Ol man Isrel oli lego Jehova bakegen, mo oli wosipim ol giaman god. Be ol giaman god ya oli no givhan long olgeta nating, taem ol man Amon oli kam faet agens long olgeta. Ol man Isrel oli harem nogud blong plante yia, nao oli talem long Jehova se: ‘Mifala i mekem sin agensem yu. Be plis, yu sevem mifala long ol enemi blong mifala.’ Nao oli spolem ol aedol blong olgeta, mo oli wosipim Jehova bakegen. Jehova i no wantem se oli harem nogud.

Ale, hem i singaot wan strong man blong faet we nem blong hem Jeftaha, blong i lidim ol ami oli go faet agens long ol man Amon. Jeftaha i talem long Jehova se: ‘Sipos yu mekem we mi winim faet ya, mi promes se taem mi kambak, fas man we i kamaot long haos blong mitim mi, bae mi givim hem i go long yu.’ Jehova i lesin long prea blong Jeftaha, mo i givhan long hem blong i winim faet ya.

Taem Jeftaha i kambak, fas man we i kamaot long haos blong mitim hem, hemia gel blong hem, wan pikinini nomo we hem i gat. Gel ya i stap plei tamborin mo i danis. ?Jeftaha i mekem wanem? Hem i tingbaot promes we hem i mekem, nao i talem se: ‘!O no, gel blong mi, yu brekem hat blong mi! Mi mekem wan promes long Jehova finis. Mi no save brekem promes ya, mi mas sanem yu yu go wok long tabenakel long Silo.’ Gel blong hem i talem se: ‘Papa, sipos yu mekem promes ya finis long Jehova, yu mas holem. Be fastaem, mi wantem go stap tu manis antap long ol hil wetem ol gel we oli fren blong mi. Afta, bae mi go long Silo.’ Gel blong Jeftaha i wok ful laef blong hem long haos tabenakel. Evri yia, ol fren blong hem oli kam luk hem.

Hae Pris Ilae i gat tu boe, Hofni mo Finehas. Tufala i mekem wok blong pris long tabenakel. Be tufala i no obei long ol loa blong Jehova, mo tufala i stap mekem i no stret long ol man Isrel. Taem ol man oli karem anamol blong mekem sakrefaes long Jehova, tufala i karem mit we i beswan, i blong tufala nomo. Ilae i save samting ya, be hem i no stretem tufala. ?Olsem wanem? ?Jehova i letem tufala i gohed blong mekem ol fasin ya we oli no stret?

Samuel i yang moa long Hofni mo Finehas, be hem i no folem fasin blong tufala. Jehova i glad tumas long Samuel. Wan naet, taem Samuel i stap slip, hem i harem wan voes we i singaot hem. Hem i girap, i ron i go long Ilae, mo i talem se: “?Yu yu singaot mi? Mi hemia.” Be Ilae i talem se: ‘Mi no singaot yu. Yu go slip.’ Ale Samuel i go slip bakegen. I no longtaem, hem i harem voes ya bakegen. Samting ya i hapen tri taem, nao Ilae i kasem save se Jehova i stap singaot Samuel. Ale, hem i talem long Samuel se: ‘Taem yu harem voes ya bakegen, yu talem se, “Jehova, yu toktok. Mi mi man blong wok blong yu, mi stap lesin.”’

Samuel i go slip bakegen. I no longtaem, hem i harem voes ya i singaot hem se: “!Samuel, Samuel!” Hem i ansa se: ‘Jehova, yu toktok. Mi mi man blong wok blong yu, mi stap lesin.’ Nao Jehova i talem se: ‘Yu talem long Ilae se mi bae mi panisim hem mo famle blong hem. Hem i save se tufala boe blong hem i stap mekem ol nogud fasin long haos blong mi, be hem i no stretem tufala.’ Long nekis moning, Samuel i openem ol doa blong tabenakel, olsem hem i stap mekem oltaem. Hem i fraet blong talem ol tok blong Jehova long hae pris. Be Ilae i singaot hem i kam, mo i askem se: ‘Boe blong mi, ?Jehova i talem wanem long yu? Yu no haedem wan samting.’ Ale, Samuel i talemaot evri samting long Ilae.

Taem Samuel i stap kam bigwan, oltaem Jehova i stap wetem hem. Ol man Isrel long olgeta ples long kantri, oli save se Jehova i jusumaot Samuel blong i kam profet mo jaj.