Refrens Blong Kristin Wok Mo Laef Buk Blong Miting
5-11 OKTOBA
OL GUDGUDFALA SAMTING LONG BAEBOL | EKSODAS 31-32
“Ronwe Long Wosip Blong Aedol”
w09 1/5 pej 11 haf 11
Gohed Kwik Blong Kam Bigman From We ‘Bigfala Dei Blong Jehova i Klosap’
11 Samtaem i no isi blong mekem samting we yumi lanem long Baebol i wok long laef blong yumi, antap moa taem yumi fesem hadtaem. Tingbaot ol man Isrel. Smoltaem afta we Jehova i mekem olgeta oli kam fri long Ijip, oli “stap tok agens long Moses” mo oli gohed blong “traem” Jehova. ?From wanem? From we oli no moa gat wota blong dring. (Eks. 17:1-4) Samtaem biaen, Jehova i mekem wan kontrak wetem olgeta mo oli agri blong “mekem evri samting we hem i talem.” Be klosap tu manis afta, oli brekem loa blong Jehova taem oli mekem wosip long aedol. (Eks. 24:3, 12-18; 32:1, 2, 7-9) ?Olsem wanem? ?Oli fraet from we Moses i gowe long olgeta longtaem tumas, taem hem i go antap long Hil ya Horeb blong kasem moa tijing? Wan taem, oli faet agensem ol man Amalek, mo taem Moses i leftemap han blong hem i go antap, olgeta oli winim faet ya. ?Be olsem wanem naoia? ?Maet oli ting se ol man Amalek bambae oli kam blong mekem faet long olgeta bakegen mo oli harem se oli no gat paoa from we Moses i no stap? (Eks. 17:8-16) Maet oli tingting olsem, be nomata se i olsem wanem, ol man Isrel oli “no wantem harem [“obei long,” NW]” God. (Wok 7:39-41) Pol i pulum ol Kristin blong oli “mas traehad” blong no “folem fasin blong olgeta ya bifo we oli no obei long God,” hemia ol man Isrel we oli fraet blong go insaed long Promes Lan ya we God i promes blong givim long olgeta.—Hib. 4:3, 11
w12 1/10 pej 26 haf 12
Ol Strong Promes Blong God Oli Mekem i Gud Long Man We i Obei
12 Stret afta we God i mekem promes wetem ol man Isrel, hem i stat wok blong mekem promes ya blong hem i kamtru. Hem i jusum ol pris blong oli mekem wok long haos wosip blong olgeta, hemia haos tapolen. Ol pris ya oli mas givhan long ol man Isrel blong oli fren gud wetem God. Ol man Isrel ya oli ol spesel man blong God. Be smoltaem nomo biaen, oli no moa obei long God. Oli no mekem ol samting ya we oli bin promes blong mekem, mo oli “mekem [God] i harem nogud.” (Sam 78:41) Wan dei taem Moses i stap antap long Hil ya Sinae mo Jehova i stap givim ol loa long hem, ol man Isrel oli kam kros from we oli stap wet longtaem. Oli no moa trastem God. Oli ting se Moses i lego olgeta finis. Ale, oli wokem pija blong wan bul long gol mo oli talem se: “!Olgeta! Hemia nao God blong yumi, we i tekemaot yumi long Ijip.” (Eks. 32:1, 4) Oli tekem ol animol i kam, nao oli mekem sakrefaes long bul ya, mo oli stap bodaon long hem. Oli talem se oli stap mekem wosip long Jehova. Be taem Jehova i luk we oli stap wosip long bul ya, hem i talem long Moses se: “Fasin ya we mi mi talem long olgeta blong oli folem, olgeta oli lego finis.” (Eks. 32:5, 6, 8) Long ol yia we oli kam biaen, ol man Isrel oli mekem plante narafala promes long God. Be oli no holem ol promes ya nating.—Na. 30:2.
‘?Hu i Stap Long Saed Blong Jehova?’
14 Ol man Isrel oli save se i no stret blong wosipim ol aedol. (Eks 20:3-5) !Be oli girap oli mekem wosip long wan bul we oli wokem long gol! Oli no obei long tok blong Jehova, mo oli gat krangke tingting ya se, nating we oli no obei long Jehova, be oli stap yet long saed blong Jehova. Mo tu, Eron i singaot wosip we oli mekem long bul ya se: ‘!Wan lafet blong ona long Jehova!’ ?Jehova i mekem wanem? Hem i talem long Moses se, ol man ya “oli tanem baksaed finis” mo oli lego rod we mi “talem long olgeta blong oli folem.” Jehova i kros tumas long olgeta mo hem i gat tingting blong spolem ful nesen blong Isrel.—Eks 32:5-10.
