Yusum Gud Ol Kwestin

OL KWESTIN oli pulum man blong i ansa, maet wetem voes blong hem no long tingting blong hem nomo. Taswe, ol kwestin oli givhan long ol man blong oli yusum tingting blong olgeta. Yu save askem wan kwestin blong statem wan storian. Mo tu, ol kwestin oli save pulum ol man blong oli talemaot ol gudfala tingting long storian blong olgeta. Taem yu givim wan tok long miting mo taem yu tijim wan man, maet yu yusum ol kwestin blong pulum tingting blong hem. Mo yu save yusum kwestin blong pulum man blong tingting gud long wan poen, mo blong givim paoa long samting we yu talem. Taem yu yusum gud ol kwestin, yu pulum man blong i joen long storian, i no blong lesin nomo. Yu mas gat wan risen blong askem kwestin, mo yu mas askem kwestin long fasin we i mekem risen ya i klia.

Yu Pulum Man Blong Storian. Taem yu stap prij, yu mas lukaot janis blong askem long ol man blong oli talemaot tingting blong olgeta, sipos oli glad blong mekem olsem.

Plante Witnes oli statem ol gudfala storian long wok blong prij taem oli askem nomo se, “?Olsem wanem? ?Samtaem yu yu tingbaot se . . . ?” Taem oli askem wan kwestin we plante man oli stap tingbaot, oli storian gud wetem ol man. Nating se man i no tingbaot kwestin ya bifo, be bambae i wekemap tingting blong hem blong i wantem save ansa. I gat plante defren kaen storian we yu save statem sipos yu askem ol kwestin olsem: “?Wanem tingting blong yu long . . . ?,” “?Yu yu harem olsem wanem long . . . ?,” mo “?Yu yu bilif se . . . ?”

Filip we i wan man blong prij long taem bifo, i luk wan haeman blong Itiopia we i stap ridim profet tok blong Aesea long bigfala voes. Filip i go klosap long man ya, mo i askem wan isi kwestin long hem, se: “?Olsem wanem? ?Yu yu save mining blong tok ya we yu stap ridim?” (Wok 8:30) Kwestin ya i openem rod blong Filip i tokbaot Jisas Kraes. Tede, sam Witnes oli askem wan kwestin we i klosap sem mak, nao oli faenem sam man we oli wantem tumas blong save trutok blong Baebol.

Plante man oli glad moa blong lesin taem yu givim janis long olgeta blong talemaot tingting blong olgeta. Afta we yu askem wan kwestin yu mas lesin gud. I nogud yu agensem ansa we man i givim, i moa gud yu talem sam tok we i kaen. Taem yu luk se i stret blong talem sam gudfala tok long wan man from ansa blong hem, i gud yu talem ol tok we i kamaot long hat blong yu. Wan taem, wan tija blong Loa i talem ‘ol tok we i waes’ blong ansa long wan kwestin we Jisas i askem long hem. Nao Jisas i talem ol gudfala tok ya long hem, se: “Yu yu no stap longwe nating long kingdom blong God.” (Mak 12:34, NW) Nating sipos wan man i talemaot tingting we i defren long tingting blong yu, be yu save talem tangkiu yet long hem. Maet ol tok blong hem i givhan long yu blong yu kasem save long wan tingting blong hem, we i impoten blong save taem yu serem ol trutok blong Baebol wetem hem.

Yu Tokbaot Wan Tingting We i Impoten. Taem yu toktok long plante man wantaem, no taem yu storian wetem wan man nomo, nao yu wantem tokbaot wan tingting we i impoten, yu save askem ol kwestin. Be yu mas meksua se ol kwestin we yu askem oli stret long samting we ol man oli stap tingbaot. Mo tu, yu save yusum ol kwestin we i no isi blong ansarem. Samting ya i save pulum ol man blong oli wantem tumas blong save ansa blong olgeta. Sipos yu askem wan kwestin nao yu spel smol, ating ol man bambae oli lesin moa long samting we yu wantem talem.

