Refrens Blong Kristin Wok Mo Laef Buk Blong Miting
5-11 NOVEMBA
OL GUDGUDFALA SAMTING LONG BAEBOL | JON 20-21
‘Yu Yu Lavem Mi Moa i Bitim Olgeta Ya?’
(Jon 21:1-3) Biaen long samting ya, Jisas i soemaot hem bakegen long ol disaepol, long Lugun blong Taebirias. Hem i soemaot hem olsem: 2 Long taem ya, Saemon Pita wetem Tomas (we oli kolem hem se Twin), mo Nataniel we i blong Kena long Galili, mo tufala pikinini blong Sebedi, mo tu narafala disaepol blong hem, oli stap wanples. 3 Nao Saemon Pita i talem long olgeta se: “Bae mi go sakem net.” Ale oli talem long hem se: “Bae mifala i kam wetem yu.” Nao oli go long bot, be long naet ya oli no kasem wan fis nating.
(Jon 21:4-14) Nao taem i brok delaet, Jisas i stap stanap long sanbij, be ol disaepol oli no luksave se hemia Jisas. 5 Nao Jisas i talem long olgeta se: “Ol fren, ?yufala i gat sam fis?” Oli ansa se: “!Nogat!” 6 Ale hem i talem long olgeta se: “Yufala i sakem net long raet saed blong bot, nao bambae yufala i save kasem.” Nao oli sakem net i godaon, be oli no moa save pulum net ya i kambak antap long bot from we i fulap gud long fis. 7 Nao disaepol ya we Jisas i lavem hem tumas, i talem long Pita se: “!Hemia Masta ya!” Taem Saemon Pita i harem se hemia Masta, hem i girap i werem klos blong hem from we hem i neked, mo i jam long solwota, i swim i go. 8 Be ol narafala disaepol oli kam long smol bot ya, oli stap pulum net ya we i fulap long fis. Olgeta oli no stap longwe long so, hem i samwe long naenti meta olsem. 9 Taem oli kamso, oli luk sakol faea i stap laet mo i gat fis long hem, mo i gat bred tu. 10 Nao Jisas i talem long olgeta se: “Yufala i tekem sam long ol fis ya we yufala i jes kasem, i kam.” 11 Nao Saemon Pita i klaem long bot, mo i pulum net ya i kamso. Net ya i fulap long ol bigbigfala fis. I gat wan handred fifti tri evriwan. Mo nating se fis i fulap gud long net, be hem i no brok. 12 Nao Jisas i talem long olgeta se: “Yufala i kam kakae.” Be i no gat wan long ol disaepol i wantem askem long hem se: “?Yu yu hu?” from we oli save finis se hemia Masta. 13 Nao Jisas i kam, i tekem bred, i givim long olgeta, mo i mekem olsem long fis tu. 14 Hemia namba tri taem we Jisas i kamtru long ol disaepol afta we hem i laef bakegen.
(Jon 21:15-19) Taem oli kakae finis, Jisas i askem long Saemon Pita se: “Saemon, pikinini blong Jon, ?yu yu lavem mi moa i bitim we yu lavem olgeta ya?” Hem i ansa se: “Yes Masta, yu save se mi mi laekem yu.” Nao hem i talem long hem se: “Yu givim kakae long ol smol sipsip blong mi.” 16 Nao hem i askem long hem nambatu taem se: “Saemon, pikinini blong Jon, ?yu yu lavem mi?” Hem i ansa se: “Yes Masta, yu save we mi mi laekem yu.” Nao hem i talem long hem se: “Yu lidim ol smol sipsip blong mi.” 17 Nao hem i askem long hem nambatri taem, se: “Saemon, pikinini blong Jon, ?yu yu laekem mi?” Be Pita i harem nogud from we hem i askem nambatri taem se: “?Yu yu laekem mi?” Ale hem i talem long hem se: “Masta, yu yu save olgeta samting. Yu save we mi mi laekem yu.” Nao Jisas i talem long hem se: “Yu givim kakae long ol smol sipsip blong mi. 18 Tru mi talem long yu, taem yu yangfala, yu nomo yu werem klos blong yu mo yu stap go long eni ples we yu wantem go long hem. Be taem yu kam olfala, bambae yu stretem han blong yu mo narafala man i putum klos long yu, mo i karem yu yu go long ples we yu no wantem go long hem.” 19 Hem i talem olsem blong soemaot fasin we Pita bambae i ded long hem, mo samting ya bambae i leftemap nem blong God. Taem hem i talem tok ya finis, hem i talem long hem se: “Yu gohed, yu folem mi.”
