Ol Yangfala Oli Askem

?Olsem Wanem Mi Save Stanap Strong Long Ol Traem?

◼ Karen i stap finis long ples blong lafet, mo ten minit afta, hem i luk we tu boe tufala i kamtru wetem sam bigfala plastik. Karen i savegud wanem i stap insaed long ol plastik ya. Hem i bin luk tufala boe ya long dei finis mo i harem we tufala i talem se bambae i gat “plante strong dring” long lafet ya. Karen i no bin talemaot samting ya long papa mama blong hem. Hem i ting se tufala boe ya i stap tokplei nomo. Mo tu, i sud gat sam bigman oli stap. ?Ating i gat sam oli stap samples long haos ya?

Wantaem nomo, Karen i haremsave wan voes biaen long hem we i talem se: “Ei, man blong spolem lafet, ?from wanem yu stap stanap olsem?” Karen i tanem hem, mo i luk fren blong hem, Jessica, we i holem tu botel bia we oli jes openem. Jessica i pusum wan i go stret long Karen mo i talem se: “!Yu no mas talem long mi se yu yu yang tumas blong gat gudtaem!”

Karen i wantem talem no. Be hem i luk se fren blong hem i fosem hem tumas blong i tekem bia ya. I no strong dring ya we i pulum Karen. Hemia nomo se, Jessica i fren blong hem, mo Karen i no wantem we Jessica i ting se hem i wantem spolem lafet. Mo tu, Karen i ting se Jessica i wan gudfala gel. Taswe, sipos hem i dring, ?from wanem Karen tu i no save dring? Karen i stap tingting se: “Hemia wan bia nomo. I no olsem se mi tekem drag no mi slip wetem wan boe.”

TAEM yu yu yangfala, yu save kasem plante defren kaen traem. Sipos yu yu wan boe, plante taem, wan gel i save kam olsem wan traem long yu, sem mak olsem wan boe i save kam wan traem long wan gel. Ramon,a we i gat 17 yia blong hem, i talem se: “OI gel long skul oli save fosem man. Oli laekem blong tajem yu mo luk sipos bambae yu letem olgeta oli gohed nomo. !Sipos yu talem long olgeta blong stop, oli no wantem harem yu!” Samting ya i hapen tu long Deanna, we hem i gat 17 yia blong hem. Deanna i talem se: “Wan boe i kam long mi mo i putum han blong hem i goraon long mi. Mi mi kilim han blong hem mo mi talem se, ‘?Yu yu mekem wanem ya? !Mi mi no save yu tu! ?Yu yu hu?’”

Yu tu yu save fesem ol traem. Mo ating yu luk se ol traem ya oli no save stop, oli gohed nomo. Wan Kristin man i talem se: “Ol traem oli olsem wan man we i gohed nomo blong noknok long doa blong yu, nating we yu no wantem openem doa.” ?Olsem wanem long yu? ?Yu yu kasem ol traem gogo yu taed long olgeta? Tingbaot: ?Wan long ol samting we i kam biaen i stap traem yu?

□ Smok

□ Dring

□ Tekem drag

□ Lukluk ol doti pija blong seks

□ Mekem rabis fasin long saed blong seks

□ Narafala samting ․․․․․

Sipos yu talem yes long wan long olgeta antap, yu no mas ting se yu yu no naf blong kam wan Kristin. Yu save lanem blong kontrolem tingting ya blong wantem ol nogud samting mo yu save stanap strong long ol traem. ?Yu save mekem samting ya olsem wanem? Wan rod we i save givhan long yu, hemia blong luksave wanem samting we i mekem se traem i kamaot. Tingbaot trifala samting ya.