Wan taem, profet Maeka i askem sam kwestin. Fastaem, hem i askem kwestin ya se: ?Sipos man i mekem wosip long God, bambae hem i mekem olsem wanem? Biaen, profet ya i askem fo kwestin bakegen, we oli tokbaot samting we maet man i talem blong ansa long fas kwestin. Olgeta kwestin ya oli mekemrere tingting blong ol man from ol gudfala ansa we Maeka i givim, blong finisim poen ya we hem i stap tokbaot. (Maeka 6:6-8) ?Olsem wanem? ?Yu ting se yu save folem fasin ya taem yu stap tijim ol man? I gud yu traem.

Yu Pulum Man Blong i Tingting Gud Long Wan Poen. Yu save yusum ol kwestin blong givhan long man blong i kasem klia ol poen we yu stap eksplenem. Jehova i mekem olsem long Malakae 1:2-10. Bifo we hem i talemaot ol strong tok long ol man Isrel, hem i talem se: “Oltaem mi mi lavem yufala.” Be oli no luksave se hem i lavem olgeta, ale hem i talem se: “Bifo, i gat tufala brata i stap, wan, nem blong hem Esao, mo narawan, nem blong hem Jekob.” Nao Jehova i tokbaot we hem i no lavem ol man Edom we oli kamaot long Esao from we oli mekem ol nogud fasin, ale hem i spolem olgeta. Biaen, hem i yusum sam pijatok mo sam kwestin, blong tok strong long ol man Isrel se oli no tinghevi long hem we i lavem olgeta. Sam long ol kwestin ya, i olsem se ol pris we oli no obei gud long Jehova oli stap askem. Sam narafala kwestin, Jehova i askem long ol pris. Ol tok ya i tajem hat blong yumi mo i pulum gud tingting blong yumi. Yumi no save talem wan samting agens long ol klia tok ya we Jehova i talem. Mo yumi no save fogetem bigfala poen long stori ya.

Sam brata oli folem sem rod ya taem oli wantem yusum gud ol kwestin. Oli no wantem se man i ansa wetem voes blong hem, be oli wantem se man i ansa long tingting blong hem, olsem se i joen long wan storian.

Taem yu mekem wan Baebol stadi, yu askem ol kwestin we oli stap long buk, nao man i ansa. I moa gud hem i no ridim nomo ol ansa long buk. Long kaen fasin, yu save askem sam narafala kwestin blong mekem hem i tingting. Taem yutufala i stadi long ol stamba poen, yu save pulum hem blong i yusum ol vas blong Baebol long ansa blong hem. Mo tu, maet yu askem se: “?Samting ya we yumitu stap tokbaot, hem i joen olsem wanem wetem narafala poen ya we yumitu stadi long hem finis? ?From wanem save ya i impoten? ?Save ya i mas mekem wanem long laef blong yumi?” Fasin ya i moa gud i bitim we yu talemaot nomo samting we yu yu bilif long hem, no yu mekem bigfala toktok blong eksplenem wan poen. Fasin ya i givhan long man we i stadi blong i yusum ‘tingting blong hem’ taem hem i mekem wosip long God.—Rom 12:1, NW.

Sipos man we yu mekem stadi long hem i luk se i had blong kasem save long wan poen, yu mas gat longfala tingting. Maet hem i stap skelem samting we yu talem wetem samting we hem i bilif long hem plante yia finis. Maet i gud yu yusum wan narafala rod blong eksplenem. Samtaem yu mas yusum ol isi tok nomo blong mekem man i tingting long wan poen. Yu mas yusum Baebol plante. Mo yu save yusum pijatok tu. Antap long samting ya, yu save askem sam isi kwestin, blong mekem hem i tingting long ol pruf we yu tokbaot.

Yu Pulum Man Blong i Talemaot Wanem i Stap Long Hat Blong Hem. Taem man i ansa long wan kwestin, plante taem hem i no talemaot wanem i stap long hat blong hem. Ating hem i givim wan ansa we hem i ting se bambae yu glad long hem. Taswe, yu mas traem luksave. (Prov. 20:5) Yu save askem kwestin ya we Jisas i askem long wan man, se: “?Yu bilif long tok ya?”—Jon 11:26.