nwtsty ol not blong stadi long Jon 21:15, 17
Jisas i askem long Saemon Pita: Storian blong Jisas mo Pita i hapen smoltaem afta we Pita i giaman tri taem se hem i no save Jisas. Jisas i askem tri kwestin long Pita blong faenemaot filing we Pita i gat long Jisas. Hem i askem kwestin plante taem mekem se “Pita i harem nogud.” (Jon 21:17) Jon i yusum tu Grik tok long stori we i stap long Jon 21:15-17, hemia: a·ga·paʹo, we oli tanem i kam lav, mo phi·leʹo, we oli tanem i kam laekem. Jisas i askem Pita tu taem se: “?Yu yu lavem mi?” Long tufala taem ya, Pita i ansa wetem strong tingting se hem i “laekem” Jisas. Biaen Jisas i askem se: “?Yu yu laekem mi?” Mo bakegen Pita i talem se hem i laekem Jisas. Long ol taem ya we Pita i ansa, Jisas i makemgud se lav we Pita i gat, i mas pusum hem blong givim kakae mo “lidim” ol disaepol blong Jisas, we oli olsem ol “smol sipsip” blong Jisas. (Jon 21:16, 17; 1Pi 5:1-3) Jisas i letem Pita i talemaot lav blong hem tri taem, nao biaen hem i givim wok long Pita, hemia blong lukaot long ol sipsip blong Jisas. Long rod ya, Jisas i soemaot se hem i fogivim Pita, from we Pita i bin giaman tri taem se hem i no save Jisas.
?yu yu lavem mi moa i bitim we yu lavem olgeta ya?: Tok ya, ‘bitim olgeta ya’ i save minim plante samting. Sam man blong stadi dip long Baebol oli se tok ya i min se:“?Yu yu lavem mi moa i bitim we yu lavem ol narafala disaepol ya?” o “?Yu yu lavem mi moa i bitim ol disaepol ya we oli lavem mi?” Nating se olsem, bigfala poen hemia se, “?yu yu lavem mi moa i bitim we yu lavem olgeta ya?” Olgeta ya i save minim ol fis we Pita i kasem o ol narafala samting we i joen wetem bisnes blong Pita, hemia blong pulum fis. Taswe, Jisas i wantem minim se: ‘?Yu yu lavem mi moa i bitim ol samting blong wol ya? Sipos yes, yu lukaotgud long ol smol sipsip blong mi.’ Ating Pita i kasemsave kwestin ya, from we hem i wan long ol faswan disaepol blong Jisas (Jon 1:35-42), mo hem i no bin lego evri samting yet blong i folem Jisas fultaem. Taswe, hem i gobak long wok blong pulum fis. Sam manis biaen, Jisas i singaot Pita blong i lego wok blong pulum fis, mo i kam man blong ‘pulum man.’ (Mt 4:18-20; Lu 5:1-11) Be bakegen, smoltaem afta we Jisas i ded, Pita i gobak long wok blong pulum fis, mo ol narafala aposol tu oli folem hem. (Jon 21:2, 3) Taswe i luk olsem se Jisas i wantem soemaot long Pita se hem i mas mekem wan gudfala desisen, se ?bambae hem i putum wok blong hem fasples o wok blong Jisas fasples?—Jon 21:4-8.
nambatri taem: Pita i giaman tri taem se hem i no save Masta blong hem. Nao Jisas askem long Pita tri taem, blong luk sipos Pita i lavem hem. Taem Pita i talem yes, Jisas i talem se Pita i mas soemaot lav ya, taem hem i putum ol samting long saed blong spirit fasples. Pita bambae joen wetem ol narafala brata blong oli givim kakae, leftemap tingting, mo lidim ol sipsip blong Kraes. Olgeta ya tabu spirit i makemaot olgeta, be yet oli nidim kakae long saed blong spirit.—Lu 22:32.
Traem Faenem Ol Gudfala Samting Ya
(Jon 20:17) Nao Jisas i talem long hem se: “Yu no moa holemtaet mi from we mi mi no go antap yet long Papa. Be yu go luk ol brata blong mi mo yu talem long olgeta se: ‘Mi mi stap go antap long Papa blong mi we hem i Papa blong yufala tu, mo hem i God blong mi we hem i God blong yufala tu.’”
nwtsty not blong stadi long Jon 20:17
Yu no moa holemtaet mi: Grik tok ya haʹpto·mai i save minim “tajem” o “holemtaet; o hang long hem.” Long sam Baebol, oli tanem tok ya se: “Yu no tajem mi.” Be Jisas i letem Meri Magdala i tajem hem, from we hem i letem ol narafala woman tu oli “holem leg blong hem” afta we hem i laef bakegen. (Mt 28:9) I luk olsem se Meri Magdala i fraet se i no longtaem bambae Jisas i go antap long heven. Hem i wantem tumas se Jisas i mas stap yet wetem hem, taswe hem i holemtaet Jisas, i no letem hem i go. Jisas i talem long Meri se bambae hem i stap yet, mo i askem Meri blong i no moa holemtaet hem. Ale, hem i sanem Meri blong i go talemaot nius blong laef bakegen long ol disaepol.
