Stadi 8

Yusum Pijatok We i Tijim Man

Matiu 13:34, 35

?I MINIM WANEM? Bambae yu kamgud moa blong tij sipos yu yusum ol isi pijatok we oli stret long ol man we yu toktok long olgeta, mo we oli makem gud ol impoten poen.

?OLSEM WANEM BLONG MEKEM?

Jusum ol pijatok we oli isi. Olsem Jisas, yusum ol smosmol samting blong eksplenem ol bigfala samting, mo ol isi samting blong eksplenem ol samting we i had. Yu no ademap ol smosmol save we yu no nidim mo i mekem pijatok i had blong kasem save. Meksua se evri haf blong pijatok i laenap wetem samting we yu stap tokbaot, nao ol man oli no save konfius.

Lukluk gud ol samting raonabaot long yu, stadi long ol buk blong yumi, mo lesin long olgeta we oli tij gud. Makem gud ol samting we yu save yusum olsem pijatok, blong kamgud moa blong tij. Raetem daon ol pijatok ya long wan buk.
Tingbaot olgeta we yu stap tijim. Jusum pijatok we i sem mak long samting we ol man oli mekem long laef blong olgeta, mo oli intres long hem. Lukaot gud se pijatok i no mekem man i sem o i harem nogud.
Tijim ol man long stamba poen. Yusum pijatok blong makem gud stamba poen be i no ol narafala save we i no impoten tumas. Meksua se ol man bambae oli rimemba lesen we oli lanem, i no pijatok nomo.