“Tingbaot Ol Dei We Oli Pas Finis”—?From Wanem?

TINGBAOT ol dei we oli pas finis.” Aposol Pol i raetem advaes ya samwe long yia 61 K.T.,a mo i sanem i go long ol Kristin Hibru man long Judia. (Hibrus 10:32, The New English Bible) ?Wanem i pusum hem blong givim advaes ya? ?From wanem ol man blong wosip long Jeova long faswan handred yia oli no mas fogetem ol samting we oli pas finis? ?Olsem wanem long yumi tede? ?Sipos yumi folem sem advaes ya, bambae i givhan long yumi?

Long ol handred yia we oli pas finis, bakegen mo bakegen ol man blong raetem Baebol oli givim woning se yumi no mas fogetem no ting nating long ol samting we oli pas finis. Yumi mas tingbaot mo luklukgud long ol taem we oli pas mo ol samting we oli hapen bifo. Jeova tu i talem se: “Tingbaot ol faswan samting blong bifo olgeta. Tingbaot se mi mi God mo i no gat narafala God, no wan we i olsem mi.” (Aesea 46:9) I gud yumi luk tri bigfala risen we oli soem from wanem yumi mas folem advaes ya.

Samting We i Pusum Yumi Mo i Leftemap Tingting Blong Yumi

Fastaem, fasin blong tingbaot ol samting we oli pas finis i save pusum yumi mo leftemap tingting blong yumi. Taem Pol i raetem leta blong hem long kongregesenb blong ol Hibru man, hem i stap raet i go long ol Kristin we evri dei, oli kasem traem long bilif blong olgeta, from we ol man Jyu oli stap agensem olgeta. Pol i luksave se oli mas wokem fasin ya blong stanap strong longtaem. Taswe, hem i talem se: “I gud yufala i stap tingbaot ol samting ya we yufala i kasem bifo. Taem we laet blong God i kamtru long yufala, yufala i harem nogud long plante samting, be ol samting ya oli no winim yufala.” (Hibrus 10:32) Taem oli tingbaot bakegen taem ya we oli stap stanap strong long faet blong olgeta long saed blong speret, bambae samting ya i givim paoa we oli nidim blong finisim resis blong olgeta. Long sem fasin, profet Aesea i raetem se: “Tingbaot samting ya, blong bambae yufala i gat paoa.” (Aesea 46:8) Jisas i stap tingbaot semkaen gudfala frut we i save kamaot from fasin blong tingbaot ol samting we oli pas, taem hem i talem long kongregesen long Efesas se: “Yufala i mas tingbaot bakegen ples we yufala i stap long hem fastaem [lav we yufala i gat fastaem], taem yufala i no foldaon yet. Nao yufala i mas tanem tingting blong yufala from ol sin blong yufala, mo yufala i mas mekem fasin ya bakegen we yufala i mekem fastaem.”​—Revelesen 2:​4, 5.

Taem Moses i givim advaes long nesen blong Isrel blong gat strong tingting blong soemaot se oli fraetgud long Jeova, bakegen mo bakegen hem i talem long olgeta blong “tingbaot ol dei we oli pas finis, mo tingting long ol yia we ol olfala bubu blong yufala bifo oli laef long olgeta.” (Dutronome 32:7) Makemgud ol tok blong hem long Dutronome 7:​18. Hem i talem se: “Yufala i no mas fraet long olgeta [ol man Kenan]. Yufala i mas tingbaot ol samting we Jeova, God blong yufala i mekem long Fero mo long kantri blong Ijip.” Fasin ya blong tingbaot ol samting we Jeova i bin mekem blong sevem ol man blong hem, i mas pusum olgeta blong gohed blong folemgud ol loa blong Jeova oltaem.​—Dutronome 5:​15; 15:15.

