Ol Refrens Blong Kristin Wok Mo Laef Miting Wokbuk
© 2023 Watch Tower Bible and Tract Society of Pennsylvania
4-10 MAJ
OL SAS SAMTING LONG BAEBOL | OL SAM 16-17
“Jehova, Yu Yu Stamba Blong Ol Gudfala Samting Blong Mi”
Ol Yangfala, Yufala i Save Harem Gud Long Laef
FAENEM OL TRUFALA FREN
11 Ridim Ol Sam 16:3. Deved i save olsem wanem blong faenem ol gudfala fren. Hem i jusum blong fren wetem olgeta we oli lavem Jehova, mo hem i “wantem tumas blong stap wetem olgeta.” Hem i se ol fren blong hem “oli gudfala man,” from we oli traehad blong folem ol rul blong Jehova. Wan narafala man blong raetem sam i talem se: “Mi mi stap fren long olgeta man we oli stap wok blong yu mo oli stap obei long ol loa blong yu.” (Ol Sam 119:63) Olsem we yumi tokbaot long las stadi, yu tu yu save faenem plante gudfala fren we oli lavem Jehova mo oli obei long hem. Mo tu, yu save gat ol fren we maet oli yang o oli olfala moa long yu.
Yumi “Lukluk Ol Gudgudfala Fasin” Blong Jehova
Long wan sing we Deved i mekem, hem i talem se: “Hae God. Yu nomo yu stamba blong olgeta laef blong mi, yu yu stap givim olgeta samting ya long mi we mi mi sot long hem. Laef blong mi long fiuja i stap long han blong yu. Olgeta samting we yu yu givim long mi oli gud tumas.” (Sam 16:5, 6) Deved i talem tangkiu long Jehova from “olgeta samting” we hem i gat. Olgeta samting ya, hemia se hem i save fren gud wetem Jehova mo mekem wok blong hem. Olsem Deved, maet yumi harem nogud from sam hadtaem, be yumi gat plante blesing long saed blong spirit. I gud yumi gohed blong tingting gud long tru wosip we yumi mekem, mo oltaem yumi mas glad blong lukluk haos tempol blong Jehova long saed blong spirit.
Tingbaot Jehova Oltaem Olsem We Yu Stap Luk Hem
2 Yumi savegud ol man ya we Baebol i tokbaot olgeta olsem Ebraham, Sera, Moses, Rut, Deved, Esta, aposol Pol mo sam narawan bakegen. Mo yumi save lanem fulap samting long stori blong olgeta ya. Be i gat ol narafala man bakegen we stori blong olgeta i stap long Baebol, we maet yumi no savegud olgeta be oli save givhan bigwan long yumi. Sipos yumi tingting dip long ol stori ya long Baebol, samting ya i save halpem yumi blong mekem olsem vas ya long Ol Sam i talem, i se: “Mi mi putum Jehova i stap oltaem long tingting blong mi, i olsem we mi stap luk hem. From we hem i stap long raetsaed blong mi, bambae i no gat wan samting we i save mekem mi mi foldaon.” (Sam 16:8, NW) ?Wanem mining blong vas ya?
3 Plante taem wan soldia i holem naef blong faet long raethan blong hem mo i holem sil long lefhan blong hem. Sil ya i blokemgud lefsaed blong soldia ya, be i no gat sil blong blokem raetsaed blong hem. Taswe, sipos i gat wan fren blong soldia ya i stanap long raetsaed blong hem, fren ya i save givhan blong blokemgud raetsaed blong soldia ya we sil i no stap blokem. Sipos yumi tingbaot Jehova oltaem mo yumi mekem ol samting we hem i wantem, bambae hem i stap olsem wan fren we i blokemgud yumi. Taswe i gud yumi tingbaot sam stori long Baebol we oli save mekem bilif blong yumi i strong blong bambae yumi ‘putum Jehova i stap oltaem long tingting blong yumi.’
Ol Gudgudfala Samting
it-2 714
Pi Blong Ae
Taem oli yusum Hibru tok ya ʼi·shohnʹ (Du 32:10; Pro 7:2), wetem tok ya ʽaʹyin (ae), hemia i minim “smol man blong ae.” Hemia i sem mak long tok ya bath (dota) we oli yusum long futnot blong Ol Krae 2:18 we i se “dota blong ae.” Tufala tok ya i stap minim pi blong ae, mo tufala i joen blong makem gud tok we i stap long Ol Sam 17:8 (ʼi·shohnʹ bath-ʽaʹyin), we prapa mining blong hem, “smol man, dota blong ae” (“pi blong ae,” NW). Tok ya i blong soemaot smol pija blong yu wan, we yu save luk long ae blong narafala man.
Ae i wan samting we yumi mas lukaot gud long hem. Sipos wan smol hea o das i go long hem, kwiktaem nomo bambae yumi haremsave. Yumi mas lukaot gud long klia skin (the cornea) we i kavremap pi blong ae blong yumi, from we sipos oli mekem operesen long hem o sipos ae blong yumi i no klia from wan sik, hemia i save mekem yumi no lukluk klia o yumi kam blaen. Baebol i yusum tok ya “pi blong ae blong yu,” blong tokbaot wan samting we yumi mas lukaot gud long hem. Mo yumi mas mekem olsem tu long loa blong God. (Pro 7:2) Baebol i tokbaot God we i papa blong Isrel, se i lukaot gud long olgeta. Dutronome 32:10, i talem se Hem i lukaot gud long nesen ya “olsem we i lukaot gud long prapa ae blong hem.” Deved i prea blong God i protektem mo lukaot gud long hem, ‘olsem we hem i stap blokem pi blong ae blong hem.’ (Sam 17:8) Hem i wantem se Jehova i kwik blong tekem aksen long bihaf blong hem, taem ol enemi blong hem oli stap atakem hem. (Skelem wetem Sek 2:8; we i yusum Hibru tok ya ba·vathʹ ʽaʹyin, we i minim “pi blong ae.”)
