Step 1

Lukaot Gudfala Advaes

?From wanem yu mas tekem step ya? Long faswan taem we ol papa mama oli holem niufala bebi blong olgeta, oli save gat plante defren filing. Wan papa blong Inglan, nem blong hem Brett, i talem se: “Mi mi harem se i wan merikel stret mo mi glad bitim mak. Be mi harem tu se hemia wan bigfala hevi wok we mi mi no naf blong mekem.” Monica i wan mama long Ajentina, mo hem i talem se: “Mi mi wari se mi no naf blong givim evri samting we smol gel blong mi i nidim. Mi tingbaot se, ‘?Mi mi save tijim hem blong i kam wan bigman we i gat gudfala fasin mo i save mekem ol gudfala desisen?’ ”

?Olsem wanem? ?Yu yu kasem save long fasin blong ol papa mama ya we oli glad be oli fraet tu? I tru, wok blong tijim pikinini i wan wok we i strong bitim ol narafala wok, be hem i wan wok we i mekem ol papa mama oli haremgud tu. Hem i wan wok we i givim plante wari bitim ol narafala wok be hem i karem bigfala blesing tu. Wan papa i talem se: “Sipos yu no tijimgud pikinini blong yu, yu no save stat bakegen mo mekem namba tu taem, nogat.” Yes, ol papa mama oli gat bigfala paoa long helt mo glad blong ol pikinini blong olgeta. Taswe, maet yu harem se yu nidim advaes we yu save trastem, blong givhan long yu blong kamgud moa long wok blong papa mo mama.

?From wanem i hadwok?: I luk olsem se olgeta man oli gat sam advaes blong givim olsem wanem blong tijim pikinini. Long ol yia we oli pas, ol yangfala papa mama oli tijim pikinini blong olgeta folem eksampol blong papa mama blong olgeta bifo. Sipos no, oli folem advaes blong jos blong olgeta. Be long plante kantri tede, ol famle oli no moa joengud mo jos i lusum paoa. From samting ya, plante papa mama oli go luk ol advaesa mo oli pem olgeta blong givim advaes long olgeta. Sam long ol advaes ya i stret. Be sam advaes blong olgeta i no laenap wetem ol narafala advaes we oli givim. Mo tu, ating bambae i no longtaem advaes blong olgeta i no moa wokgud mo ol man oli lukaot niufala advaes bakegen.

?Wanem i save givhan long yu?: Yu mas lukaot advaes blong Man ya we hem i save evri samting long saed blong tijim pikinini—hemia Jeova God, Man we i givim laef long yumi. (Ol Wok 17:26-28) Tok blong hem, Baebol, i givim ol klia advaes mo eksampol we oli save givhan long yu blong kamgud moa long wok blong papa mo mama. Hem i promes se: “Bambae mi stap givim gudfala tingting long yu, mo mi stap lukaot gud long yu.”—Ol Sam 32:8.

?Wanem ol advaes blong God we i save givhan long ol papa mama blong oli tijimgud ol pikinini blong olgeta mo mekem olgeta oli hapi?

[Tok blong makem poen long pej 3]

“I nogud yu ting se save ya blong yu naoia, hem i naf blong givhan long yu. Yu mas trastem Hae God long olgeta tingting blong yu.”—Ol Proveb 3:5