Refrens Blong Kristin Wok Mo Laef Buk Blong Miting
4-10 FEBRUARI
OL GUDGUDFALA SAMTING LONG BAEBOL | ROM 1-3
“Gohed Blong Trenem Tingting We i Stikim Yu”
?Olsem Wanem Tingting Blong Yu i Save Lidimgud Yu?
6 ?Olsem wanem? ?Ol man blong Jehova nomo oli gat tingting ya we i lidim olgeta? Nogat. Tingbaot toktok ya we tabu spirit i pulum aposol Pol blong raetem, se: “Ol man blong ol neson oli no gat loa, be taem oli folem tingting blong olgeta, oli stap mekem ol samting we i laenap wetem loa. Taswe, nating se ol man ya oli no gat loa, be oli gat wan samting we i olsem loa insaed long olgeta. Olgeta nao oli stap soemaot se ol samting we loa ya i talem, God i bin raetem long hat blong olgeta. Mo tingting we i jajem olgeta i witnes blong olgeta, nao tingting blong olgeta i save talem se oli mekem i stret no oli mekem i no stret.” (Rom 2:14, 15) Nating se wan man i no gat save nating long loa blong Jehova, be samtaem tingting blong hem nomo bambae i pulum hem blong mekem samting we i laenap stret wetem ol tingting blong Jehova.
?Olsem Wanem Tingting Blong Yu i Save Lidimgud Yu?
8 ?Olsem wanem yu stap mekem ol desisen we i laenap wetem tingting blong yu? Samfala oli tingbaot filing blong olgeta nomo. Sipos oli harem se wan samting i mas olsem, ale oli tekem desisen folem filing ya. Maet oli mekem wan samting, nao oli ting se samting ya i stret nomo from we oli no harem se tingting blong olgeta i stikim olgeta. Be samtaem, ol samting we hat blong man i wantem, oli wokem ol strongfala filing insaed long hem, mo ol strongfala filing ya oli save winim gudfala tingting blong hem. Baebol i talem se: “Oltaem nomo, tingting [“hat,” NW] blong man i stap giaman long hem bakegen. I no gat narafala samting we i save giaman olsem, i nogud we i nogud olgeta.” (Jeremaea 17:9) Taswe taem yumi mas mekem wan desisen, i nogud blong tingbaot nomo wanem we hat no filing blong yumi i wantem tumas. I moagud yumi tingbaot fastaem wanem we bambae i save mekem Jehova God i glad.
9 Sipos yumi rili trenemgud tingting blong yumi, bambae yumi no mekem desisen folem samting we yumi nomo i wantem, be bambae yumi mekem samting we God i wantem from we yumi fraet blong mekem hem i harem nogud. Tingbaot wan stori we i olsem eksampol long yumi. Man ya Nehemaea i mekem wok blong distrikejen mo hem i wan man we i bilif strong long God. Hem i gat raet blong askem takis long ol man we oli stap long Jerusalem. Be hem i no mekem olsem. ?From wanem? Nehemaea i fraet se sipos hem i mekem olsem, bambae hem i putum baden long ol man blong God, nao Jehova bambae i kros long hem. Hem i talem se: “Mi mi mekem i narafala, from we mi stap tinghevi long God, mo mi stap obei long hem.” (Nehemaea 5:15) I impoten blong gat fasin ya we yumi fraet blong mekem Papa blong yumi long heven i harem nogud. Taswe taem yumi gat sam desisen blong mekem, sipos yumi tinghevi bigwan long God, bambae yumi letem Baebol i lidim yumi.
Traem Faenem Ol Gudfala Samting Ya
w08 1/6 pej 30 haf 5
Ol Bigfala Poen Long Buk Blong Rom
3:4. Taem tok blong man i no laenap wetem wanem we God i talem long Baebol, yumi mas trastem tok blong Baebol mo mekem ol samting we God i wantem oli wok long laef blong yumi. Long rod ya, yumi soem se “God i tok tru oltaem.” Strong tingting we yumi gat long wok blong talemaot Kingdom mo mekem disaepol, i save halpem ol man blong faenemaot we God i tru oltaem nomo.
w08 1/6 pej 29 haf 6
Ol Bigfala Poen Long Buk Blong Rom
3:24, 25—?Olsem wanem ‘blad blong Jisas i save tekemaot ol sin’ blong ol man we oli bin mekem sin, bifo we Jisas i kam long wol mo i ded? Faswan profet tok long saed blong Mesaea we i stap long Jenesis 3:15, i kamtru long yia 33 K.T. taem oli kilim Jisas i ded long wan pos. (Gal. 3:13, 16) Taem Jehova i talemaot profet tok ya, i olsem we hem i pemaot ransom ya finis from we i no gat wan samting nating we i save blokem God blong mekem stamba tingting blong hem i kamtru. Ale from ransom sakrefaes we Jisas bambae i givim, Jehova i save fogivim sin blong olgeta we oli kam biaen long Adam, we oli soem bilif long promes ya. Mo tu, ransom ya i save mekem se ol man we oli ded bifo long taem blong Jisas, oli laef bakegen.—Wok 24:15.