1. Sin we yumi bon wetem. Evri sinman oli bon wetem fasin ya blong wantem mekem samting we i nogud. Aposol Pol i bigman long ol Kristin fasin, be hem tu i talem se: “Taem mi wantem mekem ol samting we i gud, be oltaem mi stap jusumaot ol samting nomo we i nogud olgeta.” (Rom 7:21) I klia se, wanwan taem, wan gudfala man tu bambae i tingting long “ol rabis samting we tingting blong hem i wantem, . . . mo ol samting we ae blong hem i luk.” (1 Jon 2:16) Be i moa nogud blong gohed blong tingbaot ol nogud samting ya, from Baebol i talem se: “Taem [wan man] i wantem tumas ol samting nogud, fasin ya bambae i kam bigwan moa long hem, nao bambae man ya i mekem [“sin,” NW].”—Jemes 1:15.

2. Ol narafala samting we oli save gat paoa long yumi. Ol traem oli stap long evri ples. Trudy i talem se: “Long skul mo long wok, ol man oli tokbaot seks oltaem. Oltaem televisin mo sinema i soem se fasin blong slip tugeta i wan naesfala samting, mo i pulum filing blong man. !I no oltaem we oli soem ol rabis frut we oli kamaot biaen!” Trudy i savegud olsem wanem ol samting ya oli save gat bigfala paoa long man. Hem i talem se: “Taem mi mi gat 16 yia, mi ting se mi lavem wan boe. Mama blong mi i sidaon wetem mi mo i talem se sipos mi gohed long fasin ya, bambae mi gat bel. !Mi mi sek se mama blong mi i save talem wan samting olsem long mi! Be tu manis biaen, mi mi gat bel.”

3. “Ol krangke fasin blong ol yangfala.” (2 Timoti 2:22) Tok ya i save minim eni samting we ol yangfala oli wantem tumas, olsem taem oli wantem tumas blong ol narafala oli agri long olgeta, no oli wantem tumas blong ol narafala oli luk olgeta se oli bigman finis. I no rong blong wantem ol samting ya, be sipos yumi no bos long yumi, bambae ol samting ya oli save kam ol traem we oli strong tumas blong yumi winim. Olsem nao, sipos yu wantem tumas we ol narafala oli luk se yu yu bigman finis, hemia i save pulum yu blong sakemaot ol gudfala fasin we papa mama blong yu oli tijim yu long olgeta. Hemia nao samting we i hapen long Steve, taem hem i gat 17 yia blong hem. Steve i talem se: “Mi mi rebol agens long papa mama blong mi. Mi mekem evri samting we oli tijim mi se mi no mas mekem, mo hemia smoltaem nomo afta we mi tekem baptaes.”

I tru, trifala samting we yumi tokbaot antap oli save gat bigfala paoa long yu. Nating se i olsem, yu yu save stanap strong long ol traem. ?Olsem wanem?

◼ Fastaem, yu mas luksave weswan traem nao we yu yu faenem se i had blong yu yu stanap strong agens long hem. (Ating yu yu faenemaot finis long lis ya antap.)

◼ Biaen, askem se: “?Wetaem nao mi stap kasem traem ya moa?” Putum mak long wan long ol bokis biaen.

□ Taem mi stap long skul

□ Taem mi stap long wok

□ Taem mi stap mi wan

□ Narafala taem ․․․․․

Maet taem yu kasem save wetaem yu fesem traem, hemia i save givhan long yu blong yu ronwe long hem. Tingbaot stori long stat blong haf ya. ?Wanem woning we Karen i kasem, we i soem se bambae i gat trabol long lafet ya we hem i go long hem? ?Olsem wanem hem i save blokem traem ya long stat nomo?

◼ Naoia we yu yu (1) luksave traem we yu stap kasem, mo yu (2) save wetaem yu stap kasem traem ya, yu rere nao blong tekem aksen. Faswan samting we yu mas mekem, hemia blong faenemaot olsem wanem yu save mekem se traem ya i no kam bigwan tumas, sipos no, olsem wanem blong mekem se yu no kasem traem ya nating. Raetemdaon ol samting we yu mas mekem.

․․․․․

․․․․․

(Tingbaot: Sipos afta long skul, oltaem yu faenem sam fren blong yu we oli fosem yu blong smok, ating yu save pas long wan defren rod, blong yu no mitim olgeta. Sipos oltaem nomo sam man oli sanem sam doti pija blong seks long yu long Intenet, maet yu save putum wan program long kompiuta blong yu we i save blokem olkaen mesej olsem. Mo tu, sipos yu wantem lukaot sam save long Intenet, yu mas raetem klia wanem samting we yu wantem faenemaot.)

