Refrens blong Kristin Wok Mo Laef Buk Blong Miting
3-9 DISEMBA
OL GUDGUDFALA SAMTING LONG BAEBOL | OL WOK 9-11
“Wan Man Blong Agens i Kam Wan Man Blong Prij”
(Ol Wok 9:1, 2) Nao Sol i gohed yet blong mekem ol disaepol blong Masta oli fraet, mo hem i wantem tumas blong kilim olgeta oli ded. Ale hem i go luk hae pris, 2 mo i askem long hem blong i raetem sam leta i go long ol sinagog long Damaskes, se bambae hem i go holem eni man mo woman we oli stap folem Rod Blong Masta, i fasem olgeta mo i tekem olgeta oli kam long Jerusalem.
bt pej 60 haf 1-2
Kongregesen i “Stap Gud We i No Moa Gat Man i Spolem Olgeta”
WAN grup blong man i stap kam klosap long Damaskes, mo oli plan blong mekem wan samting we i nogud. Oli wantem tekemaot ol disaepol blong Jisas long haos blong olgeta, oli tekem olgeta oli kam wanples, mekem olgeta oli sem, mo tekem olgeta i go long hae kot blong Sanhedrin we i stap long Jerusalem blong i panisim olgeta.
2 Sol, we i lida blong grup ya, i gat fol finis from ded blong wan man. Hem i agri blong ol man oli stonem Steven i ded, we i wan gudfala disaepol blong Jisas i ded. (Ol Wok 7:57–8:1) Sol i no stap spolem nomo ol man blong Jisas we oli laef long Jerusalem, hem i go tu long ol narafala ples we i gat ol disaepol, blong i spolem olgeta. Hem i wantem tumas blong finisim olgeta we oli stap folem “Rod Blong Masta.”—Ol Wok 9:1, 2.
(Ol Wok 9:15, 16) Be Masta i talem long hem se: “!Yu go! Mi mi jusum man ya blong hem i karem nem blong mi i go long ol neson mo long ol king mo long ol man Isrel. 16 Bambae mi soemaot klia long hem ol hadtaem we bambae hem i mas kasem from nem blong mi.”
Yumi Glad Se Jehova i Olsem Man Blong Wokem Graonpot
4 Fasin blong Jehova blong lukluk man i no olsem fasin blong man. Jehova i stap lukluk hat blong man blong luk se hem i wanem kaen man. (Ridim 1 Samuel 16:7.) Jehova i soemaot samting ya, taem hem i stanemap Kristin kongregesen. Hem i pulum plante man we ol man oli ting nating long olgeta, blong oli kam long hem mo pikinini blong hem. (Jon 6:44) Wan long ol man ya hemia Sol we hem i wan Farisi, mo hem i ‘stap tok agens long God, mo i stap mekem i nogud long God, mo i stap tok nogud long God blong spolem hem.’ (1 Timoti 1:13) Be Jehova i luk hat blong Sol, mo i no luk hem olsem wan graon we i blong sakem nomo. (Ol Proveb 17:3) Be, Jehova i luk se Sol i save jenis i kam wan man we hem i “jusumaot” blong prij “long ol man we oli no laen blong Isrel, mo long ol king, mo long ol laen blong Isrel tu.” (Ol Wok 9:15) Mo tu, Jehova i jusum sam narafala we hem i save jenisim olgeta oli kam olsem ol gudfala graonpot we i “blong yusum long spesel taem.” Hemia olgeta we oli stap dring bitim mak, oli stap mekem rabis fasin blong man wetem woman, mo oli stap stil. (Rom 9:21; 1 Korin 6:9-11) Taem olgeta oli gohed blong stadi long Baebol, mo mekem bilif blong olgeta i kam strong moa, bambae oli letem Jehova i jenisim fasin blong olgeta.
(Ol Wok 9:20-22) Mo wantaem nomo hem i stat blong prij long ol sinagog, i stap talemaot se Jisas i Pikinini blong God. 21 Be olgeta man we oli harem hem, oli sapraes tumas, oli stap talem se: “!Man! ?I no man ya nao we i stap spolem ol man long Jerusalem we oli stap singaot long nem ya Jisas? ?Mo i kam long ples ya blong arestem ol man olsem mo tekem olgeta oli gobak long ol jif pris?” 22 Be toktok blong Sol i stap kam strong moa, mo ol man Jiu we oli stap long Damaskes oli sapraes tumas, from we hem i stap pruvum klia long olgeta se Jisas ya hem i Kraes.
bt pej 64 haf 15
Kongregesen i “Stap Gud We i No Moa Gat Man i Spolem Olgeta”
15 Taem Sol i stat blong prij long ol sinagog mo i tokbaot Jisas, ol man Jiu oli sapraes mo oli kam kros long hem. Ale oli stap asaskem se: “?I no man ya nao we i stap spolem ol man long Jerusalem we oli stap singaot long nem ya Jisas?” (Ol Wok 9:21) Taem Sol i eksplenem se hem i jenisim tingting blong hem long saed blong Jisas, hem “i stap pruvum klia long olgeta se Jisas ya hem i Kraes.” (Ol Wok 9:22) Be i no evri taem we man i bilivim samting we hem i harem, nating sipos i gat pruf. Sam man oli praod mo oli strong blong folem kastom blong olgeta. Nating se i olsem, Sol i gohed nomo.
