Refrens Blong Kristin Wok Mo Laef Miting Wokbuk
© 2024 Watch Tower Bible and Tract Society of Pennsylvania
2-8 SEPTEMBA
OL SAS SAMTING LONG BAEBOL OL SAM 79-81
Soemaot Se Yu Lavem Hae Nem Blong Jehova
Ransom Wan ‘Nambawan Presen’ We Papa i Givim
5 ?Olsem wanem yumi save soemaot se yumi lavem nem blong Jehova? Tru long ol fasin blong yumi. Jehova i wantem se yumi tabu. (Ridim 1 Pita 1:15, 16.) Hemia i min se yumi wosipim hem nomo, mo yumi obei long hem long fulhat blong yumi. Nating se ol narafala oli mekem i nogud long yumi, be yumi traem bes blong yumi blong folem ol tijing blong Jehova. Taem yumi mekem ol loa blong Jehova i wok long laef blong yumi, yumi stap leftemap nem blong hem. (Matiu 5:14-16) Yumi pruvum se ol loa blong hem oli gud mo se Setan i wan man blong giaman. Yumi no stret gud olgeta, taswe bambae yumi mekem ol mastik. Be nating se i olsem, yumi tanem tingting blong yumi, mo yumi no moa mekem eni samting we i save sakem doti long nem blong Jehova.—Ol Sam 79:9.
Rom 10:13—“Singaot Long Nem Blong Masta”
Long Baebol, tok ya “singaot long nem blong Jehova” i no jes minim se yumi save nem blong God, mo yumi yusum nem ya taem yumi wosipim hem. (Ol Sam 116:12-14) Be i minim tu se yumi trastem God mo yumi lukluk i go long hem blong i halpem yumi.—Ol Sam 20:7; 99:6.
Jisas Kraes tu i luk nem blong God se i impoten. Faswan toktok we hem i talem long Lodsprea, hemia se: “Papa blong mifala long heven, plis yu mekem we nem blong yu i tabu,” o i holi. (Matiu 6:9) Mo tu, Jisas i soemaot se yumi mas save, obei, mo lavem Jehova, sipos yumi wantem kasem laef blong olwe.—Jon 17:3, 6, 26.
Ol Gudgudfala Samting
it-2 111
Josef
Nem Ya Josef i Minim Haeman. Long olgeta pikinini blong Jekob, Josef nao i gat wan hae posisen. Taswe i stret nomo we samtaem oli yusum nem ya blong tokbaot ful traeb blong Isrel (Sam 80:1) o olgeta we oli mekemap kingdom blong not. (Sam 78:67; Am 5:6, 15; 6:6) Mo oli yusum nem ya tu long profet tok blong Baebol. Long wan vison we Esikel i luk, hem i talem se Josef bambae i kasem tu graon (Esi 47:13), mo long wan long ol get blong taon ya “Jehova i Stap Long Ples Ya,” nem blong Josef i stap long hem (Esi 48:32, 35), mo tu, long taem ya we oli mekem ol man blong Jehova oli kam klin, oli tokbaot Josef olsem jif blong wan haf blong nesen, mo Juda olsem jif blong narafala haf blong nesen. (Esi 37:15-26) Profet tok blong Obadaea i soemaot se “olgeta long haos blong Jekob” bambae oli joen blong spolem “olgeta long haos blong Esao” (Ob 18), mo profet tok blong Sekaraea i talem se Jehova bambae i sevem “olgeta long haos blong Josef.” (Sek 10:6) Long buk blong Revelesen, oli no tokbaot Efrem be oli tokbaot Josef olsem wan long ol traeb blong Isrel long saed blong spirit.—Re 7:8.
Lis ya long buk blong Revelesen 7:8 i putum nem blong Josef, mo hemia i soemaot se profet tok we Jekob i talemaot bifo we hem i ded, bambae i kamtru long Isrel long saed blong spirit. I klia se Jehova, God blong Jekob we i gat Bigfala Paoa, hem nao i givim Jisas Kraes we i Gudfala Man Blong Lukaot Long Sipsip, blong i givim laef blong hem from “ol sipsip blong hem.” (Jon 10:11-16) Mo tu, Jisas Kraes hem i ston long kona blong fandesen, we tempol blong God, hemia Isrel long saed blong spirit i stap long hem. (Ef 2:20-22; 1Pi 2:4-6) Man Ya Blong Lukaot Long Sipsip mo Ston ya, i stap wetem God Ya We i Gat Olgeta Paoa.—Jon 1:1-3; Wok 7:56; Hib 10:12; skelem wetem Je 49:24, 25.
9-15 SEPTEMBA
OL SAS SAMTING LONG BAEBOL OL SAM 82-84
Glad Long Wok We Yu Mekem Blong Jehova
Samting We Yumi Lanem From Ol Pijin
Ol man long Jerusalem oli savegud pijin ya swalo, from we oltaem oli stap mekem nes blong olgeta long saed blong wol, aninit long ruf blong haos. Sam oli mekem nes blong olgeta long haos tempol blong Solomon. Ol swalo we evri yia oli stap mekem nes blong olgeta long haos tempol, oli luk se ples ya i sef mo i no gat samting i save spolem pikinini blong olgeta.