11-17 FEBRUARI
OL GUDGUDFALA SAMTING LONG BAEBOL | ROM 4-6
“God i Soemaot Se Hem i Lavem Yumi”
w11 1/6 pej 15 haf 5
God i Lavem Yumi Tumas Mo i Soemaot Samting Ya Long Yumi
5 Pol i gohed blong eksplenem samting ya, i se: “Wan man nomo i mekem se sin i kam long wol, mo ded i kamaot from sin. Mo ded i kasem olgeta man from we olgeta evriwan oli mekem sin.” (Rom 5:12) Hemia wan samting we yumi naf blong kasem save long hem, from we God i wokem wan buk we i tokbaot olsem wanem laef blong man i stat. Jehova i mekem fas man mo woman, Adam mo Iv. God ya we i Mekem olgeta samting, hem i stret gud olgeta, mo fas bubu man mo bubu woman blong yumi, tufala tu i stret gud olgeta. God i givim wan loa nomo blong tufala i folem, mo hem i talem se sipos tufala i no obei long loa ya, bambae tufala i ded. (Jen. 2:17) Be tufala i jus blong mekem samting we i spolem tufala, tufala i brekem loa blong God. Long fasin ya, tufala i sakemaot God, we i Man blong Givim Loa mo i Hae King blong heven mo wol.—Dut. 32:4, 5.
w11 1/6 pej 16 haf 6
God i Lavem Yumi Tumas Mo i Soemaot Samting Ya Long Yumi
6 Afta we Adam i kam sinman, hem i jes gat pikinini. Nao hem i pasem sin i go long evri pikinini blong hem, mo olgeta evriwan oli ded from. I tru, olgeta oli no brekem loa blong God olsem Adam, taswe God i no panisim olgeta from sem sin ya we Adam i mekem. Mo long taem ya, God i no stanemap plante loa yet blong ol man oli folem. (Jen. 2:17) Nating se i olsem, evri pikinini blong Adam oli bon wetem sin. Taswe, stat long Adam i kam kasem taem we God i givim loa long ol man Isrel, sin mo ded tufala i rul olsem king. Loa ya i soemaot klia long olgeta se oli sinman. (Ridim Rom 5:13, 14.) Blong soemaot wok we sin i mekem long man, yumi save yusum pijatok blong ol strong sik we samtaem sam man oli bon wetem, olsem sik ya anemia we plante man long ol kantri raonabaot long Mediteranian Si oli kasem, mo sik ya emofilia (hemophilia). Maet yu bin harem stori blong boe ya Alexis. Papa blong hem i King blong Rasia, nem blong hem Nicholas 2 mo mama blong hem, nem blong hem Alexandra. Boe ya i bon wetem sik ya emofilia, we i wan rabis sik blong blad. Long ol famle olsem, i gat samfala we maet oli gat sik ya long bodi blong olgeta mo oli save pasem i go long ol pikinini blong olgeta, be sik ya i no spolem olgeta. I no olsem long saed blong sin. Adam i pasem sin i go long evri man. Yumi evriwan i harem nogud long trabol ya. Mo trabol ya i mekem se yumi evriwan i kasem ded. Mo yumi pasem trabol ya i go long evri pikinini blong yumi. ?Olsem wanem? ?I gat rod blong winim trabol ya samtaem?
w11 1/6 pej 16-17 haf 9-10
God i Lavem Yumi Tumas Mo i Soemaot Samting Ya Long Yumi
9 ?Tok ya long lanwis Grik we oli tanem i kam ‘oli stret man long fes blong hem,’ i minim wanem? Tija long Yunivesiti we yumi tokbaot long stat blong stadi ya, i raetem se: “Tok ya i pulum tingting blong yumi i go long wan samting we i stret folem loa. Tok ya i no soemaot wan jenis we man i mekem, nogat. Be i soemaot se lukluk we God i gat long saed blong man, i jenis . . . Pijatok ya i soemaot God olsem wan jaj. I olsem se hem i jajem wan man we i pas long kot, nao hem i mekem desisen se man ya i no gat fol. Man ya i kam pas long kot from we hem i mekem i no stret, be God i letem hem i go fri.”