Traem Faenem Ol Gudfala Samting Ya
‘I Gat Taem’ Blong Wok Mo Spel
4 From we Jehova mo Jisas i wok had, ?hemia i min se yumi no save spel? Nogat. Jehova i no save taed, taswe hem i no nidim blong spel. Be Baebol i talem se afta we Jehova i wokem heven mo wol, ‘hem i no moa wok, hem i spel.’ (Eks 31:17) Hemia i min se Jehova i spel long wok blong hem mo i tekem taem blong harem gud long ol samting we hem i wokem. Mo nating se Jisas i wok strong taem hem i stap long wol, hem tu i tekem taem blong spel mo harem gud blong kakae wetem ol fren blong hem.—Mt 14:13; Lu 7:34.
w87 1/9 pej 29
Kwestin
Taem God i glad long wan man mo i raetem nem blong hem (long “buk blong laef”), hemia i no min se man ya i sua finis blong kasem laef we i no save finis, olsem se God i jusumaot hem finis blong i laef olwe mo i no save jenisim tingting blong hem. Long saed blong ol man Isrel, Moses i askem long Jehova se: “Naoia, sipos yu glad, yu fogivim sin blong olgeta. Sipos nogat, plis yu ravemaot nem blong mi long buk blong yu.” God i ansa se: “Man we i mekem sin agens long mi, nem blong hem nao bambae mi ravemaot long buk blong mi.” (Eks 32:32, 33) Yes, nating sipos God i glad long wan man nao i raetem nem blong hem long “buk” blong hem, man ya i save tanem baksaed long God mo lego bilif blong hem. Sipos samting ya i hapen, God bambae i “tekemaot nem blong hem long buk blong laef.”—Re 3:5.
12-18 OKTOBA
OL GUDGUDFALA SAMTING LONG BAEBOL | EKSODAS 33-34
“Ol Gudfala Fasin Blong Jehova”
it-2 pej 466-467
Nem
Ol kriesen blong Jehova we yumi save luk, oli pruvum se God i stap, be oli no soemaot nem blong hem. (Sam 19:1; Ro 1:20) Sipos wan man i wantem save nem blong God, hem i mas mekem moa i bitim we i save nem ya nomo. (2Kr 6:33) Hemia i min se hem i mas savegud God ya, wetem stamba tingting blong hem, ol wok blong hem, mo ol fasin blong hem we i stap long Baebol. (Skelem 1Ki 8:41-43; 9:3, 7; Neh 9:10.) Yumi luk samting ya long stori blong Moses, we Jehova i ‘save nem blong hem,’ hemia i min se i savegud hem. (Eks 33:12) Moses i gat blesing ya blong luk glori blong Jehova, blong harem we hem i “talemaot nem blong Jehova.” (Eks 34:5) Tok ya i no minim nomo se Jehova i ripitim nem blong hem, be i talemaot ol gudfala fasin blong God mo ol wok blong hem. “Jehova, Jehova, wan God we i gat sore mo i kaen, i no save kros kwik, mo fasin blong hem blong lavem man oltaem i bigwan tumas, mo hem i tok tru. Oltaem hem i soemaot se hem i lavem plante taosen man, hem i fogivim man we i mekem rong, no i brekem loa, no i mekem sin. Be taem man i mas kasem panis, hem i no blokem panis ya nating. Sipos ol papa oli mekem sin, bambae panis blong olgeta i kasem ol boe blong olgeta, ol smol bubu blong olgeta, mo i go kasem namba 3 jeneresen mo namba 4 jeneresen blong olgeta.” (Eks 34:6, 7) Long sem fasin, long singsing blong Moses we i gat ol toktok ya: “Bambae mi mi talemaot nem blong Jehova,” hem i tokbaot ol samting we God i mekem long ol man Isrel, mo i tokbaot ol gudfala fasin blong hem.—Du 32:3-44.
