?I Stret We Jos i Joen Long Politik?

Long ol defren ples long wol, plante man we oli talem se oli stap folem Jisas Kraes, oli joen fulwan long politik. Sam man we oli strong long jos blong olgeta mo oli tinghae long sam fasin, oli sapotem wan lida o wan pati blong politik we i leftemap ol bilif mo fasin ya. Mo plante man blong politik oli yusum ol defdefren problem long saed blong fasin o situesen blong ol man, blong pulum ol jos blong sapotem olgeta. Plante lida blong jos oli kam kandidet long eleksen blong traem kasem wan posisen long gavman. Mo long sam kantri, jos we i talem se i “Kristin” i gat wan hae posisen, olsem jos blong stet o kantri.

?Wanem tingting blong yu? ?I stret we ol man blong folem Jisas Kraes oli joen long politik? Sipos yu luk eksampol blong Jisas, yu save faenem ansa blong kwestin ya. Jisas i talem se: “Mi mi soemaot eksampol long yufala. Samting we mi mekem long yufala, yufala tu i mas mekem.” (Jon 13:15) Long saed blong politik, ?Jisas i soemaot wanem eksampol?

?Jisas i joen long politik?

Nogat. Jisas i no joen nating long politik.

Jisas i no wantem kam wan lida blong politik. Jisas i no wantem kam wan lida blong gavman long taem blong hem, taswe taem Devel Setan i wantem givim “olgeta kingdom blong wol” long Jisas, hem i no wantem. (Matiu 4:8-10)a Long wan narafala taem, samfala oli luksave se Jisas i gat ol fasin we oli stret long wan gudfala lida, ale oli traem fosem hem blong joen long politik. Baebol i talem se: “Jisas i save we olgeta oli wantem fosem hem mo mekem hem i kam king, nao hem i aot long olgeta, i go hem wan antap long bigfala hil.” (Jon 6:15) Jisas i no letem ol man oli fosem hem blong mekem samting we hem i no wantem. Hem i no joen nating long politik.

Jisas i no tekem saed blong wan pati long ol problem. Eksampol: Long taem blong Jisas, ol man Jiu oli kros from we oli mas pem takis long gavman blong Rom. Oli ting se hemia wan bigfala baden mo i no stret. Oli traem pulum Jisas blong tekem saed blong olgeta long rao ya blong politik. Be hem i no wantem, hem i talem long olgeta se: “Ol samting we oli blong Sisa, yufala i givimbak long Sisa, mo ol samting we oli blong God, yufala i givimbak long God.” (Mak 12:13-17) Hem i no joen nating long rao ya, be hem i soemaot se sipos gavman blong Rom we i representem Sisa, i askem takis, i stret blong oli pem. Be long semtaem, hem i soemaot se i no evri samting we gavman i askem we oli save obei long hem. Oli no mas givim long gavman samting we i blong God, olsem wosip mo ona.—Matiu 4:10; 22:37, 38.

Jisas i sapotem wan gavman long heven, Kingdom blong God, mo i tijim ol man long saed ya. (Luk 4:43) Jisas i no joen long politik from we hem i save se Kingdom blong God nomo bambae i mekem samting we God i wantem i kamaot long wol, be i no ol gavman blong man. (Matiu 6:10) Hem i kasem save se Kingdom blong God bambae i no yusum ol gavman blong man, be bambae i tekem ples blong olgeta.—Daniel 2:44.

?Ol fas Kristin oli joen long politik?

Nogat. Ol man we oli folem Jisas oli obei long tok blong hem se oli “no [man] blong wol ya.” (Jon 15:19) Oli folem eksampol blong Jisas mo oli stap longwe long politik. (Jon 17:16; 18:36) Oli mekem wok we Jisas i talem long olgeta blong mekem blong prij mo tijim ol man long Kingdom blong God, i bitim we oli joen long eni samting long saed blong politik.—Matiu 28:18-20; Ol Wok 10:42.

Ol fas Kristin oli obei fastaem long God, be oli save se oli mas respektem ol haeman blong gavman tu. (Ol Wok 5:29; 1 Pita 2:13, 17) Oli obei long loa mo oli pem takis. (Rom 13:1, 7) Oli no joen long politik, be oli akseptem help we loa i givim, mo ol nara samting we gavman i givim blong protektem ol sitisen blong kantri.—Ol Wok 25:10, 11; Filipae 1:7.

Ol fas Kristin mo politik—samting we histri i soemaot

“Ol Kristin oli no mekem sam samting we ol nara man Rom oli mekem. . . . Oli no tekem wan posisen long gavman.”—On the Road to Civilization—A World History, pej 238.
“I no gat wan samting blong givim tingting long yumi se Jisas i joen long politik o long ami, mo . . . i sem mak long ol disaepol blong hem.”—Jesus and Judaism, pej 231.
“Long tingting blong ol Kristin, jos i defren olgeta long politik, mo jos i moa impoten. Oli obei fastaem long Kraes, i no long Sisa.”—Caesar and Christ, pej 647.
“[Aposol] Pol i wan sitisen blong Rom, mo hem i talemaot samting ya blong kasem help we gavman blong Rom i givim long ol sitisen blong protektem olgeta. Be Pol i no sapotem wan pati blong politik taem i gat wan problem, mo i no traem pulum ol narafala tu blong oli mekem olsem. . . . Ol fas Kristin oli bilif se oli mas respektem ol haeman blong gavman, be oli no bilif se oli mas joen long ol rao blong politik.”—Beyond Good Intentions—A Biblical View of Politics, pej 122-123.
“Ol Kristin long evri ples oli bilif se oli no mas holem wan posisen long politik. . . . Jes afta long 200 K.T., Hippolytus i talem se sipos wan jaj long kot i wantem kam wan Kristin, hem i mas lego posisen ya.”—A History of Christianity, Volium 1, pej 253.

Ol tru Kristin tede oli no joen long politik

Baebol i soemaot klia se Jisas mo ol man we oli folem hem oli no joen nating long politik. From samting ya, ol Witnes blong Jehova long fulwol, oli folem Kristin fasin ya blong no joen long politik. Olsem ol Kristin bifo, oli mekem wok ya we Jisas i talem long olgeta blong mekem, hemia blong talemaot ‘gud nius blong Kingdom.’—Matiu 24:14.

a Taem Jisas i tok long Setan, hem i no rao long hem se i no gat paoa blong givim olgeta kingdom blong wol long hem. Long wan narafala taem, hem i talem se Setan i “rula blong wol ya.”—Jon 14:30