11-17 MAJ
OL SAS SAMTING LONG BAEBOL | OL SAM 18
“Jehova . . . Hem Nao i Sevem Mi”
w09 5/1 14 ¶4-5
Glad We i Kamaot Long Jehova, Hem i Strong Ples Blong Haed Blong Yumi
Baebol i komperem Jehova se i olsem sam samting we oli no laef. Hem i tokbaot hem olsem “Bigfala ston blong Isrel,” “hol blong ston,” mo olsem wan “strong ples blong haed.” (2 Samuel 23:3; Ol Sam 18:2; Dutronome 32:4) ?Wanem i mekem se Jehova i sem mak long ol samting ya? Wan bigfala ston, hem i strong mo i no save muv. Long sem fasin, Jehova God i save kam wan strong ples blong haed blong yu.
5 Buk blong Ol Sam i yusum plante pijatok blong tokbaot Jehova. Eksampol, Ol Sam 84:11 i tokbaot Jehova olsem “wan san mo wan sil,” from we hem i Stamba blong laet, laef, paoa, mo proteksen. Be Ol Sam 121:5 i talem se “Jehova i olsem wan sed long raethan blong yu.” Taem i gat strong san, wan sed i save protektem yu. Long sem fasin, taem ol man we oli wosipim Jehova oli fesem ol trabol we i olsem strong san, Jehova i save protektem olgeta, i kavremap olgeta long sado blong “han” o “ol wing” blong hem.”—Aesea 51:16; Ol Sam 17:8; 36:7.
it-2 1161 ¶7
Voes
God i harem voes blong ol man blong hem. Olgeta we oli wosipim God long spirit mo trutok oli save singaot i go long God mo trastem se hem i harem voes blong olgeta, nomata wanem lanwis oli yusum. Mo tu, nating se man i prea slo nomo we voes blong hem i no kamaot, be God we i save samting we i stap long hat blong man, i “harem” o lesin gud long hem. (Sam 66:19; 86:6; 116:1; 1Sa 1:13; Neh 2:4) Taem ol man we oli harem nogud oli krae i go long God, hem i lesin long olgeta, mo tu hem i harem voes blong olgeta mo i save rabis plan blong ol man we oli agensem hem mo ol man blong hem.—Jen 21:17; Sam 55:18, 19; 69:33; 94:9-11; Jer 23:25.
?Yu Save Mekem Wanem Taem Yu Wari?
2. Tingtingbak. Taem yu tingtingbak long ol samting we i hapen long yu bifo, ?yu tingbaot wan trabol we yu naf blong winim from we Jehova i bin halpem yu? Taem yumi tingbaot olsem wanem Jehova i bin halpem yumi mo ol man blong hem bifo, hemia i mekem yumi gat paoa mo yumi trastem hem moa. (Sam 18:17-19) Wan Elda we nem blong hem Josua i talem se: “Mi gat wan lis blong ol prea we Jehova i bin ansarem. Hemia i halpem mi blong tingbaot ol taem we mi bin askem stret wan samting long Jehova mo hem i givim samting we mi nidim.” Yes, taem yumi tingbaot olsem wanem Jehova bin halpem yumi bifo, hemia i mekem se yumi gat paoa blong dil wetem wari.
Ol Gudgudfala Samting
it-1 432 ¶2
Jerubim
Ol Jerubim oli no olsem ol pija blong ol narakaen dimon ya we oli gat wing, we ol man blong ol nesen raonabaot oli stap wosipim. Folem tingting we ol man Jiu bifo oli agri long hem (Baebol i no talem eni samting long saed ya), ol jerubim oli luk olsem ol man. Oli wokem olgeta long wan fasin we i nambawan, we i representem ol enjel we oli gat paoa mo oli naes, mo oli wokem olgeta “stret folem plan” we Moses i kasem long Jehova. (Eks. 25:9) Aposol Pol i tokbaot olgeta olsem ol ‘jerubim we oli saen mo wing blong olgeta i mekem sado long lid blong bokis ya.” (Hib. 9:5) Ol jerubim ya oli olsem ol saen we i soemaot se Jehova i stap. Jehova i talem se: “Bambae mi mi kam antap long lid blong Bokis blong Loa, long medel blong tufala jerubim ya, blong mi soemaot mi long yu, mo bambae mi givim ol tok ya blong mi long yu.” (Eks 25:22; Na 7:89) Yes, Jehova i bin talem se bambae hem i ‘sidaon antap [o bitwin] ol jerubim.’ (1Sa 4:4; 2Sa 6:2; 2Ki 19:15; 1Kr 13:6; Sam 80:1; 99:1; Aes 37:16) Ol jerubim “oli representem jariot” blong Jehova, we hem i sidaon long hem blong rul (1Kr 28:18), mo ol wing blong ol jerubim oli olsem saen blong proteksen mo spid blong jariot ya. From samting ya, long singsing blong Deved, hem i tokbaot olsem wanem Jehova i kwik blong kam givhan long hem, olsem wan man we “i raed long wan jerubim mo i flae i kam” iven “long ol wing blong wan spirit.”—2Sa 22:11; Sam 18:10.
18-24 MAJ
OL SAS SAMTING LONG BAEBOL | OL SAM 19-21
“Heven i Stap Talemaot Glori Blong God”
Olgeta Man Oli Mas Leftemap Nem Blong Jehova
DEVED, pikinini blong Jese, i gruap klosap long taon ya Betlehem. Taem hem i yangfala, hem i stap lukaot long ol sipsip blong papa blong hem. Evri naet, hem i stap hem wan long tudak, i stap lukaot long ol sipsip ya farawe long ol narafala man. !Ating plante taem, taem ples i kwaet we i kwaet, hem i stap lukluk i go antap long bigbigfala skae we i fulap long ol sta! Ating pija blong naesfala skae ya i stap long tingting blong hem taem tabu spirit blong God i pulum hem blong raetem mo singim ol naesfala tok ya long Sam namba 19 se: “Oltaem skae i stap soemaot bigfala paoa blong God, mo olgeta samting we oli stap long hem oli stap soemaot ol gudgudfala wok we God i mekem. Be tok blong olgeta i stap goaot long olgeta ples long wol, toktok blong olgeta i stap go long evri kona blong hem.”—Ol Sam 19:1, 4.