10 ?Wanem samting i mekem se God ya blong stret fasin we i stap “jajem olgeta man blong wol,” i save talem se wan man we i no stret, i fri long ol rong blong hem? (Jen. 18:25) Fastaem, God i sanem stret Pikinini blong hem, wan nomo we hem i gat, i kamdaon long wol. Jisas i mekem samting we Papa blong hem i wantem, long fasin we i stret gud olgeta. Hem i mekem olsem, nating se plante samting oli kam blong traem hem, ol man oli jikim hem bitim mak, mo oli mekem i nogud long hem. Hem i holemstrong long God gogo kasem we hem i ded long wan pos. (Hib. 2:10) Taem Jisas i givim laef blong hem we i stret gud olgeta olsem wan sakrefaes, hem i pemaot ol pikinini blong Adam, oli kam fri long sin mo ded.—Mat. 20:28; Rom 5:6-8.
Traem Faenem Ol Gudfala Samting Ya
w08 1/6 pej 29 haf 7
Ol Bigfala Poen Long Buk Blong Rom
6:3-5—Baptaes blong joen long Jisas Kraes mo baptaes blong joen long ded blong hem. ?Tufala tok ya oli minim wanem? Taem Jehova i makemaot ol man blong Jisas wetem tabu spirit, oli joen wetem Jisas nao oli kam memba blong kongregesen blong ol tabu Kristin. Kongregesen ya i olsem bodi blong Kraes, mo Kraes i olsem Hed blong hem. (1 Kor. 12:12, 13, 27; Kol. 1:18) Hemia nao mining blong tok ya baptaes blong joen long Jisas Kraes. Mo tu, ol tabu Kristin ‘oli baptaes blong joen long ded blong Jisas.’ Oli mekem olsem taem oli lego fulap samting long laef blong olgeta mo oli sakemaot tingting ya blong laef olwe long wol ya. Taswe, ded blong olgeta i olsem ded blong Jisas, hem i wan sakrefaes, be i no gat praes blong ransom long ded blong olgeta. Baptaes ya blong joen long ded blong Kraes i kamtru fulwan taem oli ded mo oli laef bakegen blong go long heven.
?Wanem Hop Blong Ol Bubu Blong Mi We Oli Ded Finis?
Taem ol man we oli no stret oli laef bakegen, ?bambae oli jajem olgeta folem ol nogud samting we oli bin mekem bifo? Nogat. Rom 6:7 i talem se: “Taem man i ded, hem i fri long olgeta sin blong hem.” Ol man we oli no stret, oli pemaot sin blong olgeta taem oli ded. Taswe, bambae oli jajem olgeta folem ol samting we oli mekem afta we oli laef bakegen, be i no bifo we oli ded. ?Olsem wanem samting ya bambae i halpem olgeta?
18-24 FEBRUARI
OL GUDGUDFALA SAMTING LONG BAEBOL | ROM 7-8
“?Yu Yu Stap Wet Blong Luk Taem Ya?”
w12 1/7 pej 12 haf 17
Yu Letem Jehova i Mekem Yu Fri
17 Pol i tokbaot taem ya we God bambae i mekem ol man blong hem oli fri, i se: “Olgeta samting we God i mekem oli stap wet, we oli wantem tumas blong luk we God bambae i soemaot ol pikinini blong hem.” Mo hem i gohed i se: “God bambae i mekem ol pikinini blong hem oli fri olgeta, we bambae oli no moa mekem sin, panis ya bambae i finis, nao olgeta samting ya we God i mekem bambae oli fri olgeta, olsem ol pikinini blong hem.” (Rom 8:19-21) Tok ya “olgeta samting we God i mekem” i minim ol man we bambae oli laef olwe long wol ya. Olgeta ya bambae oli harem gud taem God i “soemaot ol pikinini blong hem,” hemia ol tabu Kristin we hem i jusumaot. ?Wetaem God i stat blong soemaot ol pikinini blong hem? Hemia taem ol tabu Kristin we oli stap long heven oli givhan long Jisas blong spolem ol rabis man, mo oli lidim “bigfala hip blong ol man” i go fri long niufala wol.—Rev. 7:9, 14.
