Yumi Mas Lavem Olgeta Brata Mo Sista Blong Yumi
Klosap tu taosen yia bifo, God i pulum Pita blong i raetem se: “Yufala i mas lavem olgeta Kristin man.” (1 Pita 2:17) Be yumi mas obei moa long ol tok ya naoia, i bitim bifo. ?Olsem wanem yumi save lavem bigfala kampani blong ol brata mo sista blong yumi? Long wol ya we bighaf blong ol man oli no gat lav, ?olsem wanem yumi save gohed blong lavem ol narafala? (Mat. 24:12) I gud yu lukluk DVD ya, Our Whole Association of Brothers, nao yu traem ansa long ol kwestin ya.
(1) ?Wetaem yumi joen long bigfala kampani ya blong ol brata mo sista? (2) ?Wanem trifala wok we yumi mo ol brata blong yumi long fulwol, yumi mekem? (3) ?Olsem wanem ol brata blong yumi oli soemaot se oli gat strong tingting blong prij long (1) kantri blong Alaska, (2) ol bigbigfala haba blong Yurop, mo (3) dak bus blong Peru? (4) ?From wanem yumi no mas ting se wok blong prij i wan wok olbaot nomo, i no spesel? (5) Yu talem sam stori blong ol Witnes blong Jehova, we oli givgivhan long olgeta long taem blong trabol olsem (1) etkwek, (2) hariken, mo (3) faet. (6) ?Long wanem rod yumi evriwan i save soemaot fasin ya we i makemaot yumi olsem ol trufala Kristin? (Jon 13:35) (7) ?Wanem blesing i kamaot taem yumi joen wanples blong bildim ol Haos Kingdom? (8) Taem gavman i putum tabu long wok blong ol brata blong yumi long Is Yurop mo Rasia, ?ol brata ya oli stanap strong olsem wanem? (9) ?Plante Witnes oli mekem wanem blong oli go long ol bigfala asembli, mo from wanem oli traehad olsem? (10) ?DVD ya i mekem tingting blong yu i strong olsem wanem blong (1) yu wosipim Jehova wetem ol brata mo sista blong yu long ol miting, (2) yu givhan long ol narafala taem oli gat trabol, mo (3) yu talemaot gud nius long enitaem mo long eniples? (11) ?Olsem wanem mo wetaem yumi save yusum DVD ya long wok blong prij?
Bigfala risen from wanem yumi joen long kampani blong ol brata mo sista, hemia from we yumi lavem Jehova. Taswe yumi laekem blong lanem moa long saed blong hem mo blong tijim ol narafala blong oli save hem. Mo yumi lavem ol man we Jehova i lavem olgeta. Yumi halpem olgeta taem oli gat nid, from we yumi lavem olgeta, be i no from we yumi ting se Jehova i mas talem tangkiu long yumi. Yumi tingbaot se kampani blong ol brata oli olsem wan nambawan presen we Jehova i givim. Taswe yumi mas talem tangkiu long Jehova. From we yumi stap kam long en blong wol ya, yumi mas gohed blong lavem olgeta brata mo sista blong yumi.