Dei We Tufala Taoa i Foldaon

PLANTE milian man long wol, no maet bilian man, oli neva save fogetem ol samting we i hapen long Septemba 11, 2001, long New York, long Washington, D.C., mo long Pennsylvania. ?Yu yu stap wea taem yu lukluk no yu harem nius ya se tu plen oli smasem Wol Tred Senta long New York mo narawan we i foldaon long Pentagon long Washington?

Samting ya we i spolem wantaem nomo bigfala ples ya mo plante laef tu, i mekem ol man oli stop smol blong tingting.

?Trabol ya i lanem yumi se wanem samting nao i moa impoten long laef blong yumi? ?Mo yumi lanem wanem long saed blong ol samting we yumi jusum long laef? ?Olsem wanem bigfala trabol ya i pulum ol man blong soemaot ol gudfala fasin, olsem fasin blong lego samting we olgeta nomo oli wantem, fasin sore, fasin blong gohed strong longtaem, mo fasin blong tingbaot narafala fastaem? Stori ya mo hemia we i kam biaen, bambae oli traem blong ansarem laswan kwestin ya.

Stori Blong Samfala We Oli Laef

Taem bigfala trabol ya i kamaot long New York, wantaem nomo oli stopem ol tren we oli stap ron aninit long graon. Plante taosen man oli wokbaot nomo blong aot long ples ya Manhattan. Plante oli krosem tufala brij ya, Brooklyn mo Manhattan. Oli luk klia ol ofis mo faktri we oli hedkwota blong ol Witnes blong Jeova long ful wol. Samfala we oli stap ronwe long trabol ya, oli kam stret long hedkwota ya.

Alisha (raetsaed), we mama blong hem i wan Witnes, i wan long ol faswan blong kamtru long hedkwota. Smok mo asis oli kavremap ful bodi blong hem.a Hem i eksplenem se: “Taem mi stap ron long tren blong go long wok, mi luk we smok i stap kamaot long Wol Tred Senta. Taem mi kasem ples ya, mi luk we glas i brobrok olbaot long graon. Mo mi harem hot blong faea we i stap kamaot long ol haos. Ol man oli stap ronron olbaot, mo ol polis oli stap talem long ol man blong aot long eria ya. I luk olsem we wan bigfala faet i bin brokaot long ples ya.

“Mi ron i go haed long wan haos klosap. Nao mi harem wan bigfala noes, hemia seken plen we i bosta taem i sperem taoa we i stap long saot. I had blong faenem ol stret toktok blong eksplenem samting we mi luk. I gat blak smok i stap olbaot long evri ples. Oli talem long mifala blong go longwe long ples ya we i denja tumas. Oli putum mi long wan bot we i krosem Is Reva i go long Brooklyn. Taem mi kasem narasaed reva ya, mi lukluk i go antap, nao mi luk wan bigfala saen, ‘WATCHTOWER.’ !Hemia hedkwota blong skul blong mama blong mi! Wantaem nomo, mi go long ol ofis ya. Mi save se hemia beswan ples we mi save stap long hem. Ale, long ples ya mi save swim, mo telefon long papa mama blong mi.”

Wendell (raetsaed) i wok long Hotel Marriott we i stap long medel blong tufala taoa ya. Wok blong hem i blong stanap long doa mo openem doa blong ol man we oli go insaed. Hem i eksplenem se: “Mi stap stanap klosap long doa taem faswan taoa i bosta. Mi luk ol doti oli stap folfoldaon raonabaot. Taem mi lukluk i go long narasaed rod, mi luk wan man i stap slip long graon, we faea i laet long hem. Mi tekemaot kot mo sot blong mi, mi resis i go long hem blong traem kilim faea. Wan narafala man we i stap pas i givhan long mi. Evri klos blong man ya we faea i kakae hem, oli bon finis, stoken mo sus blong hem nomo i stap. Ol man blong kilim faea oli kam mo oli karem hem i go long wan dokta.

