Baebol i Talem Wanem

?Baebol i Stap Daonem Ol Woman, Se Oli No Impoten?

TERTULLIAN i wan man blong stadi long tijing blong ol skul, we i laef long ol yia 200. Hem i tokbaot ol woman olsem “rod we devel i yusum blong ol man oli ded.” Sam narafala oli yusum Baebol blong talem se ol woman oli daon moa long ol man. From samting ya, plante man oli ting se Baebol i stap daonem ol woman se oli no impoten.

Elizabeth Cady Stanton, wan woman we i laef long ol yia 18 handred mo we i wok long wan ogenaesesen blong ol woman long Yunaeted Stet, i talem se: “Baebol mo Jos i wan bigfala samting we i bin blokem fasin fri blong ol woman.” Stanton i tokbaot ol fas faefala buk blong Baebol i se: “Mi mi no save wan narafala buk long wol we i tijim se woman i mas stap daon mo we i daonem ol woman.”

I tru se maet sam man tede oli gat ol tingting olsem ya we i bitim mak, nating se i olsem, plante man oli harem se sam haf blong Baebol i sapotem fasin ya we man i daonem ol woman se oli no impoten. ?I stret blong tingting olsem?

?Hibru Haf Blong Baebol i Talem Wanem Long Saed Blong Ol Woman?

“Bambae yu stap wantem man blong yu yet, mo hem bambae i bos blong yu.” (Jenesis 3⁠:16) Sam man oli yusum ol tok ya blong talem se God i jajem Iv mo i agri nomo se ol man oli bos long ol woman. Be, hemia i no stamba tingting blong God, hemia i stret samting we i kamaot taem man i agens long hae rul blong God. Fasin ya blong spolem ol woman i kamaot from we man i gat sin, hem i no samting we God i wantem. Ol woman long plante kalja oli harem nogud from man blong olgeta i bos long olgeta. Plante taem ol man ya oli mekem olsem long fasin we i raf tumas. Be, hemia i no plan blong God.

God i wokem Adam mo Iv long stret pija blong hem. Mo, tufala i kasem sem oda long God se tufala i mas fulumap wol ya mo lukaot long hem. Tufala i mas joengud tugeta blong mekem wok ya. (Jenesis 1⁠:​27, 28) Yes, long taem ya i no gat wan long tufala we i mekem i nogud long narawan. Jenesis 1⁠:31 i talem se: ‘God i luk olgeta samting we hem i wokem finis, mo olgeta wok blong hem i gud tumas.’

Sam stori blong Baebol oli no talem tingting blong God long saed ya. Ol stori ya oli stap nomo blong soemaot samting we i bin hapen. Stori blong Lot we i givim tufala gel blong hem long ol man Sodom, i no tok agens long Lot mo i no agri long fasin ya blong Lot tu.a​—⁠Jenesis 19⁠:​6-8.

Yes. God i no laekem nating fasin ya blong mekem i nogud mo spolem narafala. (Eksodas 22⁠:22; Dutronome 27⁠:19; Aesea 10⁠:​1, 2) Loa blong Moses i agensem fasin we man i repem woman mo fasin we woman i salem bodi blong hem. (Levitikas 19⁠:29; Dutronome 22⁠:​23-29) I gat panis blong ded i stap blong ol woman wetem ol man tu we oli mared finis be oli go slip wetem narafala man no woman. (Levitikas 20⁠:10) Loa i no daonem ol woman, be hem i leftemap mo i protektem olgeta long ol nogud fasin we i kam antap long ol neson raonabaot. Ol man oli respektem mo oli tinghae long wan woman Jiu we i gat gudhan blong wokem samting. (Ol Proveb 31⁠:​10, 28-30) Sipos ol man Isrel oli no folem loa blong God blong soem respek long ol woman, hemia fol blong olgeta nomo, i no samting we God i wantem. (Dutronome 32⁠:⁠5) Taswe, God i jajem mo i panisim neson ya Isrel from fasin blong olgeta blong no obei.

?Fasin Obei i Daonem Ol Woman?

Sipos wan kantri i no stap wok folem oda, ol samting long kantri ya bambae i olbaot nomo. Hemia i minim se ol haeman oli mas mekem gud wok blong olgeta. Sipos no, ol samting bambae i olbaot. “God i no stamba blong fasin ya we olgeta samting oli paspas, hem i stamba blong pis.” ​—⁠1 Korin 14⁠:⁠33.

Aposol Pol i tokbaot plan ya insaed long famle se man i hed: “I gat wan tok we mi wantem yufala i savegud mining blong hem. God, hem i hed blong Kraes, mo Kraes, hem i hed blong man, mo man, hem i hed blong woman blong hem.” (1 Korin 11⁠:⁠3) Evri man wanwan oli mas obei long wan we i hae moa long olgeta. God nomo i no gat man i hae moa long hem. ?Olsem wanem? ?From we Jisas i gat wan we i hae moa long hem, samting ya i min se hem i daon? !No gat, i no olsem ya! Taem Baebol i talem se man i tij long kongregesen mo i hed long famle, samting ya i no min se ol woman bambae oli daon moa long ol man, no gat. Blong kongregesen mo famle i gohed gud, i nidim we ol man mo ol woman oli mekem ol wok blong olgeta wetem lav mo respek.​—⁠Efesas 5⁠:​21-25, 28, 29, 33.

Oltaem Jisas i soem respek long ol woman. Hem i no folem ol kastom mo tijing blong ol Farisi we oli daonem ol woman mo leftemap ol man. Hem i toktok wetem ol woman we oli no Jiu. (Matiu 15⁠:​22-28; Jon 4⁠:​7-9) Hem i tijim ol woman. (Luk 10⁠:​38-42) Hem i kea long ol woman we ol man oli no laekem olgeta. (Mak 10⁠:​11, 12) Ating wan jenis we i hapen long taem we Jisas i laef long wol ya se, hem i glad blong gat sam woman olsem ol fren blong hem. (Luk 8⁠:​1-3) Jisas i nambawan man we i soem ol gudfala fasin blong God, hem i soemaot se ol man mo woman oli sas long ae blong God. Yes, long faswan handred yia, ol Kristin man mo woman oli kasem paoa blong tabu spirit. (Ol Wok 2⁠:​1-4, 17, 18) Olgeta ya we tabu spirit i makemaot olgeta, we bambae oli ol king mo ol pris wetem Kraes, bambae oli sem mak nomo taem oli laef bakegen long heven, nating we oli ol man no ol woman. (Galesia 3⁠:28) Jeova, we i raetem Baebol, hem i no stap daonem ol woman.

[Futnot]

[Tok blong pija long pej 18]

Jisas i respektem ol woman, i no olsem ol man we oli laef long taem blong hem