Traem Faenem Ol Gudfala Samting Ya
(Ol Wok 9:4) nao hem i foldaon long graon, mo i harem wan voes we i talem se: “Sol, Sol. ?From wanem yu stap mekem i nogud long mi?”
bt pej 60-61 haf 5-6
Kongregesen i “Stap Gud We i No Moa Gat Man i Spolem Olgeta”
5 Taem Jisas i kamtru long Sol long rod we i go long Damaskes, hem i no askem se: “?From wanem yu stap mekem i nogud long ol disaepol blong mi?” Be hem i askem se: “?From wanem yu stap mekem i nogud long mi?” (Ol Wok 9:4) Jisas i talem tok ya, from we taem man i mekem i nogud long ol disaepol, be i olsem we hem i mekem i nogud long Jisas.—Mat 25:34-40, 45.
6 Sipos narafala i agensem yu from yu bilif long Kraes, i gud yu tingbaot se Jehova mo Jisas i save samting ya. (Mat 10:22, 28-31) Maet God bambae i no tekemaot trabol blong yu naoia, olsem we i hapen long Steven. Traem tingbaot, Jisas i bin luk samting we i hapen long Steven mo samting we Sol i mekem long ol disaepol long Jerusalem. (Ol Wok 8:3) Be hem i no blokem samting ya. Nating se i olsem, Jehova i yusum Jisas blong i givim paoa long Steven mo ol narafala disaepol, blong oli gohed blong holemstrong long Hem.
(Ol Wok 10:6) Hem i stap long haos blong wan man we i stap draemap skin blong ol anamol, nem blong hem Saemon. Haos ya i stap klosap long solwota.”
nwtsty not blong stadi long Wok 10:6
Saemon, wan man blong draemap skin blong ol anamol: Man we i stap draemap skin blong ol animol, i yusum laem wetem sam narafala samting blong tekemaot ol hea, ol mit, mo ol gris we i fas long skin blong animol. Biaen, hem i yusum sam spesel wota we oli olsem kemikol, blong mekem skin ya i rere blong oli save wokem ol defren samting long hem. I nidim plante wota blong mekem samting ya, speseli taem kala blong skin i stap jenis i kam braon, mo hemia i save mekem ples i smel nogud. Ating hemia nao from wanem Saemon i go stap klosap long solwota, aotsaed long Jopa. Loa Blong Moses i talem se man we i tajem dedbodi blong animol hem i no klin long fes blong God. (Le 5:2; 11:39) Taswe, plante man Jiu oli luk daon long ol man we oli stap draemap skin blong ol anamol, mo oli no save go stap long haos blong olgeta. Long buk ya Talmud, oli talem se wok blong man we i stap draemap skin blong ol anamol, i daon moa long wok blong man we i stap pikimap sitsit blong ol anamol. Nating se i olsem, Pita i no letem ol tingting ya oli blokem hem blong i no go stap wetem Saemon. Gudfala tingting blong Pita i rerem hem from nekiswan wok we bambae hem i mekem, hemia blong visitim ol man we oli no man Jiu. Sam man we oli stadi dip long Baebol oli talem se, Grik tok ya (byr·seusʹ) we oli tanem i kam “man we i stap draemap skin blong anamol,” i minim famle nem blong Saemon.
10-16 DISEMBA
OL GUDGUDFALA SAMTING LONG BAEBOL | OL WOK 12-14
“Banabas Mo Pol Oli Prij Long Ol Ples Farawe”
(Ol Wok 13:2, 3) Wan taem, taem oli stap mekem wosip long Jehova mo oli stap livim kakae, tabu spirit i talem se: “Yufala i putumap Banabas mo Sol blong tufala i mekem wok we mi mi singaot tufala blong mekem.” 3 Ale oli livim kakae mo oli prea, nao biaen oli putum han blong olgeta long tufala mo oli sanem tufala i go.
bt pej 86 haf 4
‘Oli Glad Tumas Mo Tabu Spirit i Fulap Long Olgeta’
4 ?From wanem tabu spirit i lidim ol brata blong oli putumap Banabas mo Sol blong tufala i “mekem wok”? (Ol Wok 13:2) Baebol i no talem. Be yumi save se tabu spirit nao i lidim ol brata blong oli jusumaot tufala. I nogat wan vas we talem se ol profet mo ol tija long Antiok oli no agri long desisen ya. Defren olgeta, oli no jalus be oli sapotem desisen ya fulwan. Traem tingbaot filing blong Banabas mo Sol, taem ol brata “oli livim kakae mo oli prea, nao biaen oli putum han blong olgeta long tufala mo oli sanem tufala i go.” (Ol Wok 13:3) Yumi tu yumi mas sapotem olgeta we oli stap kasem ol tiokratik wok, olsem ol elda long kongregesen. Yumi no mas jalus long olgeta, be yumi ‘mas lavem olgeta mo yumi mas gat bigfala ona long olgeta from wok we oli mekem.’—1 Tes. 5:13.
(Ol Wok 13:12) Nao taem hed gavman i luk samting ya, hem i kam wan man blong bilif, from we hem i sapraes long tijing blong Jehova.