w12 1/3 pej 23 haf 11
Yumi Harem Gud Long Promes We God i Mekem Long Yumi
11 Jehova i mekem tingting blong ol man i strong taem hem i promes se bambae hem i yusum “sid” no ol pikinini blong wan spesel laen, blong mekem ol man oli fri long Setan. (Jen. 3:15, NW; Rev. 12:9) Wan impoten man long laen ya hemia Jisas Kraes. (Gal. 3:16) From we Jisas i ded mo i laef bakegen, ol man oli save putum tingting blong olgeta i stap strong long promes ya se bambae oli fri long sin mo ded. Promes ya i joen wetem taem ya we “God bambae i soemaot ol pikinini blong hem,” hemia ol tabu Kristin we oli rul wetem Kraes long heven. Olgeta oli narafala haf blong spesel laen ya. Bambae God i soemaot olgeta, taem oli givhan long Kraes blong spolem rabis wol blong Setan. (Rev. 2:26, 27) Olsem nao, bambae God i sevem ol narafala sipsip, mo bambae oli pastru long bigfala trabol.—Rev. 7:9, 10, 14.
w12 1/3 pej 23 haf 12
Yumi Harem Gud Long Promes We God i Mekem Long Yumi
12 !Long taosen yia rul blong Kraes bambae ol man oli harem gud tumas! Long taem ya, bambae God i soemaot “ol pikinini blong hem” long wan narafala rod bakegen. Bambae oli wok wetem Kraes olsem ol pris mo bambae oli givhan long ol man blong oli kasem ol blesing from sakrefaes blong Kraes. Taem Kingdom blong God i rulum wol, bambae ol man we oli obei long God “oli fri olgeta, we bambae oli no moa mekem sin, panis ya bambae i finis.” Bambae oli fri long ol trabol blong sin mo ded. Sipos oli stap tru long Jehova long wan taosen yia rul blong Kraes mo long taem we Setan i traem ol man laswan, bambae nem blong olgeta i stap long ‘buk we i gat nem blong ol man we oli kasem laef’ blong olwe. Bambae ‘oli fri olgeta, olsem ol pikinini blong God.’ (Rev. 20:7, 8, 11, 12) !Hemia wan nambawan promes!
Traem Faenem Ol Gudfala Samting Ya
?Yu Yu Tingbaot?
?From wanem ‘tingting blong man we i stap long samting we bodi nomo i wantem’ i defren long ‘tingting blong man we i stap long samting we spirit i wantem’? (Rom 8:6)
Wan man we i stap mekem ol samting we bodi nomo i wantem mo i letem ol rabis samting we tingting i wantem i bos long hem, oltaem i tokbaot mo i leftemap samting we bodi nomo i wantem. Wan man we i putum tingting blong hem long ol samting we spirit i wantem, i mekem ol samting we i laenap wetem tingting blong God. Wan Kristin we i gat fasin ya, hem i soemaot se hem i letem tabu spirit i lidim tingting blong hem. Taswe, man we i mekem samting we bodi nomo i wantem, bambae hem i ded. Be man we i mekem samting we spirit i wantem, bambae hem i gat laef mo pis.—w16.12, pej 11-14.
w09 1/11 pej 14 haf 20
?Ol Prea Blong Yu Oli Soemaot Wanem Long saed Blong Yu?
20 Wanwan taem, maet yumi no save wanem blong talem taem yumi prea yumi wan. Pol i raetem se: “Problem se, taem yumi mas prea, yumi no save wanem we yumi mas prea from. Be spirit ya i toktok long saed blong yumi, mo i krae we yumi no harem. Be God we i stap skelem hat blong ol man, hem i save samting we spirit ya i traem blong talem.” (Rom 8:26, 27) Jehova i mekem se i gat plante prea i stap long Baebol. Hemia ol prea we Jehova i glad long olgeta. Olsem nao yumi save yusum olgeta tu blong askem samting long hem, mo bambae hem i mekem ol samting ya i kamtru. God i save yumi, mo hem i save mining blong ol samting we hem i mekem tabu spirit i talemaot long ol man we oli raetem Baebol. Jehova i ansarem ol prea blong yumi taem tabu spirit i “toktok long saed blong yumi” no i toktok long bihaf blong yumi. Be taem yumi kasem save moa long Tok blong God, bambae i isi moa blong tingbaot wanem we i stret blong prea from.
25 FEBRUARI–3 MAJ
OL GUDGUDFALA SAMTING LONG BAEBOL | ROM 9-11
“Parabol Blong Tri Ya Olif”
w11 1/5 pej 25 haf 13
‘!Olgeta! !Waes Blong God i Bigfala Tumas!’
