Oli Mekem Samting We Jeova i Wantem

Wan Presen Blong Sapotem Trufala Wosip

OL MAN Isrel oli luk, wetem prapa ae blong olgeta, paoa we Jeova i gat blong sevem man. Oli luk solwota blong Red Si i seraot long tu haf, mekem se oli save gokros long drae graon nomo, mo ronwe long ami blong ol man Ijip. Taem oli stap sefgud long narafala saed, oli luk bigfala wota ya i sat bakegen, mo i draonem ol enemi blong olgeta. !Jeova i sevem laef blong olgeta!​—Eksodas 14:21-​31.

Be sore tumas, sam long ol man Isrel oli ting nating long aksin we God i bin mekem blong sevem olgeta. Long taem ya we Moses i stap antap long Bigfala Hil blong Sinae, ol man Isrel oli givim ol gol jen blong olgeta i go long Eron, mo oli askem hem blong wokem wan aedol blong oli wosip long hem. !Taem Moses i kambak, hem i faenem ol stronghed man Isrel ya oli stap kakae, dring, danis, mo bodaon long fored blong wan buluk we oli wokem long gol! Folem oda blong Jeova, 3,000 man mo woman​—maet hemia olgeta we oli stamba blong nogud fasin ya​—oli kasem panis blong ded. Long dei ya, ol man blong God oli lanem wan impoten lesen long fasin blong mekem wosip i go long Jeova nomo.​—Eksodas 32:​1-6, 19-​29.

I no longtaem afta long trabol ya, Moses i rere blong obei long oda blong God blong bildim wan haos tapolen, no wan haos wosip we oli save karem i go wetem olgeta. Blong bildim haos tapolen ya i nidim ol samting we oli sas mo i nidim ol man we oli gat gudhan blong wok. ?Bambae oli kasem ol samting ya olsem wanem? ?Mo yumi save lanem wanem long stori ya blong Baebol?

Oli Givim Presen

Tru long Moses, Jeova i askem long ol man Isrel se: “Tekem ol samting blong wokem Haos Tapolen blong hem long hem, yumi givim i go long hem. Man we tingting blong hem i glad blong givim sam samting.” ?Wanem kaen samting? Long lis blong ol samting we Moses i askem, i gat gol, silva, bras, tred, ol beswan kaliko, ol skin blong anamol, wud, mo ol sas ston.​—Eksodas 35:​5-9.

Ol man Isrel oli gat i naf samting blong givim olgeta presen ya wetem gladhat. Rimemba se, taem ol man Isrel oli aot long kantri blong Ijip, oli karem plante samting i go wetem olgeta. Ol samting ya oli wokem long gol mo silva, mo i gat ol gudfala klos. Yes, “oli karem plante gudgudfala samting tu, we ol man Ijip oli givim long olgeta.”a (Eksodas 12:35, 36) Bifo, ol man Isrel oli rere blong givim ol gol jen blong olgeta blong wokem wan aedol blong giaman wosip. Be naoia, ?bambae oli rere blong mekem wan presen blong sapotem trufala wosip?

Makem se Moses i no putum sam rul long saed blong hamas presen we evriwan i mas givim. Mo tu, hem i no mekem tingting blong olgeta i stikim olgeta no mekem olgeta oli sem blong pusum olgeta blong givim presen. No gat. Moses i talem nomo se “man we tingting blong hem i glad blong givim.” Moses i no nid blong fosem ol man blong God. Hem i sua se evriwan bambae oli rere blong givim ol samting we oli gat.​—Skelem wetem 2 Korin 8:​10-​12.

Be, blong bildimap Haos Tapolen i no nidim ol presen ya nomo. Jeova i askem wan narafala samting long ol man Isrel. “I gud olgeta man blong yumi we oli gat gudhan oli kam blong wokem ol samting ya we Hae God i talem se bambae yumi mas wokem.” Blong bildimap Haos Tapolen ya i nidim ol man blong wok we oli gat gudhan. Yes, blong finisim wok ya, i nidim evri man “we i gat gudhan blong mekem plante gudfala wok”​—olsem ol kapenta, ol man blong wokem aean, mo olgeta we oli wok long ol sas ston. I sua se, Jeova nao bambae i lidim ol man blong oli gat gudhan blong wok. Ale, ol gudfala frut we oli kamaot from ol wok ya bambae oli save givim ona long God nomo.​—Eksodas 35:​10, 30-​35; 36:​1, 2.

Ol man Isrel oli rere blong givim ol samting blong olgeta mo blong yusum gudhan blong olgeta blong mekem wok ya. Baebol i talem se: “Nao olgeta we tingting blong olgeta i glad blong givim sam samting i go long Hae God blong mekem wok ya, olgeta oli tekem ol samting ya i kam. Olgeta oli karem ol samting blong wokem Haos Tapolen ya blong Hae God, mo blong wokem ol samting blong mekem wosip long Haos Tapolen ya, mo blong wokem ol klos blong pris. Ol man mo ol woman . . . oli glad blong givim ol flas samting blong olgeta i go long Hae God.”​—Eksodas 35:21, 22.

Wan Lesen Blong Yumi

Tede bigfala wok ya blong talemaot gud nius blong Kingdom blong God i stap gohed from ol presen. Plante taem hemia ol presen mane. Samtaem, ol Kristin brata mo sista oli yusum save blong olgeta blong givhan long wok blong bildim ol Haos Kingdom, Haos Asembli, mo ol branj ofis. Mo tu, i gat wok we i stap gohed long plante handred Haos Betel raon long wol. Blong mekem ol wok ya i nidim plante defren man blong wok. !Olgeta ya we oli givim paoa blong olgeta wetem gladhat, oli save sua se Jeova bambae i no fogetem hadwok blong olgeta!​—Hibrus 6:​10.

Hemia i sem mak long haf we wanwan long yumi i gat long Kristin minista wok. Yumi evriwan i mas pemaot taem blong joen fulwan long wok blong prij. (Matiu 24:14; Efesas 5:​15-​17) Samfala oli mekem samting ya taem oli joen long wok blong fultaem paenia. From defren risen, sam narafala oli no save spenem plante taem long minista wok olsem ol paenia. Nating se i olsem, Jeova i glad long wok blong olgeta tu. Olsem ol presen we ol man Isrel oli mekem long Haos Tapolen, Jeova i no askem wan spesel praes we evriwan i mas givim. Samting we Hem i wantem, hemia se evriwan long yumi i mekem wok blong hem wetem olgeta hat, olgeta laef, olgeta tingting, mo olgeta paoa blong yumi. (Mak 12:30) Sipos yumi mekem samting ya, yumi save sua se bambae hem i blesem yumi from ol presen we yumi givim blong sapotem trufala wosip.​—Hibrus 11:⁠6.

[Futnot]