Yu Yusum Smol Buklet Ya “?Wanem Save i Stap Long Baebol?” Blong Statem Storian
1. ?Wanem niufala tul we yumi save yusum long wok blong prij?
1 Long Baebol ya New World Translation we oli wokem bakegen, i gat wan haf long ol fas pej we i se, “An Introduction to God’s Word.” Haf ya i kamaot long smol buklet ya “?Wanem Save i Stap Long Baebol?, we yumi kasem long Asembli Blong Tri Dei long 2014. Taem yumi stap rerem ol fastok blong prij, ?olsem wanem yumi save yusum niufala tul ya? Long smol buklet ya, i gat plante defren kwestin we ansa blong olgeta i stap long Baebol. Long wanwan kwestin, i gat ol vas we oli givim ansa long kwestin ya. Fasin we oli wokem smol buklet ya i sem mak long smol buklet ya Statem Wan Storian no buk ya Reasoning. Smol buklet ya i givhan bigwan blong statem wan storian.
2. ?Olsem wanem blong yusum smol buklet ya “?Wanem Save i Stap Long Baebol?” long wok blong prij?
2 Maet yu yusum kwestin 8 mo yu talem se: “Mifala i stap pas smoltaem from we plante man oli stap askem se, ‘?God nao i stamba blong ol trabol we man i kasem?’ [Long sam ples, i moa gud blong soem kwestin ya stret long man.] ?Wanem tingting blong yu? [Yu letem man i ansa.] Baebol i givim stret ansa long kwestin ya.” Yu ridim wan no sam long ol vas we i stap, stret long Baebol blong yu mo yu eksplenem. Sipos man ya i intres, yu soem ol 20 kwestin long pej 1, mo yu askem hem blong i jusum wan we hem i wantem se yutufala i tokbaot long nekis visit. Sipos no, yu save givim wan long ol buk blong stadi Baebol, we i givim moa save long samting we yutufala i tokbaot.
3. ?Olsem wanem blong yusum smol buklet ya blong statem storian wetem ol man we oli no joen long wan Kristin skul?
3 Long ol ples we ol man oli no joen long wan Kristin skul, i gud yumi yusum kwestin 4 mo kwestin 13 kasem 17. Sipos yu yusum kwestin 17, yu save talem se: “Mifala i pas smoltaem blong visitim ol famle. ?Yu yu agri se ol famle oli stap fesem plante trabol? [Yu letem man i ansa.] Plante mared man mo woman oli luk se ol waestok ya oli givhan long olgeta: “Woman i mas ona gud long man blong hem.” [Yu no nid blong talem se tok ya i kamaot long Efesas 5:33. Sipos yu stap toktok long wan woman, maet yu save talem bakegen ol tok blong Efesas 5:28.] Sipos man mo woman i folem advaes ya, ?yu ting se mared blong tufala i save stap gud?”
4. ?Yu save mekem wanem afta we yu storian wetem wan man we i no joen long wan Kristin skul?
4 Afta we yu storian wetem wan man we i no joen long wan Kristin skul, i gud yu mekem plan blong gobak blong storian moa wetem hem. Maet yu save gobak blong tokbaot wan long ol narafala vas we i joen wetem kwestin we yutufala i tokbaot. Taem yu luk se i stret, yu save talem long hem se ol waes advaes we yutufala i tokbaot i kamaot long Baebol. Yu save givim wan magasin no buk long hem we yu ting se i stret long hem. Be hemia i dipen long wanem we yutufala i tokbaot finis mo long tingting we man ya i gat long Baebol.—Yu luk pepa we i stap insaed long Kingdom Wok Blong Yumi blong Disemba 2013.