Evri sikis manis, taem pikinini blong Kora we i raetem Ol Sam 84, i kam wok wan wik long haos tempol, hem i luk nes blong ol pijin ya. Hem i wantem tumas blong stap oltaem long haos blong Jehova olsem ol pijin ya, nao hem i talem se: “Hae God. Yu yu gat olgeta paoa. !Mi mi laekem haos blong yu tumas! !Mi wantem tumas blong go stap long hem! Hae God, mi wantem tumas blong stap oltaem long haos blong yu. . . . Hae God, yu yu gat olgeta paoa. Yu yu King blong mi, yu yu God blong mi. Ol smosmol pijin ya we oli smol tumas, be oli stap mekem nes blong olgeta long haos blong yu, mo oli stap lukaot long ol pikinini blong olgeta klosap long olta blong yu.” (Ol Sam 84:1-3) ?Olsem wanem? ?Yu wetem ol pikinini blong yu, yufala i gat sem tingting ya blong joen oltaem wetem ol man blong God long ol miting?—Ol Sam 26:8, 12.
w08 7/15 30 ¶3-4
Gat Stret Tingting Mo Stap Glad
Taem yumi stap kam olfala o yumi gat wan problem blong helt, hemia i save blokem yumi blong mekem moa long wok blong Jehova. Sipos yu yu wan perens, maet yu harem se yu no stap mekem gud prapa stadi blong yu o lesin gud long ol miting, from yu yusum plante taem mo paoa blong yu blong lukaot long ol pikinini blong yu. ?Be olsem wanem? ?Samtaem hemia i blokem yu blong yu no luksave samting we yu naf blong mekem?
Plante taosen yia bifo, wan Livaet i gat sem tingting ya se hem i no save harem gud. Hem i gat blesing ya blong go wok tu wik evri yia long tempol. Nating se i olsem, hem i talem se hem i wantem tumas blong stap olwe klosap long olta. (Sam 84:1-3) ?Wanem i halpem gudfala man ya blong i stap glad? Hem i luksave se nating sipos hem i stap wan dei nomo long yad blong tempol, hemia i wan nambawan blesing. (Sam 84:4, 5, 10) Long sem fasin, yumi mas tingbaot mo glad long ol samting we yumi naf blong mekem, i bitim we yumi stap tingbaot nomo ol samting we yumi no naf blong mekem.
!Jehova i Tinghae Long Yu!
12 Sipos yu gat wan strong sik, yu save sua se Jehova i kasem save long trabol blong yu. Prea long hem blong i halpem yu blong yu gat stret tingting long samting we i hapen. Nao lukaotem ol gudfala tok we Jehova i putum long Baebol blong givhan long yu. Ridim ol vas we oli soemaot se Jehova i tinghae long ol man blong hem. Sipos yu mekem olsem, bambae yu luksave se Jehova i gud, mo i kaen long olgeta we oli holemstrong long hem.—Sam 84:11.
Ol Gudgudfala Samting
it-1 816
Pikinini We i No Gat Papa
I isi nomo blong ol man oli fogetem o mekem i nogud long ol pikinini olsem, taswe Jehova i yusum tok ya “pikinini we i no gat papa” blong soemaot se ol man Isrel oli stap mekem stret fasin olsem wanem o oli go longwe finis long fasin ya. Taem nesen ya i harem gud long saed blong spirit, oli lukaot gud long ol pikinini we oli no gat papa. Be taem oli stat blong mekem ol fasin we i no stret, oli no moa lukaot gud long ol pikinini we oli no gat papa. Mo hemia i mekem se nesen ya i stap kam moa nogud. (Sam 82:3; 94:6; Aes 1:17, 23; Jer 7:5-7; 22:3; Esi 22:7; Sek 7:9-11; Mal 3:5) Jehova i mekem trabol i kasem ol man we oli stap mekem i nogud long ol pikinini we oli no gat papa. (Du 27:19; Aes 10:1, 2) Jehova i tokbaot hem wan se hem i Man We i Pemaot (Pro 23:10, 11), i Helpa (Sam 10:14), mo i Papa (Sam 68:5) blong ol pikinini we oli no gat papa. Hem nao i stap givim jastis long bihaf blong olgeta (Du 10:17, 18), i stap soemaot sore (Ho 14:3), i protektem (Sam 146:9), mo i holem olgeta oli stap laef.—Jer 49:11.
Wan fasin we i makemaot ol trufala Kristin, hemia se oli tingbaot olgeta we oli harem nogud from we oli lusum hasban o perens blong olgeta. Disaepol Jemes i raet i go long ol Kristin se: “Long fes blong God ya we i Papa blong yumi, wosip we i klin mo i no gat doti long hem, i olsem: Man i mas lukaot gud long ol pikinini we oli no gat papa mama blong olgeta mo long ol wido taem oli kasem trabol, mo hem i mas holem laef blong hem i klin, blong wol i no mekem hem i doti.”—Jem 1:27.
16-22 SEPTEMBA
OL SAS SAMTING LONG BAEBOL OL SAM 85-87
Prea i Halpem Yumi Blong Stanap Strong
?Yu Yu Stap Leftemap Hae Nem Blong God?
10 Sipos yumi wantem leftemap hae nem blong God, yumi mas “prea oltaem.” (Rom 12:12) Yumi mas prea blong Jehova i givhan long yumi long wok blong hem, blong yumi mekem long fasin we hem i glad long hem. Yumi save askem long hem blong i givim tabu spirit long yumi, mo blong i mekem bilif blong yumi i strong moa, mo blong i givhan long yumi taem ol samting i traem yumi. Yumi save prea tu blong “tijim ol man long trutok long fasin we i stret gud.” (2 Tim. 2:15; Mat. 6:13; Luk 11:13; 17:5) Yumi mas trastem Jehova blong i givhan long yumi, olsem pikinini we i trastem papa blong hem. Sipos yumi askem long Jehova blong i givhan long yumi blong kam gud moa long wok blong hem, bambae hem i givhan long yumi. Yumi no mas ting se Jehova i taed blong harem ol prea blong yumi. Long prea blong yumi, yumi mas presem Jehova, yumi talem tangkiu long hem, mo yumi askem hem blong i lidim yumi taem trabol i kasem yumi. Yumi prea blong yumi mekem ol wok we i leftemap nem blong Jehova.—Sam 86:12; Jem. 1:5-7.
?Olsem Wanem Jehova i Ansarem Ol Prea Blong Yumi?
17 Ridim Ol Sam 86:6, 7. Deved we i raetem Sam ya, i sua se Jehova i stap harem mo ansa long ol prea blong hem. Yu tu yu save sua long samting ya. Ol eksampol we yumi bin tokbaot long stadi ya, i mekem yumi sua se Jehova i save givim waes mo paoa we yumi nidim blong stanap strong. Hem i save yusum ol brata mo sista, o olgeta we oli no wosipim hem blong halpem yumi.
