Kwestin

?Prija 5:8 i stap tokbaot ol rula blong man, o Jehova?

Vas ya i talem se: “Sipos yu luk eni haeman i stap mekem i strong long ol puaman mo i go agensem jastis mo stret fasin long provins blong yu, yu no mas sapraes long samting ya. From wan man we i hae moa long haeman ya i stap wajem hem, mo i gat ol narafala man tu we oli hae moa long olgeta.”—Pri. 5:8, NW.

Long lukluk blong man, vas ya i tokbaot klia ol man blong gavman we oli gat paoa. Be sipos yumi lukluk i go moa, i gat wan trutok tu long vas ya long saed blong Jehova, we i mas leftemap tingting blong yumi mo i mekem yumi harem gud.

Prija 5:8 i tokbaot wan rula we i mekem i strong long ol puaman, mo i go agensem jastis. Be rula ya i mas tingbaot se i gat wan man blong gavman we i hae moa long hem, mo i stap wajem hem. Blong talem stret, maet i gat sam narafala haeman we oli gat posisen we i hae moa. Be sore tumas, long gavman blong man, i gat korapsen long rul blong olgeta, mo ol man we oli stap aninit long paoa blong olgeta oli mas safa plante from.

Nating se ol samting ya oli mekem yumi harem nogud, yumi glad blong save se Jehova tu i ‘stap wajem ol haeman ya’ blong gavman. Yumi save askem long God blong i halpem yumi, mo yumi sakem ol hevi baden blong yumi i go long hem. (Sam 55:22; Fil. 4:6, 7) Yumi save se “ae blong Jehova i stap lukluk raon long olgeta ples long wol, blong hem i save soemaot paoa blong hem blong givhan long olgeta we hat blong olgeta i stap fulwan long hem.”—2 Kron. 16:9, NW.

From samting ya, Prija 5:8 i mekem yumi tingbaot stret situesen blong ol man blong gavman, hemia se oltaem i gat wan man we posisen blong hem i hae moa long ol narawan. Be samting we i moa impoten, vas ya i halpem yumi blong tingbaot se Jehova nao i hae moa, yes, hem i Rula We i Hae Olgeta. Mo naoia hem i stap rul tru long Pikinini blong hem Jisas Kraes, we i King blong Kingdom. God Ya We i Gat Olgeta Paoa, we i stap wajem evri samting, fasin blong hem i gud olgeta mo i mekem i stret long olgeta man, mo Pikinini blong hem tu i sem mak.