eksplenem long hem from wanem yumi ‘harem nogud long tingting blong yumi,’ yumi save tokbaot ol trabol we yumi stap fesem. Taem yumi tingbaot se Jeova i kasem save long ol trabol blong yumi mo hem i kea long yumi, samting ya i save mekem yumi haremgud long tingting blong yumi. Toktok blong aposol Pita i mekem yumi sua long samting ya, hem i se: “Yufala i mas putum ol trabol blong yufala long han blong hem, from we oltaem hem i stap tingbaot yufala.” (1 Pita 5:7) Jeova i wantem tumas blong save wanem i kamaot long laef blong yumi. Jisas i tokbaot fasin blong Jeova blong kea long yumi, hem i talem se: “Ol smosmol pijin ya we man i stap salem sikisti vatu long tu, be sipos Papa blong yufala i no letem, i no gat wan long olgeta we i save foldaon long graon. Yufala i luk. Ol hea blong hed blong yufala, be hem i kaontem evriwan. From samting ya, yufala i no fraet. Long fes blong hem, yufala i gud moa, i winim plante smolfala pijin ya.”—Mat. 10:29-31.

Lukluk i Go Long Jeova Blong Kasem Help

7. ?Yumi save sua long wanem help?

⁷ Yumi save sua fulwan se Jeova i wantem halpem yumi mo hem i naf blong halpem yumi long taem blong trabol. “God, hem i sefples blong yumi, hem i paoa blong yumi. Oltaem, hem i rere blong givhan long yumi long taem blong trabol.” (Sam 34:15-18; 46:1) ?Olsem wanem Jeova i stap givhan long yumi? Tingbaot wanem we 1 Korin 10:13 i talem, hem i se: “God i stap holem promes blong hem, mo hem i no save letem wan samting i traem yumi, we i strong tumas long yumi. Be stret long taem ya we samting olsem i traem yumi, hem bambae i mekem rod blong yumi, blong yumi winim samting ya.” Jeova i save gat paoa long ol samting we oli hapen long laef blong yumi mo i save karemaot trabol ya we i kasem yumi, no maet hem i givim paoa long yumi blong mekem se yumi naf blong stanap strong gogo yumi winim traem ya. Yes, nomata wanem rod we Jeova i jusum, yumi save sua se hem bambae i halpem yumi.

8. ?Wanem samting yumi mas mekem blong kasem help blong Jeova?

⁸ ?Wanem samting yumi mas mekem blong kasem help ya blong Jeova? Tingbaot advaes ya we yumi kasem, se: “Putum ol trabol blong yufala long han blong hem.” I olsem we yumi givim ol trabol blong yumi i go long Jeova, blong hem nao i lukaot long ol wari mo trabol ya. Ale, yumi stop blong wari mo wetem longfala tingting yumi trastem Jeova blong hem i givim samting we yumi nidim. (Mat. 6:25-32) Blong trastem Jeova olsem, yumi mas gat tingting daon blong no dipen long paoa mo waes blong yumi. Taem yumi putum yumi i stap daon ‘aninit long han blong God,’ yumi soemaot se yumi luksave se paoa blong yumi i smol nomo. (Ridim 1 Pita 5:6.) Ale samting ya i mekem se yumi naf blong fesem eni traem we God i letem i kasem yumi. I tru se maet samtaem yumi wantem tumas se trabol blong yumi i finis naoia nomo, be yumi sua se Jeova i save stret taem mo stret samting blong mekem blong givhan long yumi.—Sam 54:7; Aes. 41:10.

9. ?Deved i mas putum wanem trabol long Jeova?

⁹ Tingbaot toktok blong Deved we i stap long Sam 55:22, i se: “Yufala i mas putum ol trabol blong yufala long Hae God, nao hem bambae i blokem yufala, i sevem yufala. Hem i no save letem stret man i lus.” Taem Deved i raetemdaon ol tok ya, hem i stap harem nogud tumas. (Sam 55:4) Yumi kasem save se Deved i raetem Sam ya taem pikinini blong hem Absalom i stap plan blong agensem hem blong tekem ples blong hem olsem king. Ahitofel we i man blong givim advaes long King, hem i man we Deved i trastem moa i bitim ol narafala we oli givim advaes, be hem tu i joen long plan ya. Ale Deved i mas aot long Jerusalem, hem i mas ronwe blong ol man oli no kilim hem i ded. (2 Saml. 15:12-14) Nating se Deved i fesem ol hadtaem ya, hem i gohed blong trastem God, mo hem i no letem tingting blong hem i foldaon.