(Jon 20:28) Nao Tomas i talem se: “!Masta blong mi, mo God blong mi!”
nwtsty not blong stadi long Jon 20:28
!Masta blong mi, mo God blong mi!: Sam man blong stadi dip long Baebol oli talem se hemia wan tok blong sapraes we i go moa long God, we i papa blong Jisas. Samfala oli talem se long lanwis Grik, tok ya i go moa long Jisas. Be blong save stret mining blong tok ya “Masta blong mi mo God blong mi,” yumi mas lukluk long ol vas we oli stap raonabaot. Stori i soemaot se Jisas i bin talem long ol disaepol blong hem se: “Mi mi stap go antap long Papa blong mi we hem i Papa blong yufala tu, mo hem i God blong mi we hem i God blong yufala tu.” Taswe i klia se Tomas i no gat tingting ya se Jisas nao i God ya we i gat olgeta paoa. (Yu luk not blong stadi long Jon 20:17.) Tomas i bin harem we Jisas i prea long “Papa” blong hem, mo i talem se “yu nomo yu tru God.” (Jon 17:1-3) Taswe, taem Tomas i singaot Jisas se “God blong mi,” maet hemia singaot from ol risen ya: Hem i luk Jisas olsem “wan god,” be i no God ya we i gat olgeta paoa. (Yu luk not blong stadi long Jon 1:1.) O maet from we hemia wan fasin blong toktok we ol man blong God oli yusum taem oli toktok wetem wan enjel blong Jehova, olsem we Hibru haf blong Baebol i talem. Maet Tomas i savegud stori blong sam man, olsem ol man blong raetem Baebol, we taem oli toktok wetem wan enjel, oli harem olsem se hem nao i Jehova God. (Skelem wetem Jenesis 16:7-1, 13; 18:1-5, 22-33; 32:24-30; Ja 6:11-15; 13:20-22.) Taswe, maet Tomas i singaot Jisas se “God blong mi,” blong soem tangkiu long Jisas we i representem tru God mo i toktok long bihaf blong God.
Samfala oli talem se ol Grik tok we oli stap bifo long tok ya “masta” mo “god,” oli soemaot se Tomas i stap minim God we i gat olgeta paoa. Be ol Grik tok ya oli putum blong mekem stori i rongud folem grama blong Grik lanwis. Taswe ol Grik tok ya oli no makem wan impoten samting long tingting blong Tomas, taem hem i toktok long Jisas.
12-18 NOVEMBA
OL GUDGUDFALA SAMTING LONG BAEBOL | OL WOK 1-3
‘Kristin Kongregesen i Kasem Tabu Spirit’
(Ol Wok 2:1-8) Nao long dei blong lafet blong Pentekos, olgeta evriwan oli stap wanples. 2 Mo wantaem nomo, i gat wan bigfala noes i kamaot long heven we i olsem win we i blu strong. Noes ya i kasem olgeta ples long haos ya we oli stap sidaon insaed long hem. 3 Nao oli luk wan samting we i luk olsem plante laet blong kandel, mo oli stap seraot, oli go long ol man ya wanwan, 4 nao tabu spirit i kam fulap long olgeta evriwan, mo oli stat blong toktok long ol defdefren lanwis, stret olsem we spirit ya i mekem oli naf blong toktok. 5 Long taem ya, ol man Jiu we oli stap long ol narafala neson long wol, oli kam stap long Jerusalem blong mekem wosip. 6 Taem noes ya i kamaot, plante plante man oli harem, nao oli kam hivap long ples ya mo oli sek from we oli harem ol lanwis blong olgeta we ol disaepol oli stap toktok long hem. 7 Yes, oli sapraes tumas mo oli talem se: “!Yufala i luk! ?Ol man ya we oli stap toktok, oli no man Galili? 8 ?Olsem wanem nao yumi evriwan yumi harem we olgeta oli stap toktok long ol lanwis blong yumi olsem?
(Ol Wok 2:14) Be Pita i stanap wetem ol leven aposol, mo i singaot bigwan, i se: “Ol man Judia mo yufala we i stap long Jerusalem, yufala i lesin gud long samting we bambae mi talem long yufala.
