Kam Gud Moa Long Fasin Blong Tij

?YU YU stap traehad blong kam gud moa long wanem samting, blong yu save tijim gud ol man? Sipos yu jes kam wan pablisa blong Kingdom, ating yu wantem tumas blong save olsem wanem blong mekem ol Baebol stadi, from we Jisas i talem long ol man blong hem se oli mas pulum ol man oli kam disaepol. (Mat. 28:19, 20) Sipos yu yu mekem wok ya longtaem finis, maet yu stap traehad blong kasem hat blong olgeta we yu stap givhan long olgeta. Sipos yu yu wan papa no mama, ating yu wantem tij long fasin we i pulum pikinini blong yu, blong i givim laef blong hem i go long God. (3 Jon 4) Sipos yu yu wan elda no yu wantem kam wan elda, ating yu stap traehad blong givim ol tok we oli save pulum ol man blong oli laekem moa Jehova mo ol fasin blong hem. ?Yu save mekem wanem blong kam gud moa long ol samting ya?

Tingbaot eksampol blong Bigfala Tija ya, Jisas Kraes. (Luk 6:40) Nating se Jisas i toktok long wan bigfala hip blong man antap long hil no long wan smol grup blong man long rod, be ol tok we hem i talem mo fasin blong hem blong talem ol tok ya, i gat paoa long ol man. Jisas i wekemap tingting blong ol man, mo i kasem hat blong olgeta. Mo tu, hem i mekem i isi blong ol man oli kasem save long wanem we oli mas mekem blong folem ol tok blong hem long laef blong olgeta. ?Yu yu save mekem olsem?

Yu Mas Dipen Long Jehova

Jisas i wan gudfala tija from we hem i fren gud wetem Papa blong hem long heven, mo from we God i givim tabu spirit long hem. ?Olsem wanem? ?Yu yu prea long Jehova blong yu save kam naf blong mekem gud ol Baebol stadi? ?Sipos yu yu wan papa no mama, yu prea oltaem blong God i lidim yu taem yu tijim ol pikinini blong yu? ?Yu yu prea wetem fulhat blong yu taem yu stap mekemrere blong givim wan tok no lidim wan miting blong kongregesen? Taem yu prea mo yu dipen long Jehova, yu save kam gud moa long fasin blong tij.

Mo tu, yu soemaot se yu dipen long Jehova taem yu yusum Tok blong hem, Baebol. Long naet bifo we stret man ya Jisas i ded, hem i prea long Papa blong hem se: “Mi mi talemaot ol tok blong yu long olgeta.” (Jon 17:14) Jisas i gat save long plante samting. Nating se i olsem, hem i neva talem ol tok we oli kamaot long hem nomo. Oltaem hem i talem ol tok we Papa blong hem i talem long hem. Long rod ya, hem i givim wan gudfala eksampol long yumi. (Jon 12:49, 50) Tok blong God we i stap long Baebol i gat paoa long man, i save jenisim fasin mo tingting blong man. (Hib. 4:12) Taem yu kasem save moa long Tok blong God, mo yu lanem blong yusum gud save ya long wok blong prij, bambae yu stat blong tijim ol man long fasin we i pulum olgeta blong oli kam klosap long God.—2 Tim. 3:16, 17.

Yu Mas Leftemap Nem Blong Jehova

Maet yu stap mekem ol gudfala tok long miting. Be sipos yu wantem folem fasin blong Kraes blong tij, i no naf blong givim ol gudfala tok. I tru se ol man oli sapraes tumas long Jisas from we ol “tok blong hem i gud tumas.” (Luk 4:22) ?Be from wanem Jisas i toktok gud? From we hem i wantem leftemap nem blong Jehova, hem i no wantem pulum tingting blong man i kam long hem. (Jon 7:16-18) Hem i talem long ol man blong hem se: “Laef blong yufala i olsem laet, mo yufala i mas letem laet ya i saenaot i kasem ol man, blong oli save luk ol gudgudfala wok we yufala i stap mekem. Nao, bambae olgeta oli save leftemap nem blong Papa blong yufala, we i stap long heven.” (Mat. 5:16) Advaes ya i mas gat paoa long fasin blong yumi blong tij. Yumi mas blokem eni samting we i save pulum yumi i gowe long fasin ya blong leftemap nem blong Jehova. Taswe, taem yumi mekem plan blong ol tok we bambae yumi talem mo olsem wanem blong talem ol tok ya, i gud yumi tingbaot se: ‘?Tok ya bambae i pulum man blong i laekem Jehova moa, no bambae i pulum tingting blong man i kam long mi nomo?’

