“Mi Mi No Intres”
1 Hemia toktok we sam man oli talem taem yumi prij long olgeta. ?Wanem bambae i givhan long yumi blong no harem nogud taem yumi luk se plante man long ples blong yumi oli no intres? ?Olsem wanem yumi save pulum tingting blong olgeta blong oli intres long gud nius?
2 Holemtaet Glad: Sipos yumi tingbaot from wanem plante oli no intres, hemia bambae i givhan long yumi blong holemtaet glad blong yumi. Sam man oli kasem tijing ya se evri samting i kamaot from laki nomo, no oli gruap long medel blong ol man we oli no bilif se i gat wan God i stap. Ol man olsem oli no save se ol tijing blong Baebol oli gud. Sam narafala oli harem nogud taem oli luk fasin tu fes blong ol man blong jos. Samfala oli no intres from oli harem nogud long sam samting long laef blong olgeta mo oli no save rod blong kamaot long ol trabol ya. (Efes. 2:12) Sam narafala oli “no wantem lesin” from ol wari blong laef i mekem tingting blong olgeta i foldaon.—Mat. 24:37-39, NW.
3 Nating se sam man oli no wantem lesin long yumi, yumi save glad yet long wok blong prij, from yumi save se traehad blong yumi i leftemap nem blong Jeova. (1 Pita 4:11) Mo tu, taem yumi tokbaot trutok long ol man, wetem olgeta ya tu we oli no luksave yet se trutok ya i gud, yumi stap mekem bilif blong yumi i strong. Yumi mas traehad blong luk ol man long ples blong yumi olsem we Jeova i luk olgeta. Hem i sore long ol man Nineve we oli “no save nating se raet han blong olgeta i defren long lef han.” (Jona 4:11, NW ) !Ol man we oli stap long ples blong yumi oli nidim gud nius! Taswe, yumi no mas lego olgeta. Yumi mas lukaotem rod blong mekem se oli intres long ol tok blong Baebol.
4 Tokbaot Ol Samting We Oli Wari Long Hem: Maet long fastok blong yu, yu save tokbaot wan samting we ol man ples blong yu oli stap wari long hem, mo askem blong man blong haos i talem tingting blong hem long saed ya. Lesingud taem hem i toktok, mo biaen, soem ol gudfala tok blong Baebol we oli stret long wari blong hem. Afta we aksiden i kamaot long wan taon, wan Witnes i talemaot sore blong hem long evri man we hem i prij long olgeta. Hem i talem se: “Wantaem nomo ol man oli stat toktok. Long dei ya, mi storiangud wetem plante man from we mi soem se mi intres long wan samting we i kamaot long laef blong olgeta.”
5 Kingdom blong God bambae i stretem evri trabol we ol man oli stap fesem. Traem luksave wanem trabol i mekem man blong haos i wari. Maet hem i glad we yu yu eksplenem ol gudfala promes blong Baebol. Be sipos hem i no letem yu, maet bambae hem i glad blong lesin “long wan narafala taem bakegen.”—Wok 17:32, NW.