18 I no oltaem we Jehova i stap ansarem ol prea blong yumi olsem we yumi wantem. Be nating se i olsem, yumi sua se bambae hem i ansarem olgeta. Bambae hem i givim samting we yumi nidim mo long stret taem we yumi nidim. Taswe yu mas gohed blong prea mo bilif se Jehova bambae i harem yu, mo yu trastem se bambae hem i lukaotgud long yu naoia, mo i “givim samting we olgeta laef samting oli wantem tumas, nao oli harem gud” long niufala wol we i stap kam.—Sam 145:16.
Ol Gudgudfala Samting
it-1 1058 ¶5
Hat
Mekem Wok Long “Olgeta Hat Blong Yu.” Hat blong yumi i save wok gud sipos i fulwan, be hat blong yumi long saed blong spirit, samtaem i save seraot. Deved i prea se: “Yu mekem hat blong mi i kam wan nomo blong mi fraet long nem blong yu.” Hemia i soemaot se sipos man i lavem narafala mo i fraet, hat blong hem i save seraot. (Sam 86:11) Man olsem, maet ‘hat blong hem i no fulwan,’ hem i hafhaf long wosip we hem i mekem long God. (Sam 119:113; Re 3:16) Mo tu, wan man i save “giaman nomo” (prapa tok, oli gat tu hat), i traem blong wosipim tu masta, o i talem wan samting be i stap tingbaot wan narafala samting. (1Kro 12:33; Sam 12:2, fut.) Jisas i tok strong agensem ol man olsem we oli gat tu fes.—Mt 15:7, 8.
23-29 SEPTEMBA
OL SAS SAMTING LONG BAEBOL OL SAM 88-89
Rul Blong Jehova i Beswan
!Sapotem Rul Blong Jehova!
5 I gat wan narafala risen from wanem Jehova i gat raet blong rul. Oltaem hem i yusum paoa blong hem long fasin we i stret nomo. Hem i talem se: “Fasin blong mi blong lavem man i gudfala tumas, mo ol wok we mi mi stap mekem long wol ya, oli gud mo oli stret nomo. Ol samting ya nao, mi mi glad long olgeta.” (Jeremaea 9:24) Jehova i stret gud olgeta, taswe hem i no nidim ol loa we man i putumap, blong save samting we i stret. Ol man nao oli mas folem ol loa we hem i putumap. Man we i raetem Ol Sam i tokbaot Jehova se: “Yu yu King, we fasin blong yu, oltaem yu stap mekem i stret, oltaem yu stap jajem ol man long stret rod.” Taswe, ol loa, ol rul, mo ol desisen blong Jehova oli stret nomo. (Ol Sam 89:14; 119:128) Setan i stap talem se rul blong Jehova i no stret. Be Setan i no save mekem se wol ya i fulap long stret fasin.
!Sapotem Rul Blong Jehova!
10 Jehova i no mekem i strong tumas long ol man we hem i rulum. Ol man we oli obei long hem oli harem se oli fri, mo oli glad. (2 Korin 3:17) Deved i tokbaot Jehova se: ‘Bigfala laet we i stap saen raonabaot long hem i soemaot we hem i King, nem blong hem i hae we i hae. Paoa blong hem i bigwan tumas, mo hem i stamba blong glad.’ (1 Kronikel 16:7, 27) Etan i raetem Sam ya we i talem se: “Olgeta we oli stap singsing blong presem yu, oli glad tumas. Oltaem yu yu kaen gud long olgeta, nao i olsem we oli stap wokbaot long delaet. Yu yu mekem olgeta oli harem gud, i stat long moning go kasem long sapa.”—Ol Sam 89:15, 16.
11 Taem yumi tingting dip long ol gudfala samting we Jehova i mekem long yumi, yumi bilif strong se rul blong hem i beswan. Yumi wantem talem olsem man blong raetem Sam ya, se: “Sipos mi stap wan dei nomo long haos blong yu, be hemia i gud moa, i winim we mi stap wan taosen dei long ol narafala ples.” (Ol Sam 84:10) Jehova i wokem yumi, taswe hem i save gud samting we i mekem yumi glad. Hem i givim plante samting long yumi, i bitim wanem we yumi nidim. Ol samting we Jehova i askem, oli blong mekem i gud long yumi nomo. Nating se yumi mas lego sam samting, be sipos yumi obei long hem oltaem, bambae yumi glad.—Ridim Aesea 48:17.
Yumi Save Bilif Strong Long Kingdom
14 Jehova i mekem wan promes no wan kontrak wetem Deved, we i king blong Isrel bifo. (Ridim 2 Samuel 7:12, 16.) Jehova i promes se Mesaea bambae i kamaot long laen blong Deved. (Luk 1:30-33) Olsem nao, Jehova i soemaot klia moa, hu olgeta we oli bubu blong Mesaea. Jehova i talem tu se Mesaea we i kamaot long laen blong Deved, bambae i “gat raet” blong kam King long Kingdom. (Esik. 21:25-27, NW) Rul blong King Deved bambae i stap olwe, from we Jisas, we i kamaot long laen blong Deved, ‘bambae i stap king olwe olsem we san i stap oltaem nomo.’ (Sam 89:34-37) !Yumi save gat strong tingting se rul blong Mesaea i no save kam nogud samtaem, mo se ol blesing we oli kamaot from rul ya, bambae oli stap gogo i no save finis!