10. ?Yumi mas mekem wanem taem trabol i kasem yumi?

¹⁰ I impoten tumas we yumi mekem olsem Deved, yumi prea long Jeova long saed blong eni trabol we i kasem yumi. I gud we yumi tingbaot advaes we aposol Pol i talem long saed ya. (Ridim Filipae 4:6, 7.) ?Wanem bambae i kamaot sipos yumi prea strong long God olsem? “Pis we [God] i givim, we i bigfala moa, i bitim save blong yumi, bambae hem i putum long tingting blong [yumi], blong lukaot gud long [yumi] ya we i joen long Jisas Kraes.”

11. ?Olsem wanem ‘pis we God i givim’ i protektem hat mo tingting blong yumi?

¹¹ ?Olsem wanem? ?Taem yu yu prea long God, samting ya i save givhan blong mekem se trabol blong yu i finis? Maet i save mekem olsem. Be, yumi mas save se i no oltaem we Jeova i ansarem prea blong yumi long rod we yumi wantem. Nating se i olsem, prea i halpem yumi blong holem stret tingting long saed blong trabol we yumi fesem mo blong yumi no harem nogud bitim mak long tingting blong yumi. Taem yumi harem se trabol i hevi tumas, ‘pis we God i givim’ i save mekem tingting mo filing blong yumi i kwaet. Olsem ol soldia blong ami we oli protektem wan taon blong ol enemi oli no save winim hem, ‘pis we God i givim’ i protektem hat mo tingting blong yumi. Hem i givhan tu blong yumi winim ol wari, fraet mo ol nogud tingting, mo i blokem yumi blong no tekem wan desisen hareap mo mekem samting we i no waes.—Sam 145:18.

12. Yusum pijatok blong eksplenem olsem wanem man i save gat pis long tingting blong hem.

¹² ?Olsem wanem yumi save gat pis long tingting blong yumi taem trabol i kasem yumi? Tingbaot pijatok ya we i save givhan long yumi blong kasem save long samting ya. Wan kampani i gat wan bos we i stap tok nogud long ol man blong wok. Be taem masta blong kampani i kam blong jekemap kampani blong hem, wan man we i wok long kampani ya i gat janis blong talemaot filing blong hem long masta. Masta ya hem i wan kaen man mo i no mekem i strong long narafala. Ale, hem i kasem save long filing blong man ya mo hem i talemaot long man ya se i no longtaem bambae hem i sakemaot bos ya. ?Naoia man blong wok i harem olsem wanem? From we hem i trastem toktok blong masta ya mo i save wanem bambae i hapen i no longtaem, tingting blong hem i strong se bambae hem i gohed blong wok long kampani ya, nating se blong smol taem bambae hem i fesem hadtaem wetem nogud toktok blong bos ya. Long sem fasin, yumi sua se Jeova i kasem save long ol trabol we yumi fesem, mo hem i promes se i no longtaem nao bambae hem i “brekem paoa blong Setan, we i stap rulum wol ya.” (Jon 12:31) !Yes, save ya i leftemap tingting blong yumi bigwan!

13. ?Taem yumi prea finis, yumi mas mekem wanem narafala samting?