(Ol Wok 13:48) Taem ol man blong ol narafala neson oli harem samting ya, oli glad tumas mo oli stap leftemap tok blong Jehova. Mo olgeta we oli stret blong kasem laef we i no save finis, oli kam ol man blong bilif.
(Ol Wok 14:1) Long Ikoniam, tufala i go insaed long sinagog blong ol man Jiu, mo tufala i prij we tok blong tufala i gud tumas, nao wan bigfala hip blong ol man Jiu mo ol man Gris oli kam man blong bilif.
bt pej 95 haf 5
‘Jehova i Givim Paoa Blong Tufala i No Fraet Blong Toktok’
5 Pol mo Banabas i stop fastaem long Ikoniam, hemia wan eria we plante man oli stap folem kastom blong ol man Gris, mo i wan long ol bigfala taon blong Rom long provins blong Galesia. I gat plante man Jiu long taon ya wetem ol proselaet. Folem kastom blong olgeta, Pol mo Banabas oli go insaed long sinagog mo oli stat blong prij. (Ol Wok 13:5, 14) Pol mo Banabas “i prij we tok blong tufala i gud tumas, nao wan bigfala hip blong ol man Jiu mo ol man Gris oli kam man blong bilif.”—Ol Wok 14:1.
(Ol Wok 14:21, 22) Afta we tufala i talemaot gud nius long taon ya mo tufala i pulum plante man lelebet oli kam disaepol, tufala i gobak long Listra, mo long Ikoniam, mo long Antiok. 22 Long ples ya, tufala i mekem ol disaepol oli kam strong mo tufala i pulum olgeta blong oli bilif oltaem. Tufala i stap talem se: “Yumi mas gotru long plante trabol, blong yumi save go insaed long Kingdom blong God.”
w14 15/9 pej 10 haf 4-5
Yumi No Lego Jehova Nating Se Yumi Kasem “Plante Trabol”
4 Afta we Pol mo Banabas i go long Debe, “tufala i tanemraon, tufala i kambak long Listra, nao biaen, tufala i aot long ples ya, tufala i kambak long Ikoniam, nao biaen bakegen, tufala i kambak long Antiok ya long Pisidia. Mo long ol ples ya, tufala i stap mekem tingting blong ol man blong Jisas i strong moa, mo tufala i stap givim tok long olgeta blong mekem olgeta oli stanap strong long bilif blong olgeta. Tufala i stap talem se: ‘Long rod blong go insaed long niufala wol ya we God i king long hem, yumi save kasem plante trabol, be nating, yumi mas stanap strong.’ (Ol Wok 14:21, 22) Tok we Pol mo Banabas i talem se bambae yumi kasem “plante trabol” i no leftemap tingting nating. Taswe, ?olsem wanem tufala i “mekem tingting blong ol man blong Jisas i strong moa”?
5 Yumi save faenem ansa blong kwestin ya long tok we Pol i talem se: “Long rod blong go insaed long niufala wol ya we God i king long hem, yumi save kasem plante trabol, be nating, yumi mas stanap strong.” Hem i no talem nomo se: “Yumi mas “stanap strong” long ol trabol we yumi fesem. Defren olgeta, Pol i talemaot klia, ol blesing we olgeta we oli holemstrong long God bambae oli kasem. Blesing ya i no wan drim. Jisas i talem se: ‘Man we i stanap strong gogo kasem en, bambae God i sevem hem.’—Matiu 10:22.
Traem Faenem Ol Gudfala Samting Ya
(Ol Wok 12:21-23) Nao long wan spesel dei, Herod i werem ol flas klos blong king, mo i go sidaon long ples blong jajem ol man, nao hem i stat blong toktok long ol man. 22 Ale ol man we oli hivap long ples ya, oli singaot bigwan se: “!Hemia voes blong god stret ya, i no blong man!” 23 Nao wantaem nomo, enjel blong Jehova i kilim hem from we hem i no leftemap nem blong God. Mo ol wom oli kakae hem nao hem i ded.
w08 1/5 pej 32 haf 6
Ol Bigfala Poen Long Buk Blong Ol Wok
12:21-23; 14:14-18. Herod i glad blong kasem ona ya we i sud go long God nomo. !Fasin blong Pol mo Banabas i defren olgeta! !Tufala i soem long fasin mo long toktok blong tufala se tufala i no wantem nating we ol man oli leftemap mo givim ona long tufala! Nomata wanem gudfala wok we yumi mekem blong Jehova, be yumi no mas wantem blong ol man oli leftemap yumi from.
