Ol Refrens Blong Kristin Wok Mo Laef—Buk Blong Miting
7-13 MEI
OL GUDGUDFALA SAMTING LONG BAEBOL | MAK 7-8
“Karem Pos Blong Yu Mo Folem Mi Oltaem”
nwtsty not blong stadi long Mk 8:34
hem i mas blokem ol samting we hem nomoi wantem: O “hem i mas givimaot olgeta raet blong hem.” Hemia i minim wan man we i rere blong lego olgeta samting we hem nomo i wantem o i yusum olgeta paoa blong hem blong ona long God. Long lanwis Grik, tok ya i save minim “hem i mas talem no long hem wan,” we i min se hem i mas talem no long ol samting we hem nomo i wantem, o samting we i blong mekem i gud long hem nomo. (2Ko 5:14, 15) Mak i yusum semfala Grik tok ya taem hem i tokbaot stori blong Pita we i giaman long saed blong Jisas.—Mk 14:30, 31, 72.
?Yu Yu Stap Ron Olsem Wanem Long Resis Ya Blong Kasem Laef?
14 Jisas Kraes i talem long wan hif blong ol disaepol blong hem wetem sam narafala se: “Man we i wantem kam biaen long mi i mas blokem ol samting we hem nomo i wantem, (no “hem i mas se, ‘No’ long hem wan,” Baebol blong Charles B. Williams) nao i mas karem [pos, NW] blong hem, i mas biaen long mi [oltaem, NW].” (Mak 8:34) Taem yumi wantem biaen long Jisas, yumi mas rere blong folem hem “oltaem” i no from we fasin blong blokem sam samting i save leftemap yumi, no gat, be from we sipos yumi fogetem fasin waes blong smoltaem, no yumi no skelemgud ol samting long laef blong yumi, yumi save spolem ol gudfala wok we yumi bin mekem, mo maet yumi spolem jans blong yumi blong kasem laef blong olwe. !Kolosap evritaem ol man oli stap gohed sloslo nomo long saed blong spirit, be yumi save spolem ol wok ya blong yumi kwiktaem sipos yumi no lukaot oltaem!
w08 1/10 pej 26 haf 3-4
?Yu Yu Rere Blong Givim Wanem Blong Kasem Laef?
3 Long semfala taem ya, Jisas i askem tu kwestin we oli pulum ol man blong hem blong oli tingting. Hem i askem se: “?Wanem gudfala samting we wan man bambae i winim sipos hem i kasem olgeta samting blong wol be i lusum laef blong hem?” Mo nara kwestin se: “?Tru ya, wanem samting nao we wan man bambae i rere blong givim olsem jenis blong laef blong hem?” (Mak 8:36, 37, NW) Ansa blong faswan kwestin i klia nomo blong eniman i faenem. Wan man i no winim wan gudfala samting nating sipos hem i hivimap plante samting blong hem long wol, be biaen hem i ded. Yes, olting we man i gat, oli mekem i gud long hem nomo taem hem i laef i stap blong harem gud long olgeta. Namba tu kwestin blong Jisas se: “?Tru ya, wanem samting nao we wan man bambae i rere blong givim olsem jenis blong laef blong hem?” Ating kwestin ya i pulum ol man we oli stap lesin long Jisas blong tingbaot toktok ya we Setan i sakem agensem God long taem blong Job. Setan i bin talem tok ya se wan man “i save lego olgeta samting we hem i gat blong i sevem laef blong hem.” (Job 2:4) Ol tok ya blong Setan maet oli tru long ol man we oli no wosipim Jeova. Plante long olgeta ya, sipos oli luk se bambae oli mas ded from we oli folem ol stret rul, be kwiktaem nomo bambae oli lego ol stret rul ya jes blong sevem laef blong olgeta. Be ol trufala Kristin oli no gat tingting olsem.