Ol Gudgudfala Samting
cl 281 ¶4-5
“Yu Nomo Yu Holemstrong Long Ol Man Blong Yu”
4 Tok ya “holemstrong” we Hibru Haf Blong Baebol i tokbaot, hem i wan fasin we i joenem tu samting blong mekem wan wok, go kasem we wok ya i finis fulwan. Be i no naf nomo we man i stap oltaem o i fasgud long wan samting. Maet wan man i stap oltaem o fasgud long wan samting, from we hem i harem se hem i mas mekem olsem. Defren olgeta, fasin blong holemstrong i stanap long lav. Nao, tok ya “stap oltaem” oli save yusum tu blong tokbaot ol samting we oli no laef. Eksampol, man blong raetem sam i talem se mun i “wan witnes we i stap oltaem long skae” from we mun i kamaot oltaem long naet. (Ol Sam 89:37) Be yumi no save talem se mun i holemstrong, from we fasin blong holemstrong i stanap long lav, mo ol samting we oli no laef oli no save soemaot fasin ya.
5 Long Baebol, fasin blong holemstrong i joen wetem filing. Mo oli yusum tok ya blong soemaot se man we i soemaot fasin ya, mo man we narafala man i soemaot fasin ya long hem, tufala i fren gud. Mo fasin blong holemstrong, hem i wan fasin we i stap sem mak nomo. Hem i no olsem ol wef blong solwota we oli jenis folem win. Defren olgeta, fasin blong holemstrong, o fasin blong lavem man oltaem, i stap sem mak nomo mo i mekem man i gat paoa blong winim ol traem we oli had.
30 SEPTEMBA–6 OKTOBA
OL SAS SAMTING LONG BAEBOL OL SAM 90-91
Trastem Jehova Blong Yu Save Gat Wan Longfala Laef
Oli Traem Mekem Se Man i Laef Longtaem
Be plante saentis oli ting se ol samting we oli wokem blong blokem olfala, i no save mekem man i laef plante moa yia. I tru, afta long ol yia 1800, sloslo laef blong man i kam longfala moa i bitim bifo. Be bigfala risen blong samting ya, hemia se ol man oli lanem ol rod blong stap klin, i gat ol meresin mo stik meresin blong blokem sik, mo blong winim sik tu. Taswe sam saentis oli ting se yumi kasem mak finis we yumi no moa save kam olfala moa.
Samwe long 3,500 yia bifo, Moses i raetem wan Sam long Baebol we i talem se: “Yia blong mifala i save kasem seventi nomo, no sipos bodi blong mifala i stap strong oltaem, mifala i save kasem eiti, be oltaem mifala i stap kasem trabol, mifala i stap harem nogud nomo. Laef blong mifala i save finis kwiktaem nomo, nao mifala i go lus olgeta.” (Ol Sam 90:10) Nating se ol man oli traehad blong mekem laef i longfala moa, be i stap sem mak olsem Moses i talem.
Be i gat sam animol mo tri we oli laef longtaem moa i bitim man. I gat wan kaen blak nidel mo natalae we oli laef bitim 200 yia, mo sam tri oli laef plante taosen yia. Taem yumi skelem laef blong yumi wetem olgeta mo wetem sam narafala laef samting, yumi wantem save se: ‘?Laef ya blong 70 o 80 yia, hemia nomo?’
wp19.1 5, bokis
?Wanem Nem Blong God?
Plante man oli tingbaot kwestin ya. Maet yu tu yu tingbaot. Narafala rod blong askem kwestin ya, hemia se: ?Sipos God i wokem skae mo wol mo evri samting long tufala, hu i wokem God?
Plante saentis oli agri se i gat wan stat blong skae mo wol. Baebol i agri wetem tingting ya tu, i se: “Bifo we bifo olgeta, God i mekem skae mo graon wetem olgeta samting we i stap long tufala.”—Jenesis 1:1.
Skae mo wol, tufala i no save wokem tufala, mo tufala i no save kamaot olsem nomo. Wan samting i no save kamaot hem wan. Sipos i no gat wan samting i stap bifo we skae mo wol i stat, bambae i no gat skae mo wol tede. Nating se i had blong kasem save fulwan, be i mas gat wan samting i stap bifo long skae mo wol, blong mekem tufala i stat. Jehova God, we i wan spirit Man mo i gat bigfala paoa mo waes, Hem nao i mekem skae mo wol.—Jon 4:24.
Baebol i tokbaot God, se: “Bifo, taem we yu . . . no wokem wol ya nating yet, be yu yu stap fastaem finis. Yu yu God we yu stap we yu stap, mo bambae yu save stap oltaem, gogo i no save finis.” (Ol Sam 90:2) Yes, God i stap olwe, bifo mo long fiuja. Hem nao i wokem skae mo wol, “bifo we bifo olgeta.”—Revelesen 4:11.
?Olsem Wanem Lav i Halpem Yumi Blong Winim Fraet?
16 Setan i save se yumi tinghae long laef blong yumi. Taswe, hem i talem se bambae yumi lego evri samting, inkludum frensip blong yumi wetem Jehova, blong sevem laef blong yumi. (Job 2:4, 5) !Be hem i rong! Setan i gat “i gat paoa blong mekem man i ded,” hem i traem blong yusum filing ya blong fraet blong ded, blong mekem yumi lego Jehova. (Hib. 2:14, 15) Samtaem Setan i yusum ol man blong oli talem se bambae oli kilim yumi, sipos yumi no lego bilif blong yumi. Mo samtaem, hem i luk we yumi kasem wan bigfala sik we yumi nidim help kwiktaem, mo hem i traem yusum samting ya blong pulum yumi blong brekem loa blong Jehova. Ol dokta mo ol famle blong yumi we oli no bilif, maet oli fosem yumi blong akseptem blad transfusen we i agensem loa blong God. O maet wan man i traem blong fosem yumi blong akseptem wan tritmen we i agensem ol rul blong Baebol.