13 Aposol Pol i gohed, i tokbaot olgeta we bambae oli kam haf blong laen blong Ebraham. Hem i talem se oli olsem ol han blong tri ya olif we man i lukaotgud long hem. (Rom 11:21) Tri ya olif i pija blong samting we God i mekem i kamtru, folem stamba tingting blong hem long saed blong promes we hem i mekem long Ebraham. Rus blong tri ya we i tabu, i pija blong Jehova we i givim laef long Isrel blong God. (Aes. 10:20; Rom 11:16) Stamba blong tri ya i pija blong Jisas, we hem i fas haf blong laen blong Ebraham. Olgeta han blong tri ya, hemia “fulnamba” blong olgeta we oli seken haf blong laen blong Ebraham.
w11 1/5 pej 26 haf 15
‘!Olgeta! !Waes Blong God i Bigfala Tumas!’
15 ?Ale, Jehova i mekem stamba tingting blong hem i kamtru olsem wanem? Pol i talem se Hem i tekem sam han blong olif we i wael, i joenem olgeta long gudfala olif ya, blong tekem ples blong ol han we hem i katemaot. (Ridim Rom 11:17, 18.) Taswe God i yusum tabu spirit blong makemaot sam Kristin we oli no man Isrel, olsem sam long kongregesen blong Rom, nao oli kam haf blong laen blong Ebraham. Fastaem oli olsem ol han blong wael olif. Oli no gat janis blong joen long spesel promes ya we God i mekem wetem Ebraham. Be Jehova i openem rod blong oli save kam Isrel blong God.—Rom 2:28, 29.
w11 1/5 pej 27 haf 19
‘!Olgeta! !Waes Blong God i Bigfala Tumas!’
19 Yes, stamba tingting blong Jehova long saed blong “Isrel blong God,” i stap kamtru long nambawan fasin. (Gal. 6:16) Olsem Pol i talem, “bambae God i sevem olgeta laen blong Isrel.” (Rom 11:26) Long stret taem blong Jehova, “olgeta laen blong Isrel,” hemia fulnamba blong Isrel blong God, bambae oli mekem wok blong ol king mo ol pris long heven. !I no gat wan samting we i save blokem stamba tingting ya blong Jehova!
Traem Faenem Ol Gudfala Samting Ya
w13 15/6 pej 25 haf 5
Yu Mas Letem Jehova i Stretem Yu
5 Sipos wan man i stronghed mo i no wantem se Jehova i jenisim hem, ?bambae Jehova i mekem wanem? Jehova i mekem wan samting we i defren long man blong wokem graonpot. Wan man blong wokem graonpot, i save yusum graon blong mekem wan narafala samting, no maet hem i sakem, sipos hem i luk se hem i no save wokem samting we hem i wantem long graon ya. Plante taem, samting olsem i hapen from we hem nomo i no wokem gud graon ya olsem we hem i mas mekem. Taswe i fol blong hem nomo. (Dut. 32:4) Be long saed blong Jehova, taem wan man i no wantem we Jehova i jenisim hem, Jehova i no fosem hem. Be Jehova nao i jenisim fasin we hem i mekem long man ya. Sipos man ya i no obei, hemia i fol blong hem nomo. Be sipos hem i obei long Jehova, fasin blong hem bambae i kam gud moa, ale Jehova i save yusum hem long wok blong hem. Yu traem tingbaot ol tabu Kristin. God “i gat sore” long olgeta, nao hem i mekem olgeta oli kam olsem ‘ol graonpot we oli flas gud we i blong yusum long spesel taem.’ Be man we i no obei mo i agensem God, hem i kam olsem wan graonpot ‘we i stret nomo blong i lus.’—Rom 9:19-23.
it-1 pej 1260 haf 2
Jalus
Wok We i No Stret. Maet wan man i gat strong tingting blong mekem wan wok, o i jalus, from sam risen we hem i ting se i stret, be hem i rong, mo i mekem God i no glad. Hemia nao samting we plante man Jiu long faswan handred yia oli mekem. Oli ting se oli stret man long fes blong God, from we oli stap folem Loa Blong Moses. Be Pol i soemaot se, strong tingting blong olgeta long ol wok ya i no laenap wetem stret save. Taswe fasin blong olgeta i no laenap wetem tingting blong God. Sipos oli wantem kam stret man long fes blong God mo kam fri long Loa Blong Moses, oli mas lukluk i go long God, tru long Kraes. (Ro 10:1-10) Wan long olgeta hemia Sol blong Tasas. Hem i strong blong folem skul blong ol man Jiu, nao i “stap mekem bigfala trabol long kongregesen blong God.” Hem i strong blong folem Loa, taswe “i no gat man i save faenem wan poen long [hem].” (Ga 1:13, 14; Fil 3:6) Strong tingting we hem i gat, i no lidimgud hem. Hem i gat gudfala tingting, ale God i kaen tumas long hem mo i yusum Kraes blong pulum hem i kam long rod blong tru wosip.—1Ti 1:12, 13.