4 Yumi save se Jisas i no kam long wol ya blong givim strong bodi, mane, mo longfala laef long yumi. Hem i kam blong openem rod long yumi blong yumi save laef olwe long niufala wol, mo yumi tinghae tumas long janis ya we yumi gat blong kasem wan laef olsem. (Jon 3:16) Long tingting blong wan Kristin we i ridim faswan kwestin blong Jisas, ating i olsem we Jisas i stap askem se, “?Wanem gudfala samting we wan man bambae i winim sipos hem i kasem olgeta samting blong wol be i lusum janis blong laef olwe?” Ansa i klia nomo se hem i no winim wan gudfala samting nating. (1 Jon 2:15-17) Blong yumi save ansa blong namba tu kwestin blong Jisas, ating i gud yumi askem se, ‘?Mi mi rere blong lego wanem samting naoia blong mi no lusum janis blong mi blong laef long niufala wol?’ Fasin blong laef blong yumi nao, bambae i soemaot ansa blong kwestin ya, mo bambae i soemaot tu se yumi putum tingting blong yumi i stap strong olsem wanem long niufala wol.—Skelem wetem Jon 12:25.
jy pej 143 haf 4
?Hu Ya Pikinini Blong Man?
Yes, blong pruvum se Jisas i stret, ol man blong hem oli mas gat strong tingting mo tingbaot narafala fastaem. Jisas i talem se: “Ol man blong tede oli stap mekem sin, mo oli no holemstrong long God. Sipos man i sem blong talemaot mi long fes blong ol man ya mo blong talemaot se hem i bilif long tok blong mi, bambae Pikinini blong man tu i sem blong talemaot hem, taem hem i kam wetem ol tabu enjel long bigfala laet blong Papa blong hem we i saen.” (Mak 8:38) Yes, taem Jisas i kam, “bambae hem i givim pei long evri man stret long wok we oli mekem.”—Matiu 16:27.
Traem Faenem Ol Gudfala Samting Ya
Kwestin
?From wanem ol enemi blong Jisas oli folem kastom blong wasem han?
▪ Ol enemi blong Jisas oli stap agensem hem mo ol disaepol blong hem from plante samting, mo hemia wan long olgeta ya. Loa blong Moses i talem samting we i mekem man i kam doti, olsem, taem man i gat wan sik long tabu haf blong bodi blong hem mo taem woman i kasem sik blong hem, mo leprosi, mo taem man i tajem wan dedman no ded anamol. Mo tu, Loa i talem samting we man i mas mekem blong hem i kam klin bakegen. Hemia taem man i givim sakrefaes, i swim, mo oli saksakem wota long hem.—Lev., japta 11-15; Nam., japta 19.
Ol tija blong Loa, we ol man oli singaot olgeta se ol rabae, oli ademap sam rul blong olgeta antap long ol loa ya. Wan buk i talem se ol rabae oli ademap sam moa smosmol rul long samting we i mekem man i kam doti, mo olsem wanem hem i save mekem ol narafala i kam doti. Mo tu, oli mekem ol rul long saed blong ol samting we oli klin mo ol samting we oli no klin, mo ol kastom we man i mas folem blong kam klin bakegen.”
Ol enemi blong Jisas oli askem long hem se: “?From wanem ol man blong yu oli no folem kastom blong yumi we ol olfala blong yumi bifo oli tijim yumi long hem? Olgeta oli stap kakae, be long kastom blong yumi, han blong olgeta i doti.” (Mak 7:5) Ol Farisi ya oli no stap tokbaot fasin ya blong wasem han bifo kakae. Be oli mekem rul se bifo we man i kakae, oli mas kafsaedem wota antap long han blong hem. Fasin ya i olsem wan kastom blong olgeta. Buk ya we yumi tokbaot finis i gohed se, ol rabae oli “raorao tu long saed blong weswan botel we oli save yusum blong kafsaedem wota, mo weswan wota i stret blong yusum, mo hu i mas kafsaedem, mo oli mas wasem han kasem weples.”
?Wanem tingting we Jisas i gat long ol rul ya? Hem i talem long ol lida blong skul blong ol man Jiu se: “Taem Profet Aesea i talemaot tok we God i givim long hem, hem i makemgud yufala ya we yufala i man blong giaman. Hem i talemaot we God i talem se, ‘Ol man ya oli stap ona long mi long ol toktok blong olgeta nomo, be tingting blong olgeta i longwe tumas long mi. Oli stap mekem wosip long mi blong nating nomo, from we taem oli tijim ol man oli talem se tok ya i blong mi, be i tingting blong man nomo.’ Mo Jisas i talem se, ‘Yufala i stap livim loa we God i givim, nao yufala i stap folem ol kastom blong man nomo.’—Mak 7:6-8.
w00 15/2 pej 17-18 haf 9-11
?Yu Yu Gat “Tingting Blong Kraes”?
