Step 2
Mekem Se i Gat Lav Insaed Long Famle
?From wanem yu mas tekem step ya? Ol pikinini oli nidim lav. Sipos oli no kasem lav, oli harem nogud. Long ol yia afta 1950, man ya M. F. Ashely Montagu, we i stadi long laef blong ol man, i raetem se: “Samting we bodi blong man i nidim moa blong i save grugud, hemia lav. Blong gat gud helt long evri haf blong laef, man i mas kasem lav, speseli long fas yia blong laef blong hem go kasem namba sikis yia.” Ol man we oli stadi long bisnes ya tede, oli agri wetem tok blong Masta Montagu se, “taem pikinini i no kasem plante lav, samting ya i save spolem hem mo hem i no save gruap gud.”
?From wanem i hadwok?: Yumi laef long wan wol we i no gat lav long hem, mo ol man oli tingbaot olgeta nomo. Samting ya i mekem se i strong blong holemtaet lav insaed long famle. (2 Timoti 3:1-5) Ol papa mama oli hadwok blong winim naf mane blong famle, mo oli hadwok tu blong mekem evriwan long famle oli haremgud long filing blong olgeta. Maet samting ya i mekem we ol problem we oli stap finis insaed long mared blong wan man mo woman, oli kam bigwan moa. Maet tufala i faenem i had finis blong toktok tugeta long evri samting. Nao sipos tufala i gat defdefren tingting bakegen long saed blong fasin blong stretem pikinini mo wanem we bambae tufala i mekem blong givim presen long pikinini taem hem i obei, samting ya i save mekem moa trabol i kamaot insaed long mared.
?Wanem i save givhan long yu?: Mekem plan blong spenem taem tugeta olsem wan famle. Mo tu, hasban mo waef i mas mekem plan blong spenem taem tugeta, tufala nomo. (Amos 3:3) Yusumgud taem ya we yutufala i gat tugeta afta we ol pikinini oli go slip long naet. I nogud yutufala i letem televisin i kakae ol taem ya we i sas long yutufala. Yutufala i mas gohed blong talemaot mo soemaot lav long yutufala, olsem nao, filing blong lav bambae i stap oltaem long mared blong yutufala. (Ol Proveb 25:11; Sing blong Solomon 4:7-10) I nogud we yu “tok strong” oltaem long hasban no waef blong yu, i moagud we yu lukaot rod blong talemaot ol gudfala toktok long hem evri dei.—Ol Sam 103:9, 10; Ol Proveb 31:28.
Talem long ol pikinini blong yu se yu lavem olgeta. Jeova God i givim eksampol long ol papa mama taem hem i talemaot klia long Pikinini blong hem, Jisas, se i lavem hem. (Matiu 3:17; 17:5) Wan papa long Ostria, nem blong hem Fleck, i talem se: “Mi mi luk se ol pikinini oli lelebet olsem ol flaoa. Ol flaoa oli lukluk i go long san blong kasem laet mo blong stap wom, ale ol pikinini oli lukluk i go long papa mama blong kasem lav mo blong harem ol toktok we i soemaot se oli impoten long famle.”
Nating se yu mared no yu yu wan papa no mama we yu stap yu wan wetem ol pikinini blong yu, be sipos yu givhan long evriwan long famle blong oli lavlavem olgeta mo blong oli lavem God, bambae yu luk we famle laef blong yufala i kam moagud.
?Be, Tok blong God i talem wanem long saed blong fasin blong papa mama blong bos long pikinini?
[Tok blong pija makem poen pej 4]
“Yufala i mas lavem ol man, from we fasin ya . . . i save joenemgud olgeta samting, blong oli kam wan.”—Kolosi 3:14