17 Nating se yumi no wantem ded, be yumi save se Jehova bambae i no stop blong lavem yumi sipos yumi ded. (Ridim Rom 8:37-39.) Taem ol fren blong Jehova oli ded, hem i gohed blong tingbaot olgeta olsem we oli laef yet. (Luk 20:37, 38) Mo hem i wantem tumas blong mekem olgeta oli laef bakegen. (Job 14:15) Jehova i pem wan hae praes, blong yumi save “kasem laef we i no save finis.” (Jon 3:16) Hemia i mekem yumi luksave se Jehova i lavem yumi mo i kea bigwan long yumi. So i bitim we yumi lego Jehova taem yumi sik o taem narafala i talem se bambae i kilim yumi, yumi mas dipen long Jehova blong i mekem yumi harem gud, i givim waes mo paoa long yumi. Hemia nao samting we Valérie mo hasban blong hem i mekem.—Sam 41:3.
Ol Gudgudfala Samting
?Yu Gat Wan Enjel Blong Yu?
Baebol i no tijim se wanwan man oli gat wan enjel we i stap lukaot long olgeta. I tru, Jisas i se : “Yufala i mas lukaot se yufala i no ting nating long wan long ol smolwan ya [ol disaepol blong Kraes], from we ol enjel blong olgeta oli stap oltaem wetem Papa blong mi long heven.” (Matiu 18:10) Jisas i no stap talem se wanwan man i gat wan enjel we i lukaot long hem, be hem i wantem soemaot se ol enjel tu oli intres long ol wanwan disaepol blong hem. Taswe, olgeta we oli wosipim God oli no mas ting se enjel blong God bambae i protektem olgeta, sipos oli mekem wan samting we i denja.
?Hemia i min se ol enjel oli no stap halpem ol man? Nogat. (Ol Sam 91:11) Sam man oli harem se God i stap yusum ol enjel blong protektem mo lidim olgeta. Kenneth we yumi tokbaot hem finis, i harem olsem tu. Yumi no save talem se hem i rong, maet hem i tru. Oltaem ol Witnes blong Jehova oli luksave se ol enjel oli stap givhan long olgeta long wok blong prij. From we yumi no save luk ol enjel, yumi no save talem stret olsem wanem God i yusum ol enjel blong halpem ol man we oli kasem trabol. Be sipos yumi stap talem tangkiu long Jehova from ol rod we hem i yusum blong givhan long yumi, yumi mekem wan samting we i stret.—Kolosi 3:15; Jemes 1:17, 18.
7-13 OKTOBA
OL SAS SAMTING LONG BAEBOL OL SAM 92-95
!Beswan Laef Hemia Blong Mekem Wok Blong Jehova!
Yangfala, ?Yu Gat Plan Blong Mekem Moa Long Wok Blong Jehova?
5 ?From wanem i impoten we yu gat plan blong mekem moa long wok blong Jehova? Yu wantem talem tangkiu long Jehova from lav we hem i soemaot, mo from ol samting we hem i mekem long yu. Man we i raetem Sam 92 i talem se: ‘Hae God. I gud tumas blong talem tangkiu long yu. Ol bigfala wok blong yu oli stap mekem mi mi glad tumas. Oltaem mi harem gud from ol samting ya we yu yu mekem.’ (Ol Sam 92:1, 4) Traem tingbaot ol samting ya we Jehova i givim long yu: laef, bilif, Baebol, kongregesen, hop blong laef olwe long Paradaes. Taem yu gat plan blong mekem moa long wok blong Jehova, yu soemaot long hem se yu glad long ol samting we hem i givim, nao yu kam klosap moa long hem.
?Yu Stap Folem Tingting Blong Hu?
8 Jehova i wantem se ol pikinini blong hem oli haremgud long laef blong olgeta. (Aesea 48:17, 18) Taswe, hem i tijim yumi long ol stamba rul blong Baebol we oli halpem yumi blong gat ol gudfala fasin. Hem i wantem se yumi lanem blong folem ol tingting blong hem. Hemia i no blokem yumi long ol samting we yumi laekem, be i mekem yumi kam waes moa, mo i halpem yumi blong mekem ol gudfala desisen. (Ol Sam 92:5; Ol Proveb 2:1-5; Aesea 55:9) Bambae yumi gohed blong mekem samting we yumi laekem, be bambae yumi glad from ol desisen we yumi mekem. (Ol Sam 1:2, 3) !Taem yumi folem tingting blong Jehova, yumi kasem plante blesing!
!Jehova i Tinghae Long Yu!
18 Taem yumi kam olfala, tingting blong yumi i save strong yet se Jehova i gat wok blong yumi mekem. (Sam 92:12-15) Jisas i tijim yumi se nating we yumi no gat plante save, o yumi naf blong mekem smol samting nomo, be Jehova i tinghae long eni samting we yumi mekem blong hem. (Luk 21:2-4) Taswe, yu mas tingbaot samting we yu naf blong mekem. Yu yu naf blong tokbaot Jehova long ol narafala, prea from ol brata mo sista, mo leftemap tingting blong olgeta blong oli holemstrong long Jehova. Traem tingbaot: Jehova i letem yu yu joen wetem hem blong mekem wok. Hemia i no from samting we yu naf blong mekem, be from we yu glad blong obei long hem.—1 Kor. 3:5-9.
Ol Gudgudfala Samting
cl 176 ¶18
‘!Tru, Waes Blong God i Dip Tumas!’
18 Makem olsem wanem aposol Pol i tokbaot waes blong Jehova: “!Tru, ol blesing blong God, mo waes, mo save blong hem oli dip tumas! !Man i no naf blong kasem save long jajmen blong hem! !Mo man i no naf blong kasem save long ol rod blong hem!” (Rom 11:33) From we vas ya i stat wetem tok ya “Tru” mo i gat wan esklamesen mak long hem, Pol i soemaot wan strong filing blong sapraes. Grik tok we oli jusum blong tokbaot “dip tumas” i klosap sem mak long tok ya “abys.” Yes, ol tok blong hem oli mekem se yumi gat wan klia pija long tingting blong yumi. Taem yumi tingting dip long waes blong Jehova, i olsem we yumi stap lukluk i godaon long wan hol we i godaon we i godaon, we yumi no naf blong makem se i bigwan mo i dip olsem wanem. Taswe yumi no naf blong kasemsave long evri smosmol haf blong hem. (Ol Sam 92:5) ?Yu no ting se hemia i soemaot se yumi mas gat tingting daon?