9 Man ya we Jisas i soem spesel intres long hem, sora blong hem i fas mo hem i no save toktok gud. Ating Jisas i luksave se man ya i fraet lelebet mo maet i sem tu. Nao, Jisas i mekem wan samting we i narakaen lelebet. Hem i tekem man ya, tufala i gowe long ol narafala man, we tufala nomo i stap. Ale, Jisas i mekem saen blong soemaot long man ya wanem we bambae hem i mekem. Jisas i “putum fingga blong hem long sora blong man ya, mo i tekem spet blong hem, i putum long tang blong man ya.” (Mak 7:33) Nao, Jisas i lukluk i go antap long heven, i talem wan prea, we tingting blong hem i hevi mo i pulum win from. Taem Jisas i mekem samting ya, i olsem we hem i stap talem long man ya se, ‘Samting we bambae mi mekem long yu i kamaot long paoa blong God.’ Biaen, Jisas i talem se: “Yu open.” (Mak 7:34) Nao wantaem nomo sora blong man ya i open, mo hem i save toktok gud.
10 !Tru ya, Jisas i wan man we i rili tingbaot ol narafala! Hem i kasem save long filing blong olgeta, mo samting ya i pusum hem blong tekem aksin we i no spolem filing blong olgeta. Yumi ol Kristin, i gud yumi traehad blong wokem mo soemaot sem tingting olsem Kraes long saed ya. Baebol i givim advaes long yumi se: “Yufala evriwan i mas gat wan tingting nomo, mo yufala i mas gat sore long yufala. Yufala i mas lavlavem yufala olsem we yufala i wan brata nomo, mo yufala i mas mekem i gud long yufala, we tingting blong yufala i stap daon.” (1 Pita 3:8) Hemia i minim se yumi mas tingbaot filing blong ol narafala taem yumi toktok mo mekem wan samting.
11 Insaed long kongregesen, yumi save soem se yumi tingbaot filing blong ol narafala, taem yumi ona long olgeta, mo mekem i gud long olgeta olsem we yumi wantem blong oli mekem long yumi. (Matiu 7:12) Hemia i minim se yumi mas lukaot gud long ol samting we yumi talem, mo fasin blong yumi blong talem ol samting ya. (Kolosi 4:6) Tingbaot se ‘man we i stap toktok be i no tingtinggud fastaem, tok blong hem i olsem naef blong faet we i stikim man.’ (Ol Proveb 12:18) ?Olsem wanem long famle? Wan hasban mo waef we tufala i rili lavlavem tufala bambae tufala i kasem save filing blong tufala. (Efesas 5:33) Tufala i mas lukaot gud blong no sakem ol strong tok, ol tok we oli daonem narafala oltaem, mo ol tok we oli stikim narawan—hemia ol fasin blong toktok we i save spolem filing blong narawan mo oli save mekem man i harem nogud longtaem. Ol pikinini tu oli gat filing, mo ol papa mama we oli gat lav bambae oli tingbaot samting ya. Taem i nidim blong stretem ol pikinini, papa mama we i gat lav bambae i stretem olgeta long fasin we i soem respek mo i no mekem olgeta oli sem blong nating nomo. (Kolosi 3:21) Taem yumi tingbaot filing blong ol narafala long ol fasin mo toktok blong yumi, yumi soemaot se yumi gat tingting blong Kraes.
14-20 MEI
OL GUDGUDFALA SAMTING LONG BAEBOL | MAK 9-10
“Wan Vison We i Mekem Bilif i Strong”
w05 15/1 pej 12 haf 9-10
Ol Profet Tok Oli Poen i Go Long Kraes
9 Bitim wan yia i pas afta we Jisas i givim ol pruf ya se hem i Mesaea. Hemia yia 32 K.T. Oli mekem lafet blong Pasova finis. Plante man we fastaem oli bilif long Jisas, oli no moa folem hem. Maet oli lego hem from we ol man oli agensem olgeta, maet oli wantem ronem mane, no maet oli tingting tumas long ol wari blong laef. Maet samfala oli konfius no oli harem nogud from we Jisas i no wantem we ol man oli mekem hem i kam king. Taem ol lida blong ol man Jiu oli askem long hem blong mekem wan saen long paoa blong God blong leftemap hem wan, hem i no wantem. (Matiu 12:38, 39) Maet samfala oli no kasem save from wanem Jisas i no wantem. Mo tu, Jisas i stat talemaot wan samting long ol disaepol blong hem we i had blong oli kasem save long hem—‘bambae hem i mas go long Jerusalem, mo ol elda blong ol laen blong Isrel, wetem ol jif pris mo ol tija blong Loa bambae oli mekem hem i harem nogud mo bambae oli kilim hem i ded.’—Matiu 16:21-23.
