Stap Tugeta Bifo Mared—?Hem i Wan Gudfala Fandesen Blong Mared?

WAN buk (Journal of Marriage and Family) i talem se ol man mo woman we oli stap tugeta bifo mared, “oli plante we plante naoia long ol rij kantri blong wol.” Mo “samwe long stret haf blong ol man mo woman ya, oli ting se sipos tufala i stap tugeta fastaem, bambae tufala i save luk se tufala i stret long tufala no nogat.” Sipos tok ya i tru, “olgeta mared man mo woman we oli bin stap tugeta bifo mared ating oli stret long olgeta nomo, mo ating mared blong olgeta i stanap strong.”

Journal i gohed se: “Ol samting we i hapen i soemaot se i no olsem. Ol mared man mo woman we oli bin stap tugeta bifo mared, oli no haremgud long mared blong olgeta olsem ol narafala, oli no spenem taem tugeta mo mekem ol samting tugeta, oli raorao moa bitim ol narafala, oli no givgivhan long olgeta, oli no wok tugeta blong stretem ol problem blong olgeta, mo oli gat moa trabol insaed long mared blong olgeta. . . . Mo tu, plante moa long olgeta we oli bin stap tugeta bifo mared oli seraot [divos].”

Stadi ya i soemaot se samting we man i ting se i waes, maet i no waes nating. Hemia i laenap wetem wan trutok long Jeremaea 10:23, se: “I no gat man i save kam bos long laef blong hem.” !I moa waes blong lukluk i go long Tok blong God, Baebol, blong kasem gudfala advaes long saed blong mared! (2 Timoti 3:​16) Wan advaes we Baebol i givim long saed blong mared, hemia: “Man i mas aot long papa mo mama blong hem, i mas go joen wetem woman blong hem, nao tufala bambae i kam olsem wan bodi nomo.”​—Jenesis 2:​24; Matiu 19:5.

Sipos yumi folem tok ya blong God i bitim we yumi folem advaes blong man we i no stret mo i stap jenis oltaem, samting ya bambae i givhan bigwan long yumi blong gat wan mared we i hapi mo i stanap strong.​—Ol Proveb 3:​5, 6.