Sore tumas, plante taem ol man Isrel oli mekem sin ya we oli fogetem ol samting we oli pas finis. ?Wanem frut i kamaot? “Oltaem oli stap traem God ya blong yumi. God ya blong yumi man Isrel hem i Tabu be oli stap mekem hem i harem nogud. Oli no moa tingbaot bigfala paoa blong hem, mo dei ya we hem i tekemaot olgeta long han blong ol enemi blong olgeta.” (Ol Sam 78:41, 42) Biaen, Jeova i sakemaot olgeta from we oli fogetem ol loa blong hem.​—Matyu 21:42, 43.

Man blong raetem Ol Sam i soem wan nambawan eksampel. Hem i raetem se: “Hae God, bambae mi mi stap tingbaot ol bigbigfala wok blong yu, bambae mi stap tingting long ol merikel ya we yu yu mekem bifo. Bambae mi stap tingbaot olgeta samting ya we yu bin mekem, bambae mi stap tingtinggud long olgeta bigbigfala wok ya blong yu.” (Ol Sam 77:11, 12) Taem yumi tingbaot ol man we oli holemstrong long wok blong God bifo mo ol samting we Jeova i mekem wetem lav, bambae samting ya i givim strong tingting blong pusum yumi. Bambae samting ya i leftemap tingting blong yumi, mo i mekem se yumi gat fasin tangkyu, hemia ol fasin we yumi nidim. Mo tu, fasin blong “tingbaot ol dei we oli pas finis” bambae i blokem fasin ya blong kam taed, mo i save pusum yumi blong mekem evri samting we yumi naf blong mekem, mo gohed blong stanap strong.

Lanem Samting Long Ol Mastik Blong Bifo

Namba tu samting se, taem yumi no fogetem ol yia we oli pas finis, yumi save lanem samting long ol mastik blong yumi mo ol frut we oli kamaot from. Moses i stap tingbaot samting ya, taem hem i givim advaes long ol man Isrel se: “Tingbaot: Yufala i no mas fogetem olsem wanem yufala i mekem Jeova, God blong yufala, i kros long draeples. Stat long dei we yufala i aot long kantri blong Ijip, gogo kasem we yufala i kam long ples ya, yufala i stap rebel agensem Jeova.” (Dutronome 9:7) From we ol man Isrel oli no obei, frut we i kamaot, olsem Moses i talem, se ‘Jeova, God blong olgeta i mekem oli wokbaot fote yia long draeples.’ ?From wanem Moses i pulum olgeta blong tingbaot samting ya? Hemia blong oli mekem tingting blong olgeta i stap daon mo blong stretem olgeta long fasin rebel we oli gat. Long rod ya, oli save “folem ol loa blong Jeova, God [blong olgeta] taem oli wokbaot long ol rod blong hem mo fraetgud long hem.” (Dutronome 8:​2-6) Oli mas lanem blong no mekem ol sem mastik ya we oli mekem bifo.

Wan man blong raetem buk i talem se: “Man we i stap lukaotgud, hem i lanem samting from ol samting we i hapen long laef blong hem. Be man we i waes, hem i lanem samting from ol samting we i hapen long laef blong ol narafala.” Moses i talem long ol man Isrel blong tingbaot ol prapa rong we oli mekem bifo mo lanem samting from. Be aposol Pol i givim advaes long ol narafala​—⁠Kristin kongregesen long Korin long faswan handred yia, mo long yumi tu​—⁠blong lanem samting from store ya blong ol man Isrel. Hem i raetem se: ‘Olgeta trabol ya we ol man ya bifo oli kasem, oli blong tijim olgeta [ol man Isrel]. Mo oli raetem store blong olgeta long buk blong wekemap yumi ya we yumi stap laef naoia, we lasdei blong wol i kolosap.’ (1 Korin 10:11) Jisas Kraes i stap tingbaot wan narafala store blong Baebol mo i soem se yumi mas lanem wan samting from store ya. Hem i talem se: “Yufala i mas tingbaot woman blong Lot.” (Luk 17:32; Jenesis 19:1-26) Samuel Taylor Coleridge, wan Engglis man we i stap raetem ol naes vas mo i gat bigfala save long waes blong wol, i raetem se: “!Sipos histri i save tijim ol man, hem i save tijim yumi long plante samting!”