(Ol Wok 2:37, 38) Taem ol man ya oli harem tok ya, oli harem we i stikimgud olgeta, nao oli talem long Pita mo ol narafala aposol se: “?Ol brata, bambae mifala i mekem wanem?” 38 Nao Pita i talem long olgeta se: “Yufala i mas tanem tingting blong yufala, mo yufala evriwan i mas baptaes long nem blong Jisas Kraes, blong God i fogivim ol sin blong yufala, nao bambae yufala i kasem presen ya tabu spirit we i fri nomo.
(Ol Wok 2:41) Nao olgeta we oli glad long ol tok blong hem, oli baptaes, mo long dei ya, samwe long tri taosen man oli joen long olgeta.
(Ol Wok 2:42-47) Nao oli gohed blong folemgud ol tijing blong ol aposol, mo blong stap joen wanples, mo blong prea, mo blong kakae. 43 Nao ol aposol oli mekem plante samting blong sapraes mo ol saen, nao olgeta man oli fraet tumas. 44 Olgeta we oli bilif, oli stap joen wanples, mo olgeta evriwan oli glad blong serem olting blong olgeta long ol narawan. 45 Mo oli salem olting mo graon blong olgeta, blong oli seraot mane blong ol samting ya long ol narafala, stret olsem we olgeta wanwan oli nidim. 46 Evri dei, oli stap oltaem long haos tempol we oli gat wan tingting nomo, mo oli stap joen wanples blong kakae long ol defdefren haos, mo long fulhat blong olgeta, oli glad tumas blong serem kakae long ol narafala. 47 Mo oli stap presem God mo olgeta man tu oli glad long olgeta. Mo evri dei, Jehova i stap tekem ol man we hem i sevem olgeta, oli kam joen wetem olgeta.
w86 1/12 pej 29 haf 4-5, 7
Ol Presen We i Mekem Man i Glad
Long fas dei we Kristin kongregesen i stat long yia 33 Kristin taem, ol 3,000 man we oli jes baptaes oli ‘joengud mo oli serem olting blong olgeta, oli kakae tugeta mo oli prea tugeta. ?From wanem oli mekem olsem? Hemia blong mekem bilif blong olgeta i kam strong, nao oli save ‘gohed blong folemgud ol tijing blong ol aposol.—Ol Wok 2:41, 42.
Ol man Jiu mo ol proselaet we oli bin kam long Jerusalem, oli plan blong stap nomo kasem we Lafet blong Pentekos i finis. Be olgeta we oli Kristin, oli wantem stap longtaem moa blong mekem bilif blong olgeta i strong. Hemia i mekem se bambae oli nidim moa kakae mo ples blong slip. Samfala oli gat naf mane blong stap, be samfala oli nogat naf mane. Taswe ol narafala oli givim sam mane mo ol samting blong bodi blong givhan long olgeta we oli gat nid.—Ol Wok 2:43-47.
Oli glad nomo blong salem ol graon mo olting blong olgeta mo givim mane blong hem long olgeta we oli gat nid. Be hemia i no min se olgeta we oli rij oli mas salemaot evri samting blong oli kam puaman. Defren olgeta, ol Kristin long taem ya oli sore long ol brata sista we oli gat nid, taswe oli salem ol graon blong olgeta mo oli givhan long ol brata mo sista we oli gat nid, blong oli save mekem moa long wok blong Kingdom.—Skelem wetem 2 Korin 8:12-15.
Traem Faenem Ol Gudfala Samting Ya
(Ol Wok 3:15) nao yufala i kilim i ded Nambawan Man blong givim laef. Be God i mekem hem i laef bakegen, mo mifala i witnes long samting ya.
it-2 pej 61 haf 1
Jisas Kraes
“Nambawan Man Blong Givim Laef.” Jisas i soemaot kaen fasin blong Papa blong hem, hemia taem hem i givim laef blong hem blong pemaot sin blong olgeta man. Sakrefaes blong Jisas i openem rod blong olgeta we bambae oli go rul wetem Kraes long heven, mo olgeta we bambae oli stap aninit long rul blong Kingdom long wol. (Mt 6:10; Jo 3:16; Ef 1:7; Hib 2:5; yu luk RANSOM.) Taswe, Jisas nao i olsem “Nambawan Man [“Prins,” KJ; JB] Blong Givim laef “ from olgeta man. (Wok 3:15) Grik tok we oli yusum long ples i minim, “bigfala lida,” hemia semfala tok we oli yusum blong tokbaot Moses (Wok 7:27, 35) olsem “lida” blong ol man Isrel.