w09 1/5 pej 18 haf 3-5
Taem Jehova i Diskraebem Hem Wan
Faswan samting we Jehova i tokbaot long saed blong hem wan, hemia se hem i “wan God we i gat sore mo i kaen.” (Vas 6) Wan man blong stadi long Baebol i talem se Hibru tok ya we oli tanem i kam “sore,” i soemaot se God i ‘sore long ol man from we i lavem olgeta, olsem wan papa we i sore long ol pikinini blong hem.” Tok ya “kaen” i joen wetem wan veb we i “soemaot filing blong wan man we i wantem tumas blong givim samting long wan narafala we i gat nid.” I klia nomo se Jehova i wantem yumi save se hem i stap lukaotgud long ol man we oli wosipim hem, olsem ol perens oli mekem long ol pikinini blong olgeta, oli gat lav mo oli kea bigwan long ol nid blong olgeta.—Sam 103:8, 13.
Biaen, Jehova i talem se hem “i no save kros kwik.” (Vas 6) Hem i no stap kros long ol man blong hem long wol. Be hem i gat longfala tingting long olgeta, i fogivim ol slak fasin blong olgeta mo long semtaem i givim taem long olgeta blong oli jenisim fasin blong olgeta.—2 Pita 3:9.
God i gohed i se “fasin blong hem blong lavem man oltaem i bigwan tumas, mo hem i tok tru.” (Vas 6) Fasin ya blong lavem man oltaem, i wan gudfala fasin we Jehova i gat long ol man blong hem, nao i mekem se lav we hem i gat long olgeta i stap olwe, i no save lus. (Dutronome 7:9) Mo tu, Jehova i olsem wan wel we i fulap long trutok. Hem i no save trikim man mo i no gat man i save trikim hem. From we hem i “God blong trutok,” yumi save trastem fulwan evri samting we hem i talem, wetem ol promes blong hem long saed blong fiuja.—Sam 31:5.
w09 1/5 pej 18 haf 6
Taem Jehova i Diskraebem Hem Wan
Wan narafala gudfala trutok we Jehova i wantem se yumi save long saed blong hem, hemia se hem i ‘fogivim man we i mekem rong, o i brekem loa, o i mekem sin.’ (Vas 7) Hem i ‘rere blong fogivim’ sinman we i tanem tingting blong hem. (Sam 86:5) Long semtaem, Jehova i neva talem se rabis fasin i gud nomo. Hem i eksplenem se “taem man i mas kasem panis, hem i no blokem panis ya nating.” (Vas 7) God ya we i tabu mo i gat stret fasin, bambae i panisim ol man we oli minim nomo blong mekem sin. Bambae oli kasem frut blong rabis fasin blong olgeta yet.
Traem Faenem Ol Gudfala Samting Ya
w04 15/3 pej 27 haf 5
Ol Bigfala Poen Long Buk Blong Eksodas
33:11, 20—?Olsem wanem God i toktok long Moses “fes tu fes”? Tok ya i minim olsem we tu man oli stap storian tugeta. Moses i storian long Jehova mo i kasem ol tijing we i kamaot long Jehova, tru long man we i wok long nem blong Jehova. Be Moses i no luk Jehova, from we ‘sipos wan man i luk fes blong God, man ya bambae i ded.’ Yes, Jehova i no tok stret long Moses. Galesia 3:19 i talem se: “God i yusum ol enjel blong oli givim Loa ya long Moses, nao hem i givim long olgeta man.”
!Meksua Se Yu Putum Ol Impoten Samting Long Fasples!
Tri taem long wan yia, evriwan we oli man long Isrel wetem ol proselaet long kantri ya, oli mas kam stanap long fored blong Jehova. Plante hed blong famle, oli luksave se hemia wan taem we ful famle i save harem gud long saed blong spirit. Taswe oli tekem waef mo ol pikinini blong olgeta tu, i go wetem olgeta. Be, ?hu bambae i blokem ol enemi blong oli no kam spolem haos mo garen blong famle ya taem oli aot? Jehova i promes se: “Sipos yufala i wokbaot blong kam mekem lafet long ples ya we bambae mi mi makem, be bambae i no gat man i save kam blong stilim graon blong yufala.” (Eksodas 34:24) Ol man Isrel ya oli rili nidim strong tingting blong bilif fulwan se sipos oli putum ol samting long saed blong spirit fastaem, bambae oli no lusum wan samting long saed blong bodi. ?Jehova i holem promes blong hem? !Yes, hem i mekem!