(Ol Wok 13:9) Nao tabu spirit i kam fulap long Sol we narafala nem blong hem Pol, nao hem i lukluk strong long kleva ya,
nwtsty ol not blong stadi long Wok 13:9
Sol we narafala nem blong hem Pol: Stat long taem ya, oli singaot Sol se, Pol. Papa mo mama blong hem tufala i man Hibru. Taswe, hem i wan Hibru taem hem i bon, mo biaen hem i tekem sitisen blong Rom. (Wok 22:27, 28; Fil 3:5) I luk olsem se taem hem i smol, oli givim tu nem long hem. Nem long lanwis Hibru hemia Sol mo nem long lanwis Rom hemia Pol. Long taem ya, ol man Jiu we oli stap long defren kantri oli gat wan nem nomo. (Wok 12:12; 13:1) I gat sam famle blong Pol tu we oli gat wan nem long Rom mo wan nem long lanwis Grik. (Ro 16:7, 21) From we Pol i “wan aposol long ol neson,” hem i gat wok ya blong talemaot gud nius long ol man we oli no ol Jiu. (Ro 11:13) Taswe, hem i yusum nem blong hem blong Rom, olsem nao ol man bambae oli glad moa blong lesin long hem. (Wok 9:15; Ga 2:7, 8) Samfala oli talem se hem i yusum nem ya blong soem ona long Sejas Polas, be i luk olsem se hem i yusum nem ya finis afta we hem i aot Saepras. Sam narafala oli talem se Pol i no wantem yusum Hibru nem ya from we wei blong talem tok ya i sem mak long Grik tok we i blong tokbaot wan man (o wan anamol) we i wokbaot long wan fasin we i soem se hem i praod.—Yu luk not blong stadi long Wok 7:58.
Pol: Long Grik haf blong Baebol, nem ya Pauʹlos, we long Latin oli se Paulus, i minim “Smol.” Mo oli yusum 157 taem, blong tokbaot aposol Pol, mo wan taem oli yusum blong tokbaot hed gavman blong Saepras, hemia Sejas Polas.—Wok 13:7.
17-23 DISEMBA
OL GUDGUDFALA SAMTING LONG BAEBOL | OL WOK 15-16
“Wan Desisen We i Folem Tok Blong God”
(Ol Wok 15:1, 2) Nao sam man oli aot long Juda oli kam long Antiok, oli stat blong tijim ol brata, se: “Sipos yufala i no sakomsaes olsem we Loa blong Moses i talem, bambae God i no save sevem yufala.” 2 Nao Pol mo Banabas wetem olgeta ya, oli stap agiu from samting ya mo oli toktok plante from. Ale ol brata oli mekem rod blong Pol mo Banabas mo sam narafala tu oli go long Jerusalem, blong luk ol aposol mo ol elda from bisnes ya.
bt pej 102-103 haf 8
‘Oli Stap Agiu Mo Oli Stap Toktok’
8 Luk i gohed se: “Pol mo Banabas wetem olgeta ya, oli stap agiu from samting ya mo oli toktok plante from. Ale ol brata [ol elda] oli mekem rod blong Pol mo Banabas mo sam narafala tu oli go long Jerusalem, blong luk ol aposol mo ol elda from bisnes ya.” (Ol Wok 15:2) Tok ya ‘agiu mo toktok plante’ i soemaot se hemia i no wan smol rao, tugeta saed i strong, mo kongregesen long Antiok i no save stretem bisnes ya. Taswe, blong holemtaet pis mo fasin joengud, kongregesen i sanem Pol mo Banabas i go “long Jerusalem, blong luk ol aposol mo ol elda,” we hemia hed kampani blong oli save stretem bisnes ya. ?Yumi lanem wanem long fasin blong ol elda long Antiok?
(Ol Wok 15:13-20) Taem tufala i toktok finis, Jemes i talem se: “Ol brata. Yufala i lesin long mi. 14 Simion i talemaotgud finis olsem wanem God i lukluk i go long ol man blong ol neson, blong hem i tekemaot sam long olgeta blong oli karem nem blong hem. 15 Mo samting ya i stret nomo long tok blong ol profet, we oli raetem long Baebol, se: 16 ‘Afta long ol samting ya, bambae mi kambak mo mi stanemap bakegen haos tapolen blong Deved we i foldaon finis. Bambae mi wokem gud ol ples we oli brokbrok mo mi stanemap bakegen, 17 blong mekem se ol man we oli stap yet, wetem ol man blong olgeta neson, yes ol man we oli holem nem blong mi, oli save lukaot Jehova. Hemia tok blong Jehova we i mekem olgeta samting ya, 18 we ol man bifo oli save.’ 19 Taswe, tingting blong mi se yumi no mas mekem i had long ol man blong ol neson we oli kam man blong God. 20 Be yumi mas raet i go long olgeta se oli mas stap longwe long ol samting we ol aedol oli mekem i kam doti. Mo oli mas stap longwe long enikaen doti fasin blong seks. Mo oli no mas kakae ol anamol we oli jokem nek blong olgeta, mo oli no mas kakae blad.
Ol Tru Kristin Oli Tinghae Long Tok Blong God
6 Ol tok blong Amos 9:11, 12 i givhan long olgeta blong stretem problem ya. Yumi ridim ol tok ya bakegen long buk blong Ol Wok 15:16, 17, Nyutesteman wetem Ol Sam long Bislama (NTB). Hem i talem se: “Bambae mi mi kambak bakegen. Bambae mi wokem haos ya blong Deved we i foldaon finis, i gud bakegen. Haos ya i kam nogud finis, be bambae mi mi wokem bakegen, bambae mi mi stanemap bakegen. Nao ol narafala man olbaot long wol, mo ol hiten man ya [“ol man we oli stap yet, wetem ol man blong ol narafala kantri,” NW] we mi mi singaot olgeta finis, blong oli holem nem blong mi, bambae olgeta ya oli lukaot mi ya, we mi mi Hae God.”