¹³ ?Olsem wanem? ?Sipos yumi prea long Jeova blong talemaot ol trabol blong yumi long hem, hemia nomo i naf? Nogat. Yumi mas mekem sam moa samting bakegen. Yumi mas tekem aksen blong wok folem ol prea blong yumi. Taem King Sol i sanem ol man blong hem long haos blong Deved blong kilim Deved i ded, Deved i prea se: “God blong mi. Plis yu sevem mi, blong ol enemi blong mi oli no spolem mi. Sipos oli kam blong faet long mi, plis yu blokem mi. Olgeta ya oli man nogud, oli man blong kilim man. Plis yu tekemaot mi long han blong olgeta, yu sevem mi.” (Sam 59:1, 2) Deved i prea finis, ale hem i lesin long samting we waef blong hem i talem mo i tekem aksen blong ronwe. (1 Saml. 19:11, 12) Long sem fasin, yumi save prea blong gat waes ya we bambae i halpem yumi blong save wanem blong mekem taem yumi kasem hadtaem, mo maet waes ya i save halpem yumi tu blong faenem rod blong mekem we hadtaem ya i no hevi tumas.—Jem. 1:5.

?Olsem Wanem Yumi Save Gat Paoa Blong Stanap Strong Longtaem?

14. ?Wanem i save givhan long yumi blong stanap strong taem yumi fesem trabol?

¹⁴ Maet bambae ol trabol blong yumi oli no finis wantaem nomo. Maet oli gohed blong longtaem lelebet. ?Sipos i olsem, wanem sam samting we i save givhan long yumi blong stanap strong? Faswan samting, hemia blong tingbaot se taem yumi gohed blong mekem wok blong Jeova nomata wanem trabol i kasem yumi, yumi pruvum lav we yumi gat long Jeova. (Wok 14:22) Tingbaot oltaem toktok we Setan i sakem long saed blong Job se: “Hem i stap mekem wosip long yu from we yu yu stap givhan gud long hem. Oltaem yu stap lukaot gud long hem wetem ol pikinini blong hem mo olgeta samting blong hem, mo yu stap blokemgud olgeta. Evri samting we hem i stap mekem, be yu yu stap blesem olgeta, mo ol anamol ya we yu givim long hem, kantri ya i fulap gud long olgeta. Be sipos yu tekemaot ol samting ya, bambae hem i tok nogud long yu, stret long fes blong yu.” (Job 1:9-11) Taem Job i stap tru long Jeova hem i pruvum se toktok blong Setan i giaman. Taem yumi stanap strong long hadtaem, yumi tu yumi gat janis blong pruvum we toktok blong Setan i giaman. Ale, fasin blong yumi blong stanap strong i mekem se yumi gat moa tras long Jeova mo ol promes blong hem.—Jem. 1:4.

15. ?Eksampol blong hu i save givim paoa long yu?

¹⁵ Seken samting, hemia blong tingbaot oltaem we “long evri ples long wol, ol brata blong yumi oli stap kasem trabol from nem blong Jisas, stret olsem we yufala i stap kasem.” (1 Pita 5:9) Yes, “ol samting ya we oli stap traem yumi, oli sem mak nomo long ol samting we oli stap traem ol narafala man.” (1 Kor. 10:13) Taswe, bitim we yu tingbaot ol trabol we yu yu fesem, i moa gud blong tingting dip long eksampol we narafala i soemaot, mo long rod ya yu save kasem paoa mo mekem tingting blong yu i strong. (1 Tes. 1:5-7; Hib. 12:1) Tekem taem blong tingbaot eksampol blong ol brata sista we yu yu savegud se oli bin stanap strong nating se oli kasem ol bigfala trabol. ?Olsem wanem? ?Samtaem yu bin lukaotem ol laef stori long ol buk mo magasin blong traem faenem stori blong ol brata sista we oli kasem semfala traem olsem yu? Maet bambae yu faenem se ol stori ya oli save givim bigfala paoa long yu.

16. ?Olsem wanem God i givim paoa long yumi taem yumi fesem ol defdefren traem?

¹⁶ Namba tri samting, hemia blong tingbaot we Jeova hem i wan ‘Papa we i gat sore, hem i God we i stamba blong fasin blong givhan. Hem i stap givhan long yumi long olgeta trabol blong yumi, blong mekem yumi harem gud. Nao taem ol narafala man oli gat trabol [“enikaen trabol,” NW], yumi save givhan long olgeta, blong mekem olgeta oli harem gud long sem fasin, from we God i givhan finis long yumi.’ (2 Kor. 1:3, 4) I olsem se God i stap stanap long saed blong yumi blong leftemap tingting blong yumi mo blong givim paoa long yumi blong stanap strong long trabol we yumi stap kasem naoia mo long “olgeta trabol blong yumi.” Samting ya i mekem se yumi naf blong givhan long narafala taem oli kasem “enikaen trabol.” Pol i luksave se ol tok ya oli tru tumas long laef blong hem.—2 Kor. 4:8, 9; 11:23-27.