Wan taem, plante disaepol blong Jisas oli harem nogud long sam tok we hem i talem, ale oli lego hem. Long taem ya, Jisas i pulum ol aposol blong oli talemaot wanem i stap long hat blong olgeta. Hem i askem se: “?Olsem wanem long yufala? ?Yufala tu i wantem gowe long mi?” Pita i talemaot wanem i stap long hat blong hem, se: “Masta. ?Bambae mifala i save go long hu? Yu nomo yu gat ol tok blong laef ya we i no save finis. Mo mifala i bilif finis long yu. Mifala i save finis we yu yu Tabu Man blong God.” (Jon 6:67-69) Long wan narafala taem, Jisas i askem long ol disaepol blong hem se: “?Ol man oli stap tokbaot mi, mi Pikinini blong Man, se mi hu?” Nao hem i askem wan kwestin bakegen, blong pulum olgeta blong oli talemaot samting we i stap long hat blong olgeta, i se: “?Be yufala, yufala i stap tokbaot mi, se mi hu?” Pita i ansa se: “Yu yu Mesaea ya. Yu yu Pikinini blong God ya we i laef, i stap we i stap.”—Mat. 16:13-16.

Taem yu stap mekem Baebol stadi long wan man, maet yu luk se i gud samtaem blong folem fasin ya blong Jisas. Maet yu askem se: “?Wanem tingting blong ol yangfala long klas blong yu (ol man we oli wok wetem yu)?” Afta, maet yu askem se: “?Wanem tingting blong yu?” Yu we yu tija, yu wantem save wanem i stap long hat blong man we yu tijim. Olsem nao yu save givhan gud long hem.

Yu Givim Paoa Long Toktok Blong Yu. Yu save yusum ol kwestin blong givim paoa long wan tingting we yu talemaot. Aposol Pol i mekem samting ya, olsem yumi ridim long Rom 8:31, 32, NW: “Sipos God i stap wetem yumi, ?hu i save agens long yumi? God i no holemtaet stret Pikinini blong hem, be i letem hem i ded blong sevem yumi evriwan. ?Weswe hem i save holemtaet ol narafala samting blong hem? Hem i kaen, bambae hem i givim olgeta oli kam nomo long yumi.” Ating yu makem gud se tufala kwestin ya wanwan, oli joen wetem ol tok we i stap jes bifo long tufala.

Profet Aesea i raetemdaon panis we Jehova bambae i givim long king blong Babilon. Nao Aesea i soemaot strong tingting we hem wan i gat, i se: “Jehova blong ol ami i mekem plan finis. ?Hu i save spolem plan ya? Hem i stretem han blong hem finis. ?Hu i save blokem hem?” (Aes. 14:27, NW) Ol kwestin ya oli mekem i klia se i no gat wan man i save agensem ol tok ya. I no nid blong man i ansa long ol kwestin ya.

Yu Soemaot Wan Tingting We i Rong. Ol kwestin we yumi tingting gud long olgeta fastaem, oli gat paoa blong soemaot rong tingting we man i gat. Bifo we Jisas i tekemaot sik blong wan man, hem i askem long ol Farisi mo long sam man we oli save gud Loa, se: “?Olsem wanem? ?Long Sabat dei, Loa blong yumi i letem blong yumi mekem sikman i gud bakegen, no nogat?” Afta we hem i mekem man ya i gud bakegen, hem i askem wan moa kwestin, se: “?Hu long yufala we pikinini blong hem no buluk blong hem i foldaon long wel long Sabat dei, be hem i no go wantaem nomo blong pulumaot?” (Luk 14:1-6) Ol man oli no ansa long ol kwestin ya, mo Jisas i no wantem se oli ansa. Ol kwestin ya oli blong soemaot rong tingting blong olgeta.

Wan tru Kristin i save gat rong tingting tu. Long taem blong aposol Pol, sam Kristin long Korin oli mekem ol brata blong olgeta oli pas long kot, blong stretem sam trabol we olgeta nomo oli naf blong stretem. ?Aposol Pol i mekem wanem? Hem i askem plante kwestin blong stretem tingting blong olgeta.—1 Kor. 6:1-8.

Yu save lanem blong yusum gud ol kwestin. Be yu mas gat respek, antap moa, taem yu toktok long ol olfala, olgeta we yu no savegud olgeta, mo ol haeman. Yu mas askem ol kwestin we oli pulum ol man blong oli wantem save trutok blong Baebol.