Givhan Long Ol Narafala Blong Oli Kam Fren Blong God
1 Tede, ol man long olgeta kantri long wol oli kasem tijing long saed blong ol rod blong Jeova. (Aes. 2:2, 3) Be, blong olgeta ya “oli mekem tingting blong olgeta i longfala, nao oli gat frut blong tok ya long laef blong olgeta,” oli mas lavem Jeova. (Luk 8:15; Mak 12:30) Sipos oli no lavem Jeova, bambae oli no save stanap strong agens long ol nogud fasin, mo bambae oli no save gat strong tingting blong mekem samting we i stret. Wan rod blong givhan long ol narafala blong oli frengud wetem Jeova, hemia blong halpem olgeta blong oli lavem moa ol gudfala fasin blong Hem. Leftemap tingting blong olgeta blong tingting dip long ol save long buk ya Draw Close to Jehovah.
2 Eksampol Blong Yu: Samting we yu yu mekem i save gat bigfala paoa long hat blong ol Baebol studen. Taem oli luk se yu yu tinghae long fasin fren blong yu wetem Jeova, mo oli luk olsem wanem fasin fren ya i gat paoa long laef blong yu, samting ya i save pulum olgeta, blong olgeta tu oli wantem frengud wetem Hem. (Luk 6:40) Yes, plante taem eksampol blong yumi i gat bigfala paoa long ol narafala i bitim toktok blong yumi.
3 Wan impoten rod blong ol papa mama oli save tijim ol pikinini blong olgeta blong lavem Jeova, hemia tru long eksampol blong olgeta. (Dut. 6:4-9) Wan hasban mo waef, we tufala i wantem tijim ol pikinini blong tufala long ol rod blong trutok, tufala i askem advaes long sam narafala papa mama we oli karem gudfala frut long wok ya. Hasban ya i talem se: “Evri papa mama we mi toktok long olgeta, oli talem se samting we i impoten hemia eksampol blong papa mama.” Taswe, fasin blong laef blong ol papa mama i save stap olsem wan gudfala eksampol blong ol pikinini. Long rod ya, ol pikinini oli save kasem save se i minim wanem blong kam wan “fren blong God.”—Jem. 2:23.
4 Prea We i Kamaot Long Hat: Yu save givhan long ol narafala tu blong oli kam fren blong Jeova, taem yu tijim olgeta blong prea wetem fulhat blong olgeta. Maet yu soemaot long olgeta sam prea we oli stap long Baebol, olsem prea ya we Jisas i tijim ol disaepol blong hem long hem, wetem sam narafala prea we oli dip. (Mat. 6:9, 10) Ol pikinini mo ol Baebol studen blong yu oli save lanem olsem wanem blong prea, taem oli lesin long ol prea we yu yu mekem. Sipos oli harem prea we yu mekem wetem fulhat blong yu, bambae oli harem save filing we yu yu gat long Jeova. Taem oli fesem traem, leftemap tingting blong olgeta blong oli “prea oltaem.” (Rom 12:12) Taem oli luk ol samting we Jeova i mekem blong halpem olgeta, bambae oli stat blong trastem mo lavem hem olsem wan trufala fren blong olgeta.—Sam 34:8; Fil. 4:6, 7.