7 Samfala oli talem se vas ya i no tokbaot se ol man blong narafala laen we oli wantem kam Kristin, oli no mas sakomsaes. Yes i tru. Be taem ol man Jiu we oli Kristin oli ridim vas ya, oli kasem save se bambae ol man blong narafala laen oli no nid blong sakomsaes. ?From wanem? From we ol man Jiu we oli Kristin oli luk ol man blong narafala laen we oli sakomsaes olsem ol brata blong olgeta. Oli no tingbaot olgeta se oli man blong narafala laen, olsem we vas ya i talem. (Eks. 12:48, 49) Esta 8:17 long Septuagint Baebol we Masta Bagster i wokem, i talem se: “Plante man blong narafala laen oli sakomsaes, mo oli kam ol man Jiu.” “Ol man we oli stap yet,” hemia olgeta we oli blong haos blong Isrel. Olgeta ya oli ol man Jiu mo ol man blong narafala laen we oli sakomsaes mo oli joen wetem ol man Jiu long wosip. Baebol i talem se bambae oli joen wetem “ol man blong ol narafala kantri,” no ol man blong narafala laen we oli no sakomsaes, blong evriwan oli holem nem blong God. Taswe ansa blong Baebol i klia. Ol man blong narafala laen we oli wantem kam Kristin, oli no nid blong sakomsaes.
(Ol Wok 15:28, 29) Tabu spirit i givhan long mifala blong kasem save se i nogud blong ademap sam moa baden long yufala. Be hemia nomo sam impoten samting we yufala i mas mekem: 29 Yufala i mas stap longwe long ol sakrefaes we oli givim i go long ol aedol. Mo yufala i no mas kakae blad mo ol anamol we oli jokem nek blong olgeta. Mo yufala i mas stap longwe long enikaen doti fasin blong seks. Sipos yufala i lukaot gud mo yufala i stap longwe long ol samting ya, bambae yufala i gat gudfala laef. !Hemia en blong tok blong mifala!”
(Ol Wok 16:4, 5) Nao taem oli stap gotru long ol taon, oli stap talemaot long ol brata, ol loa ya we ol aposol mo ol elda long Jerusalem oli bin putum blong oli folem. 5 Nao bilif blong ol kongregesen i stap kam strong moa, mo evri dei namba blong olgeta i stap kam antap moa.
bt pej 123 haf 18
‘Mekem Ol Kongregesen Oli Kam Strong’
18 Pol mo Timoti i wok tugeta blong plante yia. Hed kampani i yusum tufala blong mekem wok long ol defren ples. Baebol i talem se: “Taem oli stap gotru long ol taon, oli stap talemaot long ol brata, ol loa ya we ol aposol mo ol elda long Jerusalem oli bin putum blong oli folem.” (Ol Wok 16:4) Blong talem stret, ol kongregesen oli folem samting we ol aposol mo ol elda long Jerusalem oli talem. Mo from samting ya, “bilif blong ol kongregesen i stap kam strong moa, mo evri dei namba blong olgeta i stap kam antap moa.”—Ol Wok 16:5.
Traem Faenem Ol Gudfala Samting Ya
(Ol Wok 16:6-9) Nao oli gotru long ol ples ya Frijia mo Galesia, from we tabu spirit i blokem olgeta blong oli no talemaot tok blong God long provins ya Esia. 7 Mo taem oli godaon long Misia, oli traehad blong go long Bitinia, be spirit blong Jisas i no letem olgeta. 8 Nao oli pastru long Misia mo oli kamdaon long Troas. 9 Long naet, Pol i luk wan vison. Hem i luk wan man Masedonia i stap stanap, i stap askem long hem se: “Plis yu kamkros long Masedonia, yu givhan long mifala.”
Fasin Blong Ol Aposol Blong Jisas i Tijim Yumi Blong Lukaot Gud
8 ?Yumi lanem wanem long stori ya? Yumi makem se spirit blong God i stat blong lidim Pol afta we Pol i stat blong folem rod we i go long Esia. Biaen, Jisas i givim moa save blong lidim Pol, afta we hem i kam klosap long Bitinia. Mo Jisas i lidim Pol i go long Masedonia afta we Pol i kasem Troas. Jisas i hed blong kongregesen tede tu, mo maet hem i lidim yumi olsem we i mekem long Pol. (Kol. 1:18) Maet yu stap tingbaot blong mekem wok blong paenia, no blong muv i go long ples we i nidim moa man blong talemaot gud nius. Be maet afta nomo we yu traehad blong kasem mak we yu putum, bambae Jisas i yusum spirit blong God blong lidim yu. I olsem taem wan man i stap draevem trak. Man ya i save tanem trak blong hem i go long lefsaed no long raetsaed, sipos trak i stap ron. Long sem fasin, Jisas i save lidim yumi blong mekem moa long wok blong prij, sipos yumi traehad blong kasem mak we yumi putum.