(Ol Wok 3:19) “Taswe yufala i mas tanem tingting blong yufala, mo yufala i tanraon blong Jehova i tekemaot sin blong yufala, nao hem bambae i mekem yufala i gat niufala paoa,
cl pej 265 haf 14
God We i “Rere Blong Fogivim Man”
14 Ol Wok 3:19 i tokbaot fasin blong Jehova blong fogivim man, i se: “Yufala i mas tanem tingting blong yufala, mo yufala i tanraon blong Jehova i tekemaot sin blong yufala.” Grik tok we oli tanem i kam tekemaot i save minim tu, “waepemaot o kanselem.” Sam man blong stadi dip long Baebol oli talem se hemia i sem mak long fasin ya blong waepemaot wan raeting. ?Olsem wanem i sem mak? Long taem bifo, ink we oli yusum blong raetem ol toktok, oli wokem long kabon, glu ya gum, mo wota. Sipos man i raet long wan ink olsem, hem i save yusum wota blong waepemaot. Hemia i soemaot klia se Jehova i sore long ol man. Taem hem i fogivim yumi, i olsem we hem i tekem wan sponj mo i waepemaot sin blong yumi.
19-25 NOVEMBA
OL GUDGUDFALA SAMTING LONG BAEBOL | OL WOK 4-5
“Oli Gohed Blong Talemaot Tok Blong God We Oli No Fraet Nating”
(Ol Wok 4:5-13) Nao long nekis dei, ol lida blong olgeta, mo ol elda, mo ol tija blong Loa, oli kam wanples long Jerusalem, 6 oli joen wetem jif pris ya Anas, mo Kaeafas, mo Jon, mo Aleksanda, mo ol famle blong jif pris. 7 Nao oli putum Pita mo Jon i stanap long medel blong olgeta, mo oli stap askem kwestin long tufala, se: “?Hu i givim paoa long yutufala? ?Mo yutufala i mekem samting ya long nem blong hu?” 8 Nao tabu spirit i kam fulap long Pita, ale hem i talem se: “Ol lida mo ol elda, 9 sipos yufala i stap askem kwestin long mitufala from gudfala wok we mitufala i mekem long man ya we leg blong hem i nogud, mo sipos yufala i wantem save se hu i mekem man ya i kam gud, 10 oraet, i gud yufala mo evri man long Isrel, yufala i save se man ya we i stap stanap long fes blong yufala, hem i kam gud bakegen long nem blong man Nasaret ya Jisas Kraes, we yufala i kilim hem i ded long pos, mo we God i mekem hem i laef bakegen. 11 Jisas ya, hem i ‘ston ya we yufala, ol man blong wokem haos, yufala i ting nating long hem. Be hem i kam nambawan ston long kona blong haos.’ 12 Mo i no gat wan narafala man nating we i save sevem yumi, from we long wol ya, God i no givim nem blong wan narafala man long yumi, we hem i stap yusum blong sevem yumi.” 13 Nao taem oli luk we Pita mo Jon tufala i no fraet blong toktok, mo taem oli kasem save se tufala i no skul gud mo tufala i man olbaot nomo, oli sapraes tumas. Nao oli jes tingbaot se tufala ya i bin stap wetem Jisas.
w08 9/1 15, bokis
Ol Toktok i Kam Wan Tabu Buk—Samting We Oli Raetem Mo Ol Fas Kristin
?I Tru Se Ol Aposol Oli No Skul Gud?
Taem ol lida mo ol elda long Jerusalem “oli luk we Pita mo Jon tufala i no fraet blong toktok, mo taem oli kasem save se tufala i no skul gud mo tufala i man olbaot nomo, oli sapraes tumas.” (Ol Wok 4:13) ?I tru se ol aposol oli no skulgud? The New Interpreter’s Bible i talem se: “Tok ya i no minim se Pita [mo Jon] tufala i no skul o tufala i no save rid mo raet. Nogat. Oli wantem skelem tu defren grup blong man, hemia olgeta we oli mekem wok olsem ol jaj mo ol aposol.”
w08 1/5 Pej 30 haf 6
Ol Bigfala Poen Long Buk Blong Ol Wok
4:13—?Olsem Wanem? ?Pita Mo Jon, tufala i save rid mo raet mo tufala i skul no nogat? Si, tufala i save rid mo raet. Oli talem tufala se “oli no gat nem, mo oli no skul gud,” from we tufala i no bin joen long wan skul we i givim trening blong wosipim God.
