Baebol i Talem Wanem
?God i Laekem Wan Kantri Moa i Bitim Narawan?
PLANTE man oli ting se God i laekem moa kantri blong olgeta i bitim ol narafala kantri. ?Sipos yumi askem pruf blong samting ya, oli talem wanem? Maet oli tokbaot sam bigfala samting we kantri blong olgeta i bin mekem long ol yia we oli pas. Maet ami blong kantri ya i winim wan faet. Maet kantri i kam rij moa mo ol man oli gat plante samting. Maet oli tokbaot sam plan we kantri i stap folem blong givhan long olgeta we oli no gat naf kakae, no blong lukaot long olgeta we oli no gat janis blong kasem plante samting olsem ol narafala, no sam plan blong mekem i sem mak long olgeta man long kantri mo jajem ol man long stret fasin. Samfala oli ting se God i laekem kantri blong olgeta moa, from we i gat plante naesfala ples long kantri ya.
Long evri kantri, yumi faenem ol man we oli gat tingting ya se kantri blong olgeta i beswan. ?Olsem wanem? ?Baebol i agri long tingting ya se God i laekem wan kantri moa i bitim narawan?
Wan Impoten Fasin Blong God
Ansa blong kwestin ya i kam klia taem yumi kasem save long wan impoten fasin blong Hae God, wan fasin we Baebol i makemgud. God i no stap mekem i moagud long samfala i bitim ol narafala. Ol Wok 10:34 i talem stret se: “God i stap mekem i sem mak nomo long olgeta man.” Baebol i talem tu se, “taem we [Jeova God] i jajem man, hem i no save wok wan saed,” mo ‘hem i no wantem luk fasin ya we man i laekem sam man, be sam man, hem i no laekem olgeta, no we man i wantem mekem wan samting we i no stret.’ (Dutronome 10:17; 2 Kronikel 19:7) God i no laekem fasin ya we man i mekem i moagud long samfala i bitim ol narafala, hem i talem se fasin ya i no stret nating.
Maet yu talem se: ‘Be long taem bifo, God i bin mekem i gud moa long ol man Isrel i bitim ol narafala man. ?Hem i mekem i stret?’ I tru se long taem bifo, God i bin jusumaot ol man Isrel olsem ol man blong hem, mo hem i bin lukaotgud long olgeta taem oli mekem faet agens long sam narafala kantri. Mo tu, Baebol i talem se: “Yumi ol laen blong Isrel, mo oltaem Hae God i stap givim tok blong hem long yumi, i stap tijim yumi long ol rod blong hem, mo long ol tingting blong hem. Hem i no mekem samting ya long ol man blong ol narafala kantri.” (Ol Sam 147:19, 20) ?Be olsem wanem? ?Fasin ya we God i mekem long ol man Isrel i soemaot se hem i mekem i gud moa long olgeta i bitim ol narafala? Nogat. Bambae yumi tokbaot tri risen from wanem yumi ansa olsemia.
Faswan risen se, God i jusumaot ol man Isrel from we hem i wantem mekem i gud long olgeta man blong olgeta kantri. Hem i mekem wan promes long Ebraham, olfala bubu blong ol man Isrel, se: ‘Bambae mi mi mekem i gud tumas long olgeta we bambae oli kamaot biaen long yu. Bambae ol man blong ol narafala kantri oli save prea long mi blong mi blesem olgeta, olsem we bambae mi blesem olgeta ya.’ (Jenesis 22:17, 18) Yes, God i jusumaot ‘olgeta we oli kamaot biaen long Ebraham’ from we hem i wantem givim bigfala blesing long “ol man blong ol narafala kantri,” i no long ol man Isrel nomo.
Seken risen se, God i no blesem ol man Isrel nomo. From we hem i stap mekem i sem mak long olgeta man, hem i openem rod long ol man blong ol narafala kantri, blong oli save mekem wosip wetem ol man Isrel we hem i jusumaot. (2 Kronikel 6:32, 33) Plante man oli folem rod ya mo oli kasem blesing from. Wan woman we i mekem olsem, hemia Rut blong kantri ya Moab.—Rut 1:3, 16.