I tru se yu no save ronwe long olgeta traem. I no longtaem, maet bambae yu fesem wan traem we i strong tumas, ating hemia long wan taem we yu no rere long hem nating. ?Wanem samting we yu save mekem?

Yu mas rere. Taem “Setan i traem” Jisas, Jisas i kwik blong tok long hem. (Mak 1:13) ?From wanem? From we Jisas i save finis wanem samting we hem i mas mekem, sipos hem i kasem traem olsem. Tingbaot samting ya. Jisas i no wan robot. Hem i save foldaon long traem ya. Be nogat, hem i mekem tingting blong hem i strong finis se bambae hem i obei long Papa blong hem long evri samting. (Jon 8:28, 29) Jisas i rili minim tok ya taem hem i talem se: “Mi mi no kamaot long heven blong mekem ol samting we mi nomo mi wantem. Mi kam blong mekem ol samting we Papa blong mi we i sanem mi mi kam, hem i wantem.”—Jon 6:38.

Long ol emti spes daon, raetem tu risen from wanem yu mas stanap strong agens long traem we yu yu stap fesem oltaem, mo tu rod we yu tingbaot blong winim traem ya.

1. ․․․․․

2. ․․․․․

Yu mas tingbaot se, taem yu foldaon long traem, yu yu mekem samting we yu yu wantem tumas, i olsem we samting ya i holemtaet yu, nao yu kalabus. (Taetas 3:3) ?From wanem bambae yu letem ol samting we yu yu wantem tumas, oli kontrolem yu? Yu no mas letem samting ya i bos long yu. Yu mas kam bigman long ol Kristin fasin, blong yu save bos long ol samting we yu yu wantem tumas.—Kolosi 3:5.

[Futnot]

SAM SAMTING BLONG TINGBAOT

◼ ?Ol man we oli stretgud olgeta oli save kasem traem?—Jenesis 6:1-3; Jon 8:44.

◼ Taem yu stanap strong long wan traem, ?fasin blong yu blong stap tru long God, i gat paoa olsem wanem long ol narafala?—Ol Proveb 27:11; 1 Timoti 4:12.

[Bokis blong pija long pej 27]

TRAEM MEKEM SAMTING YA

Tekem wan kampas, mo putumgud blong mekem se ara i poen i go long not. Biaen, putum wan magnet klosap long kampas ya. ?Wanem samting i hapen? Ara i no moa poen i go long not, be i poen i go long magnet ya.

Tingting blong yu we i save jajem yu i olsem kampas ya. Sipos yu trenem gud tingting ya, bambae hem i poen i go long “not,” i min se i lidim yu i go long stret rod, mo bambae i givhan long yu blong tekem ol desisen we oli waes. Be ol rabis fren oli olsem wan magnet. Oli save pulum yu, nao yu no moa gat stret tingting long ol gudfala fasin. ?Wanem tijing we yu kasem from? !Yu mas traem blong ronwe long ol man, mo ol samting, we oli save mekem se yu no moa gat stret tingting long ol gudfala fasin!—Ol Proveb 13:20.

[Bokis blong pija long pej 27]

WAN TINGTING

Mekem rere sam ansa we yu save yusum taem wan man i traem pulum yu blong mekem samting we i no stret. Yu no wari. I no nid blong yu talem sam samting we i save givim tingting long ol narafala se yu yu hae moa long olgeta. Plante taem, i jes nidim nomo blong yu talem “no” wetem strong tingting. Olsem nao, sipos wan fren blong yu long skul i givim wan sigaret long yu, yu save talem se: “Yu no westem sigaret blong yu long mi. !Mi mi no smok!”

[Tok blong pija long pej 28]

Taem yu foldaon long traem, yu yu mekem samting we yu yu wantem tumas, i olsem we samting ya i holemtaet yu, nao yu kalabus