(Ol Wok 4:18-20) Nao oli singaot tufala i kambak insaed, mo oli givim oda long tufala blong tufala i no moa yusum nem blong Jisas blong toktok mo blong tijim ol man. 19 Be Pita mo Jon tufala i talem se: “?Olsem wanem? ?Yufala i ting se i stret long fes blong God blong mitufala i lesin long yufala, no mitufala i lesin long hem? Hemia i stap long yufala blong yufala i skelem. 20 Be mitufala, mitufala i no save stop blong tokbaot samting we mitufala i luk mo mitufala i harem.”
(Ol Wok 4:23-31) Afta we oli lego tufala i go fri, tufala i gobak long ol narafala disaepol, mo tufala i talemaot samting we ol jif pris mo ol elda oli talem long tufala. 24 Taem olgeta oli harem samting ya, olgeta evriwan oli joen blong prea long God, oli se: “Hae Masta, yu nao yu mekem heven mo wol mo solwota mo evri samting we i stap long olgeta. 25 Mo yu nao yu yusum tabu spirit blong pulum olfala ya blong mifala Deved, we i man blong wok blong yu, blong hem i talem se: ‘?From wanem ol neson oli no stap kwaet, mo ol man oli stap tingting dip long ol samting we oli blong nating nomo? 26 Ol king blong wol ya oli stap mekemrere blong faet, mo ol lida oli stap hivap wanples blong agensem Jehova mo agensem Kraes blong hem.’ 27 Tok ya i tru, from we Herod mo Ponjes Paelat wetem ol man blong ol neson mo ol man Isrel, oli kam wanples long taon ya mo oli agensem tabu man blong wok blong yu, Jisas, we yu yu makemaot hem. 28 Olgeta oli kam wanples blong mekem samting we yu yu bin talemaot finis. Ol samting ya oli kamtru folem stamba tingting blong yu mo from we yu yu gat paoa. 29 Jehova, naoia yu makemgud ol strong tok ya we oli talem blong mekem mifala i fraet, mo yu givim strong tingting long mifala ol slef blong yu, blong mifala i gohed blong talemaot tok blong yu. 30 Mo yu hilim ol sikman long paoa blong yu, mo yu mekem ol merikel mo ol samting blong sapraes long nem blong Jisas we i tabu man blong wok blong yu.” 31 Taem oli prea finis, haos we oli stap long hem i seksek, mo olgeta evriwan, tabu spirit i kam fulap long olgeta, nao oli stap talemaot tok blong God we oli no fraet nating.
it-1 pej 128 haf 3
Aposol
Oli Gohed Strong. Bilif blong ol aposol i kam strong moa taem God i givim tabu spirit long olgeta long dei blong Pentekos. Japta 1-5 long buk blong Ol Wok i tokbaot ol aposol se, oli no fraet mo oli gat strong tingting blong talemaot gud nius, mo blong talemaot se Jisas i laef bakegen, nating se ol lida oli putum olgeta long kalabus, oli kilim olgeta, mo oli wantem kilim olgeta i ded. Afta long dei blong Pentekos, tabu spirit i lidim ol aposol, ale oli gohed strong bakegen, oli mekem se Kristin kongregesen i kam bigwan moa. (Ol Wok 2:41; 4:4) Oli stat blong prij long Jerusalem, biaen oli go long Sameria, mo sloslo oli go long olgeta ples long wol.—Wok 5:42; 6:7; 8:5-17, 25; 1:8.
Traem Faenem Ol Gudfala Samting Ya
(Ol Wok 4:11) Jisas ya, hem i ‘ston ya we yufala, ol man blong wokem haos, yufala i ting nating long hem. Be hem i kam nambawan ston long kona blong haos.’
it-1 pej 514 haf 4
Ston Long Kona Blong Haos
Ol Sam 118:22 i talemaot se ston we ol man blong wokem haos oli sakemaot bambae i kam “nambawan ston long kona blong haos” (Hibru tok, roʼsh pin·nahʹ). Jisas i talem profet tok ya bakegen mo i eksplenem se hem nao i “nambawan ston long kona blong haos” (Grik tok, ke·pha·leʹ go·niʹas, bigfala ston long kona). (Mt 21:42; Mk 12:10, 11; Lu 20:17) Jisas i olsem wan nambawan ston long kona blong haos we evri man i save luk, from we hem nao i stamba ston long Kristin kongregesen blong ol tabu Kristin, we i olsem tempol long saed blong spirit. Mo tu, Pita i yusum vas blong Ol Sam 118:22, blong tokbaot Kraes, se hem nao i “ston ya” we ol man oli sakemaot be God i mekem hem i kam “nambawan ston long kona blong haos.”—Wok 4:8-12; mo tu yu luk 1Pi 2:4-7.