10 Afta naen no ten manis, bambae “[Jisas] i aot long wol ya, i gobak long Papa blong hem.” (Jon 13:1) Hem i wari bigwan long ol disaepol blong hem, taswe hem i promes blong givim long samfala, wan saen we i kamaot long heven. Hemia samting we hem i no bin wantem givim long ol man Jiu we oli no gat bilif. Jisas i talem se: “Tru mi talem long yufala, i gat sam man oli stap stanap long ples ya, we bambae oli no save ded, gogo oli luk mi, mi Pikinini blong Man, mi kamtru, we mi mi King.” (Matiu 16:28) I klia we Jisas i no stap talem se sam disaepol blong hem bambae oli laef gogo Kingdom blong Mesaea i stanap long yia 1914, nogat. Jisas i gat tingting blong givim wan spesel vison long trifala disaepol we hem i laekem trifala tumas, blong soemaot paoa we bambae hem i kasem taem i kam King. Long vison ya, bodi blong Jisas i jenis, i kam narafala.
w05 15/1 pej 12 haf 11
Ol Profet Tok Oli Poen i Go Long Kraes
11 Sikis dei biaen, Jisas i tekem Pita, Jemes, mo Jon, trifala i go antap long wan bigfala hil—ating hil ya Hemon. Long ples ya, “stret long fes blong trifala, bodi blong Jisas i jenis, i kam narafala. Trifala i luk we fes blong hem i saen olsem san, mo klos blong hem oli kam waet olsem laet blong san.” Mo tu, profet Moses mo Elaeja, tufala i kamtru, tufala i stap stori wetem Jisas. Ating narakaen samting ya i hapen long naet, mekem se i gat moa paoa long trifala disaepol ya. Pita i ting se ol man ya oli rili stap long ples ya, taswe hem i talem se i gud we hem i wokem tri wansaed haos—wan blong Jisas, wan blong Moses, mo wan blong Elaeja. Taem Pita i stap toktok yet, wan klaod we i saen we i saen i kam kavremap olgeta, nao wan voes i kamaot long klaod ya i se: “Hemia Pikinini blong mi, we mi lavem hem. Mi mi glad tumas long hem. Yufala i mas lesin gud long hem.”—Matiu 17:1-6.
nwtsty not blong stadi long Mk 9:7
wan voes: I gat tri taem nomo we ol Gospel oli tokbaot se Jehova i toktok stret long ol man. Mo hemia i sekem taem.—Yu luk ol not blong stadi long Mk 1:11; Jon 12:28.
Traem Faenem Ol Gudfala Samting Ya
w08 1/2 pej 32 haf 8
Ol Bigfala Poen Long Buk Blong Mak
10:6-9. Tingting blong God hemia se tufala we i mared oli joengud tugeta. From samting ya, i nogud we hasban no waef oli kwik blong mekem divos, be tufala i mas traehad blong mekem ol rul blong Baebol oli wok long laef blong tufala blong bambae tufala i save winim ol defren traem we maet i kamaot insaed long mared blong tufala.—Mat. 19:4-6.
nwtsty ol not blong stadi long Mk 10:17, 18
Tija, Yu Yu Wan Gudfala Man: Man ya i yusum tok ya “Tija, Yu Yu Wan Gudfala Man” olsem wan taetel blong leftemap Jisas, hemia ona we ol lida blong ol skul oli wantem kasem. Taswe Jisas i no wantem se ol man oli singaot hem se “Tija” mo “Masta” (Jon 13:13), hem i talem se ona i mas go long Papa blong hem.