2 Bigfala skae ya we Jehova i wokem i no save tok mo hem i no gat voes, be evri dei mo evri naet, hem i stap leftemap God. Ol samting ya we Jehova i wokem oli neva spel blong leftemap nem blong hem. I olsem we oli givim witnes long ol man “long olgeta ples long wol” mo oli mekem ol man ya oli tingbaot se oli smol tumas. Be i no ol samting raonabaot long yumi nomo we i mas leftemap nem blong God. I gud sipos olgeta man we oli bilif long God, olgeta tu oli yusum voes blong olgeta blong presem God. Wan man blong raetem Sam, we yumi no save nem blong hem, i toktok i go long ol man blong God i se: “Yumi leftemap nem blong hem from ol gudgudfala samting blong hem mo from paoa blong hem. !Nem blong hem i hae we i hae! !Yumi presem hem!” (Ol Sam 96:7, 8) Ol man we oli ol fren blong Jehova oli glad nomo blong folem tok ya. ?Be oli mekem olsem wanem blong leftemap nem blong God?
!Ol Samting We God i Wokem Oli Leftemap Hem!
8 Long nekis tok blong hem, Deved i tokbaot wan narafala samting we Jehova i wokem, we i samting blong sapraes. “God i mekem ples blong hem long skae [“i givim wan haos tapolen long san,” NW]. San i stap girap long moning, i kamaot olsem wan man we i jes mared we i hapi tumas, olsem wan jampion blong resis we i rere blong resis blong i win. Hem i stat long narasaed blong skae, nao i gokros long narasaed blong hem. Mo i no gat wan samting we i save ronwe long hot blong hem.”—Ol Sam 19:4-6.
9 Sipos yu skelem san wetem sam narafala sta long yunives, san ya i smol nomo. Nating se i olsem, san ya hem i wan bigbigfala sta yet, taem yu skelem wetem ol narafala planet we oli stap goraon long hem. Wan buk i talem se hevi blong san i kasem “2 bilian mo bilian mo bilian tan.” !Taem oli kaontem hevi blong olgeta planet we oli stap raonem san, wetem wol blong yumi, mo san tugeta, san nao i tekem 99.9 pesen blong hevi ya! Graviti we i kamaot long san ya i holem wol i stap long stret ples blong hem, hemia 150 milian kilometa longwe long san, we i no kam klosap tumas mo i no go longwe tumas long san. Wan smosmol haf nomo blong hot blong san i kasem wol blong yumi, be hemia i naf blong givim laef long evri samting long wol ya.
10 Man blong raetem Sam i tokbaot san olsem wan “jampion blong resis” we long dei hem i stat long narasaed blong skae i resis i gokros long narasaed blong hem. Nao long naet hem i go slip long “haos tapolen” blong hem. Taem yumi wajem san i godaon long wes, i luk olsem se hem i go insaed long “haos tapolen” blong hem, i go blong spel. Ale, long moning, taem hem i girap long is, hem i kamaot we i saen bigwan olsem “wan man we i jes mared we i hapi tumas.” Deved i wan man blong lukaot sipsip taswe plante taem kolkol i stap kasem hem long naet. (Jenesis 31:40) Ating hem i stap tingbaot olsem wanem we hot blong san i mekem hem i harem gud tumas, taem san i kam antap long moning mo i laetem ol ples raon long hem. I klia se san i no taed nating long longfala wokbaot blong hem stat long is go kasem wes, be hem i olsem wan “jampion blong resis,” hem i rere blong mekem longfala wokbaot blong hem bakegen evri dei.
g95 11/8 7 ¶3
Nambawan Atis We Ol Man Oli No Luksave
Taem yumi tinghae moa long ol nambawan samting long neija we oli stap raonabaot long yumi, bambae yumi naf blong kasemsave moa long Krieta blong yumi. Wan taem, Jisas i talem long ol disaepol blong hem blong oli lukluk ol wael flaoa we oli stap gru olbaot long Galili. Hem i se: “Yufala i traem tingbaot ol lili we oli stap gru long open ples, yufala i save lanem wan lesen long olgeta. Olgeta oli no wok, mo oli no somap klos blong olgeta, be mi mi talem long yufala se nating se King Solomon i stap long glori blong hem, be ol klos blong hem oli no naes olsem wan long ol lili ya.” (Matiu 6:28, 29) Ol naesfala wael flaoa ya, oli save rimaenem yumi se God i intres long yumi wanwan mo i save givim ol samting we ol famle oli nidim.
Ol Gudgudfala Samting
it-1 1073
Hibru, II
Synthetic (o formal, constructive) parallelism, hem i wan stael blong raetem ol poem, we seken haf blong wan sentens i no givim sem tingting olsem fas haf, o defren tingting long fas haf, be hem i ademap wan niufala tingting long fas haf blong sentens. Wan eksampol i stap long Ol Sam 19:7-9, we i se:
Loa blong Jehova i stret gud,
mo i stap givimbak paoa.
Ol rimaenda blong Jehova, man i save trastem,
mo i mekem man we i no gat ekspiriens, i waes.
Ol oda we oli kamaot long Jehova oli stret,
oli mekem hat i glad.
Komanmen blong Jehova i klin,
i mekem ae i saen.
Fasin blong fraet long Jehova, i klin gud,
i stap olwe.
Ol jajmen blong Jehova oli tru,
oli stret evriwan.
Makem gud se seken haf blong wanwan sentens, i mekem se tingting i fulwan. Taswe, ful vas i joen blong mekemap wan ful tingting. Seken haf blong ol sentens, olsem “i stap givimbak paoa” mo “mekem man we i no gat ekspiriens, i waes,” i mekem man we i ridim, i luksave se ‘loa i stret gud’ mo se “ol rimaenda blong Jehova, man i save trastem.” Long ol kaen sentens olsem, taem oli seraotem faswan haf blong sentens long seken haf, hemia i folem wan kaen bit, olsem bit blong miusik. Taswe, taem oli ademap wan tingting long narawan, hemia i holemtaet stael blong wan poem. From samting ya, samtaem oli kolem ol sentens olsem se formal o constructive parallelism.
