Boefren Mo Gelfren—Pat 1: ?Mi Mi Rere Blong Fren?

Long atikol ya

• ?I minim wanem se yu frenem narafala?

• ?Yu yu rere blong fren?

?I minim wanem se yu frenem narafala?

Sam man oli wantem gat wan boefren o gelfren jes blong harem gud nomo. Be long atikol ya, “frenem narafala” i minim se wan boe mo wan gel i spenem taem tugeta blong luk sipos i stret we tufala i mared. Taswe, i mas gat wan risen from wanem yu wantem frenem narafala, i no jes blong harem gud nomo long kampani blong hem.

Afta we yutufala i fren blong sam taem, bambae yutufala i mas mekem wan desisen, hemia se bambae yutufala i mared o stop blong fren. Taswe sipos yu frenem narafala, yu mas rerem tingting blong yu from ol samting we i save hapen.

Samting we i impoten: Sipos yu rere blong fren, i minim se yu rere tu blong mared.

?Yu yu rere blong fren?

Taem yu fren, i minim se maet bambae yu mared. Taswe i gud yu tingbaot sipos yu gat ol gudfala fasin we bambae i givhan long mared blong yu. Eksampol, tingbaot ol fasin ya:

• Fasin blong yu insaed long famle. Fasin we yu stap mekem long papa mama mo ol brata sista blong yu, speseli taem yu stres, i soemaot fasin we bambae yu mekem long hasban o waef blong yu.

  Advaes blong Baebol: “Yufala i mas tekemaot olgeta nogud filing long hat blong yufala, wetem fasin blong kros, boel long kros, singaot bigwan, mo ol rabis tok, wetem evri samting we i blong spolem narafala.”—Efesas 4:31.

  Askem se: ‘?Papa mama mo ol brata mo sista blong mi, oli stap talem se mi mi soemaot respek long olgeta? Taem mi no agri wetem olgeta, ?mi mi stap toktok gud wetem olgeta o mi kros kwik mo rao wetem olgeta?’

  

• Rere blong lego samting we yu wantem. Taem yu mared, bambae yu mas tingbaot samting we hasban o waef blong yu i wantem, mo plante taem bambae yu mas rere blong lego samting we yu nomo yu wantem.

  Advaes blong Baebol: “I nogud man i stap lukaot rod we i save givhan long hem nomo. Hem i mas lukaot rod blong givhan long ol narafala man.”—1 Korin 10:24.

  Askem se: ‘?Mi mi wantem se narafala i folem tingting blong mi nomo? ?Ol narafala oli luk se mi mi kaen? ?Mi mi soemaot finis se mi stap tingbaot ol narafala fastaem, be i no mi wan nomo?’

• Gat tingting daon. Wan gudfala hasban o waef i no fraet blong talemaot ol mastik blong hem mo i rere blong talem sore.

  Advaes blong Baebol: “Yumi evriwan i mekem mastik plante taem.”—Jemes 3:2, futnot.

  Askem se: ‘?Mi mi no fraet blong talemaot ol mastik blong mi o mi stap mekem eskius from? ?Mi mi harem nogud o mi kros taem narafala i givim advaes long mi?’

• Yusum gud mane. Plante hasban mo waef oli raorao long saed blong mane. Taswe sipos yu save yusum gud mane, hemia bambae i blokem plante raorao insaed long mared.

  Advaes blong Baebol: “?Hu long yufala we i wantem wokem wan taoa, be i no sidaon fastaem blong kaontem praes blong ol samting we hem i nidim, blong luk sipos mane blong hem i naf?”—Luk 14:28.

  Askem se: ‘?Mi mi naf blong kontrolem fasin blong mi blong spenem mane o mi stap mekem tumas kaon? ?Mi mi soemaot finis se mi save yusum mane long fasin we i waes?’

• Gat wan gudfala program blong wosip. Sipos yu wan Witnes blong Jehova, yu mas gat wan gudfala program blong stadi Baebol mo go long ol miting oltaem.

  Advaes blong Baebol: “Olgeta we oli haremsave se oli nidim God long laef blong olgeta, oli glad.”—Matiu 5:3.

  Askem se: ‘?Mi mi stap traehad blong mekem bilif blong mi i strong? ?Mi mi stap putum program blong mi blong wosip long fasples, o mi stap letem ol narafala samting oli pulum tingting blong mi?’

Samting we i impoten: Man o woman we bambae yu mared long hem i wantem blong gat wan gudfala hasban o waef. Sipos yu traehad blong gat ol gudfala fasin, hemia bambae i pulum narafala we hem tu i gat ol gudfala fasin ya, blong i laekem yu.