Soem Intres Long Ol Man—Yumi Prij Long Enikaen Man
1 Long wan vison, aposol Jon i luk wan enjel i flae antap long skae mo i stap talemaot gud nius ya we i blong stap oltaem nomo. Hem i talemaot gud nius ya long ol man we oli kamaot long “evri kala, mo kantri, mo laen, mo lanwis.” (Rev. 14:6) ?Olsem wanem? ?Yumi stap folem eksampol blong enjel ya? ?Yumi stap prij long enikaen man? Maet yumi no luksave, be long tingting blong yumi, yumi agensem sam laen blong man. Tingting we yumi gat long ol man i save gat paoa long wei we yumi talemaot gud nius long olgeta. Taswe, taem yumi prij long ol man we oli blong defdefren kantri, yumi mas soemaot se yumi rili laekem olgeta mo se yumi intres long olgeta.
2 Tingbaot Ples Blong Yu: ?Long ples blong yu, i gat sam man blong narafala kantri no sam refuji? I isi nomo blong yu no tingbaot ol man olsem. Yu mas go lukaot olgeta mo traem savegud olgeta. ?Wanem samting we oli nidim mo wanem ol wari blong olgeta? ?Wanem samting we oli laekem mo oli no laekem? ?Oli fraet long wanem samting mo wanem ol tingting agens we oli gat? Taem yu talemaot Kingdom, yu mas traehad blong jenisim toktok blong yu blong mekem i stret long olgeta. (1 Kor. 9:19-23) Olsem aposol Pol, yumi mas harem se hemia wok blong yumi blong talemaot gud nius long evri man we oli stap long ples blong yumi, wetem olgeta ya tu we oli blong defren kantri, we kastom blong olgeta i defren, we oli toktok defren lanwis, mo we oli rij.—Rom. 1:14, NW, futnot.
3 ?Be olsem wanem yu save prij long wan man we i toktok defren lanwis? Yu mas yusum buklet ya Good News for People of All Nations. Yu save karem sam traket no sam buklet long lanwis we ol man long ples blong yufala oli toktok long hem. (Lukluk Kingdom Wok Blong Yumi blong Julae 2003, pej 6, haf. 2-3.) Mo tu, sam pablisa oli traehad blong lanem blong talem halo long wan narafala lanwis, mo talem wan isi toktok blong serem gud nius. Plante man oli sapraes taem oli harem wan man we i traem blong toktok long olgeta long lanwis blong olgeta, nating sipos man ya i no savegud lanwis ya yet. Hemia i save pulum olgeta blong oli lesin long gud nius.
4 Folem Fasin Blong Jeova: Taem yumi traehad blong kasem ol man we oli kamaot long defdefren kantri, yumi stap folem fasin blong God blong yumi Jeova, we i stap mekem i sem mak long olgeta man. “God ya, hem i wantem sevem olgeta man, mo i wantem we olgeta man bambae oli save trutok blong hem.”—1 Tim. 2:3, 4.