(Ol Wok 5:1) Be i gat wan man, nem blong hem Ananaeas, mo waef blong hem Safaera, tufala i salemaot wan pis graon blong tufala.
Pita Mo Ananaeas i Giaman—?Yumi Lanem Wanem?
Ananaeas mo waef blong hem tufala i salem sam pis graon blong tufala, blong yusum mane blong hem blong halpem olgeta we oli jes baptaes. Nao taem Ananaeas i givim mane long ol aposol, hem i talem se hemia nao evri mane we tufala i kasem from graon we tufala i salem. !Be hem i giaman nomo! !Hem i kipim sam mane se i blong hem! Nao God i mekem se Pita i save samting ya, ale Pita i talem long Ananaeas se: “Yu yu no giaman long man, be yu giaman long God ya.” !Nao wantem nomo Ananaeas i foldaon mo i ded! Tri aoa biaen waef blong hem i kam, hem i no save wanem i hapen long hasban blong hem, ale hem tu i girap i giaman mo i foldaon i ded.
26 NOVEMBA–2 DISEMBA
OL GUDGUDFALA SAMTING LONG BAEBOL | OL WOK 6-8
“Niufala Kristin Kongregesen i Kasem Traem”
(Ol Wok 6:1) Long ol dei ya, taem namba blong ol disaepol i stap kam antap, ol disaepol we oli toktok lanwis Grik oli stap komplen agens long ol disaepol we oli toktok lanwis Hibru, from we taem oli stap seraot kakae evri dei, oli no tingbaot ol wido we oli toktok lanwis Grik.
bt pej 41 haf 17
“Mifala i Mas Obei Long God We i Rula Blong Mifala”
17 Niufala kongregesen i kasem wan traem we i hapen bitwin ol Kristin bakegen. ?Wanem traem ya? Plante long ol disaepol we oli bin baptaes, oli kam long ol defren ples mo oli wantem stap smoltaem long Jerusalem blong mekem bilif blong olgeta i kam strong, bifo we oli gobak long ples blong olgeta. Nao ol disaepol we oli blong Jerusalem, oli givim mane mo kakae long olgeta. (Ol Wok 2:44-46; 4:34-37) Long taem ya, wan smol problem i kamaot. “Taem oli stap seraot kakae evri dei, oli no tingbaot ol wido we oli toktok lanwis Grik.” (Ol Wok 6:1) Be oli tingbaot ol wido we oli toktok lanwis Hibru. Problem ya i mekem se naoia i gat fasin ya blong tok agensem wan narafala laen o lanwis. I gat sam problem we oli save kam bigwan moa long hemia.
(Ol Wok 6:2-7) Nao ol twelef aposol oli singaot olgeta disaepol oli kam wanples, mo oli talem se: “I no stret blong mifala i lego wok ya blong tijim ol man long tok blong God, blong mifala i go seraot kakae long ol tebol. 3 Taswe ol brata, yufala i mas jusum seven man long yufala we oli gat gud nem long fes blong ol man, mo we tabu spirit i fulap long olgeta mo oli waes, blong mifala i save putumap olgeta blong oli lukaot long bisnes ya. 4 Olsem nao bambae mifala i spenem fultaem blong mifala blong prea mo blong tijim ol man long tok blong God.” 5 Nao olgeta evriwan oli glad long samting we oli talem, nao oli jusum Steven we i gat strong bilif mo we tabu spirit i fulap long hem, mo Filip, mo Prokoras, mo Nikano, mo Timon, mo Pamenas, mo Nikolas we i wan proselaet blong Antiok. 6 Ale oli tekem olgeta oli go long ol aposol, nao ol aposol oli putum han blong olgeta long olgeta mo oli prea blong putumap olgeta. 7 Nao tok blong God i stap goaot moa long ol man, mo namba blong ol disaepol i stap kam plante moa long Jerusalem. Mo plante plante pris tu oli bilif.
bt pej 42 haf 18
“Mifala i Mas Obei Long God We i Rula Blong Mifala”
18 Ol aposol, we oli wok olsem hed kampani we lukaot long kongregesen we i stap kam bigwan, oli luksave se i no waes blong ‘oli lego wok ya blong tijim ol man long tok blong God, blong oli go seraot kakae.’ (Ol Wok 6:2) Ale oli sanem sam disaepol blong oli go lukaot seven man “we tabu spirit i fulap long olgeta mo oli waes,” blong ol aposol oli save putumap olgeta “blong oli lukaot long bisnes ya.” (Ol Wok 6:3) ?From wanem oli nidim ol man we oli waes? From we wok ya i no jes blong seremaot ol kakae nomo, be oli mas lukaot long mane, pem ol saplae, mo kipimgud rikod blong ol samting we oli mekem. Ol man ya oli mas gat nem long lanwis Grik, from we maet hemia i save mekem ol wido we oli kasem problem oli harem gud. Nao ol aposol oli prea, biaen oli putumap ol seven man ya “blong oli lukaot long bisnes ya.”