(Ol Wok 16:37) Be Pol i talem long olgeta se: “Olgeta ya oli no jajem mitufala yet be oli wipim mitufala long fes blong ol man, nating se mitufala i sitisen blong Rom, mo oli sakem mitufala long kalabus. ?Be naoia oli wantem kikimaot mitufala long fasin haed? !Nogat! Olgeta nomo oli mas kam tekem mitufala i goaot.”
nwtsty not blong stadi long Wok 16:37
mitufala i sitisen blong Rom: Pol mo Saelas oli ol sitisen blong Rom. Loa blong ol man Rom i talem se, yu no save panisim wan man we i sitisen blong Rom sipos hem i no pas long kot yet, mo yu no save panisim hem long fored blong ol man sipos i nogat poen agens long hem. Ol man we oli sitisen blong Rom, oli gat raet long ol samting taem oli go long ol narafala taon we Rom i rul long olgeta. Wan Sitisen blong Rom i folem ol loa blong Rom, be i no loa blong ol narafala taon we Rom i no rul long olgeta. From samting ya, taem wan man blong narafala kantri i traem blong putum wan sitisen blong Rom long kot, oltaem kot blong Rom bambae i tekem saed blong man we i sitisen blong Rom. Be sipos oli talem se hem mas ded, man ya i gat raet blong apil i go long hedgavman. Aposol Pol i bin prij plante long taon blong Rom. Mo hem i tekem janis ya, blong yusum raet blong hem olsem wan sitisen blong Rom, long tri defren taem. Faswan hemia long Filipae, taem hem i talemaot long jaj blong Filipae se oli agensem loa blong Rom taem oli kilim hem.—Blong save tufala narafala taem, yu luk ol not blong stadi long Wok 22:25; 25:11.
24-30 DISEMBA
OL GUDGUDFALA SAMTING LONG BAEBOL | OL WOK 17-18
“Folem Fasin Blong Pol Blong Prij Mo Tij”
(Ol Wok 17:2, 3) Nao olsem we Pol i stap mekem oltaem, hem i go insaed long sinagog ya, mo long tri Sabat dei, hem i stap toktok plante long ol man, i askem kwestin long olgeta blong mekem oli tingting gud long ol tok blong Baebol. 3 Mo hem i yusum Baebol blong eksplenem mo pruvum long olgeta se Kraes i mas safa mo biaen i mas laef bakegen. Hem i talem se: “Jisas ya we mi stap talemaot long yufala, hem nao Kraes ya.”
nwtsty ol not blong stadi long Wok 17:2, 3
askem kwestin blong mekem oli tingting: Pol i no jes talemaot gud nius nomo long olgeta. Hem i eksplenem mining blong ol toktok mo i yusum ol tok blong Baebol, hemia Hibru haf blong Baebol, blong pruvum tok we hem i stap talemaot. Hem i ridim Baebol mo i askem kwestin blong mekem olgeta oli tingting gud. Grik tok ya di·a·leʹgo·mai i minim “joen long wan storian; toktok mo askem kwestin; tokbaot wan samting.” Grik tok ya i stap tu long Wok 17:17; 18:4, 19; 19:8, 9; 20: 7, 9.
Yusum Baebol blong pruvum: Grik tok we oli yusum long vas ya, i minim “putum klosap long hem.” Hemia i givim tingting se Pol i yusum ol vas blong Hibru haf blong Baebol we oli tokbaot Mesaea mo i skelem wetem ol samting we oli hapen long laef blong Jisas, blong soemaot se Jisas nao i Mesaea we ol profet oli tokbaot hem bifo, mo hem nao i mekem ol profet tok long saed blong Mesaea oli kamtru.
(Ol Wok 17:17) Nao hem i go long sinagog, i stap toktok plante mo i askem plante kwestin long ol man Jiu mo ol narafala man we oli stap mekem wosip long God, blong mekem oli tingting. Mo evri dei, hem i mekem sem samting long ol man we hem i mitim olgeta long ples blong maket.
nwtsty not blong stadi long Wok 17:17
ples blong maket: Hemia long not wes blong Akropolis, long Atens (long lanwis Grik, a·go·raʹ) we i kavremap wan eria blong 5 hekta (12 ac) o moa. Long ples blong maket, oli no jes salem kakae nomo, be hemia stamba ples blong mekem ol narafala bisnes, wok blong politik, mo mekem ol samting we i joen wetem kalja blong ol man long ples ya. Ol man Atens oli laekem blong kam wanples long pablik ples ya mo tokbaot ol niufala save.
(Ol Wok 17:22, 23) Nao Pol i stanap long medel blong Areopagus mo i talem se: “Ol man Atens. Mi mi luk we long evri samting, yufala i strong moa blong mekem wosip long ol god i bitim ol narafala man. 23 Taem mi stap wokbaot, mi luklukgud ol samting we yufala i stap wosipim, nao mi luk wan olta we oli raetem tok ya long hem se, ‘Blong Wan God We Mifala i No Save Hem.’ God ya we yufala i no save hem be yufala i stap wosipim, hem nao God ya we mi stap talemaot long yufala.
nwtsty not blong stadi long Wok 17:22, 23
Blong Wan God We Mifala i No Save Hem: Ol Grik tok ya A·gnoʹstoi the·oiʹ oli ol haf blong toktok we oli raetem long wan olta long Atens. Ol man Atens oli soemaot se oli fraet long ol god, hemia taem oli wokem plante tempol mo olta, mo tu oli wokem olta blong ol god we oli pijarem nomo, olsem god blong Haenem, Tingting Daon, Paoa, Leftemap Tingting, mo Sore. Maet oli mekem olsem from we oli fraet se bambae oli tekemaot nem blong wan god mo hemia i save mekem god ya i no glad long olgeta. Taswe, oli wokem wan olta ‘Blong Wan God We Oli No Save Hem.’ Yes, oli save se i gat wan God we i laef, be oli no save hem. Nao Pol i tokbaot olta ya, olsem stamba samting blong pulum tingting blong ol man blong save se i gat wan God we i laef, hemia trufala God.
