Folem Fasin Blong Jeova Blong Mekem i Sem Mak
1 Jeova i kea long ol man. Hem i akseptem eniman we i wantem mekem wok blong hem. (Wok 10:34, 35) Taem Jisas i prij long ol man, hem i stap mekem i sem mak tu long olgeta man. (Luk 20:21) Yumi mas folem eksampel blong tufala, olsem Pol i bin mekem, we i raetem se: “God ya, hem i Hae God, i Masta blong olgeta man evriwan, mo hem i stap mekem i gud tumas long olgeta we oli stap singaot long hem.”—Rom. 10:12.
2 Wok ya blong talemaot gud nius blong Kingdom blong God long olgeta man, i givim “glori long God.” Yumi mas gohed blong serem nambawan mesej ya wetem olgeta man, nomata se oli blong wanem laen, fasin blong laef, edukesen, mo nating se oli rij no oli pua. (Rom. 10:11-13) Samting ya i minim se yumi mas prij long evriwan we bambae i rere blong lesin—man, woman, yangfala mo olfala. Yumi mas kilkilim evri doa, blong givim jans long wanwan man long haos, blong harem trutok.
3 Soem Intres Long Evriwan: Mak blong yumi i blong toktok long evri man we yumi save kasem. Wetem tingting ya, sam pablisa oli kasem gudfala frut taem oli prij long ol man, long ol ofis blong dokta, long hospital, long haos blong lukaot ol olfala, ol ofis, mo ol ples we oli lukaot long man we i gat trabol. Mo tu, sam pablisa oli prij long man we i wok blong berem dedman, ol hed masta blong skul, ol man we oli givim advaes long ol pikinini, mo ol jaj. Taem yumi toktok long ol hed masta, i stret we yumi talem tangkiu, from ol gudfala wok we oli mekem, blong givhan long ol man. Yumi mas gat respek, mo jusum sam atikol we i laenap wetem wok blong olgeta, mo ol problem we maet oli kasem taem oli mekem wok ya.
4 Wan taem, wan sista i mekem plan blong toktok long wan jaj long ofis blong hem. Afta we tufala i storeyan gud, jaj ya, hem wan i talem tok ya se: “?Yu yu save wanem samting we mi laekem long ol Witnes blong Jeova? Oli gat ol nambawan rul we oli traehad oltaem blong folem.” Sista ya i bin givim wan gudfala witnes, long hae man ya.
5 Yumi no save ridim samting we i stap long hat blong ol man. Be, taem yumi toktok long evri man we yumi mitim, yumi soem se yumi bilif we God i naf blong lidim wok ya blong yumi. Mo tu, samting ya i givim jans long ol man blong harem mo obei long mesej we i givim hop. (1 Tim. 2:3, 4) Yumi mas yusum taem blong yumi long waes fasin mo traehad blong folem fasin ya we Jeova i gat blong mekem i sem mak long olgeta man, taem yumi kasem olgeta man, wetem gud nius.—Rom. 2:11; Efes. 5:1, 2.