25-31 MAJ
OL SAS SAMTING LONG BAEBOL | OL SAM 22
Baebol i Tokbaot Ol Smosmol Save Long Saed Blong Ded Blong Jisas
Oli Faenem Mesaea
16 Bambae i luk olsem se God i lego Mesaea. (Ridim Ol Sam 22:1.) Folem profet tok ya, Mak i talem se: “Long tri klok, Jisas i singaot bigwan se, ‘Eloe, Eloe. ?Lama Sabaktani?’ we i min se ‘God blong mi, God blong mi. ?From wanem yu lego mi mi stap olsem ya?’” (Mak 15:34) Jisas i no talem tok ya from we hem i no moa bilif long papa blong hem, nogat. Hem i save se God bambae i no protektem hem long ol enemi blong hem, taem bambae hem i ded. Hemia wan janis blong Jisas blong soemaot se bambae hem i holemstrong long God oltaem nomo. Taem Jisas i singaot bigwan olsem, hem i mekem profet tok blong Ol Sam 22:1 i kamtru.
Oli Faenem Mesaea
13 Deved i talemaot se ol man bambae oli tok nogud long Mesaea. (Ridim Ol Sam 22:7, 8.) Taem Jisas i stap hang long pos, ol man oli tok nogud long hem. Matiu i talemaot samting ya i se: “Ol man we oli stap wokbaot long rod oli stap tok nogud long hem, oli stap saksakem hed blong olgeta. Oli stap talem se, ‘Yu yu man blong brekemdaon haos blong God, mo blong stanemap bakegen long tri dei nomo, ale, yu sevem laef blong yu naoia. Sipos yu yu Pikinini blong God tru, yu aot long kros [“pos,” NW] ya, yu kamdaon.’” Mo ol jif pris, ol tija blong Loa mo ol elda oli stap laf long hem, oli stap talem se: “Hem i sevem plante narafala man finis, be i no naf blong sevem hem. !Hem i King blong ol laen blong Isrel ya! I gud hem i kamdaon long kros [“pos,” NW] naoia, nao bambae yumi bilif long hem. Man ya i bilif long God. Sipos God i lavem hem, i gud hem i sevem hem naoia, from we man ya i stap talem se, ‘Mi mi Pikinini blong God.’” (Mat. 27:39-43) Yes, Jisas i safa bigwan be hem i stap kwaet nomo, hem i no talem wan nogud samting nating. !Hemia wan gudfala eksampol we yumi mas folem!
Oli Faenem Mesaea
14 Oli sakem daes blong luk se hu bambae i tekem klos blong Mesaea. Man blong raetem Sam i talem se: “Oli tekemaot ol klos blong mi oli seraot long olgeta, mo oli sakem daes blong luk se hu bambae i tekem kot blong mi.” (Sam 22:18) Samting ya i hapen stret olsem we Sam ya i talem. Baebol i talem se afta we ol soldia blong Rom oli nilim hem long pos, oli sakem daes blong faenemaot se hu bambae i tekem klos blong hem.—Mat. 27:35; ridim Jon 19:23, 24.
Ol Gudgudfala Samting
Tinghae Long Ol Tabu Miting Blong Yumi
7 I gat sam fasin we oli soemaot klia se yumi tinghae long ol miting. Wan fasin, i blong stap long Haos Kingdom taem kongregesen i singim ol singsing blong Kingdom. Plante long ol singsing ya oli olsem prea nomo, mo yumi mas singim olgeta long fasin we i soem ona mo respek. Aposol Pol i talem tok blong Sam 22 long saed blong Jisas, i se: “God. Mi bambae mi talemaot long ol brata mo sista blong mi ol samting ya we yu bin mekem. Bambae mi mi [“singsing blong,” NW] presem yu long fes blong olgeta.” (Hibru 2:12) Taswe yumi mas sidaon rere bifo we jeaman i talemaot singsing. Mo taem yumi singsing, yumi mas tingting dip long mining blong ol tok blong hem. I gud sipos yumi singsing wetem sem filing olsem man blong raetem Sam ya, we i talem se: “Olgeta. !Yumi presem Hae God! Bambae mi mi stanap long fes blong olgeta man blong hem, mi talem tangkiu long hem long olgeta tingting blong mi.” (Ol Sam 111:1) Yes, janis ya blong singsing blong presem Jehova i mas pulum yumi blong kam eli long miting mo blong stap go kasem en blong hem.
Presem Jehova “Long Medel Blong Kongregesen”
Tede, olsem bifo, evri man we i bilif long God i gat janis blong talemaot bilif blong hem “long medel blong kongregesen.” Wan janis we evriwan i save tekem blong talemaot bilif blong hem, hemia blong givim ansa long ol miting blong kongregesen. Yumi no mas ting nating long ol gudfala frut we ol ansa oli save karem. Eksampol, ol ansa we yumi givim blong eksplenem olsem wanem blong blokem no winim wan problem, oli save mekem tingting blong ol brata blong yumi i kam strong moa blong folem ol stamba trutok blong Baebol. Taem yumi givim ansa blong eksplenem wan vas blong Baebol we oli no raetem toktok blong hem i stap, no taem yumi tokbaot sam poen we yumi bin faenem taem yumi mekem moa risej, ol ansa ya oli save pulum ol narafala brata blong kam gud moa long fasin blong stadi olgeta wan.
1-7 EPREL
OL SAS SAMTING LONG BAEBOL | OL SAM 23-25
“Jehova i Man Blong Lukaot Long Sipsip, We i Lukaot Gud Long Mi”
“Jehova i Stap Lukaot Gud Long Mi Olsem We Mi Mi Sipsip Blong Hem”
Jehova i lidim ol sipsip blong hem. Ol sipsip we i no gat man blong lukaot long olgeta, oli save go lus. Long sem fasin, yumi tu, yumi nidim wan man blong givhan long yumi blong faenem stret rod we i go kasem laef. (Jeremaea 10:23) Deved i talem se Jehova i stap lidim ol man blong hem, oli go “long ples we i gat gudfala gras long hem,” mo “long kwaet ples we wota i stap ron smol long hem.” Hem i stap lidim olgeta “long ol stret rod.” (Vas 2, 3) Ol pijatok ya oli givhan long yumi blong trastem God. Taem yumi letem God i lidim yumi wetem ol tok blong hem long Baebol, yumi folem rod ya blong laef we i save mekem yumi glad, yumi harem gud, mo yumi harem se yumi sef.