Traem Faenem Ol Gudfala Samting Ya
(Ol Wok 18:18) Pol i stap plante dei long ples ya, biaen hem i talem tata long ol brata, mo hem i tekem wan sip i go long Siria, mo Akwila mo Prisila, tufala i go wetem hem. Long Kengkria, hem i katem hea blong hem i sot blong soemaot se hem i mekem wan promes long God.
w08 1/5 pej 32 haf 4
Ol Bigfala Poen Long Buk Blong Ol Wok
18:18—?Wanem promes we Pol i mekem? Ol man we oli stadi long saed blong Baebol oli talem se Pol i promes blong laef olsem wan Nasiraet. (Nam. 6:1-21) Be Baebol i no tokbaot wanem promes we Pol i mekem. Mo tu, Baebol i no tokbaot sipos Pol i bin mekem promes ya bifo no afta we hem i kam Kristin, mo sipos hem i jes statem promes ya no i kasem en blong promes ya. Nomata se i olsem wanem, be fasin blong wok folem promes blong yumi i no wan sin.
(Ol Wok 18:21) Ale hem i talem tata long olgeta, mo i talem se: “Sipos Jehova i wantem, bambae mi kambak blong luk yufala bakegen.” Nao hem i tekem sip long Efesas mo i aot.
nwtsty not blong stadi long Wok 18:21
Sipos Jehova i wantem: Hemia wan tok blong soemaot se oltaem yumi mas tingbaot ol tingting blong Jehova taem yumi mekem wan samting o taem yumi plan blong mekem wan samting. Aposol Pol i folem rul ya oltaem long laef blong hem. (1Ko 4:19; 16:7; Hib 6:3) Disaepol Jemes tu i talem se: “Sipos Jehova i wantem, bambae yumi laef, mo yumi mekem samting ya, no samting ya.” (Jem 4:15) Taswe, yumi no mas talem tok ya blong pleplei nomo, man we talem tok ya se “Sipos Jehova i wantem,” hem i mas traehad blong wok folem samting we Jehova i wantem. I no nid blong talemaot tok ya blong evri man oli harem, plante taem yumi mekem samting ya long hat blong yumi nomo.—Yu luk ol not blong stadi long Wok 21:14; 1Ko 4:19; Jem 4:15 mo App. C.
31 DISEMBA–6 JENUWARE
OL GUDGUDFALA SAMTING LONG BAEBOL | OL WOK 19-20
“Lukaot Gud Long Yufala Mo Long Olgeta Sipsip”
(Ol Wok 20:28) Yufala i mas lukaot gud long yufala mo long olgeta sipsip we tabu spirit i putumap yufala blong yufala i lukaot long olgeta. Yufala i mas lukaot long kongregesen blong God, olsem we man i lukaot long ol sipsip. Olgeta ya, hem i pemaot olgeta long blad blong stret Pikinini blong hem.
w11 1/6 pej 24-25 haf 5
“Yufala i Mas Lukaot Gud Long Ol Man We God i Givim Long Yufala”
5 Aposol Pita i raetem se ol elda oli mas ol man we oli ‘lukaot gud long ol man we God i givim long olgeta.’ Yes, i impoten we oli luksave se ol sipsip ya oli blong Jehova mo blong pikinini blong hem Jisas Kraes. Ol elda oli mas talemaot long God olsem wanem oli lukaot long ol sipsip blong Hem. Traem tingbaot sipos wan fren blong yu i wantem go spel samples nao i askem long yu blong lukaot long ol pikinini blong hem. Ating bambae yu yu lukaot gud long ol pikinini ya mo yu givim kakae long olgeta. Sipos wan i sik, bambae yu tekem hem i go long hospital. Long sem fasin, ol elda long kongregesen oli ‘mas lukaot long ol man blong God, olsem we man blong lukaot sipsip i stap lukaot long ol sipsip blong hem, from we God i pemaot ol man ya finis long blad blong Pikinini blong hem.’ (Wok 20:28) Oli mas tingbaot se Jehova i pemaot olgeta sipsip blong hem long gudfala blad ya blong Jisas Kraes. Ol elda oli mas talemaot ol fasin blong olgeta long God, taswe oli givim kakae long ol sipsip blong God, oli protektem olgeta, mo oli lukaot gud long olgeta.
(Ol Wok 20:31) “Yufala i mas stap wekap, mo yufala i mas tingbaot we long tri fulyia, long dei mo long naet, mi mi stap tijim yufala wanwan we mi no spel, mo we wota blong ae blong mi i stap ron from yufala.
w13 15/1 pej 31 haf 15
Ol Elda Oli Wok Wetem Yumi Blong Mekem Yumi Glad
15 Ol elda oli gat plante wok blong mekem. Samtaem oli no slip gud long naet, from we oli wari long ol brata mo sista blong olgeta. Mo maet oli wekap let long naet blong prea from ol brata mo sista ya, no blong givhan long olgeta. (2 Kor. 11:27, 28) Nating se i olsem, ol elda ya oli glad nomo blong mekem wok blong olgeta, olsem we Pol i mekem. Hem i raet long ol Kristin long Korin se: “Mi mi glad blong lusum olgeta samting blong mi, mo laef blong mi tu, blong givhan long yufala.” (2 Kor. 12:15) Pol i lavem ol Kristin ya, taswe hem i glad blong “lusum” laef mo paoa blong hem blong givhan long olgeta. (Ridim 2 Korin 2:4; Fil. 2:17; 1 Tes. 2:8) !Hemia nao from wanem ol brata oli lavem hem tumas!—Wok 20:31-38.