19-25 OKTOBA
OL GUDGUDFALA SAMTING LONG BAEBOL | EKSODAS 35-36
“Rere Blong Mekem Wok Blong Jehova”
w14 15/12 pej 4 haf 4
Jehova i Blesem Bigwan Man We i Rere Blong Mekem Wok
Samting we i mekem Jehova i glad moa, i no ol samting we man i givim, be gudfala tingting blong sapotem tru wosip. Oli glad tu blong givim taem mo paoa blong olgeta long God. Baebol i talem se: “Olgeta woman we oli gat gudhan blong wokem tred, oli kam givim ol tred we oli wokem.” Yes, “olgeta woman we oli gat gudhan mo we hat blong olgeta i pusum olgeta, oli wokem ol tred long hea blong nani.” Mo tu, Jehova i mekem Bejalehel i “waes, i kasemsave samting, mo i gat save blong wokem ol defdefren samting.” Blong talem stret, God i mekem Bejalehel mo Oholiab oli gat gudhan blong mekem olgeta wok we God i talem se oli mas mekem.—Eks. 35:25, 26, 30-35.
w11 15/12 pej 18 haf 6
Ol Man Bifo We Oli Bilif Long God, Oli Letem Spirit Blong God i Lidim Olgeta
6 Wan narafala man blong wok blong Jehova we i laef long taem blong Moses, hemia Bejalehel. Spirit blong God i givhan long hem tu. Eksampol blong hem i soemaot wanem we spirit blong God i save mekem blong lidim yumi. (Ridim Eksodas 35:30-35.) Jehova i jusum Bejalehel blong i lidim wok ya blong mekem ol samting blong flasem haos tapolen. ?Olsem wanem? ?Bejalehel i gat save blong mekem ol samting ya? Maet hem i save. Be wok we hem i stap mekem, hemia blong wokem ol brikis blong ol man Ijip. (Eks 1:13, 14) ?Ale, Bejalehel i save lidim bigfala wok ya olsem wanem? Jehova “i mekem tabu spirit blong God i kam fulap long Bejalehel, nao hem i gat waes, i kasemsave samting, mo i gat save blong wokem ol defdefren samting . . . mo blong wokem enikaen naesfala samting.” Tabu spirit we God i givim long Bejalehel mo Oholiab i halpem tufala blong tufala i kam gud moa long ol wok we tufala i mekem. Ating tufala i lanem gud ol wok blong tufala from we tufala i mekem ol wok ya, mo tufala i tijim ol narafala tu blong oli mekem.
w11 15/12 pej 19 haf 7
Ol Man Bifo We Oli Bilif Long God, Oli Letem Spirit Blong God i Lidim Olgeta
7 Narafala samting we i soemaot se tabu spirit i lidim Bejalehel mo Oholiab, hemia se tufala i mekem gud ol wok blong tufala, mo ol samting we tufala i wokem oli stap longtaem. Klosap 500 yia biaen, ol man oli stap yusum yet ol samting ya we tufala i wokem. (2 Kron. 1:2-6) Plante man we oli wokem ol samting tede, oli wantem se ol narafala oli leftemap olgeta from wok we oli mekem. Be Bejalehel mo Oholiab tufala i no mekem olsem. Tufala i wantem se ol man oli ona long Jehova from wok we tufala i mekem.—Eks. 36:1, 2.
Traem Faenem Ol Gudfala Samting Ya
w05 15/5 pej 23 haf 14
Savegud Ol Fasin Blong Jeova
14 Putum ol samting long saed blong spirit long fas ples long laef blong yumi. Nesen blong Isrel i no mas spenem tumas taem blong lukaot ol samting we oli nidim long saed blong bodi, nao oli no moa gat taem blong mekem ol wok long saed blong spirit. Oli no mas yusum ful laef blong olgeta blong mekem ol prapa samting blong olgeta nomo. Jehova i makemaot taem evri wik we hem i talem se i tabu, taem ya oli mas yusum nomo blong mekem ol wok we oli joen wetem wosip blong trufala God. (Eksodas 35:1-3; Namba 15:32-36) Evri yia, i gat sam narafala spesel taem tu, we oli mas mekem ol tabu asembli blong olgeta. (Levitikas 23:4-44) Long taem ya, oli gat janis blong storian tugeta long ol bigbigfala wok blong Jehova, oli harem tok we i mekem olgeta oli tingting bakegen long ol fasin blong hem, mo oli save talem tangkiu long hem from ol gudfala fasin blong hem. Taem ol man ya oli soemaot bigfala ona long Jehova, bambae oli lavem hem moa, bambae oli fraet moa blong mekem samting we hem i no laekem, mo bambae oli kasem help blong wokbaot long ol rod blong hem. (Dutronome 10:12, 13) Ol gudfala rul insaed long ol tok we Jeova i talem long olgeta, oli givhan long ol man blong Jehova tede tu.—Hibrus 10:24, 25.
