Oli Yang Tumas Blong Kam Mama

“Boefren blong mi i naes. Hem i gat mane, mo mitufala i goaot oltaem, pleplei plante mo haremgud. Taem mi mestem sikmun blong mi, mi save se wan samting i rong. ?Bambae mi talem wanem long mama blong mi? Mi mi no save bilif se mi gat bel. Mi mi gat 16 yia nomo. Mi no save wanem blong mekem.”​—Nicole.

NAOIA Nicolea i gat samwe long 35 yia blong hem. Hem i no moa gat fasin blong fraet, hem i smat mo i wok strong, mo hem i mama blong tri pikinini. Fasbon blong hem i gat 20 yia finis. Yes, plante yia bifo, Nicole i wan long plante milian yangfala we oli gat bel be oli no mared. Olsem ol narafala yangfala mama, hem i harem se hem i no naf blong winim ol bigfala trabol we hem i fesem, mo blong mekem ol strong disisen, mo hem i harem se i no sua nating long fiuja blong hem.

Nicole i no stap tokbaot tumas ol filing we oli bin kasem hem taem hem i sek long nius ya se hem i gat bel. Hem i bin harem se i no save bilivim nius ya, hem i fraet, i kros, mo i harem nogud tumas. Laef blong hem i sud sem mak long ol fren blong hem, we oli stap tingbaot nomo ol naesfala klos, mo ol hae mak we oli wantem kasem long skul. Be i gud se Nicole i gat wan papa mama we tufala i rere blong halpem hem. Tufala i lavem hem mo tufala i bin traehad blong tijim hem long ol gudfala fasin. Be hem i no wantem folem ol gudfala fasin ya, ale hem i kasem bigfala trabol ya. Biaen, hem i tanraon, i folem bakegen ol gudfala fasin ya mo oli lidim hem blong karem gudfala frut long laef blong hem, mo blong haremgud bakegen. Long trabol taem ya, hem i holem wan tok long tingting blong hem we i givim paoa long hem blong gohed, hemia se: “I gat rod yet.”

Sore tumas, plante yangfala mama oli gat wan papa mama we tufala i no wantem givhan long olgeta, mo plante oli no gat strong tingting blong winim trabol ya tu. Mane blong olgeta i finis hareap nao oli harem se i no gat rod blong kamaot long trabol ya. Sam gel, wan man i repem olgeta no i fosem olgeta, nao oli harem nogud tumas long filing blong olgeta tu.

Ol trabol ya i mekem se ol yangfala mama ya oli no save lukaotgud long pikinini blong olgeta. Wan buk (Teen Moms​—The Pain and the Promise) i tokbaot ol pikinini blong ol yangfala mama ya se: “Taem oli bon oli smol moa long ol pikinini blong ol mama we oli olfala moa, oli kasem moa sik, plante moa long olgeta oli ded, oli no kasem ol meresin we oli nidim, oli no kasem gudfala kakae mo plante oli hanggri, ol yangfala mama ya oli kilim olgeta moa, mo ol pikinini ya oli no grugud olsem ol narafala pikinini.” Mo tu, long ol gel we mama blong olgeta i bin yang tumas taem hem i bonem olgeta, plante moa long olgeta oli gat bel i winim ol gel we mama blong olgeta i olfala moa taem i bonem olgeta.

?Olsem wanem? ?Trabol ya blong ol yangfala we oli gat bel, hem i stap long evri kantri no long sam kantri nomo? ?Olsem wanem ol yangfala mama ya oli save winim traem ya blong tijim mo lukaotgud long pikinini blong olgeta? ?I gat wan samting we i save halpem ol yangfala blong oli no kasem trabol ya? Ol haf blong Wekap! ya bambae oli ansarem ol kwestin ya.

[Futnot]