17. ?Olsem wanem Baebol i save halpem yumi blong winim ol trabol we yumi kasem long laef?

¹⁷ Namba fo samting, yumi gat Tok blong God, Baebol, we hem i “stretgud blong tijim yumi long ol trutok, mo blong blokem ol krangke tok. Mo i stret gud blong stretem ol krangke fasin, mo blong tijim yumi long ol stret fasin. Ol tok ya, God i givim blong bambae yumi ol man blong hem yumi save kam waes long olgeta samting, nao bambae yumi savegud ol rod blong mekem ol gudfala wok.” (2 Tim. 3:16, 17) Tok blong God i mekem se yumi kam “waes” mo yumi ‘savegud rod blong mekem ol gudfala wok.’ Be i no hemia nomo. Hem i mekem se yumi naf blong winim ol trabol long laef tu. Yes hem i mekem se yumi “waes long olgeta samting” mo yumi “savegud ol rod.” Long lanwis Grik, blong talem tok ya “savegud ol rod,” oli yusum wan tok we prapa mining blong hem se “i gat evri samting we hem i nidim.” Long taem bifo, maet oli yusum tok ya blong tokbaot wan sip we i gat evri samting we hem i nidim blong go long wan trip. No maet oli yusum blong tokbaot wan mesin we i naf blong mekem wok ya we oli wokem hem blong mekem. Long sem fasin, long Baebol, Jeova i putum evri samting we yumi nidim blong mekem yumi naf blong stap tru long hem nomata wanem traem yumi fesem. Taswe, yumi save talem se, “Sipos God i letem traem ya i kasem mi, wetem help blong Hem mi mi naf blong winim traem ya.”

Bambae Jeova i Tekemaot Yumi Long Olgeta Trabol

18. ?Wanem narafala samting we bambae i givhan long yumi blong holemstrong long bilif blong yumi?

¹⁸ Namba faef samting, hemia se oltaem yumi mas tingbaot se i no longtaem nao bambae Jeova i mekem ol man oli fri long olgeta trabol we oli kasem. (Sam 34:19; 37:9-11; 2 Pita 2:9) God bambae i tekemaot yumi long ol trabol we yumi fesem naoia, be i no hemia nomo. God i givim janis long yumi blong kasem laef we i no save finis, maet long heven wetem Jisas no long wan paradaes long wol.

19. ?Olsem wanem yumi save holemstrong long bilif blong yumi?

¹⁹ Bambae yumi gohed blong kasem ol trabol blong rabis wol ya go kasem taem ya we bambae Jeova i tekemaot yumi long ol trabol. !Tru ya yumi wantem tumas blong stap long taem ya we bambae olgeta trabol evriwan oli finis! (Sam 55:6-8) Tingbaot se taem yumi holemstrong long bilif blong yumi, yumi pruvum se toktok blong Setan i giaman. Yumi save kasem paoa taem yumi prea mo taem yumi tingbaot ol brata sista blong yumi we oli stap fesem ol semfala traem olsem yumi. Yumi mas gohed blong yusumgud Baebol, mo long rod ya bambae yumi gohed blong kam waes long olgeta samting mo bambae yumi savegud ol rod blong mekem gudfala wok. God i stamba blong fasin blong givhan mo bambae hem i keagud long yumi wetem lav. I nogud yumi no moa trastem hem. Oltaem yumi mas tingbaot se “Hae God i stap lukluk long ol stret man, i stap lesin blong harem krae blong olgeta.”—Sam 34:15.

?“I Gat Sam Long Yufala We Oli Waes, Mo Oli Gat Save”?

