God i Wokem Fas Man Mo Woman

Jehova i wokem wan garen long ples ya Iden. I gat fulap flaoa, tri, mo anamol long garen ya. Biaen, God i wokem fas man, Adam, long graon, mo i blu long nus blong hem. ?Yu save wanem i hapen? !Adam i laef! Nao Jehova i talem long Adam se, hem i mas lukaot long garen ya, mo i mas putum nem blong ol anamol.

Jehova i putum wan impoten loa we Adam i mas folem, i se: ‘Yu save kakae olgeta frut long garen, be i gat wan tri nomo we i tabu. Sipos yu kakae frut blong tri ya, bae yu ded.’

Biaen, Jehova i talem se: ‘Bae mi mekem wan fren blong Adam, we bae i givhan long hem.’ Ale, hem i mekem Adam i slip ded, nao i tekemaot wan rib blong Adam mo i wokem wan woman long hem. Nem blong woman ya se Iv. Tufala i kam hasban mo waef, hemia fas famle long wol. ?Wanem tingting blong Adam taem hem i luk woman blong hem? Adam i glad we i glad, mo i talem se: ‘!Man, Jehova i yusum wan rib nomo blong mekem wan we i olsem mi! !Hemia prapa fren blong mi!’

Jehova i talem long Adam mo Iv se tufala i mas gat plante pikinini, blong oli go stap long olgeta ples long wol. Hem i wantem se tufala i harem gud blong wok tugeta, mo mekem fulwol i kam paradaes olsem garen blong Iden. Be tufala i no mekem olsem. ?From wanem? Bambae yumi luk long nekis stori.