14-20 OKTOBA
OL SAS SAMTING LONG BAEBOL OL SAM 96-99
!“Talemaot Gud Nius”!
?Gud Nius Ya i Long Saed Blong Wanem?
OL KRISTIN oli mas talemaot ‘gud nius ya blong kingdom’ long ol narafala, taem oli go prij mo oli eksplenem se Kingdom ya i wan gavman we bambae i rulum wol ya long fasin we i stret. Be Baebol i yusum tok ya “gud nius” long saed blong sam narafala samting tu. Yumi luk se Baebol i tokbaot “gud nius ya we [God] i sevem yumi” (Ol Sam 96:2); “gud nius blong God” (Rom 15:16); mo “gud nius blong Jisas Kraes.”—Mak 1:1
Blong talem long toktok we i klia nomo, gud nius hem i olgeta trutok we Jisas i tokbaot mo olgeta trutok we ol disaepol blong hem oli raetemdaon. Bifo we Jisas i go antap long heven, hem i talem long ol man blong hem se: “Yufala i mas go long ol man long olgeta ples long wol, blong pulum olgeta oli kam man blong mi. Mo yufala i mas baptaesem olgeta long nem blong Papa blong mi, mo long nem blong mi, mi Pikinini blong hem, mo long nem blong Tabu Spirit. Mo yufala i mas tijim olgeta blong oli folem olgeta tok ya we mi mi givim finis long yufala.” (Matiu 28:19, 20) Yes, wok blong ol tru Kristin i no blong talemaot Kingdom nomo, be oli mas traehad blong pulum ol man oli kam ol disaepol blong Jisas.
?Wanem Bambae i Hapen Long Jajmen Dei?
Plante man oli ting se long Jajmen Dei, plante milian dedman bambae oli stanap long fored blong jea blong God, blong hem i jajem olgeta from ol sin we oli mekem taem oli laef. Olsem we pija ya i soemaot, oli ting se olgeta we God i jajem olgeta se oli stret, bambae oli go long heven, be olgeta we oli no stret bambae oli go long helfaea. Be Baebol i soemaot se God i yusum Jajmen Dei blong tekemaot fasin we i no stret we i mekem ol man oli stap harem nogud. (Ol Sam 96:13) God i putumap Jisas blong i Jaj, mo Jisas bambae i putumbak stret fasin long wol ya.—Ridim Aesea 11:1-5; Ol Wok 17:31.
Pis Blong Wan Taosen Yia Mo Blong Olwe
18 Taem Setan i pulum Adam mo Iv blong agensem Jehova, hem i spolem pis ya we tufala i gat wetem Jehova. Be stat long 1914, King Jisas i mekem sam samting blong putumbak pis mo fasin joen gud. (Efes. 1:9, 10) Long Wan Taosen Yia Rul Blong Kraes, ol nambawan samting we “yumi no save luk” from we oli no hapen yet, bambae oli kamtru. Ale “en” blong Wan Taosen Yia Rul Blong Kraes, i kam. ?Wanem bambae i hapen long taem ya? Nating se Jehova i givim “olgeta paoa” long Jisas, be Jisas i no wantem tekemaot raet blong Jehova blong rul. Hem putum hem i stap daon, nao hem “i givimbak olgeta paoa blong hem long God, Papa blong hem.” Bambae hem i yusum raet no paoa blong hem, blong “leftemap nem blong God, Papa blong yumi.”—Mat. 28:18; Fil. 2:9-11.
19 Long taem ya, olgeta man we oli stap aninit long rul blong Kingdom, bambae oli stret gud olgeta. Mo oli folem eksampol blong Jisas. From we oli gat tingting daon, bambae oli glad se Jehova i rul long olgeta. Sipos oli soemaot se oli wantem we Jehova i rul long olgeta, bambae oli stanap strong taem Setan i traem olgeta laswan. (Rev. 20:7-10) Biaen, ol enjel mo ol man we oli agensem Jehova, bambae oli lus blong olwe. !Bambae i wan taem blong glad! Evriwan long heven mo long wol we oli stap long famle blong Jehova, oli presem hem. Mo Jehova bambae “i rul long olgeta samting.”—Ridim Ol Sam 99:1-3.
Ol Gudgudfala Samting
it-2 994
Singsing
Tok ya “wan niufala singsing” i no kamaot nomo long buk blong Ol Sam, be i kamaot tu long ol tok we Aesea mo aposol Jon i raetem. (Sam 33:3; 40:3; 96:1; 98:1; 144:9; 149:1; Aes 42:10; Re 5:9; 14:3) Taem yumi lukluk ol vas raonabaot, plante taem oli yusum toktok ya “niufala singsing” blong soemaot se oli sing long singsing ya from oli glad long niufala samting we Jehova i mekem, blong soemaot hae rul blong hem. Olsem Ol Sam 96:10 i talem: “!Jehova i kam King!” Naoia rul blong hem i kam bigwan moa, i kasem olgeta ples long heven mo wol, mo hemia i mekem se olgeta evriwan oli joen long “niufala singsing” ya.—Sam 96:11-13; 98:9; Aes 42:10, 13.
21-27 OKTOBA
OL SAS SAMTING LONG BAEBOL OL SAM 100-102
Soemaot Se Yu Glad Long Fasin Blong Jehova Blong Lavem Man Oltaem
?Olsem Wanem Blong Rere From Baptaes?
18 Fasin ya blong lavem Jehova, hem i wan nambawan fasin mo naes tumas. (Ridim Ol Proveb 3:3-6.) Strong lav we yu gat long God i save halpem yu blong stanap strong tru long ol hadtaem we yu fesem long laef. Plante taem Baebol i tokbaot fasin ya blong Jehova we hem i lavem ol man blong hem oltaem. Lav ya i min se hem i fasgud long ol man blong hem, i neva lego olgeta. (Sam 100:5) God i wokem yu long pija blong hem. (Jen. 1:26) ?Olsem wanem yu save soemaot sem kaen lav olsem hem?