“Smoltaem biaen, Bryant Gumbel we i wok long CBS nius long televisin, i toktok i kam long telefon. Hem i wantem se wan man i givim ripot blong ol samting we hem i luk wetem prapa ae blong hem. Famle blong mi long Vijin Aelan oli harem nius ya long televisin. From samting ya, oli save se mi mi laef i stap.”

Donald, wan saes man we i longfala olsem 195 sentimeta, i wok long Wol Faenansol Senta. Ofis ya i stap long namba 31 stori blong haos ya, i lukluk i go stret long tufala taoa ya mo Hotel Marriott. Donald i talem se: “Samting we mi luk i mekem mi mi sek nogud, mo tingting blong mi i fasfas. Ol man oli stap folfoldaon mo jamaot long ol windo blong taoa we i stap long not. Mi lusum hed, mi fraet mo mi resis i goaot long bilding ya long ful spid.”

Wan narafala stori i kam long wan mama we i gat bitim 60 yia mo tufala gel blong hem we tufala i gat bitim 40 yia. Mama, nem blong hem Janice, mo tufala gel blong hem, Ruth mo Joni. Trifala i stap slip long wan hotel klosap long tufala taoa ya. Ruth we hem i wan nes, i storian se: “Mi mi stap swim. Wantaem nomo, mi harem voes blong mama mo sista blong mi, tufala i stap singaot strong long mi blong kamaot. Mitrifala i stap long namba 16 stori blong hotel ya. Tufala i stap luk ol doti i stap flae long win, i pas long windo blong mifala. Mama blong mi i luk bodi blong wan man i flae i go antap long ruf blong wan haos klosap, olsem we wan samting i sakem hem i go long ples ya.

“Mi jenis hareap, mo mitrifala i stat godaon long lada. Fulap man oli stap singaot mo krae. Mitrifala i kasem big rod. I gat ol bigfala noes blong ol samting we oli bosta mo faea i stap kamaot olbaot. Oli talem long mifala blong resis i go long saot, go kasem Battery Pak. Long ples ya, bot i aot blong go long Staten Aelan. Taem mifala i stap resis i go, mitufala i lusum Mama long rod. Mitufala i wari from we hem i stap kasem sot win. ?Olsem wanem hem i save stap laef wetem fulap smok, asis mo graon we i stap olbaot long win? Mitufala i pasem haf aoa blong lukaotem hem, be mitufala i no faenem hem. Be, mitufala i no wari bitim mak from we Mama i wan woman we tingting blong hem i strong mo hem i naf blong faenem rod blong hem.

“Biaen, oli talem long mifala blong wokbaot i go long Brooklyn Brij, mo krosem i go long narasaed. !Mitufala i harem gud bigwan taem mitufala i krosem brij ya nao mitufala i luk bigfala saen ya ‘WATCHTOWER’! Mitufala i save se bambae mitufala i sef long ples ya.

“Long hedkwota ya, oli welkamem mitufala mo givim wan ples blong slip. Oli givim klos tu, from we mitufala i no gat wan samting nating. ?Be Mama i stap wea? Mitufala i spenem ful naet blong asaskem hem long ol hospital, be mitufala i no faenem hem. Long nekis moning, long haf pas leven, mitufala i kasem wan mesej. !Mama i jes kamtru long ples ya we mitufala i stap long hem! ?Wanem i bin hapen long hem?”

Janice we i mama blong tufala ya i gohed long storian ya, i se: “Taem mitrifala i spid i kamaot long hotel, mi stap tingbaot wan olfala fren blong mi, we i no strong naf blong ronwe wetem mitrifala. Mi mi wantem gobak blong karemaot hem. Be i gat tumas denja. Long taem ya nao, mi lusum tufala gel blong mi. Be mi no wari tumas, from we mi save se tufala i naf blong tingting gud, mo tu, Ruth i wan nes.