I no gat wan man we i gud, God nomo i gud: Jisas i savegud se Jehova nomo i gud moa i bitim evri samting, mo Hem nao i gat raet blong talem samting we i gud mo samting we i nogud. Taem Adam mo Iv tufala i kakae frut blong tri we i mekem man i save wanem we i gud mo wanem we i nogud, tufala i agensem raet ya blong God. Be Jisas i no olsem tufala, hem i gat tingting daon mo i letem Papa blong hem nomo i talem samting we i gud mo samting we i nogud. God i givim ol loa mo ol rul blong hem we oli stap long Baebol, blong eksplenem long yumi, samting we i gud.—Mk 10:19.
21-27 MEI
OL GUDGUDFALA SAMTING LONG BAEBOL | MAK 11-12
“Hem i Givim Moa i Bitim Ol Narafala”
nwtsty ol not blong stadi long Mk 12:41, 42
bokis blong presen mane: Folem ripot we ol man Jiu bifo oli talem, ol bokis blong presen mane, sep blong olgeta i olsem ol trampet, o hon, mo i gat smol spes long top blong hem we i open. Ol mane we ol man oli putum i go long ol boiks ya, oli yusum blong mekem plante defren samting. Grik tok we oli yusum long ples ya, i kamaot tu long Jon 8:20, mo oli tanem i kam, ‘bokis o ples blong putum presen mane.’ I luk olsem se tok ya i minim wan eria long Yad Blong Ol Woman. (Yu luk not blong stadi long Mt 27:6 mo App. B11.) Buk blong ol rabae, i soemaot se i gat 13 bokis blong presen mane we oli stap raon long wol blong yad ya. Mo i luk olsem se long tempol, i gat wan bigfala bokis blong presen mane, we oli yusum blong putum evri presen mane we oli tekemaot long ol narafala bokis.
tu smol mane: PT., “tu lepta, we i semak long wan kwadran.” Long lanwis Grik, tok ya lepta hem i plural blong tok ya, le·ptonʹ, we i minim wan samting we i smol mo i tintin. Lepton hem i wan coin we i smol, mo oli wokem long kopa o brons, mo oli yusum long Isrel. 128 lepta, valiu blong hem i semak 1 denarias. Grik tok ya, ko dran’tes, we i kamaot long Latin wod ya kwadran, i minim wan mane blong Rom we oli wokem long kopa o brons. 64 kwadran, valiu blong hem i semak 1 denarias. Nao long vas ya, Mak i yusum mane blong Rom blong eksplenem valiu blong coin we ol man Jiu oli stap yusum oltaem.—Yu luk Diksonari, long tok ya “Lepton,” mo App. B14.
w97 15/10 pej 16-17 haf 16-17
Jeova i Tinghae Tumas Long Wok We Yu Yu Mekem Wetem Ful Laef Blong Yu
16 Tu dei biaen, long Naesan 11, Jisas i stap wan ful dei long haos prea. Long ples ya, samfala oli sakem tok blong daonem haenem blong hem, mo hem i givim ol waes ansa long ol strong kwestin long saed blong takis, laef bakegen long ded, mo sam narafala samting. Hem i tok agensem ol tija blong Loa mo ol Farisi from plante nogud fasin blong olgeta, olsem fasin blong “stilim olting blong wido.” (Mak 12:40) Nao Jisas i sidaon. I luk olsem se hemia long Rum blong ol Woman, from we, folem kastom blong ol man Jyu, i gat 13 bokis blong presen mane long ples ya. Hem i sidaon blong smoltaem, mo hem i stap lukluk ol man we oli putum presen mane i go long ol bokis ya. Plante rijman oli kam, ating sam long olgeta oli stap traem blong soem se oli stret man, maet oli stap mekem flas nomo. (Skelem wetem Matiu 6:2.) Jisas i lukluk longtaem long wan woman. Maet ol narafala man oli no bin luk se woman ya mo presen we hem i givim, oli spesel. Be, Jisas i naf blong luksave wanem i stap long hat blong ol man, taswe hem i save se woman ya i ‘wan wido we i pua.’ Hem i save tu, hamas mane stret we wido ya i putum long bokis—‘tu smol mane we i olsem ten vatu nomo.’—Mak 12:41, 42.