19 Faswan samting, yu talem tangkiu long hem. (1 Tes. 5:18) Evri dei i gud yu askem se, ‘?Olsem wanem Jehova i soemaot finis se hem i lavem mi?’ Biaen, yu meksua se yu prea blong talem tangkiu long Jehova, mo yu tokbaot stret ol samting we hem i mekem blong yu. Olsem aposol Pol, yu mas luksave se Jehova i mekem ol aksen ya blong soemaot lav long yu stret. (Ridim Galesia 2:20.) Askem se, ‘?Mi mi wantem soemaot se mi lavem hem, from ol samting we hem i mekem long mi?’ Lav we yu gat long Jehova bambae i halpem yu blong agensem ol samting we oli traem yu, mo stanap strong long ol hadtaem we yu fesem. Lav ya bambae i pusum yu blong holemtaet program blong wosip we yu stap folem, mo long rod ya, yu soemaot evri dei se yu lavem Papa blong yu long heven.
“!Tingting Blong Yufala i Mas Klia Gud Oltaem Mo Yufala i Mas Rere!”
10 Sam long ol denja we yumi mas lukaot long olgeta, hemia fasin blong pleplei wetem filing blong narafala, dring bitim mak, kakae bitim mak, ol tok we i spolem narafala, ol samting blong spel mo pleplei we oli raf, ponografi, mo sam moa narafala samting olsem. (Sam 101:3) Oltaem enemi ya blong yumi, Devel Setan, i traem faenem eni janis blong spolem frensip blong yumi wetem Jehova. (1 Pita 5:8) Sipos yumi no lukaot gud, Setan i save planem long tingting mo hat blong yumi, sid blong ol nogud fasin olsem, wantem kasem mak blong narafala, giaman, griri, no laekem nating narafala, praod, mo holemtaet kros. (Gal. 5:19-21) Long stat, maet yumi no ting se ol fasin ya oli denja. Be sipos yumi no tekem aksen kwiktaem blong rutumaot olgeta, bambae oli gohed blong gru olsem wan plant we i posen mo i save mekem yu kasem trabol.—Jem. 1:14, 15.
?Bambae Yu Yu Folem Ol Tok Blong God We Oli Givhan Long Yu Blong Lukaot Gud?
7 ?Yumi mas mekem wanem blong stap longwe long ol tija we tijing blong olgeta i no stret? Yumi no mas toktok long olgeta mo yumi no mas tekem olgeta oli kam insaed long haos blong yumi. Mo tu, yumi no ridim ol buk blong olgeta, yumi no lukluk ol program blong olgeta long televisin, yumi no ridim ol toktok blong olgeta long Intenet, mo yumi no raetem tingting blong yumi long Intenet, long saed blong ol samting we oli talem. ?From wanem yumi gat strong tingting blong stap longwe long olgeta? From we yumi lavem God blong yumi we “hem i tru.” Yumi no wantem save long ol giaman tijing we oli agensem trutok long Baebol. (Dut. 32:4; Jon 17:17) Mo yumi laekem tumas ogenaesesen we Jehova i yusum blong tijim yumi long ol nambawan trutok. Ogenaesesen blong Jehova nao i tijim yumi long nem blong Jehova mo mining blong nem ya, i tijim yumi long stamba tingting blong Jehova long saed blong wol ya, long samting we i hapen long man taem hem i ded, mo long nambawan promes blong laef bakegen. ?Yu yu save tingbaot olsem wanem yu harem gud taem yu lanem ol samting ya mo sam narafala trutok bakegen? Ale, yu no mas letem ol giaman tok blong ol tija ya oli pulum yu blong agensem ogenaesesen ya we i tijim yu long ol trutok ya.—Jon 6:66-69.
8 !Nomata wanem samting we ol tija ya oli talem, bambae yumi no save biaen long olgeta! I no gat risen nating blong yumi lesin long ol man we oli olsem wel we i no gat wota. Sipos yumi mekem olsem, bambae tingting blong yumi i foldaon. Yumi putum tingting blong yumi i stap long Jehova mo long ogenaesesen blong hem. Neva ogenaesesen blong Jehova i mekem tingting blong yumi i foldaon. Oltaem ogenaesesen ya i tijim yumi long plante plante trutok long Tok blong God. Ol trutok ya oli olsem gudfala wota we yumi dring long hem.—Aes. 55:1-3; Mat. 24:45-47.
Ol Gudgudfala Samting
it-2 596
Pelikan
Taem pijin ya pelikan i kakae gogo i fulap gud, plante taem hem i flae i go long wan ples we i no gat man long hem. Long ples ya, hem i tanem hed blong hem i go long ol solda blong hem olsem we hem i harem nogud tumas. Mo sipos man i stanap longwe mo i lukluk, bambae hem i ting se wan waet ston. Samtaem pijin ya i save stap olsem blong plante aoa. Hemia nao from wanem man blong raetem sam ya i yusum fasin blong pijin ya blong soemaot se hem i harem nogud tumas. Hem i talem se: “Mi mi luk olsem pijin ya pelikan long draeples.” (Sam 102:6) Long vas ya, tok ya “draeples” i no rili minim wan draeples, be i stap tokbaot wan ples we i longwe we i no gat man long hem, maet hemia wan swam. Sam taem long yia, ol pijin ya pelikan oli go stap long ol swam long not blong Vali blong Jodan. Long Isrel, i gat tri defren kaen pelikan. Wan we i plante moa long is saed hemia ol waet pelikan (Pelecanus onocrotalus). Be Dalmatian pelikan (Pelecanus crispus) mo pink-backed pelikan (Pelecanus rufescens) oli luk tufala wanwan taem nomo.