Fasin Blong Givim Plante i Karem Glad
Traem tingbaot filing we ol man Isrel oli gat long taem ya. Long ol yia we oli pas, plante long olgeta oli bin safa from nogud fasin blong slef mo oli sot long plante samting. Naoia oli fri mo oli gat ol rij samting. ?Bambae oli harem olsem wanem taem oli lego sam long ol samting ya? Maet oli harem se oli wokhad from ol samting ya mo oli gat raet blong holemtaet i stap. Be, taem oli askem olgeta blong givim presen mane blong sapotem trufala wosip, oli mekem olsem—!from we oli wantem mo oli no givim smol nomo! Oli no fogetem se Jeova nao i mekem se oli save gat ol samting ya. Taswe, oli givim plante long ol silva mo ol gol mo ol anamol blong olgeta. Oli “glad blong givim.” ‘Hat blong olgeta i glad blong givim.’ “Tingting blong olgeta i glad blong givim.” Hem i rili wan nambawan presen we “oli givim i go long Hae God.”—Eksodas 25:1-9; 35:4-9, 20-29; 36:3-7.
26 OKTOBA–1 NOVEMBA
OL GUDGUDFALA SAMTING LONG BAEBOL | EKSODAS 37-38
“Ol Olta Blong Tabenakel Mo Wok Blong Olgeta Long Tru Wosip”
it-1 pej 82 haf 3
Olta
Olta blong insens. I klia se oli wokem olta blong insens (we oli kolem tu se “olta we oli wokem long gol” [Eks 39:38]) long wud blong akasia, mo oli blokem top mo saedsaed blong hem long gol. Hem i gat wan strap long gol we i goraon long saed blong hem long top. Olta ya i 44.5 sentimeta skwea mo 89 sentimeta hae, mo long ol fo kona blong hem antap, i gat fo “hon.” Oli wokem tu gol ring blong olta ya mo oli putum aninit long rel blong hem, we wan i stap long wansaed mo narawan long wansaed. Ol gol ring ya oli blong holem ol longfala stik long wud blong akasia we oli blokem long gol. (Eks 30:1-5; 37:25-28) Evri dei, oli bonem wan spesel insens tu taem long olta ya, wan taem long moning mo wan taem long sapa. (Eks 30:7-9, 34-38) Sam narafala ples long Baebol i tokbaot se oli yusum wan sensa, o faea holda, mo i klia se oli yusum tu long olta blong insens. (Le 16:12, 13; Hib 9:4; Re 8:5; skelem 2Kr 26:16, 19.) Olta blong insens i stap insaed long tabenakel, jes bifo long bigfala kaliko blong Rum We i Tabu We i Tabu, taswe oli stap talem se olta ya i stap “long fored blong bokis blong Loa.”—Eks 30:1, 6; 40:5, 26, 27.
it-1 pej 1195
Insens
Tabu insens we God i talem se oli yusum long tabenakel, oli wokem long ol samting we i sas mo we kongregesen i givim. (Eks 25:1, 2, 6; 35:4, 5, 8, 27-29) Taem Jehova i talemaot ol fofala samting we bae oli yusum blong mekem insens ya, Jehova i talem long Moses se: “Yu tekem ol senta ya: Drop blong stakte, onika, blad blong galbanam, mo frangkinsens we i klin gud. Olgeta evriwan ya oli mas sem mak. Yu yusum ol samting ya blong mekem insens long hem. Yu mas miksim gud ol samting ya mo yu sakem sol long hem, blong oli gat gudfala smel, oli klin gud, mo oli tabu. Yu mas granem sam long ol samting ya blong oli kam paoda we i smosmol olgeta, mo yu putum sam paoda ya long fored blong bokis blong Loa long tent blong miting, long ples we bambae mi soemaot mi long yu. Yufala i mas luk paoda ya olsem wan samting we i tabu we i tabu.” Biaen, blong mekem oli tinghevi long insens ya se i tabu mo i blong yusum long wosip nomo, Jehova i talem se: “Sipos wan man i wokem insens olsem hemia mo i harem gud long smel blong hem, yufala i mas aotem hem.”—Eks 30:34-38; 37:29.
