Japta 130
Long Bigfala Lugun Blong Galili
JISAS i talem long ol aposol finis se oli mas gobak bakegen long Galili. Ale olgeta oli mekem olsem ya. Be oli no save wanem we oli mas mekem long ples ya. Smoltaem i pas, nao Pita i talem long Tomas mo Nataniel mo Jemes mo brata blong hem Jon mo tu narafala aposol se: “Mi mi go blong sakem net.”
Ol narafala sikis man oli talem se: “Ale, yumi evriwan i go.”
Ful naet oli stap sakem gogo i kasem delaet. Be oli no pulum sam fis. Nao taem i brok delaet, Jisas i stap stanap long so, be ol aposol oli no luksave hem. Nao hem i singaot bigwan i se: “?Ol fren, yufala i pulum sam fis?”
Olgeta oli stap long bot, i no longwe tumas long so. Ale oli singaot bigfala bakegen oli talem se: “No gat.”
Nao hem i talem long olgeta i se: “Ale, yufala i traem sakem net long raet saed blong bot. Bambae yufala i save pulum sam.” Ale, oli sakem net ya i go, nao oli no save pulum bakegen, from we i fulap we i fulap long ol fis.
Nao Jon i singaot i se: “!Hemia Masta blong yumi ya!”
Pita i bin tekemaot klos blong hem blong i pulum net. Be taem hem i harem tok ya hem i putum klos blong hem bakegen, nao i jyamdaon long wora. Olgeta oli no stap longwe tumas long so, i olsem wan handred mita nomo. Ale Pita i swim i gosoa. Ol narafala aposol oli tekem bot ya i kam long so, we oli stap pulum net ya we i fulap long ol fis i kam biaen.
Taem olgeta oli gosoa, oli luk wan smol faea i stap, we fis i stap rus long sakol blong hem, mo bred tu i stap. Nao Jisas i talem long olgeta, i se: “Ale, yufala i tekem sam fis i kam, long olgeta ya we yufala i jes pulum.” Nao Pita i klaem long bot, i pulum net i kam long so. !Net ya i fulap long ol bigbigfala fis, we i gat 153 olgeta oli stap!
Nao Jisas i talem long olgeta, i se: “Yufala i kam kakae.”
Nao ol man blong hem oli sem, i no gat wan long olgeta we i save askem long hem se: “?Nem blong yu hu?” From we oli save se hemia i Jisas. Hemia i namba seven taem we Jisas i soemaot hem long sam disaepol blong hem, biaen long taem ya we hem i laef bakegen long ded. Mo hemia i namba tri taem we hem i soemaot hem long ol aposol blong hem, taem oli stap wanples. Ale Jisas i givim brekfas long olgeta, i givim bred mo fis long olgeta wanwan.
Olgeta oli kakae finis. Ating Jisas i stap lukluk i go long ol bigfala fis we oli bin pulum. Nao hem i askem long Pita, i se: “?Saemon, pikinini blong Jon, yu yu laekem mi moa, i winim we yu laekem olgeta ya?” (NW) I klia we hem i minim se: ?Yu yu laekem moa wok ya blong pulum fis, i bitim wok ya we mi mi givim long yu blong mekem?
Pita i ansa long hem, i se: “Yu save we mi laekem yu.”
Jisas i talem long hem, i se: “Ale, yu givim kakae long ol smol sipsip blong mi.”
Nao bakegen, Jisas i askem long hem, i se: “?Saemon, pikinini blong Jon, yu yu laekem mi?”
Pita i talem strong long hem nao, i se: “Yes Masta, yu save we mi laekem yu tumas.”
Bakegen, Jisas i givim oda ya long hem, i se: “Ale, yu lukaotgud long ol sipsip blong mi.”
Nao bakegen, we i mekem namba tri taem blong hem, Jisas i askem long hem, i se: “?Saemon, pikinini blong Jon, yu yu laekem mi?”
Nao Pita i harem nogud from we Jisas i askem sem samting long hem tri taem bakegen. Maet hem i ting se Jisas i no bilivim we hem i rili laekem hem tru. Traem tingbaot: Smoltaem nomo bifo, taem Jisas i stap stanap fored long kot we i jajem hem, Pita i haedem hem tri taem, se hem i no save hem. Nao Pita i ansa long Jisas i se: “Masta, yu yu save olgeta samting finis. Yu yu save we mi laekem yu tumas.”
Nao Jisas i talem long hem bakegen, hemia namba tri taem blong hem, se: “Ale, yu yu givim kakae long ol sipsip blong mi.”
Jisas i yusum Pita olsem wan eksampel blong makem long tingting blong ol narafala tu, wanem wok we hem i wantem se oli mekem. Kolosap nao, bambae hem i livim wol ya. Hem i wantem we biaen olgeta oli lidim minista wok ya, blong pulum ol man we bambae oli mas kam insaed long haos blong ol sipsip blong God.
Ol man oli bin fasem Jisas mo oli bin kilim hem i ded from we hem i mekem wok we God i givim long hem blong mekem. Nao hem i talemaot long Pita se bambae samting olsem i mas kamaot long hem. Hem i se: “Bifo, taem we yu yu yangfala, yu yu stap fasem strap blong yu, mo yu stap wokbaot long weples yu yu wantem go long hem. Be bambae, taem we yu yu olfala, yu yu save stretem han blong yu, nao narafala man bambae i save fasem yu, i save tekem yu long ples we yu no wantem go long hem.” Yes, bambae oli mas kilim Pita i ded from bilif blong hem. Nating we bambae i mas olsem, be Jisas i talem long hem se: “Ale, yu mas biaen long mi oltaem, yu mas man blong mi.” (NW)
Nao Pita i tanem hem, i luk Jon, nao i askem long Jisas, i se: “?Masta, bambae i olsem wanem long man ya?”
Jisas i ansa long hem, i se: “Sipos mi mi wantem blong hem i stap laef, gogo i kasem we bambae mi mi kambak bakegen, hemia i no bisnes blong yu. Yu yu mas biaen long mi, yu mas man blong mi.” Plante disaepol oli ting se Jisas i stap talem we aposol Jon bambae i no save ded samtaem. Be biaen Jon i eksplenem se Jisas i no stap talem olsem. Jisas i talem nomo se: “Sipos mi mi wantem blong hem i stap laef, gogo i kasem we bambae mi mi kambak bakegen, hemia i no bisnes blong yu.”
Mo tu, biaen Jon i talem wan narafala impoten poen, i se: “Nao i gat plante narafala samting we Jisas i mekem. Mo sipos ol man oli raetemdaon olgeta samting ya, mi mi ting se bambae wol ya i no naf. Bambae i no gat ples blong ol buk ya we oli save raetem olsem.” Jon 21:1-25; Matyu 26:32; 28:7, 10.
▪ ?Wanem i soemaot se ol aposol oli no save wanem we oli mas mekem long Galili?
▪ ?Long Bigfala Lugun blong Galili, wanem i mekem ol aposol oli luksave Jisas?
▪ ?Biaen we hem i laef bakegen long ded, hamas taem Jisas i kamtru long olgeta?
▪ ?Olsem wanem Jisas i makem long tingting blong ol aposol blong hem wanem wok we hem i givim long olgeta blong mekem?
▪ ?Olsem wanem Jisas i talemaot fasin blong ded blong Pita?
▪ ?Wanem samting we Jisas i talem long saed blong Jon we ol disaepol blong hem oli no kasem save long hem?