“Mi lukluk raon long mi. Olgeta man oli nidim help, antap moa ol pikinini mo bebi. Mi givhan long plante olsem we mi naf blong mekem. Mi go long ples we oli stap karem ol sikman oli kam long hem, mo we oli stap givim meresin long olgeta stret long ol kil we oli kasem. Mi givhan blong wasem fes mo han blong ol polis mo ol man blong kilim faea. Blak asis mo graon i fasgud long skin blong olgeta. Mi mi stap long ples ya go kasem tri klok long moning. Biaen, mi jam long laswan bot we i go long Staten Aelan. Mi tingting se maet tufala gel blong mi oli bin ronwe i go long ples ya. Be mi no faenem tufala.

“Long moning, mi traem blong jam long faswan bot we i gobak long Manhattan, be oli no letem mi from we mi mi no stap gobak blong wok long ples we disasta i bin kamaot long hem. Mi luk wan polis we mi bin halpem hem. Mi singaot long hem se: ‘!Ei, John! Mi mi mas faenem rod blong gobak long Manhattan.’ Hem i ansa se: ‘Ale, yu folem mi.’

“Taem mi kasem Manhattan, mi gobak long Hotel Marriott. Maet olfala fren blong mi i stap yet. !Nogat! Hotel ya i brobrok evriwan. Taon i kwaet we i kwaet, i no gat man nating long hem. Olgeta we oli stap, hemia ol polis nomo wetem ol man blong kilim faea we oli taed gud. Fes blong olgeta ya i soemaot se oli fesem wan bigfala trabol bitim mak.

“Mi wokbaot i go long Brooklyn Brij. Taem mi stap krosem brij ya, mi luk wan saen we mi save gud, hemia ‘WATCHTOWER.’ Maet tufala gel blong mi oli stap long ples ya. Yes i tru, tufala i stap. Tufala i kamdaon long doa blong stori haos ya blong mitim mi. !Mitrifala i holholem mitrifala mo mitrifala i krae tugeta!

“Mi mi sapraes tumas we sotwin i no mekem mi nating long taem ya, nating se win i fulap long smok, asis mo graon. Mi gohed blong prea, from we mi wantem givhan long ol narafala, mi no wantem kam wan baden blong narafala.”

“!I No Gat Ples We Plen Ya i Save Foldaon!”

Rachel we i jes ova 20 yia, i talem long wan man blong raetem Wekap! se: “Mi stap wokbaot long rod klosap long haos blong mi long Manhattan, nao mi harem noes blong wan plen antap. Noes ya i bigwan tumas, i pulum mi blong lukluk i go antap. Mi no save bilivim samting we mi luk. Wan bigfala jet plen i stap kam daon. Mi no kasem save from wanem hem i stap flae i kam daon olsem, mo from wanem hem i spid bitim mak. !I no gat ples we plen ya i save foldaon long hem! Maet paelot i no moa save holem plen ya. Nao mi harem wan woman i stap krae bigwan i stap singaot se: ‘!Plen ya i jes sperem stori haos ya!’ Bigfala faea i kamaot long taoa blong not. Mi luk wan bigbigfala blak hol long taoa ya.

“Mi neva luk wan samting olsem long laef blong mi. I nogud tumas. I olsem se mi stap drim. Mi stanap i stap, maot blong mi i open. Smoltaem biaen, wan narafala plen i sperem seken taoa. Afta we smoltaem i pas bakegen, tufala taoa ya evriwan oli foldaon. Mi stat krae mo mi singaot krangke. !Samting we mi luk i winim tingting mo filing blong mi!”

“Sipos Mi Mas Swim, Bambae Mi Swim”

Denise we i gat 16 yia, i jes kasem skul blong hem we i stap klosap long Stok Eksjenj Blong Amerika. Stat long ples ya, yu mas krosem tri big rod blong kasem Wol Tred Senta. “Hemia 9 klok long moning. Mi save se wan samting i bin hapen, be mi no save wanem samting. Mi stap long namba 11 stori blong skul ya, long wan klas blong histri. Olgeta studen oli fraet we oli fraet. Be tija i talem se bambae mifala i mas mekem eksam blong mifala. Mifala i wantem nomo blong aot mo gohom.