Namba tri risen se, spesel fasin fren bitwin God mo ol man Isrel i blong smoltaem nomo. Long 29 K.T.,a Mesaea Jisas Kraes i kamtru. Hemia nao impoten man we Baebol i bin talem se bambae i ‘kamaot biaen long Ebraham.’ (Galesia 3:16) Be ol manples blong Jisas oli no bilif se hem i Mesaea. Ale, hem i talem long olgeta se: “Yufala i luk. God i lego yufala finis, ples blong yufala i emti i stap.” (Matiu 23:38) Afta long taem ya, God i no moa gat wan spesel fasin fren wetem ol man blong kantri ya mo i no moa joen long ol faet blong olgeta. Hem i mekem i sem mak long olgeta evriwan, mo olgeta man oli save kasem blesing blong hem. Tingbaot sam samting we oli pruvum poen ya.
Ol Presen We God i Givim Long Olgeta Man
Ransom sakrefaes blong Jisas Kraes, hemia presen we i bigwan moa we God i givim long ol man. (Rom 6:23) Hemia rod blong man i save kam fri long sin mo ded. Ale ransom ya i givim janis long yumi evriwan blong kasem laef we i no save finis. Presen ya i go long ol man we “oli kamaot long olgeta kala, mo long olgeta kantri, mo long olgeta laen, mo long olgeta lanwis.” (Revelesen 5:9) Yes, God i wantem se “olgeta man we oli bilif” long Jisas bambae oli kasem “laef we i no save finis.”—Jon 3:16.
Gud nius blong Kingdom blong God i stap karem plante blesing long olgeta man we oli lesin. (Revelesen 14:6, 7) Gud nius ya i givim hop blong fiuja long olgeta, mo i givim waes advaes we i save mekem laef blong olgeta i moa hapi naoia. From we Jeova i stap mekem i sem mak long olgeta man, hem i mekem plan se bambae “ol man oli stap talemaot gud nius ya . . . long olgeta ples long wol, blong oli witnes blong hem long fes blong olgeta man.” (Matiu 24:14; 28:19, 20; Ol Wok 16:10) Yumi faenem gud nius ya long Baebol, wan buk we olgeta haf blong hem no sam haf blong hem oli stap long bitim 2,300 lanwis. Jeova, Papa blong yumi we i lavem ol man, i mekem se wan bighaf blong olgeta man long wol oli save kasem “ol tok blong laef ya we i no save finis.”—Jon 6:68; Josua 1:8.
Ol presen ya wetem plante narafala presen we God i givim, olgeta man oli save kasem—yes, ol man blong olgeta kantri, olgeta kala, mo olgeta lanwis. Taswe, i no nid blong yumi bon long wan spesel kantri, blong God i laekem mo blesem yumi.
?God i Laekem Hu?
?Ale, yumi mas mekem wanem blong God i laekem yumi? Aposol Pita i ansarem kwestin ya, i talem se: “Sipos wan man i ona long God, mo i mekem ol samting we i stret long fes blong hem, bambae God i glad long hem, i nating we hem i wan laen blong Isrel, no i kamaot long wan narafala laen olgeta.” (Ol Wok 10:34, 35) I klia se i no naf blong talem nomo se yumi bilif long God. Yumi mas rili lavem God, mo yumi mas fraet blong mekem samting we God i no laekem. Mo tu, yumi mas “mekem ol samting we i stret,” hemia i min se ol samting we God i glad long hem.
Blong kasem save long poen ya, tingbaot skul blong ol pikinini we long plante kantri olgeta pikinini oli gat janis blong go long hem. Be sipos wan pikinini i no wantem go long skul mo i no traehad, skul bambae i no givhan long hem. Sem mak long saed blong blesing blong God. Yumi evriwan i save kasem ol blesing ya, be yumi mas traehad. Yumi mas ridim Baebol evri dei, yumi mas soemaot se yumi bilif long ransom sakrefaes blong Kraes, mo yumi mas folem ol rul blong Baebol long laef blong yumi. Sipos yumi rili “luk long Hae God blong hem i givhan long yumi,” yumi stap long rod blong kasem blesing blong hem, mo bambae hem i laekem yumi.—Ol Sam 105:3, 4; Ol Proveb 2:2-9.
[Futnot]
a K.T. i minim Kristin Taem.
[Tok blong pija long pej 17]
God i mekem se ol man blong olgeta kantri oli save kasem “ol tok ya blong laef we i no save finis”