(Ol Wok 20:35) Mi mi soemaot long yufala long olgeta rod se yufala i mas wok had olsem, blong givhan long olgeta we oli no strong. Mo yufala i mas stap tingbaot tok ya we Masta Jisas i talem, i se: ‘Man i harem gud moa taem hem i givim samting long narafala, i bitim we hem i kasem samting.’ ”
bt pej 172 haf 20
“Mi Mi No Gat Poen From Blad Blong Eni Man”
20 Fasin blong Pol i defren olgeta long fasin blong ol man we oli wantem kasem samting long ol narafala. Pol i wokhad blong lukaot long hem wan, blong hem i no mekem hadwok long ol brata mo sista. Hem i wok blong givhan long ol narafala, be i no blong kasem samting. Pol i leftemap tingting blong ol elda long Efesas blong oli lego ol samting we olgeta nomo oli wantem, blong oli save givhan long ol narafala. Hem i talem se, yufala i mas “givhan long olgeta we oli no strong. Mo yufala i mas stap tingbaot tok ya we Masta Jisas i talem, i se: ‘Man i harem gud moa taem hem i givim samting long narafala, i bitim we hem i kasem samting.’”—Ol Wok 20:35.
Traem Faenem Ol Gudfala Samting Ya
(Ol Wok 19:9) Be sam man oli stronghed tumas, oli no wantem bilif, mo oli stap tok nogud long Rod blong Masta long fes blong ol hip man. Nao hem i aot long olgeta, mo i tekem ol disaepol oli biaen long hem. Mo evri dei, hem i stap givim tok long wan bigfala klasrum blong man ya we nem blong hem Tiranas.
bt pej 161 haf 11
Gud Nius ‘i Goaot Moa, Mo i Kam Strong Moa’ Nating Se Ol Man i Agens
11 Maet evri dei Pol i stap long bigfala klasrum ya, i givim tok stat long moning samwe long eleven klok go kasem long aftenun samwe long fo klok. (Ol Wok 19:9) Hemia wan taem we ol man oli no bisi tumas mo ples i hot, taswe plante man oli stop blong wok, mo oli go kakae mo spel. Traem tingbaot sipos Pol i mekem olsem blong tu ful yia, ating hem i spenem moa long 3,000 aoa blong tijim ol man. Hemia wan risen from wanem tok blong Jehova i stap gohed blong goaot moa, mo i stap kam strong moa. Pol i wokhad mo hem i rere blong mekem ol jenis. Hem i jenisim program blong hem, blong mekem se wok we hem i mekem i laenap wetem nid blong ol man long komuniti. ?Wanem i kamaot from? “Evriwan, ol man Jiu mo ol man Gris we oli stap long provins ya Esia, oli harem tok blong Masta.” (Ol Wok 19:10) !Pol i givim wan nambawan witnes long ol man!
(Ol Wok 19:19) Mo plante long olgeta we oli stap mekem majik, oli karem ol buk blong olgeta i kam wanples, nao oli bonem long fes blong olgeta man. Mo taem oli kaontem praes blong ol buk ya, hem i fifti taosen silva mane.
bt pej 162-163 haf 15
Gud Nius ‘i Goaot Moa, Mo i Kam Strong Moa’ Nating Se Ol Man i Agens
15 Nogud samting we i hapen long ol boe blong Skeva, i mekem se plante man oli fraet long God, nao oli bilif long trutok mo oli sakemaot ol samting we i joen wetem wok blong ol rabis spirit. Kastom blong ol man Efesas i joen plante wetem wok blong mekem majik. Oli stap singaot trabol i kam long narafala man mo oli werem ol samting we oli bilif se bambae i givim gudlak long olgeta o bambae i protektem olgeta, mo oli stap yusum ol buk blong majik we i oli raetem ol toktok mo ol singsing insaed. Be biaen plante long olgeta oli tekemaot ol buk blong majik blong olgeta mo oli bonem long fes blong olgeta man. Ol buk ya praes blong olgeta i sas we i sas. Luk i raetem se: “Ol bigfala samting ya oli mekem se tok blong Jehova i stap goaot moa long evri ples, mo i stap kam strong moa oltaem.” (Ol Wok 19:17-20) !Hemia i pruvum se trutok i gat moa paoa long ol giaman samting mo wok blong ol rabis spirit! Eksampol blong ol man Efesas i rili leftemap tingting blong yumi. Yumi laef long wan wol we i fulap long wok blong ol rabis spirit. !Taswe sipos yumi faenemaot se yumi holem wan samting we i joen wetem wok blong ol rabis spirit, yumi mas kwik blong sakemaot samting ya, olsem we olgeta long Efesas oli bin mekem! I gud yumi stap longwe long ol doti samting ya, nating sipos ol samting ya oli sas.