Yusum Baebol Blong Ansa

PLANTE man oli askem kwestin blong save bilif blong yumi, fasin blong laef blong yumi, tingting blong yumi long samting we i hapen long wol, mo wanem samting we yumi putum tingting blong yumi i stap strong long hem long fiuja. Taem yu ansa long ol kwestin ya, yu mas traehad blong yusum Baebol. ?From wanem? From we Baebol hem i Tok blong God. Ol samting we yumi bilif long hem oli stanap long Baebol. Yumi mekem fasin blong laef blong yumi i laenap wetem ol tok blong Baebol. Yumi skelem ol samting we oli hapen long wol wetem ol samting we Baebol i talem. Tingting blong yumi i stap strong long ol promes we Baebol i talem se bambae oli kamtru.—2 Tim. 3:16, 17.

Yumi kasem save gud long wok we i joen wetem nem blong yumi, Ol Witnes Blong Jehova. (Aes. 43:12, NW) Taswe, yumi no yusum ol waes blong wol ya blong ansa long kwestin blong ol man, be yumi yusum tok blong Jehova long Baebol. I tru, yumi wanwan i gat defdefren tingting long plante samting. Be yumi letem Tok blong God i jenisim tingting blong yumi, from we yumi bilif strong se Tok ya i tru. Nating se i olsem, long plante samting we i no gat loa long olgeta, Baebol i letem yumi nomo i jus. Long ol samting olsem, i nogud yumi fosem narafala blong i folem tingting blong yumi. I moa gud yumi tijim ol man long ol tingting blong God long Baebol, nao olgeta oli save jusum rod blong olgeta, olsem we yumi jusum rod blong yumi. Olsem aposol Pol, yumi traehad blong givhan long olgeta blong oli ‘bilif long tok ya, nao oli save obei long hem.’—Rom 16:26.

Revelesen 3:14 (NW) i talem se Jisas Kraes i “tru witnes ya we i no save tanem tok blong hem.” ?Jisas i ansa olsem wanem long ol kwestin we ol man oli askem? ?Mo hem i mekem wanem, taem ol man oli askem wan kwestin we hem i no tingrere long hem? Samtaem hem i yusum pijatok blong pulum man blong i tingting gud. Samtaem hem i askem long man we i askem kwestin, blong hem i talemaot tingting blong hem long wan vas. Plante taem hem i talem sam tok blong Baebol stret, no i talem wan tingting nomo we i stap long Baebol. (Mat. 4:3-10; 12:1-8; Luk 10:25-28; 17:32) Long taem blong Jisas, ol hanraet blong Baebol oli stap long ol haos prea blong ol man Jiu. I no gat wan samting blong soemaot se Jisas i karem ol hanraet ya wetem hem. Be hem i save gud Baebol, mo oltaem hem i yusum tok blong Baebol taem hem i tijim narafala. (Luk 24:27, 44-47) Jisas i tru nomo taem hem i talem se ol samting we hem i tijim, oli no kamaot long tingting blong hem. Hem i talemaot ol samting we Papa blong hem i talem long hem.—Jon 8:26.

Yumi wantem tumas blong folem eksampol blong Jisas. Jisas i harem voes blong God stret, yumi neva harem samting ya. Be Baebol hem i Tok blong God. Taem yumi yusum Baebol blong ansa long wan kwestin, yumi no leftemap yumi. Yumi soemaot we yumi bilif strong se God nao i save wanem samting i tru, taswe yumi no talemaot tingting blong yumi nomo.—Jon 7:18; Rom 3:4.

Be i no naf blong yusum Baebol nomo. Yumi mas yusum Baebol long fasin we i givhan gud long man. Yumi wantem se man i lesin wetem wan tingting we i open. Sipos yu luk se man i glad, yu save pulum hem i go long Baebol. Maet yu talem olsem: “?Yu yu ting se i impoten blong lesin long ol tok we God i talem?” Sipos no, yu save talem se: “?Yu yu save se Baebol i tokbaot kwestin ya we yu yu askem?” Sipos yu stap toktok long wan man we i no respektem Baebol, ating yu mas jenisim ol tok blong yu. Maet yu talem se: “Mi glad blong serem wan profet tok wetem yu, we oli raetem longtaem bifo.” Sipos no, yu save talem se: “Buk ya we oli seremaot moa i bitim ol narafala buk, i talem se . . . ”

Maet yu ting se i gud blong talem tingting we i stap long wan vas nomo. Be sipos i gat rod, i moa gud yu openem Baebol mo yu ridimaot ol tok blong hem stret. Sipos yu luk se man i glad, yu save soem vas ya long hem long prapa Baebol blong hem. Plante taem fasin ya blong ridim Baebol stret long ol man i save gat bigfala paoa long olgeta.—Hib. 4:12.

Ol Kristin elda oli mas meksua se oli yusum Baebol oltaem blong ansa long ol kwestin. Wan long ol fasin we brata i mas gat blong hem i naf blong kam wan elda, hemia se, “long fasin blong hem blong tijim ol man, hem i mas holemstrong tok ya we yumi save trastem.” (Taet. 1:9, NW) Maet wan elda i givim advaes long wan brata long kongregesen, nao afta we brata i harem advaes ya, hem i mekem wan bigfala desisen long laef blong hem. !Taswe, i impoten tumas we advaes ya i stanap long Baebol nomo! Sipos ol elda oli yusum Baebol oltaem, oli save pulum plante narafala blong oli gat sem fasin ya blong tij.