17 Jisas i singaot ol disaepol blong hem oli kam, from we hem i wantem se oli lukluk samting ya we bambae hem i yusum blong tijim wan lesen long olgeta. Jisas i talem se: “Woman ya i sakem kleksin blong hem, i antap moa long ol mane ya we ol narafala man ya oli sakem.” Long tingting blong Jisas, woman ya i givim moa mane i bitim ol narafala man tugeta. Hem i givim “olgeta mane blong hem”—hemia laswan mane blong hem. Long rod ya, hem i putum laef blong hem i stap long han blong Jeova, blong i lukaot long hem. Taswe, woman ya we Jisas i yusum blong soemaot nambawan fasin blong givim presen i go long God, presen blong hem i smol we i smol, kolosap i nating nomo. !Be long tingting blong God, presen ya i sas tumas!—Mak 12:43, 44; Jemes 1:27.
w97 15/10 pej 17 haf 17
Jeova i Tinghae Tumas Long Wok We Yu Yu Mekem Wetem Ful Laef Blong Yu
17 Jisas i singaot ol disaepol blong hem oli kam, from we hem i wantem se oli lukluk samting ya we bambae hem i yusum blong tijim wan lesen long olgeta. Jisas i talem se: “Woman ya i sakem kleksin blong hem, i antap moa long ol mane ya we ol narafala man ya oli sakem.” Long tingting blong Jisas, woman ya i givim moa mane i bitim ol narafala man tugeta. Hem i givim “olgeta mane blong hem”—hemia laswan mane blong hem. Long rod ya, hem i putum laef blong hem i stap long han blong Jeova, blong i lukaot long hem. Taswe, woman ya we Jisas i yusum blong soemaot nambawan fasin blong givim presen i go long God, presen blong hem i smol we i smol, kolosap i nating nomo. !Be long tingting blong God, presen ya i sas tumas!—Mak 12:43, 44; Jemes 1:27.
w87 1/12 pej 30 haf 1
?Presen We Yu Givim i Wan Sakrefaes?
Yumi save lanem plante impoten lesen long stori ya. Wan we i impoten moa, hemia se yumi evriwan i gat blesing ya blong sapotem tru wosip taem yumi givim ol sas samting blong yumi, we i sas tumas long ae blong God, i no samting we yumi save givim we yumi ting se i nating nomo be yumi givim samting we i impoten long yumi. Wan nara tok se ?yumi givim samting we bae yumi no rili ting se bae yumi misim? O ?Yumi givim olsem wan ril sakrefaes?
cl pej 185 haf 15
Waes We i Stap Long “Tok Blong God”
15 I impoten blong luk se aot long olgeta man we oli kam long tempol long dei ya, Baebol i tokbaot wido woman ya nomo. Jehova i yusum eksampol ya blong tijim yumi se hem i wan God we i glad long samting we yumi givim long hem. Hem i glad taem yumi givim presem wetem fulhat blong yumi, nomata se man i skelem wetem wanem we narafala i givim. !Hemia wan gudfala rod we Jehova i yusum blong tijim yumi long nambawan trutok ya!
Traem Faenem Ol Gudfala Samting Ya
nwtsty not blong stadi long Mk 11:17
haos blong prea blong olgeta man long ol neson: Long ol trifala Gospel we oli tokbaot bakegen tok blong Aes 56:7, Mak nomo we i raetem long en blong tok ya se, “blong olgeta man long ol neson.” (Mt 21:13; Lu 19:46) Haos tempol long Jerusalem, hem i wan ples we ol man Isrel mo ol man blong narafala kantri, oli save kam long hem blong mekem wosip mo presem Jehova. (1Ki 8:41-43) Jisas i tok strong agensem ol man Jiu we oli yusum tempol blong mekem bisnes mo mekem i kam wan ples blong haed blong ol stil man. Fasin blong olgeta i mekem se ol man oli no moa intres blong kam klosap long Jehova, long haos prea blong hem, mo i blokem ol man long janis we oli gat, blong save Jehova.
jy pej 244 haf 7
Wan Figtri We i Blong Tijim Yumi Long Saed Blong Bilif
I no longtaem, Jisas mo ol disaepol blong hem oli go long Jerusalem. Jisas i go long haos tempol mo i stat blong tijim ol man, olsem we hem i stap mekem oltaem. Nao ol jif pris mo ol elda, oli stap tingbaot samting we Jisas i bin mekem long ol man blong jenisim mane, long dei bifo. Ale oli askem kwestin blong traem hem, oli se: “?Yu yu gat wanem raet blong mekem ol samting ya? ?Hu i givim raet ya long yu blong mekem ol samting ya?”—Mak 11:28.
