Ol Man Blong Ridim Wekap! Oli Talem

Tingting i Foldaon Tangkiu tumas long stori ya “Ol Yangfala Oli Askem . . . ?Bambae Mi Talemaot Se Tingting Blong Mi i Foldaon?” (Eprel-Jun, 2001) Stori ya i kamaot long wan taem we tingting blong mi i foldaon bigwan, mo mi no save wanem blong mekem. Taem mi ridim stori ya mi save se i gat sam narafala we oli kasem save long filing blong mi. Mi toktok wetem papa mama blong mi, mo wetem bes fren blong mi, be mi toktok moa long Jeova. Hem i givhan bigwan long mi. Mi neva wantem lusum gudfala fasin fren we mi mi gat wetem Jeova.

A. P., Jemani

Tingting Dip Mi mi wantem talem tangkiu from haf ya “Baebol i Talem Wanem: Fasin Blong Tingting Dip We i Save Givhan Long Yumi.” (Eprel-Jun, 2001) Naoia mi kasem save se tingting dip i no minim se yumi drim. Mi traehad blong folem Filipae 4:8, mo naoia mi save stret rod blong tingting dip long ol trabol blong mi. !Tangkiu tumas!

W. P., Polan

Laef Stori Stori blong Alexei Davidjuk, “Bigfala Tingting Blong Mi i Blong—Stap Tru Long God” (Jenuware-Maj, 2001), i leftemap tingting blong mi bigwan. Alexei i eksplenem se wan brata we hem i bin trastem blong plante yia i putum sam Kristin brata long han blong ol enemi blong olgeta. Sem samting i hapen long mi plante yia bifo, taem gavman i putum tabu long Kristin wok blong mifala. Tu “elda” oli givim save long saed blong wok blong mifala i go long ol polis we oli wok long fasin haed. From samting ya, ol polis oli holem mifala mo askem plante kwestin. Wan long ol giaman brata ya i ded finis. Narawan, kongregesen i sakemaot hem. Be, i no longtaem i pas, hem i kambak insaed long kongregesen. Mi mi glad se naoia mi save toktok wetem brata ya we mi no moa harem se mi kros long hem. Samting ya, tabu spirit blong Jeova nomo i save mekem.

D. G., Jemani

Trabol Blong Pikinini Stori ya “!Trabol We i Stap Kasem Ol Pikinini—!Rod Blong Stretem!” (Eprel-Jun, 2001) i rili tajem hat blong mi. Mi harem nogud blong tingting bak long taem ya we mi mi pikinini nomo. Mama blong mi i dring bitim mak mo klosap evri dei hem i kilim mi. Taem ol yia oli pas, tingting blong mi i foldaon, mo plante taem mi wantem ded nomo. Stori ya i mekem mi mi tingbaot olsem wanem i impoten tumas we papa mama tufala i frengud wetem ol pikinini blong tufala. Naoia we mi mi harem save lav blong Jeova, mi mi stap traehad blong kasem save long mama blong mi. Hem i gat sem kaen laef taem hem i pikinini.

U. P., Ripablik blong Koria

Mi mi wan tija, mi blong Ajentina. Mi ting se i gud tumas sipos ol papa mama mo ol tija oli folem advaes long stori ya, mo long Baebol, we yufala i tokbaot plante.

F. S., Spen

Edukesen Mi mi raetem leta ya blong talem tangkiu from stori ya “Edukesen We i Mekem Laef i Moa Gud.” (Julae-Septemba, 2001) Hem i rili soemaot olsem wanem Jeova i stap yusum kampani blong ol man blong hem blong traem faenem ol man we hat blong olgeta i stret. Taem mi ridim olsem wanem ol niuspepa mo televisin oli tokbaot Wekap! taem i jes kamaot long lanwis blong Samoa, samting ya i tajem hat blong mi. I soemaot olsem wanem tok blong Ol Wok 1:8 i stap kamtru, taem i talem se: “Bambae yufala i mas go talemaot mi . . . gogo yufala i finisim olgeta ples long wol.”

J. D., Amerika

Laef Stori Tangkiu long stori ya “Gudfala Fiuja We i Stap Givim Paoa Long Mi.” (Julae-Septemba, 2001) Mi mi no laekem nating papa blong mi from we stat taem mi mi pikinini nomo, mi luk we hem i stap kilim nogud mama blong mi. Long tingting blong mi, mi save se i no stret blong agensem hem olsem, be i had blong mi winim ol filing blong mi. Stori blong Tatjana Vileyska i soemaot olsem wanem hem i winim fasin ya blong no laekem nating man ya we i kilim mama blong hem i ded. Bambae mi mi traem folem fasin blong hem.

A. K., Japan

Taem mi ridim stori blong Tatjana, we papa mama blong hem i lus, mi mi krae. Ol stori olsem oli mekem mi mi tingbaot se plante man long wol oli stap kasem ol bigfala trabol, be oli stap winim mo faenem glad long laef yet.

J. R., Amerika

Mi jes finisim nambawan stori blong Tatjana Vileyska. Bambae mi no save fogetem stori ya. Bifo we hem i lanem trutok blong Baebol, hem i kasem ol bigbigfala trabol ya. Be hem i laef tru long ol samting ya mo hem i save laf yet. Hemia i olsem wan merikel we bilif nomo i mekem i kamaot.

S. S., Amerika