Soem Intres Long Man—Taem Yumi Gat Kaen Fasin Mo Respek
1 Jeova i Hae King blong heven mo wol. Nating se i olsem, be hem i mekem gudfala fasin long ol sinman, hem i kaen, i tingbaot olgeta, mo i soem respek long olgeta. (Jen. 13:14, NW; 19:18-21, 29) Taem yumi talemaot gud nius, yumi flasem toktok blong yumi sipos yumi folem gudfala fasin blong God. (Kol. 4:6) I no naf blong gat respek mo gudfala fasin long ol toktok blong yumi nomo, be yumi mas mekem moa.
2 Long Ol Haos Wanwan: ?Bambae yumi mekem wanem sipos yumi prij nao yumi faenem wan man long taem we i no stret long hem, no long taem we hem i bisi tumas mo i no save toktok long yumi? Yumi mas luksave se long taem olsem i no stret blong toktok longtaem. Yumi mas traem blong toktok smoltaem nomo, no yumi save talem se bambae yumi kambak long wan narafala taem. Mo tu, yumi soemaot kaen fasin taem yumi no fosem ol man blong oli karem ol buk mo magasin sipos oli no wantem. Sipos yumi tingbaot ol narafala, hemia bambae i pusum yumi blong soem respek long ol samting blong olgeta, olsem yumi satem get no doa afta we yumi kamaot, mo yumi trenem ol pikinini blong yumi blong mekem sem mak. Taem yumi lego traket no magasin long ol haos we i no gat man long olgeta, yumi mas meksua se ol man we oli pas long rod oli no save luk traket no magasin ya. Yes, kaen fasin mo respek bambae i pulum yumi blong mekem long ol narafala olsem we yumi wantem oli mekem long yumi.—Luk 6:31.
3 Prij Long Rod: Taem yumi stap prij long rod, yumi soemaot kaen fasin mo respek sipos yumi no blokem rod blong ol man mo sipos yumi no hivap long fored blong ol stoa. Yumi mas tingbaot ol narafala, yumi traem toktok long olgeta we oli gat smol taem blong storian, be i no olgeta we yumi luksave se oli no gat taem mo oli hareap. From ol noes long rod, maet sam taem i nidim blong yumi toktok strong. Be yumi mas mekem olsem wetem respek, yumi no mas pulum ol narafala blong lukluk yumi.—Mat. 12:19.
4 Taem Yumi Yusum Telefon Blong Prij: Sipos yumi tingbaot ol narafala, hemia bambae i pusum yumi blong toktok long wan ples we i kwaet taem yumi prij long telefon. Yumi soemaot respek sipos yumi kwik blong talemaot se yumi hu mo eksplenem risen from wanem yumi ring. Taem yumi yusum telefon, yumi mas toktok i go stret long telefon, mo yumi toktok wetem voes we i kaen mo we man i glad blong lesin long hem. Hemia bambae i givhan blong pulum ol narafala blong storiangud long saed blong Baebol. (1 Kor. 14:8, 9) Taem yumi kaen, mo yumi tingbaot ol narafala, mo yumi soemaot respek long ol defren rod, yumi folem fasin blong God blong yumi, Jeova.