Fasin We i No Flas Mo Fasin Tangkyu

Namba tri samting se, fasin blong tingbaot ol samting blong bifo, i save halpem yumi blong wokem ol fasin we God i glad long olgeta, olsem fasin we i no flas mo fasin tangkyu. Yumi glad tumas long ol gudfala samting long paradaes long saed blong speret we yumi gat raonabaot long wol. Be yumi no mas foget se, i gat sam fasin we paradaes ya i stanap long olgeta. Ol fasin olsem fasin blong holemstrong long God mo ol loa blong hem, lav, fasin blong lego sam samting we yumi nomo i wantem, fasin blong no fraet taem narafala i agensem yumi, fasin blong stanap strong longtaem, longfala tingting mo bilif. Hemia ol fasin we ol Kristin brata mo sista blong yumi oli soem plante yia bifo, taem oli statem wok blong prij long ol defren kantri. Long lashaf blong ripot blong histri blong ol man blong God long Meksiko long taem blong yumi, 1995 Yearbook of Jehovah’s Witnesses i talem se: “Maet olgeta we oli jes joen wetem ol Wetnes blong Jeova, oli sapraes long ol traem we oli kasem olgeta we oli statem wok blong prij long Meksiko. Ol nyuwan ya, oli save nomo wan paradaes long saed blong speret, we i gat fulap kakae long saed blong speret, plante taosen fren we oli fraetgud long God, mo we wok blong Jeova i gohed folem wan gudfala plan.”

Ol faswan man ya we oli statem wok blong prij long ol defren kantri, plante taem oli prij olgeta nomo, no oli stap olsem ol smosmol grup we oli farawe long ol narafala. Oli no gat fren, oli sot long plante samting, mo sam narafala samting i traem bilif blong olgeta bigwan, be oli stap gohed nomo blong talemaot mesej blong Kingdom. !Nating se plante long ol gudfala man blong wok ya blong bifo oli ded finis, yumi glad tumas blong save se Jeova i no fogetem ol gudfala wok blong olgeta! Aposol Pol i promes samting ya, taem hem i raetem se: “Oltaem God i stap mekem i stret nomo. Mo hem i no save fogetem ol wok ya we yufala i mekem. Hem bambae i stap tingbaot we yufala i laekem hem tumas.” (Hibrus 6:​10) Sipos Jeova i gat tangkyu long olgeta, mo i no save fogetem olgeta, ?yu ting se i stret we yumi tu yumi mas tingbaot olgeta wetem fasin tangkyu?

Olgeta we oli jes kasem save long trutok, oli save luklukbak long ol yia we oli pas finis, taem oli ridim buk ya Jehovah’s Witnesses​—Proclaimers of God’s Kingdom.c Mo tu, sipos yumi gat blesing ya we yumi stap long wan famle no wan Kristin kongregesen we sam memba blong hem oli ol brata mo sista we oli wok strong longtaem finis, Dutronome 32:​7 i talem long yumi blong “tingbaot ol dei we oli pas finis, mo tingting long ol yia we ol olfala bubu blong yufala bifo oli laef long olgeta. Askem ol papa blong yufala, mo oli save talem long yufala. Askem ol olfala, mo oli save storeyan long yufala.”

Yes, fasin ya blong tingbaot ol man we oli onagud long God long ol yia we oli pas finis, i save pusum yumi blong gohed oltaem wetem glad blong stanap strong long Kristin wok blong yumi. Mo tu, i gat sam samting we yumi nidim blong lanem from ol samting we oli hapen bifo. Mo fasin blong tingtingdip long paradaes we yumi gat long saed blong speret we God i stap blesem, i givhan long yumi blong gat ol gudfala fasin, olsem tingting we i no flas mo fasin tangkyu. Tru ya, “tingbaot ol dei we oli pas finis.”

[Ol futnot]