it-1 pej 82 haf 1
Olta
Ol Olta Long Tabenakel. Taem oli wokem tabenakel, oli wokem tu olta folem plan we God i givim. Olta blong sakrefaes we i bon fulwan (we oli kolem tu se ‘olta long kopa’ [Eks 39:39]), oli wokem long wud blong akasia, mo hem i olsem wan bigfala bokis we i emti, mo we i no gat top mo botom blong hem. Olta ya i 2.2 m. skwea mo 1.3 m. hae, mo i gat ol “hon” long ol fofala kona blong hem antap. Wan bigfala netwaea long kopa i stap aninit long strap blong olta ya, “i stat long ples ya go kasem medel blong olta ya.” Oli putum fo ring long ol fofala kona blong olta ya, klosap long netwaea ya, mo hemia ol sem ring we oli pusum ol stik blong akasia i gotru long olgeta, taem oli wantem karem olta ya. Hemia i min se oli katemaot wan flat hol i gotru long tu saed blong olta ya, blong pusum flat netwaea i gotru long hem, mo tufala ring ya i stap long tugeta saed ya. Plante man blong stadi long Baebol oli gat defdefren tingting long saed blong samting ya, mo plante oli ting se i gat 8 ring, mo fo long olgeta we ol stik blong karem olta oli gotru long olgeta, oli stap aotsaed long olta ya. Ol samting blong yusum long olta ya, oli wokem long kopa, i gat ol baket mo ol savel blong karem asis, ol bol blong kasem blad blong ol animol, ol fok blong stikim mit blong animol, mo ol faea holda.—Eks 27:1-8; 38:1-7, 30; Na 4:14.
Traem Faenem Ol Gudfala Samting Ya
it-1 pej 36
Akasia
Tri ya akasia i gat plante longlongfala branj blong hem, mo ol branj ya oli gat ol longfala nil. Plante taem, ol branj ya oli fasfas wetem ol branj blong ol nara akasia tri klosap, nao oli fomem wan tik bus; Ating hemia nao from wanem plante taem, Baebol i yusum toktok ya shit·timʹ we i minim plante. Wan akasia i save gru kasem 6 o 8 m. hae, be plante taem hem i olsem wan bus. Ol lif blong hem i sofsof mo i olsem feta, mo i fulap long ol yelo flaoa we i gat naesfala smel, mo biaen ol flaoa ya oli karem frut we i longfala mo i gat skin olsem blong namambe. Skin blong tri ya i raf mo i blak, be insaed long hem, wud blong akasia i naes mo i strong, mo i hevi nao ol bebet oli no save spolem. Tri ya i gru plante long draeples, mo ol gudfala samting long saed blong tri ya, oli mekem se oli save yusum blong wokem tabenakel mo ol samting long tabenakel ya. Oli yusum blong wokem bokis blong kontrak (Eks 25:10; 37:1), tebol blong sobred (Eks 25:23; 37:10), ol olta (Eks 27:1; 37:25; 38:1), ol stik blong karem ol samting ya (Eks 25:13, 28; 27:6; 30:5; 37:4, 15, 28; 38:6), ol bigfala pos blong bigfala kaliko mo skrin (Eks 26:32, 37; 36:36), mo ol frem (Eks 26:15; 36:20) wetem ol stik blong olgeta (Eks 26:26; 36:31).
?Yu Yu Save?
Ol glas blong lukluk fes long taem bifo oli defren long hemia blong tede. Plante taem oli wokem ol glas ya long bras, mo tu maet oli wokem olgeta long silva, mo gol mo oli saenem gud. Faswan taem we Baebol i tokbaot ol glas blong lukluk fes, hemia long taem we oli wokem haos tapolen blong Jehova. Hem i faswan ples we ol man Isrel oli kam long hem blong mekem wosip. Ol woman Isrel oli givim ol glas we oli gat, blong wokem besin we oli wokem long bras, mo ples blong besin ya. (Eksodas 38:8) I luk olsem se, oli bonem ol glas ya blong mekem ol bras oli ronaot, mo oli yusum bras ya blong wokem besin ya.