28 MEI–3 JUN
OL GUDGUDFALA SAMTING LONG BAEBOL | MAK 13-14
“Blokem Trap Ya Blong Fraet Long Man”
ia pej 200 haf 14
Hem i Lanem Fasin Blong Fogif Long Masta
14 Pita i haed mo i wokbaot sloslo i go kasem get blong wan bigfala haos long Jerusalem. Hemia haos blong Kaeafas, wan hae pris we i rij mo i gat bigfala paoa. Ol kaen haos olsem, oli gat wan yad we i goraon long olgeta. Pita i wokbaot i go kasem get blong yad ya, mo i stop, i no go insaed. Nao Jon, we i save hae pris ya mo i stap insaed finis long yad, hem i kam luk man blong lukaot long get blong i letem Pita i kam insaed. I luk olsem se Pita i no go klosap tumas long Jon, mo hem i no traem blong go insaed long haos, blong stanap long saed blong Masta blong hem. Hem i stap nomo long yad, klosap long wan faea we sam slef mo sam wokman oli stap wom long hem. Olgeta ya, oli stap lukluk ol giaman witnes, we oli go insaed long haos blong talem ol giaman poen agens long Jisas.—Mak 14:54-57; Jon 18:15, 16, 18.
it-2 pej 619 haf 6
Pita
Wan narafala disaepol i givhan long Pita blong i go insaed long yad blong haos blong hae pris. (Jon 18:15, 16) Pita i no haed long wan smol kona o traem blong mekem se man i no luksave hem, be hem i go klosap long faea mo i stap wom. Laet blong faea i mekem ol narafala oli luksave se hem i wan fren blong Jisas, mo tu oli luksave samting ya from fasin blong toktok blong hem i olsem ol man Galili. Ale oli talem samting ya long Pita, be hem i giaman tri taem se hem i no save Jisas, biaen hem i mekem strong toktok blong sapotem giaman blong hem. Nao wan faol i singaot nambatu taem, mo Jisas i “tanem hem, i lukluk stret long Pita.” Nao Pita i go afsaed, i harem nogud tumas mo i krae we i krae. (Mt 26:69-75; Mk 14:66-72; Lu 22:54-62; Jon 18:17, 18) Be God i ansa long prea we Jisas i bin mekem finis from Pita, mo bilif blong Pita i no foldaon fulwan.—Lu 22:31, 32.
Traem Faenem Ol Gudfala Samting Ya
w08 1/2 pej 32 haf 6
Ol Bigfala Poen Long Buk Blong Mak
14:51, 52—?Hu ya man ya we i “ronwe we i neked nomo”? Mak nomo i talem stori ya. Taswe, yumi save talem se man ya hemia Mak nomo.
jy pej 287 haf 4
Oli Tekem Jisas i Go Long Anas, Mo Biaen Long Kaeafas
Kaeafas i save se ol man Jiu oli kam kros taem wan man i talem se hem i pikinini blong God. I bin gat wan taem we Jisas i talemaot se God i Papa blong hem, nao ol man Jiu oli wantem kilim hem i ded, from we oli talem se “hem i mekem hem i sem mak nomo wetem God.” (Jon 5:17, 18; 10:31-39) Nao from we Kaeafas i save samting ya, hem i askem long Jisas se: “!Long nem blong God ya we i laef, yu talem stret long mifala! ?Yu yu Kraes ya we i Pikinini blong God?” (Matiu 26:63) I tru, Jisas i soemaot stret se hem i pikinini blong God. (Jon 3:18; 5:25; 11:4) Sipos hem i no mekem olsem, hemia i min se hem i stap giaman se hem i Pikinini blong God mo hem i Kraes. Taswe Jisas i se: “Yes, mi ya nao. Mo bambae yufala i luk Pikinini blong man i stap sidaon long raet saed blong Man ya we i gat Olgeta Paoa, mo hem i stap kam long ol klaod long skae.”—Mak 14:62.