Wan Wok We i Impoten Tumas
1. ?Bigfala tangkiu we yumi gat long wok blong prij bambae i pulum yumi blong rere blong givim wanem?
1 ?From wanem yumi harem tok oltaem we i stap pulum yumi blong yusum taem, paoa, mo ol samting we yumi gat long wok blong prij? !From we wok blong prij i impoten moa i bitim ol narafala wok! Taem yumi tingbaot olsem wanem wok blong prij i givhan long plante man, samting ya bambae i pulum yumi blong wantem joen moa long wok ya. Hem i wan wok we bambae yumi no moa mekem bakegen samtaem.—Wok 20:24.
2. ?Olsem wanem wok blong prij i leftemap hae nem blong Jeova?
2 Leftemap Nem Blong Jeova: Wok blong prij i soemaot klia se Kingdom blong Jeova we Jisas Kraes i rul long hem, bambae i tekem ples blong olgeta gavman blong man. Mo bambae i finisim olgeta trabol we i stap kasem ol man long wol. (Mat. 6:9, 10) Wok ya i leftemap Jeova se hem nomo i save sevem yumi long sik mo ded. (Aes. 25:8; 33:24) From we yumi holem nem blong Jeova, ol man we oli luk ol gudfala fasin mo strong tingting blong yumi, bambae oli save leftemap nem blong hem. (1 Pita 2:12) !Yes, yumi harem gud tumas blong save go talemaot nem blong Haefala Masta Jeova long ol man long olgeta ples long wol!—Sam 83:18, NW.
3. ?Ol man we oli glad blong obei long gud nius blong Kingdom oli kasem wanem blesing?
3 Sevem Laef: Jeova “i no wantem se bambae wan man i lus. Hem i wantem blong olgeta man bambae oli tanem tingting blong olgeta from ol sin blong olgeta.” (2 Pita 3:9) ?Be sipos i no gat man i go tijim olgeta, olsem wanem bambae oli save luksave fasin we Jeova i talem se i stret mo fasin we i no stret? (Jona 4:11; Rom 10:13-15) Taem ol man oli obei long gud nius, laef blong olgeta i kam gud moa, mo oli stap lego ol fasin we oli save spolem olgeta. (Maeka 4:1-4) Antap long hemia, oli save harem gud long nambawan hop ya blong kasem laef we i no save finis. Taem yumi bisi blong prij mo tij, yumi save sevem laef blong yumi mo laef blong ol man we oli lesin long yumi. (1 Tim. 4:16) !I wan bigfala blesing blong mekem wan wok we i impoten olsem!
4. ?From wanem yumi mas bisi long wok blong talemaot Kingdom mo blong pulum ol man oli kam disaepol?
4 I no longtaem bigfala trabol bambae i finisim rabis wol ya wantaem nomo. Ol man we oli stap long saed blong Jeova bambae oli sef. Taswe, wok blong prij mo blong pulum ol man oli kam disaepol i impoten we i impoten tumas. I no gat narafala wok tede we i save givhan moa long laef blong man i bitim wok ya. !I gud yumi putum wok ya long fasples long laef blong yumi!—Mat. 6:33.