Stadi 2

Toktok Olsem We Yu Storian Nomo

Luk 6:45, fashaf

?I MINIM WANEM? Yu toktok long prapa fasin blong yu mo wetem fulhat blong yu. Hemia bambae i soemaot tingting we yu gat long samting we yu tokbaot, mo long ol man we yu toktok long olgeta.

?OLSEM WANEM BLONG MEKEM?

Prea mo rere gud. Prea long Jehova blong yu save putum tingting blong yu long ol toktok we yu talemaot, be i no long yu wan. Yu mas gat wan klia tingting long ol bigfala poen we yu wantem tokbaot. Talemaot ol tingting long prapa toktok blong yu. I nogud yu ripitim nomo ol tok we yu ridim long wan buk.

Sipos yu ridim wan vas blong Baebol o wan narafala buk, yu mas lanem gud fastaem nao riding blong yu bambae i ron gud. Sipos yu ridim toktok blong wan man, yu mas putum filing long ol toktok ya, be yu no bitim mak.
Ol toktok i mas kamaot long hat. Putum tingting blong yu long ol man nomo, mo tingbaot from wanem oli nidim tok ya. Sipos yu mekem olsem, fes blong yu mo ol aksen blong yu bambae oli soemaot se yu toktok wetem fulhat blong yu mo yu kea long olgeta.

Taem yu toktok long prapa fasin blong yu, yu mas lukaot gud blong toktok wetem respek tu. Toktok gudfala Bislama we i klia, hemia bambae i soemaot se ol tok blong yu i impoten.
Lukluk stret long ol man. I gud yu lukluk stret long fes blong man. Taem yu givim wan tok long kongregesen, traem lukluk ol man wanwan, i bitim we yu lukluk evriwan wantaem, o yu stap lukluk i go long wan saed mo long narasaed be yu no lukluk stret long wan man.