Olsem nao, i gud yumi yusum ol pijatok mo ol laef stori blong givim paoa long tijing blong yumi. Be taem wan pijatok i longfala tumas no yumi talem evri smosmol samting insaed long wan laef stori, bambae bigfala tijing we yumi wantem givim long ol man i no kamaot klia. Mo tu, sipos yumi talem ol stori blong mekem ol man oli laf nomo, bambae yumi pulum tingting blong olgeta i gowe long tijing we yumi wantem givim. Taem tija i mekem olsem, hem i pulum tingting blong ol man i go long hem nomo, hem i no givim tijing blong God long olgeta.

Yu Mas Givhan Long Man Blong i “Makem Ol Samting”

Sipos man i wantem kam wan prapa disaepol blong Kraes, hem i mas kasem save klia long ol tijing blong Baebol. Hem i mas harem trutok mo i mas makem wanem samting i mekem se trutok i defren long ol narafala tijing. Yu save givhan long ol man blong oli mekem olsem, sipos yu skelem ol giaman tijing wetem trutok.

Jehova i talem bakegen mo bakegen long ol man blong hem se oli mas “makem ol samting” we oli klin long fes blong hem mo ol samting we oli no klin. (Lev. 10:9-11) Hem i talem se olgeta we oli mekem semkaen wok olsem ol man we oli wok long bigfala haos blong God bifo, bambae oli tijim ol man “blong oli luksave ol samting we oli tabu, mo ol samting we oli no tabu, mo ol samting we oli klin, mo ol samting we oli no klin.” (Esik. 44:23) Buk blong Ol Proveb i fulap long ol tok we i soemaot olsem wanem stret fasin i defren long rabis fasin, mo olsem wanem man we i waes i defren long man we i no gat hed. I gat sam samting tu we maet i luk olsem se oli sem mak, be oli no sem mak. Long Rom 5:7, aposol Pol i soemaot se man we i stret i no sem mak long man we i gud. Long buk blong Hibrus, Pol i soemaot se wok blong hae pris we Kraes i mekem, i hae moa long hemia we Eron i mekem. Long ol yia 1600, wan tija we nem blong hem John Amos Comenius, i raetem se: “Taem yu tijim wan man, yu soemaot long hem wanem i mekem se wan samting i defren long wan narafala samting. Maet wan i no mekem sem wok olsem narawan, maet wan i luk defren long narawan, no i kamaot long wan stamba we i defren. . . . Taswe, man we i save eksplenem wanem i mekem se wan samting i defren long wan narafala samting, hem i wan gudfala tija.”

Maet yu yu stap tijim wan man long Kingdom blong God, nao yu luk se i had blong hem i kasem save se Kingdom i olsem wanem. Yu save soemaot se samting we Baebol i talem i defren olgeta long tingting ya se Kingdom i stap long hat blong man. No maet yu save eksplenem wanem i mekem se Kingdom i defren long ol gavman blong wol. Be sam man oli save finis ol stamba trutok ya, ale maet yu tokbaot sam moa samting bakegen. Maet yu eksplenem long olgeta wanem i mekem se Kingdom blong Mesaea i defren long rul blong Jehova antap long olgeta samting long heven mo wol, we Ol Sam 103:19 i tokbaot. Maet yu eksplenem wanem i mekem se Kingdom blong Mesaea i defren long ‘kingdom blong Pikinini ya we God i lavem tumas,’ we Kolosi 1:13 i tokbaot. No yu save eksplenem wanem i mekem se Kingdom blong Mesaea i defren long plan ya we Efesas 1:10 i tokbaot, hemia blong mekem “olgeta samting long heven mo long wol bambae oli kam joen long Kraes.” Taem yu eksplenem wanem i mekem impoten tijing ya blong Kingdom i defren long sam narafala samting, tijing ya i save kam klia moa long tingting blong man.