Ol pelikan oli laekem blong stap long ol ples we i longwe, blong man i no hambag long olgeta. Long ples ya, oli mekem ol nes blong olgeta, oli gat ol pikinini, mo oli go fising. From we pijin ya i laekem blong stap hem wan, Baebol i yusum hem olsem wan pijatok blong tokbaot man we i stap hem wan. Taem Aesea i talemaot profet tok long saed blong Edom, hem i talem se ol pelikan bambae oli kam stap long kantri ya. Hemia i soemaot se bambae i no gat man nating long kantri ya. (Aes. 4:11) Mo taem Sekaraea i talemaot se ol pelikan bambae oli mekem ples blong olgeta long ol bigfala pos blong ol kapital blong Nineve, hemia i soemaot se ol taon ya bambae oli kam nogud, we i no gat man long olgeta.—Sef 2:13, 14.
28 OKTOBA–3 NOVEMBA
OL SAS SAMTING LONG BAEBOL OL SAM 103-104
Hem i Tingbaot We “Yumi Das Nomo”
Folem Fasin Blong Jehova Blong No Mekem i Strong Tumas Long Narafala
5 Jehova i gat tingting daon mo i kaen, taswe hem i no mekem i strong long narafala. Eksampol, Jehova i soemaot se hem i gat tingting daon taem hem i rere blong distroem ol rabis man long Sodom. Hem i yusum tu enjel blong talem long gudfala man ya Lot blong i ronwe i go long rijen blong ol hil. Be Lot i fraet blong go long ples ya, taswe hem i askem long Jehova blong i letem hem mo famle blong hem oli ronwe i go long Joa. Hemia wan smol taon we Jehova i plan finis blong distroem. Jehova i save talem long Lot blong i folem samting we hem i talem finis. Be hem i letem Lot i go long Joa, mo hem i no distroem taon ya. (Jen. 19:18-22) Plante yia biaen, Jehova i soemaot se hem i kaen long ol man we oli laef long Nineve. Hem i sanem profet Jona blong i go talem long olgeta se bambae hem i distroem olgeta mo taon ya Nineve. Be taem ol man Nineve oli tanem tingting blong olgeta, Jehova i sore long olgeta, mo i no distroem Nineve.—Jona 3:1, 10; 4:10, 11.
Olsem Samson, Yumi Mas Dipen Long Jehova
16 Nating se Samson i kasem bigfala trabol from mastik blong hem, be hem i stap gohed nomo blong traehad blong mekem samting we Jehova i wantem. Sipos yumi mekem wan mastik we oli mas stretem yumi from, o yumi lusum wok blong yumi long kongregesen, yumi no mas givap. Yumi mas tingbaot se Jehova i rere oltaem blong fogivim yumi. (Sam 103:8-10) Nating se yumi mestem samtaem, be Jehova i save gohed blong yusum yumi olsem we hem i mekem long Samson.
17 Tingbaot eksampol blong wan yangfala brata we nem blong hem Michael. Hem i wan man blong givhan, wan fultaem paenia, mo i bisi oltaem long wok blong Jehova. Be sore tumas, hem i mekem wan mastik mo i lusum wok blong hem long kongregesen. Hem i talem se: “Kam kasem taem ya, mi mi ful spid long wok blong Jehova. Be wantaem nomo, mi harem olsem se mi bangem wan stonwol. Mi no gat tingting ya se Jehova i lego mi, be mi stap tingbaot sipos mi save frengud wetem hem bakegen olsem fastaem, mo sipos mi save mekem wok long kongregesen bakegen.”
18 I gud tumas se Michael i no givap. Hem i talem se: “Oltaem mi prea long Jehova, mi stadi mo mi tingting dip, blong traehad blong frengud wetem hem bakegen.” Biaen, Michael i kasembak wok blong hem long kongregesen. Naoia hem i wan elda mo wan fultaem paenia. Hem i talem se: “Ol tok we mi kasem blong leftemap tingting mo sapotem mi, speseli help blong ol elda, i givhan long mi blong luksave se Jehova i lavem mi yet. Naoia mi save mekem wok long kongregesen bakegen we tingting blong mi i no stikim mi. Samting ya i tijim mi se Jehova i save fogivim eni man we i rili tanem tingting blong hem.” Nating se yumi mekem mastik, be yumi save bilif strong se Jehova bambae i gohed blong yusum mo blesem yumi, sipos yumi stretem ol rong blong yumi mo dipen long hem.—Sam 86:5; Prov. 28:13.
Yu Save Kasem Ol Mak Blong Yu
2 Sipos yu jes putum wan mak we yu no kasem yet, plis yu no letem tingting blong yu i foldaon. Samtaem, blong kasem wan smol mak we yumi putum, hemia tu i nidim taem mo traehad. Taem yu stap traehad blong kasem mak blong yu, hemia i soemaot se yu tinghae long frensip blong yu wetem Jehova, mo yu wantem mekem bes blong yu long wok blong hem. Jehova i tinghae long traehad blong yu, mo hem i no ekspektem blong yu mekem moa long wanem yu no naf blong mekem. (Sam 103:14; Maeka 6:8) Taem yu putum wan mak, meksua se yu save kasem. Afta we yu putum wan mak, ?yu save mekem wanem blong kasem? Bambae yumi luk sam samting we i save givhan long yumi.
Ol Gudgudfala Samting
cl 55 ¶18
Bigfala Paoa Blong “Man We i Mekem Heven Mo Wol”
18 ?Yumi lanem wanem long paoa blong Jehova blong wokem ol samting? Yumi sapraes tumas long ol defdefren samting we hem i krietem. Wan man blong raetem sam i talem se: “!O Jehova, ol wok blong yu oli plante we plante! . . . Wol ya i fulap gud long ol samting we yu mekem.” (Ol Sam 104:24) !Hemia i tru! Ol saentis oli faenemaot se i gat bitim wan milian defren kaen laef samting long wol, be oli ting se i gat plante milian moa laef samting i stap we oli no faenemaot yet. Wan man blong pentem ol pija, maet samtaem ol penting blong hem oli kam drae. Be long saed Jehova, paoa blong hem blong disaenem, mo krietem ol defdefren samting ya i nambawan tumas.