(Ol Wok 7:58–8:1) Nao oli holem hem, oli sakem hem i go afsaed long taon, biaen oli stonem hem. Ol witnes oli livim ol kot blong olgeta daon, klosap long leg blong wan yang man we nem blong hem Sol. 59 Taem oli stap stonem Steven, hem i singaot i se: “Masta Jisas, spirit blong mi i stap long han blong yu.” 60 Biaen, hem i nildaon, mo i singaot bigwan i se: “Jehova, yu no jajem olgeta from sin ya.” Afta we hem i talem tok ya, hem i ded.
8 Sol i glad nomo taem oli kilim hem i ded. Long dei ya, ol man oli mekem i strong tumas long olgeta we oli stap long kongregesen long Jerusalem. Nao olgeta disaepol oli go stap olbaot long Judia mo Sameria, be ol aposol nomo oli stap.
Traem Faenem Ol Gudfala Samting Ya
(Ol Wok 6:15) Mo olgeta we oli stap sidaon long rum blong Sanhedrin, oli stap lukluk hem, mo oli luk we fes blong hem i olsem fes blong enjel.
bt pej 45 haf 2
Steven—“God i Glad Long Hem Mo i Givim Paoa Long Hem”
2 I gat wan narakaen samting i hapen long fes blong Steven. Ol jaj oli lukluk hem mo oli se fes blong hem “i olsem fes blong enjel.” (Ol Wok 6:15) Ol enjel oli talemaot mesej blong Jehova God, taswe oli no fraet nating long wan man, oli stap kwaet, mo oli gat pis. Hemia sem samting we Steven i mekem. Olgeta we oli stap jajem hem oli luksave samting ya. ?From wanem Steven i stap kwaet nomo?
(Ol Wok 8:26-30) Be enjel blong Jehova i toktok long Filip, i se: “Yu girap mo yu go long saot, yu go long rod ya we i aot long Jerusalem i go kasem Gasa.” (Rod ya i pas long draeples.) 27 Nao hem i girap, i go, mo i luk wan man Itiopia. Hem i wan haeman blong Kandes, kwin blong Itiopia, mo hem i stap lukaot long olgeta sas samting blong kwin ya. Man ya i go long Jerusalem blong mekem wosip, 28 nao hem i stap gobak long ples blong hem. Hem i sidaon long wan kat we hos i pulum, i stap ridim buk blong profet Aesea long bigfala voes. 29 Nao spirit i talem long Filip se: “Yu go klosap long kat ya.” 30 Ale Filip i go. Hem i stap ron klosap long kat ya, nao hem i harem we man ya i stap ridim profet tok blong Aesea. Nao hem i askem long hem se: “?Yu yu kasem save long samting we yu stap ridim?”
bt pej 58 haf 16
Oli Talemaot “Gud Nius Blong Jisas”
16 Tede ol Kristin oli gat blesing ya blong mekem wok olsem we Filip i mekem. Plante taem oli tekem janis blong prij long man taem oli travel i go long wan defren ples. Samtaem i luk olsem se i gat wan man i stap lidim olgeta blong oli mitim wan man we i intres long trutok. Be tingting ya i stret, from we Baebol i talem se ol enjel oli stap lidim wok blong prij, blong mekem se gud nius i kasem ‘olgeta laen, olgeta lanwis, mo olgeta grup blong man.’ (Rev. 14:6) Jisas i bin talemaot se ol enjel bambae oli lidim wok blong prij. Long pijatok blong gudfala sid mo rabis gras, Jisas i talem se long taem blong tekemaot kakae long garen, hemia i minim en blong wol ya, “ol man blong tekemaot kakae long garen, hemia ol enjel.” Hem i gohed i se ol enjel ya bambae oli “katemaot ol samting long Kingdom blong hem, we oli stap mekem ol man oli foldaon wetem ol man we oli stap brekem loa.” (Mat. 13:37-41) Long semtaem, ol enjel bambae oli hivimap olgeta we bambae oli go long heven blong rul long Kingdom, mo biaen “bigfala hip blong ol man,” hemia i minim “ol narafala sipsip” we Jehova i wantem pulum olgeta i kam long ogenaesesen blong hem.—Rev. 7:9; Jon 6:44, 65; 10:16.