Jisas i yusum rod ya plante taem blong tijim ol man. Hem i soemaot se save we bighaf blong ol man oli gat long Loa blong Moses, i defren long bigfala tingting long Loa ya. (Mat. 5:21-48) Hem i soemaot klia se prapa fasin blong ona long God i defren long fasin blong ol Farisi we oli gat tu fes. (Mat. 6:1-18) Hem i soemaot se fasin blong ol man we oli “mekem i strong tumas” long narafala, i defren long ol disaepol blong hem we oli rere blong mekem wok blong ol narafala. (Mat. 20:25-28) Long wan narafala taem we Matiu 21:28-32 i tokbaot, Jisas i singaot olgeta we oli lesin long hem, blong olgeta nomo oli traem blong luksave wanem i mekem se wan man we i tanem tingting blong hem from sin i defren long wan man we i ting se hem i stret man. Poen ya i pulum yumi blong tingbaot wan narafala impoten fasin we yumi mas mekem blong yumi tijim gud man.

Yu Mas Pulum Man Blong i Yusum Tingting Blong Hem

Long Matiu 21:28, Jisas i statem toktok blong hem olsem: “Yufala i traem tingbaot.” Blong tijim gud man, i no naf blong talemaot ol save we oli tru nomo, mo blong givim ansa long evri kwestin. Nogat. Wan gudfala tija i pulum ol man blong oli yusum prapa tingting blong olgeta. (Prov. 3:21; Rom 12:1, NW) Wan rod blong mekem olsem, hemia blong askem kwestin. Yumi luk samting ya long Matiu 17:25, taem Jisas i talem se: “Saemon, yu traem tingbaot. ?Ol king blong wol ya oli stap tekem takis long hu? ?Oli stap kasem mane blong olgeta long hu? ?Long ol man blong olgeta, no long ol strenja we oli stap long ples blong olgeta?” Ol kwestin blong Jisas oli mekem tingting blong Pita i wok. Oli givhan long Pita, blong hem nomo i faenem stret ansa blong kwestin ya se hu man we i mas pem takis long haos blong God. Jisas i folem sem fasin ya taem hem i ansa long man ya we i askem se: “?Hu ol man ya we oli stap raonabaot long mi, we Loa ya i tokbaot?” Jisas i soemaot wanem i mekem se fasin blong wan pris mo wan Livaet i defren long fasin blong wan man Sameria. Biaen, hem i askem se: “?Long tingting blong yu, hu long trifala ya i mekem i gud long man ya we ol man blong stil oli kam kilim hem?” (Luk 10:29-36) Long taem ya bakegen, Jisas i no givim ansa long kwestin ya, be hem i pulum man blong i yusum prapa tingting blong hem blong faenem ansa.—Luk 7:41-43.

Yu Mas Kasem Hat Blong Man

Wan tija we i kasem save gud long Tok blong God, hem i save se i no naf we man blong mekem tru wosip i lanem baehat sam stamba tijing mo i folem sam rul long laef blong hem. Man we i mekem tru wosip i mas fren gud wetem Jehova mo i mas luksave se ol rod blong Jehova oli stret blong folem. Wosip olsem i kamaot long hat blong man. (Dut. 10:12, 13, NW; Luk 10:25-27) Plante taem, Baebol i yusum tok ya “hat” blong minim ol tingting mo fasin blong man we oli stap haed. Hemia ol samting we hem i wantem, i laekem, i harem, mo ol tingting we oli pulum hem blong i mekem ol defren samting long laef.