“Jehova i Stap Lukaot Gud Long Mi Olsem We Mi Mi Sipsip Blong Hem”
Jehova i lukaot gud long ol sipsip blong hem. Sipos i no gat man blong lukaot long ol sipsip, ol sipsip oli fraet, mo oli no save lukaot long olgeta wanwan. Samtaem ol man blong Jehova oli fesem sam samting long laef blong olgeta we i olsem se oli stap ‘pas long ples we i tudak olgeta i ples blong ded.’ Be Jehova i talem long olgeta se oli no mas fraet. (Vas 4) Jehova i stap lukaot gud long ol man blong hem, mo hem i rere blong givhan long olgeta. Hem i save givim waes mo paoa we oli nidim blong stanap strong agensem ol samting we oli kam blong traem olgeta.—Filipae 4:13; Jemes 1:2-5.
“Jehova i Stap Lukaot Gud Long Mi Olsem We Mi Mi Sipsip Blong Hem”
Jehova i givim kakae long ol sipsip blong hem. God blong yumi i givim ol save blong tijim yumi we i olsem kakae. (Matiu 4:4) Yumi talem bigfala tangkiu long Jehova, God ya we i givim samting long gladhat blong hem. Hem i mekemrere wan tebol long fored blong ol man blong hem we i fulap gud long kakae. (Vas 5) Yumi save kasem ol kakae ya long Baebol mo long ol buk we oli givhan long yumi blong stadi Baebol, olsem magasin ya we yu stap ridim. Ol kakae ya oli givhan long yumi blong save from wanem yumi laef, mo stamba tingting blong God long saed blong yumi.
Ol Gudgudfala Samting
Long Olgeta Hat Blong Yu, Yu Mas Laekem Ol Fasin We i Stret
JEHOVA i yusum Tok blong hem mo tabu spirit blong hem, blong lidim ol man blong hem long ol “rod blong stret fasin.” (Sam 23:3, NW) From we yumi sinman, samtaem yumi gowe long rod ya. Be sipos yumi wantem kambak mo mekem samting we i stret, yumi mas traehad bigwan. ?Wanem samting bambae i givhan long yumi? Yumi mekem olsem Jisas, yumi mas laekem blong mekem samting we i stret.—Ridim Ol Sam 45:7.
2 ?Wanem ya “rod blong stret fasin”? “Rod” we vas ya i tokbaot, i minim laef blong yumi we yumi mekem i laenap wetem ol stamba rul blong Jehova long saed blong stret fasin. Long lanwis Hibru mo Grik, tok ya “fasin we i stret” i givim tingting se man i folem gud ol loa blong God long Baebol. Jehova hem i God ya we ‘stret fasin i stap long hem oltaem.’ Taswe, ol man we oli wosipim hem oli glad blong lukluk i go long hem, blong hem i talem long olgeta, ol fasin we oli stret we oli mas folem long laef blong olgeta.—Jer. 50:7, NW.
3 Sipos yumi traehad wetem fulhat blong yumi blong folem gud ol stret rul blong God, hem bambae i glad we i glad long yumi. (Dut. 32:4) Blong mekem olsem, fastaem, yumi mas stadi long Tok blong Jehova long Baebol, blong yumi lanem plante save long saed blong hem. Taem yumi lanem moa long saed blong God, yumi kam klosap moa long hem evri dei, mo bambae yumi laekem moa ol fasin blong hem we oli stret. (Jem. 4:8) Mo tu, taem yumi mekem sam bigfala desisen long laef blong yumi, yumi mas letem Tok blong God long Baebol i lidim yumi.
8-14 EPREL
OL SAS SAMTING LONG BAEBOL | OL SAM 26-28
Samting We Deved i Mekem Blong i Save Gohed Blong Holemstrong Long Jehova
Wokbaot Long Rod Blong Stret Fasin
8 Deved i prea long Jehova se: “Plis yu lukluk long laef blong mi, blong faenemaot se mi mi wanem man [“blong klinim kidni blong mi,” NW] mo yu skelem olgeta tingting [“hat,” NW] blong mi.” (Ol Sam 26:2) Tufala kidni i stap dip insaed long bodi blong man. Baebol we oli raetem fastaem long lanwis Hibru, i yusum kidni olsem wan pijatok blong minim ol tingting mo filing blong yumi we ol narafala man oli no save. Mo hat i minim olgeta samting long saed blong yumi we oli haed—ol tingting we oli pulum yumi blong mekem samting, ol filing, mo ol save we i stap long bren blong yumi. Taem Deved i prea blong askem Jehova blong lukluk long laef blong hem, hem i wantem se Jehova i jekemgud mo skelemgud ol tingting mo filing blong hem.
9 Deved i askem long God blong klinim kidni mo hat blong hem. ?Olsem wanem Jehova i save klinim ol samting long saed blong yumi we oli haed? Deved i singsing se: “Mi mi stap presem Hae God, from we oltaem hem i stap lidim mi, mo long naet, tingting blong mi [“kidni blong mi,” NW] i stap toktok long mi, i stap soemaot rod long mi.” (Ol Sam 16:7) ?Wanem mining blong tok ya? Hemia i min se, advaes blong God i tajem ol dip filing mo tingting blong Deved, mo hem i holem ol advaes ya i stap blong i stretem ol tingting mo filing blong hem. Sem samting i save hapen long yumi sipos yumi glad blong harem mo tingting dip long ol advaes we yumi kasem tru long Baebol, tru long ol man we God i stap yusum, mo tru long ogenaesesen blong hem, mo sipos yumi letem ol advaes ya i tajem hat mo filing blong yumi. Yumi mas prea oltaem long Jehova blong hem i klinim yumi long fasin ya. Samting ya bambae i givhan long yumi blong wokbaot long rod blong stret fasin.