“Sipos i gat sam long yufala we oli waes, mo oli gat save, i gud oli soemaot samting ya long laef blong olgeta. Oli mas mekem ol gudfala wok, long fasin we tingting blong olgeta i stap daon, mo we oli waes.”—JEM. 3:13.

1, 2. ?Yumi save talem wanem long saed blong plante man we oli ting se oli waes?

?HU MAN we yu yu ting se i waes? ?Maet papa mama blong yu, wan olfala man, no wan tija blong yunivesiti? Tingting blong yu long saed blong man we i waes i save dipen long laef we yu gruap long hem mo laef blong yu naoia. Be ol man we oli mekem wok blong God, oli intres blong save wanem samting i mekem man i waes long tingting blong God.

² Wol ya i leftemap plante man se oli waes, be long lukluk blong God i no olgeta ya we oli waes. Tingbaot ol man ya we Job i toktok wetem olgeta. Long lukluk blong ol man ya oli ting se toktok blong olgeta i waes, be Job i talem se: “Mi mi save talem se i no gat wan long olgeta nating we i waes.” (Job 17:10) Long wan leta blong Aposol Pol hem i tokbaot sam man we oli no wantem save blong God, hem i se: “Oli stap talem se oli waes, be oli krangke nomo.” (Rom 1:22) Mo Jeova hemwan i tok klia long saed ya, hem i yusum profet Aesea blong talemaot toktok ya blong hem, i se: ‘!Yufala ya we i ting se yufala i waes, sore tumas long yufala!’—Aes. 5:21.

3, 4. ?Man we i gat trufala waes i mekem wanem?

³ I klia we yumi nidim blong faenemaot wanem samting i mekem man i gat trufala waes we biaen God nao i glad long hem. Long Ol Proveb 9:10 (NW) yumi faenem moa save, hem i talem se: “Sipos yu wantem kam waes, oraet, fastaem yu yu mas fraetgud long Jeova. Mo sipos yu kasem save long God we i Tabu Tumas, hemia nao yu gat dip save.” Man we i waes i mas gat gudfala fraet ya long God mo hem i mas tinghae long ol rul we God i stanemap. Be i no naf blong agri nomo se God i stap mo blong save se i gat sam rul we hem i stanemap, yumi nidim blong mekem moa. Disaepol Jemes i pulum yumi blong tingting moa long samting ya. (Ridim Jemes 3:13.) Makem toktok we hem i talem, i se: “I gud oli soemaot samting ya long laef blong olgeta. Oli mas mekem ol gudfala wok.” Evri dei, samting we yu mekem mo toktok blong yu i mas soemaot se yu gat trufala waes.

⁴ Man we i gat trufala waes i mekem ol gudfala desisen mo hem i yusumgud save mo fasin luksave we hem i gat. ?Wanem samting we yumi save mekem blong soemaot se yumi gat trufala waes ya? Jemes i talem sam samting we bambae ol man oli mekem sipos oli waes.a ?Hem i givim wanem advaes we i save givhan long yumi blong joengud wetem ol Kristin brata sista, mo wetem ol narafala man afsaed long kongregesen?

Aksen Blong Man i Soemaot Sipos Hem i Gat Trufala Waes

5. ?Fasin blong man we i gat trufala waes, i olsem wanem?

⁵ Olsem yumi tokbaot finis, Jemes i talem se waes i joen wetem ol gudfala wok. Wan man we i waes bambae i traehad blong mekem samting we i laenap wetem ol fasin blong God mo ol rul blong hem from we hem i fraetgud long Jeova, hemia nao fasin we i soemaot se man i stat blong kam waes. Yumi no bon wetem waes ya blong God. Be sipos oltaem yumi stadi long Baebol mo tingting dip long hem, yumi save kasem waes ya. Bambae tufala samting ya i halpem yumi blong mekem olsem Efesas 5:1 i talem, hem i se: “Yufala i mas traehad blong folem fasin blong [God].” Moa we yumi traehad blong folem fasin blong God, moa we bambae yumi soemaot se yumi waes long ol aksen blong yumi. Ol fasin blong Jeova oli hae moa long fasin blong ol man. (Aes. 55:8, 9) Taswe, taem yumi traehad blong folem fasin blong