Jisas i save se ol man oli lukluk bodi blong man nomo, be God i lukluk wanem i stap long hat. (1 Saml. 16:7) Yumi wantem mekem wok blong God from we yumi lavem hem, be i no from we yumi wantem soem yumi long fored blong ol narafala man. (Mat. 6:5-8) Ol Farisi oli mekem plante samting blong soem olgeta. Oli strong blong folem evri smosmol samting long Loa mo ol rul we olgeta nomo oli putumap. Be oli mestem wan bigfala samting. Oli no gat ol gudfala fasin blong makemaot olgeta se oli man blong tru God. (Mat. 9:13; Luk 11:42) Jisas i tijim ol man se i impoten blong obei long wanem we God i talem. Be samting we i save mekem God i glad moa, hemia samting we i stap long hat blong man we i pusum hem blong obei. (Mat. 15:7-9; Mak 7:20-23; Jon 3:36) Bambae yumi karem gudfala frut long wok blong tijim ol man sipos yumi folem eksampol blong Jisas. Yumi mas givhan long ol man blong oli lanem wanem we God i wantem se oli mekem. Be i impoten tu we oli save gud Jehova mo oli lavem hem. Olsemia, ol fasin blong olgeta bambae oli soemaot se oli tinghae long fasin fren blong olgeta wetem tru God ya.

Tijing we yumi givim long ol man bambae i givhan long olgeta nomo sipos oli luksave samting we i stap long hat blong olgeta. Jisas i pulum ol man blong oli skelem gud tingting we i stap pusum olgeta blong mekem samting, mo tu, blong oli skelem wanem we i stap long hat blong olgeta. Taem Jisas i stretem wan rong tingting blong olgeta we oli lesin long hem, hem i askem long olgeta se, from wanem oli tingting, talem, no mekem samting olsem. Be hem i no stop long ples ya. Hem i talem sam tok, no wan pijatok, no i mekem wan samting we i givhan long ol man ya blong oli gat stret tingting. (Mak 2:8; 4:40; 8:17; Luk 6:41, 46) Long sem fasin, yumi save givhan long ol man sipos yumi talem long olgeta blong oli tingbaot se: ‘?From wanem mi mi wantem folem rod ya? ?From wanem mi mi tingting olsem?’ Nao yu tokbaot sam tingting we oli save pulum olgeta blong oli mekem samting we Jehova i wantem.

Yu Mas Pulum Man Blong i Yusum Save Ya We Hem i Kasem

Wan gudfala tija i save se ‘fasin waes i nambawan fasin blong man i kasem.’ (Prov. 4:7) Wan man we i waes, hem i naf blong yusum save we hem i gat blong winim ol trabol, mo blong stap longwe long trabol, mo blong traehad blong kam gud moa long sam samting, mo blong givhan long ol narafala. Wok blong tija i blong halpem man blong i lanem blong yusum save blong hem long ol rod ya. Be i no wok blong tija blong mekem desisen long ples blong man ya. Taem yu tokbaot ol tingting blong God long Baebol, yu mas givhan long man blong i yusum prapa tingting blong hem. Maet yu tokbaot wan samting we i hapen long laef blong yumi evri dei. Nao yu askem long hem se: ‘?Sipos samting ya i hapen long laef blong yu, tingting blong God long Baebol we yumitu jes stadi long hem, i save givhan long yu olsem wanem?’—Hib. 5:14.

Taem aposol Pita i toktok long ol man long lafet blong Pentekos long yia 33 K.T.,a hem i joenem ol tok blong hem i go long laef blong ol man ya. (Wok 2:14-36) Pita i tokbaot tri vas blong Baebol we ol man ya oli talem se oli bilif long olgeta. Nao hem i tokbaot se trifala vas ya oli laenap olsem wanem wetem samting we olgeta evriwan oli luk long taem ya. From samting ya, ol man ya oli wantem folem ol tok we hem i talem. ?Tijing blong yu i gat paoa olsem long ol man? ?Yu yu talemaot nomo samting we i tru, no yu givhan long ol man tu blong oli kasem save from wanem samting ya i tru? ?Yu yu pulum olgeta blong oli tingbaot se, samting we oli lanem i mas jenisim laef blong olgeta olsem wanem? Maet oli no singaot olsem hip man ya long taem blong Pentekos se, “?Bambae mifala i mekem olsem wanem?” Be sipos yu soemaot se ol tok blong Baebol i joen olsem wanem wetem laef blong olgeta, bambae oli tingbaot samting we oli mas mekem.—Wok 2:37.