Wokbaot Long Rod Blong Stret Fasin
12 Deved i tokbaot wan narafala samting bakegen we i givhan long hem blong wokbaot long stret fasin, i se: “Mi mi no save go stap wetem ol man blong giaman. Mi no gat bisnes nating wetem ol man ya we oli gat tu tingting. Mi mi no laekem kampani blong ol rabis man, mo mi no glad nating blong go sidaon wetem ol man nogud.” (Ol Sam 26:4, 5) Deved i no joen nating wetem ol man nogud. Hem i no laekem nating kampani blong ol rabis man.
13 ?Olsem wanem long yu? ?Yu yu stap joen wetem ol man blong giaman, long ol stori we yu lukluk long televisin, ol video kaset, ol sinema, Intenet, no long sam narafala samting olsem? ?Yu yu stap longwe long ol man we oli gat tu tingting? Maet samfala long skul no long ples blong wok oli giaman se oli fren blong yu, jes blong trikim yu blong joen long rabis fasin blong olgeta. ?Yu yu rili wantem fren wetem olgeta we oli no stap folem trutok blong God? Ol man blong apostasi oli save mekem olsem we oli wantem givhan long yu, be oli wantem nomo blong pulumaot yu long wosip blong Jehova. ?Olsem wanem sipos i gat samfala long Kristin kongregesen we oli mekem olsem se oli folem stret fasin, be oli stap mekem i nogud long fasin haed? Olgeta ya tu oli gat tu tingting. Wan man, nem blong hem Jayson, we naoia hem i wan man blong givhan long kongregesen, hem i tokbaot taem we hem i yangfala mo sam fren blong hem long taem ya we oli gat tu tingting. Hem i se: “Wan dei, wan long olgeta ya i talem long mi se: ‘I oraet nomo sipos yumi mekem rabis fasin naoia, from we taem niufala wol i kam, bambae yumi ded finis, mo bambae yumi no save nating ol samting we yumi mestem.’ Wantaem nomo, tok ya i wekemap tingting blong mi. Mi mi no wantem ded taem niufala wol i kamtru.” Jayson i waes, hem i no moa joen wetem fren ya. Aposol Pol i givim woning se: “Yufala i no go krangke. . . . ‘Ol stret man nomo, be ol fren blong olgeta we oli no stret, oli save spolem fasin blong olgeta.’” (1 Korin 15:33) !I impoten tumas we yumi no kampani wetem ol rabis fren!
Wokbaot Long Rod Blong Stret Fasin
17 Haos tapolen blong God wetem olta blong hem mo ol sakrefaes, hemia stamba ples we ol man Isrel oli kam long hem blong mekem wosip long Jehova. Deved i prea blong talemaot we hem i glad blong stap long ples ya, i se: “Hae God, mi mi laekem haos blong yu tumas. Haos ya i ples we yu yu stap long hem long bigfala paoa blong yu.”—Ol Sam 26:8.
18 ?Olsem wanem long yu? ?Yu yu laekem tumas blong joen wanples wetem ol narafala blong lanem moa long saed blong Jehova? Haos Kingdom wetem ol tijing long saed blong spirit we yumi kasem long ples ya, hem i stamba ples blong mekem trufala wosip. Mo tu, evri yia i gat distrik asembli, seket asembli mo spesel dei asembli. Long ol miting olsem, yumi tokbaot “ol rul” blong Jehova. Sipos yumi lanem blong “laekem olgeta tumas,” bambae yumi wantem go long olgeta miting mo bambae yumi lesin gud long ol tok we i kamaot. (Ol Sam 119:167) !Yumi harem gud tumas blong kam wanples wetem ol Kristin brata sista blong yumi we oli laekem yumi tumas mo we oli wantem givhan long yumi blong gohed blong wokbaot long rod blong stret fasin!—Hibru 10:24, 25.
Ol Gudgudfala Samting
Jehova i Save Sevem Man We i Harem Nogud
15 Deved i singsing se: “Papa mo mama blong mi, maet tufala i save lego mi, be yu [Jehova], oltaem nomo bambae yu stap lukaot gud long mi.” (Ol Sam 27:10) !Yumi harem gud tumas blong save se Jehova i lavem yumi moa i winim we papa mama blong yumi i lavem yumi! I tru, sipos papa mama blong yumi i no wantem yumi, no tufala i mekem nogud long yumi, no tufala i lego yumi, yumi harem nogud tumas. Be yumi no mas ting se fasin blong tufala blong no tingbaot yumi i min se Jehova i no tingbaot yumi, nogat. (Rom 8:38, 39) Yumi no mas fogetem se olgeta we God i lavem, hemia nao olgeta we hem i stap pulum oli kam long hem. (Jon 3:16; 6:44) !Nating se ol man oli mekem nogud tumas long yu, be Papa blong yu long heven i lavem yu!
15-21 EPREL
OL SAS SAMTING LONG BAEBOL | OL SAM 29-31
Jehova i Soemaot Lav Taem i Stretem Yumi
it-1 802 ¶3
Fes
Tok ya “haedem fes” i save minim plante samting, be i dipen long situesen. Plante taem, Jehova God i haedem fes blong hem long wan man o wan grup blong man, from oli mekem hem i no glad o i tekemaot paoa blong hem long olgeta. Maet hemia nao samting we hem i mekem long nesen blong Isrel from oli no obei long hem. (Job 34:29; Sam 30:5-8; Aes 54:8; 59:2) Maet samtaem, tok ya i save minim se Jehova i no wantem mekem o talem wan samting blong soemaot hem, from i stap wet long stret taem we hem i jusum. (Sam 13:1-3) Taem Deved i talem long God se: “Yu tanem fes blong yu i gowe long ol sin blong mi,” hem i stap askem long God blong i fogivim o tekemaot ol sin blong hem.—Sam 51:9; skelem wetem Sam 10:11.