“Haos we mifala i stap long hem i seksek bakegen taem seken plen i smasem taoa blong saot. Be mifala i no save yet wanem i bin hapen. Wantaem nomo, mi harem wan voes i kamaot long radio blong tija, i se: ‘!Tu plen oli jes sperem tufala taoa!’ Tingting blong mi se: ‘Mifala i no moa save stap ya. Hemia ol teroris, mo bambae oli spolem Stok Eksjenj nekis wan.’ Ale mifala i ronwe.

“Mifala i resis i godaon long Battery Pak. Mi tanem mi blong lukluk i gobak long samting we i hapen. Mi luk we taoa blong saot i rere blong foldaon. Mi tingting se, sipos hem i foldaon mo i fas long ol narafala stori haos raonabaot bambae hem i save pulum olgeta tu oli foldaon. Mi hadwok blong pulum win, nus mo trot blong mi i fas from ol asis mo smok. Mi resis i go long Is Reva, mi stap tingting se: ‘Sipos mi mas swim, bambae mi swim.’ Taem mi stap ronwe, mi prea long Jeova blong i sevem mi.

“Biaen, oli putum mi long wan bot we i go long New Jersey. Mama blong mi i lukaotem mi blong faef aoa bifo we hem i faenem mi. !Be samting we i impoten hemia se mi stap sef!”

“?Hemia Laswan Dei Blong Laef Blong Mi?”

Joshua we i gat 28 yia blong hem i stap long Princeton, New Jersey. Hem i stap long namba 40 stori blong taoa blong not, i stap tijim wan klas. Hem i tingting bak i se: “Wantaem nomo mifala i harem olsem se wan bom i bosta. Haos i seksek, mo mi tingting se: ‘Hemia graon nomo we i stap seksek.’ Mi lukluk i go afsaed, mo mi no save bilivim samting we mi luk. I gat smok mo doti i stap flae olbaot, raon long stori haos ya we mifala i stap long hem. Mi talem long klas se: ‘Yufala evriwan i livim olting blong yufala. !Yumi go!’

“Mifala i resis i godaon long lada, we i stap kam fulap long smok, mo wota i stap sut i kamaot long ol paep. Be ol man oli no lusum hed. Mi stap prea se mifala i bin jusum stret lada mo se bambae mifala i no faenem wan bigfala faea we i blokem rod blong mifala.

“Taem mi stap resis i godaon long lada, mi tingting se: ‘?Hemia laswan dei blong laef blong mi?’ Mi gohed blong prea long Jeova, nao mi harem wan narakaen filing blong pis i kasem mi. Mi mi neva harem kaen pis ya long tingting blong mi bifo. Bambae mi neva fogetem samting ya.

“Taem mifala i kamaot long stori haos ya, polis i stap talem long ol man blong hareap blong go longwe. Mi lukluk i go antap, mo mi luk tu bigfala hol long tufala taoa. I olsem se i no tru, hemia i mas wan drim nomo.

“Nao mi harem wan samting we i mekem mi mi fraet bigwan. Ples i kwaet narakaen olsem we plante taosen man oli fraet blong pulum win. I luk olsem we taon blong New York i stop evriwan. Biaen, ol man oli singaot mo krae. !Taoa blong saot i stat foldaon! Wan bigfala klaod blong smok, asis, mo graon i stap kam from mifala. I luk olsem samting we ol man oli mekem taem oli wokem ol sinema. Be hemia i no wan sinema, hem i tru. Taem klaod ya i kasem mifala, klosap mifala i no moa save pulum win.

“Mi mi kasem Brij blong Manhattan, mi tanem mi long stret taem blong luk taoa blong not i foldaon kasem graon, wetem bigbigfala mas blong televisin we i stap antap long hem. Taem mi stap gokros long brij, mi gohed blong prea se bambae mi kasem Betel, hemia hedkwota blong ol Witnes blong Jeova. Mi mi glad tumas blong luk haos ya, i bitim ol narafala taem long laef blong mi. !Mi luk bigfala saen long fored blong haos ya, we plante taosen man oli stap luk evri dei: ‘Ridim Tabu Tok Blong God, Baebol, Evri Dei’! Tingting blong mi se, ‘!Klosap mi kasem ples ya nao! Mi mas gohed nomo.’