Sipos yu wan papa, no yu wan mama, yu mas ridim Baebol wetem ol pikinini blong yu. Long taem ya, yu yu gat nambawan janis blong tijim olgeta blong oli luksave rod blong folem ol tingting blong Baebol long laef blong olgeta. (Efes. 6:4) Olsem nao, maet yu jusum sam vas long Baebol riding blong wik, yu eksplenem olgeta, nao yu askem ol kwestin olsem: ‘?Long laef blong yumi, ol vas ya oli save lidim yumi olsem wanem? ?Long wok blong prij, yumi save yusum ol vas ya olsem wanem? ?Ol vas ya oli soemaot wanem long saed blong Jehova mo fasin blong hem? ?Mo samting ya i save givhan long yumi olsem wanem blong yumi laekem hem moa?’ Yu save pulum famle blong yu blong oli talemaot ol poen ya long Tiokratik Skul, taem yumi tokbaot ol bigfala poen blong Baebol riding. Ol vas we oli tokbaot long taem ya, hemia ol vas we bambae oli rimemba.

Yu Mas Soemaot Gudfala Eksampol

Ol toktok blong yu i tijim man. Mo ol samting we yu mekem tu i tijim man. Ol samting we yu mekem oli soemaot se ol samting we yu talem oli save wok long laef. Hemia nao rod blong ol pikinini oli lanem samting. Oli folem fasin blong papa mama blong olgeta, from we oli wantem kam olsem tufala. Oli wantem harem se i olsem wanem taem oli mekem sem mak olsem papa mama blong olgeta. Long sem fasin, ol man we yu tijim olgeta oli ‘folem fasin blong yu, olsem we yu yu stap folem fasin blong Kraes.’ Nao oli stat blong kasem blesing we i kamaot taem man i mekem samting we Jehova i wantem. (1 Kor. 11:1) Bambae oli luksave paoa blong God long laef blong olgeta.

Hemia i mekem yumi tingbaot se i impoten tumas blong soemaot wan gudfala eksampol. Taem yumi soemaot se yumi ‘man we fasin blong laef blong yumi i tabu mo yumi soemaot long ol wok blong yumi we yumi fasgud long God,’ yumi givhan bigwan long ol man we yumi tijim olgeta. Nao oli luksave wanem we oli mas mekem blong folem ol tingting blong God long Baebol. (2 Pita 3:11, NW) Sipos yu talem long wan man we yu mekem Baebol stadi long hem, se hem i mas ridim Tok blong God evri dei, yu tu yu mas strong blong ridim Baebol evri dei. Sipos yu wantem we ol pikinini blong yu oli lanem blong folem ol tingting blong God long Baebol, ale yu mas meksua se ol fasin blong yu tu oli laenap wetem wanem we God i wantem. Sipos yu tijim olgeta long kongregesen blong oli wok strong long wok blong prij, yu tu yu mas joen plante long wok ya. Taem yu yu folem wanem we yu tijim ol narafala long hem, yu pulum olgeta moa blong oli folem tijing ya.—Rom 2:21-23.

Sipos yu yu wantem kam gud moa long fasin blong tij, yu mas tingbaot se: ‘?Taem mi mi tijim ol man, mi tij long fasin we i save jenisim tingting, toktok, mo fasin blong olgeta? ?Mi mi soemaot olsem wanem wan tingting no wan fasin i defren long narafala tingting no fasin? ?Mi mi mekem wanem blong givhan long ol man we mi stadi wetem olgeta, ol pikinini blong mi, mo olgeta we oli lesin long ol tok blong mi long miting, blong oli rimemba samting we mi talem? ?Mi mi soemaot klia long olgeta, wanem we oli mas mekem blong folem samting we oli lanem? ?Oli luk we tijing blong mi i laenap wetem fasin blong mi? ?Oli luksave se fasin we bambae oli mekem folem tijing ya, i save mekem se oli fren gud wetem Jehova?’ (Prov. 9:10) Yu mas tingbaot ol kwestin ya oltaem blong yu save kam gud moa long fasin blong tijim man. “Yu mas lukaot gud long fasin blong yu, mo long ol tok we yu stap tijim ol man long hem. Oltaem yu mas mekem olgeta fasin ya. Sipos yu mekem olsem bambae yu save sevem yu, wetem ol man we oli stap lesin long yu.”—1 Tim. 4:16.