w07 3/1 19 ¶1
Glad Blong Wet Long Jehova
Taem Jehova i stretem yumi, hemia i save mekem i gud long yumi sem mak olsem wan frut we i gru i kam bigwan. Baebol i tokbaot fasin blong Jehova blong stretem yumi, i se: “Olgeta we fasin ya i trenem olgeta, bambae oli gat pis mo stret fasin.” (Hibru 12:11) Olsem we wan frut i nidim taem blong i raep, yumi tu, yumi nidim taem blong jenisim ol fasin blong yumi blong i laenap wetem ol trening we God i givim. Eksampol, sipos yumi mekem wan mastik, yumi save lusum sam privilej long kongregesen. Be sipos yumi glad blong wet long God, bambae tingting blong yumi i no foldaon mo yumi no givap. Long taem olsem, tok blong Deved i save leftemap tingting blong yumi, we i talem se: “Be taem [God] i glad long man, hem i mekem olsem long ful laef blong man ya. Long sapa, man i save krae, be long moning, hem i krae from i glad tumas.” (Ol Sam 30:5) Sipos yumi wokem fasin ya blong wet mo yumi folem ol advaes we yumi kasem long Tok blong God mo oganaesesen blong hem, taem ya we yumi ‘krae from yumi glad tumas’ bambae i kamtru.
?Tanem Tingting i Rili Minim Wanem?
18 Blong soemaot se man ya we i disfelosip i rili tanem tingting blong hem, hem i mas kam oltaem long ol miting, mo i mas folem gud advaes blong ol elda blong prea mo stadi Baebol oltaem. Mo tu, hem i mas wok had blong blokem ol samting we oli save pulum hem blong foldaon long sem sin ya bakegen. Sipos hem i traehad blong fren gud wetem Jehova bakegen, hem i save sua se Jehova bambae i fogivim hem fulwan, mo kongregesen bambae i tekembak hem. I tru, taem ol elda oli stap dil wetem man we i mekem sin, oli save se wanwan kes i defren, taswe oli lukluk gud long ol kes ya mo oli jajem long fasin we i stret.
Ol Gudgudfala Samting
Ol Bigfala Poen Long Buk Wan Blong Ol Sam
31:23—?Olsem wanem man we i praod i kasem bigfala pei? Pei we vas ya i tokbaot i minim panis. Taem Jehova i stretem gudfala man, hemia pei blong ol mastik we hem i no minim blong mekem. Be man we i praod i no wantem jenisim nogud fasin blong hem, ale hem i kasem strong panis olsem bigfala pei blong hem.—Ol Proveb 11:31; 1 Pita 4:18.
22-28 EPREL
OL SAS SAMTING LONG BAEBOL | OL SAM 32-33
?From Wanem Yumi Mas Talemaot Sin Blong Yumi?
Fasin Sore Blong Jehova i Sevem Yumi Long Tingting We i Trabol
7 Sipos yumi harem se tingting blong yumi i stikim yumi from we yumi brekem ol bigfala loa blong God, maet yumi harem se i had tumas blong talemaot sin blong yumi, mo i had tumas tu blong talemaot long Jehova. ?Wanem i save hapen long ol taem ya? Long Ol Sam 32, Deved i talem se: “Hae God, taem mi mi no talemaot ol sin blong mi long yu, mi slak we mi slak, from we evri dei nomo, mi stap krae kasem tudak. Long dei mo long naet, yu stap panisim mi. Paoa blong mi i lus olgeta, olsem wota we bigsan i bonem, nao i drae olgeta.” (Vas 3 mo 4) Taem Deved i traem blong haedem sin blong hem mo holemtaet tingting we i stap stikim hem, samting ya i mekem hem i harem nogud. Tingting we i trabol i daonem bigwan paoa blong hem olsem wan tri we i lusum wota long bigsan. Yes, maet hem i harem nogud long tingting mo long bodi blong hem. Yes, hem i lusum glad blong hem. Sipos yumi harem olsem, ?yumi mas mekem wanem?
cl 262 ¶8
Wan God We i “Rere Blong Fogif”
8 Deved we i tanem tingting blong hem, i talem se: “Biaen mi talemaot sin blong mi long yu. Mi mi no kavremap ol mastik blong mi. . . . Mo yu yu fogivim mastik mo ol sin blong mi.” (Ol Sam 32:5) Tok ya “fogivim,” prapa mining blong hem long Hibru se “leftemap” o “karem.” Oli yusum long vas ya blong minim tekemaot “fol, rabis fasin, mo sin.” Taswe, Jehova i leftemap ol sin blong Deved mo i karem olgeta i gowe. I sua se hemia i mekem Deved i no moa harem se hem i gat fol. (Ol Sam 32:3) Yumi tu, yumi trastem fulwan se God i save tekemaot sin blong olgeta we oli wantem blong hem i fogivim olgeta, from oli bilif long ransom sakrefaes blong Jisas.—Matiu 20:28.
Fasin Blong Talemaot Sin i Mekem Man i Harem Gud
Afta we Deved i talemaot sin blong hem, hem i no holem tingting ya se hem i nating nomo. Ol tok we hem i raetem long buk blong Ol Sam, oli soem se hem i harem gud taem hem i talemaot ol sin blong hem, mo hem i gat strong tingting blong gohed long wok blong God. Tingbaot wan eksampol long Ol Sam 32. Vas 1 i talem se: “Man we Hae God i fogivim hem, mo i tekemaot ol sin blong hem, hem i save harem gud.” Nating se sin blong man i bigwan olsem wanem, man ya i save harem gud sipos hem i rili tanem tingting from sin blong hem. Wan rod blong mekem olsem, hemia blong akseptem fulwan se hem i mekem i rong, olsem we Deved i mekem. (2 Samuel 12:13) Hem i no traem blong mekem eskius long fored blong Jehova mo hem i no blemem narafala. Vas 5 i talem se: “‘Bambae mi talemaot sin blong mi long Hae God.’ Nao mi talemaot ol sin blong mi long yu, mi no moa haedem ol samting nogud we mi mi mekem. Nao yu yu fogivim mi, yu tekemaot ol sin blong mi.” Taem man i talemaot ol sin blong hem, hem i save harem gud. Tingting blong hem i no moa stikim hem from ol rong we hem i bin mekem.