“Taem mi tingting bak, trabol ya i makem gud long mi se mi mas lukaot long wanem samting we mi stap putum long fasples long laef blong mi. Ol stret samting oli mas stap fastaem.”

“Mi Luk Ol Man Oli Stap Jamaot Long Taoa”

Jessica we i gat 22 yia blong hem, i kamaot long wan stesen blong tren we i ron aninit long graon, nao hem i lukluk ol samting we i stap hapen. Hem i se: “Mi lukluk i go antap, nao mi luk ol asis, doti, mo ol pis aean oli stap flae i kamdaon. Ol man we oli stap wet blong yusum ol pablik telefon oli stap singaot mo krae from we oli stap wet longtaem. Mi prea se tingting blong mi bambae i stap kwaet. Nao i gat wan narafala noes olsem bom we i bosta. Aean mo glas i stap folfoldaon olbaot. Mi harem samfala oli singaot se ‘!Hemia wan narafala plen!’

“Mi lukluk i go antap, samting we mi luk i nogud tumas. Ol man oli stap jamaot long tufala stori haos ya we smok mo faea i stap kamaot long tufala. Mi save luk samting ya yet long tingting blong mi. I gat wan man mo woman we tufala i hang afsaed long windo blong smol taem. Be tufala i no moa save holemtaet, ale tufala i lego, nao tufala i foldaon, foldaon, foldaon. Mi harem nogud bitim mak blong lukluk samting ya.

“Ale, mi kasem Brooklyn Brij. Mi tekemaot sus blong mi we oli stap kakae leg blong mi, mi spid i gokros long brij ya go kasem Brooklyn. Mi wokbaot i go long ofis blong Wajtaoa. Long ples ya, oli givhan long mi blong kwaetem tingting blong mi.

“Long semfala naet ya, taem mi kasem haos blong mi, mi ridim Wekap! blong Ogis 22, 2001 (Franis mo Inglis), we i tokbaot ‘Coping With Post-traumatic Stress’ (Winim Wari We i Kamaot Afta Long Wan Bigfala Trabol). !Mi mi nidim save ya tumas!”

Taem ol man oli luk we trabol ya i bigwan bitim mak, oli wantem blong givhan long eni rod we oli save mekem. Stori we i kam biaen i tokbaot samting ya.

[Futnot]

[Tok blong pija long pej 8, 9]

(Lukluk niuspepa)

DISASTA YA I SPOLEM GUD

1 TAOA BLONG NOT 1 Wol Tred Senta

2 TAOA BLONG SAOT 2 Wol Tred Senta

3 HOTEL MARRIOTT 3 Wol Tred Senta

7 7 WOL TRED SENTA

BROBROK NOGUD

4 4 WOL TRED SENTA

5 5 WOL TRED SENTA

L WAN LIBETI PLASA

D DATJ BANK 130 Liberti Rod

6 YUNAETED STET KASTOMS HAOS 6 Wol Tred Senta

N S NOT MO SAOT BRIJ WE OL MAN OLI WOKBAOT LONG OLGETA

SAM HAF OLI BROBROK

2F 2 WOL FAENANSOL SENTA

3F 3 WOL FAENANSOL SENTA

W WINTA GADEN

[Credit Line]

As of October 4, 2001 3D Map of Lower Manhattan by Urban Data Solutions, Inc.

[Fotos]

Antap olgeta: Taoa blong saot i foldaon fastaem

Antap: Samfala oli ron i go long ol haos blong Watchtower blong faenem sef ples

Raetsaed: Plante handred man we oli wok long Graon Sero blong kilim faea mo sevem ol man oli no spel nating

[Credit lines]

AP Photo/Jerry Torrens

Andrea Booher/FEMA News Photo

[Foto Credit Line blong pija long pej 3]

AP Photo/Marty Lederhandler

[Foto Credit Line blong pija long pej 4]

AP Photo/Suzanne Plunkett