Ol Gudgudfala Samting
Ol Bigfala Poen Long Buk Wan Blong Ol Sam
33:6; futnot blong NW—?Wanem ya “spirit” no “win” we i kamaot long maot blong Jehova? Spirit ya i minim tabu spirit blong God no paoa we hem i yusum blong wokem olgeta samting long skae. (Jenesis 1:1, 2) Spirit ya i kamaot long maot blong hem from we hem i save sanem spirit ya i go longwe blong mekem wok we hem i wantem, olsem wan strong win we i kamaot long maot blong hem.
29 EPREL–5 MEI
OL SAS SAMTING LONG BAEBOL | OL SAM 34-35
“Presem Jehova Oltaem”
Yumi Joen Tugeta Blong Leftemap Nem Blong Jehova
11 “Oltaem mi bambae mi talem tangkiu long Hae God, bambae mi presem hem oltaem nomo.” (Ol Sam 34:1) Taem Deved i stap ronwe i go long ol defren ples blong haed, ating hem i sot long plante samting long saed blong bodi. Be ol tok long vas ya oli soemaot se hem i no letem tingting ya blong kasem ol samting blong laef evri dei, i winim strong tingting we hem i gat blong presem Jehova. !Hemia wan gudfala eksampol we yumi save folem taem laef i had! Nating se yumi stap long skul, long wok, wetem ol narafala Kristin, no long wok blong prij, be bigfala samting we i mas stap long tingting blong yumi, i blong presem Jehova. !I gat plante risen blong presem hem! Tingbaot ol samting raonabaot long yumi we Jehova i wokem. I gat plante tumas save we yumi save kasem long saed blong ol samting ya, mo yumi save harem gud tumas long olgeta tu. !Antap long hemia, tingbaot wok we Jehova i stap mekem tru long ogenaesesen blong hem long wol ya! Long taem blong yumi, Jehova i yusum ol man we oli stap tru long hem blong mekem plante bigbigfala wok, nating se oli sinman. ?Olsem wanem long ol wok blong Jehova, taem yumi skelem wetem wok blong ol man we wol ya i leftemap olgeta? Deved i raetem se: “[“Jehova,” NW], i no gat narafala god we i olsem yu. I no gat wan i stap, we i stap mekem ol gudgudfala wok olsem we yu yu bin mekem.” ?Olsem wanem? ?Yu yu agri wetem ol tok ya blong Deved?—Ol Sam 86:8.
Yumi Joen Tugeta Blong Leftemap Nem Blong Jehova
13 “Bambae mi mi tokflas from ol samting we Jehova i mekem. Ol man we oli gat tingting daon bambae oli harem, mo bambae oli glad tumas from. (Ol Sam 34:2, NW) Deved i no tokflas from samting we hem i mekem. Taem hem i trikim king blong Gat, long taem ya tu hem i no tokflas. Hem i luksave se Jehova nao i protektem hem taem hem i stap long Gat, mo Jehova i halpem hem blong ronwe. (Ol Proveb 21:1) Taswe, Deved i tokflas from ol wok blong Jehova nomo, i no from ol prapa wok blong hem. Taem Deved i leftemap nem blong Jehova, ol man we oli gat tingting daon oli kam long Jehova. Jisas tu i leftemap nem blong Jehova, mo samting ya i pulum ol man we oli gat tingting daon mo oli glad blong kasem tijing, oli kam long Jehova. Tede, long olgeta ples blong wol, ol man we oli gat tingting daon oli stap joen wetem kongregesen blong ol Kristin we tabu spirit i makemaot olgeta mo we Jisas i Hed blong hem. (Kolosi 1:18) Taem ol man blong God we oli gat tingting daon oli leftemap nem blong God, tok blong olgeta i tajem hat blong ol narafala man we oli gat tingting daon. Ol tok blong Baebol we ol man ya oli harem mo we tabu spirit i givhan long olgeta blong kasem save long hem, olgeta tu oli tajem hat blong olgeta.—Jon 6:44; Ol Wok 16:14.
Yumi Joen Tugeta Blong Leftemap Nem Blong Jehova
15 ‘Mi mi prea long Jehova, nao hem i ansa long mi, i tekemaot mi long ol man we oli stap mekem mi mi fraet.’ (Ol Sam 34:4) Hemia wan bigfala samting we Deved i no save fogetem. Taswe, hem i gohed i talem se: “Taem ol man oli stap spolem mi, mi singaot i go long [“Jehova,” NW], nao hem i harem mi, i tekemaot mi long olgeta trabol blong mi.” (Ol Sam 34:6) Taem yumi joen wetem ol Kristin brata sista blong yumi, yumi gat janis blong storian long ol samting we Jehova i bin mekem blong givhan long yumi blong stanap strong tru long ol trabol long laef blong yumi. Storian olsem i save mekem bilif blong ol narafala Kristin i strong, olsem we ol tok blong Deved i mekem bilif blong ol man blong hem i strong. Ol man we oli joen wetem Deved, ‘oli luk long Jehova, nao oli glad. Neva bambae tingting blong olgeta i foldaon.’ (Ol Sam 34:5) Nating se oli stap ronwe long King Sol, be tingting blong olgeta i no foldaon. Oli gat strong tingting se God i stap givhan long Deved, mo oli glad from. Long sem fasin, olgeta we oli jes save trutok wetem olgeta we oli trufala Kristin longtaem finis, oli lukluk i go long Jehova nomo blong givhan long olgeta. Oli luk we Jehova i bin givhan long olgeta wanwan, mo samting ya i mekem olgeta oli glad mo i givim strong tingting long olgeta blong oli stap tru long Hem.
Ol Gudgudfala Samting
Ol Bigfala Poen Long Buk Wan Blong Ol Sam
35:19—?Wanem mining blong prea blong Deved se Jehova i no mas letem ol man we oli no laekem hem nating oli laf long hem? Tok ya i soemaot se ol enemi blong Deved oli harem gud from we ol rabis plan we oli mekem agens long hem oli stap win. Deved i askem se samting ya i no hapen.