Baebol i Talem Wanem

?God i Olsem Wanem?

BAEBOL i eksplenem se: “God, hem i Spirit, mo ol man we oli mekem wosip long hem, oli mas mekem long fasin ya we Spirit blong God i givhan long olgeta, nao oli savegud se hem i tru God.” Vas ya i soemaot wan stamba trutok long saed blong God, hemia se hem i wan spirit man. (Jon 4:19-24) Nating se i olsem, Baebol i tokbaot God olsem wan trufala man we i gat ol fasin mo filing. Nem blong hem Jeova.—Ol Sam 83:18, NW.

Sam man we oli ridim Baebol oli talem se i gat ol defdefren tingting we i mekem olgeta oli konfius se God i olsem wanem. God i wan spirit man we yumi no save luk hem. ?Be from wanem plante vas long Baebol oli tokbaot God se hem i gat ae, sora, nus, hat, han, fingga mo leg?a Sam man oli talem se God i gat wan bodi olsem ol man from we Baebol i talem se God i mekem man blong i olsem hem. Bambae yumi luklukgud long wanem we Baebol i talem, blong yu save kasem wan klia tingting long saed blong God.—Jenesis 1:26.

?From Wanem Baebol i Tokbaot God Olsem Se i Gat Bodi Blong Man?

Blong givhan long ol man blong kasem save se God i olsem wanem, tabu spirit i pulum ol man we oli raetem Baebol blong oli yusum ol haf blong bodi blong man blong tokbaot God ya we i gat Olgeta paoa. Ol man blong stadi oli talem se hemia wan fasin blong toktok (anthropomorphic) we man i yusum blong “tokbaot wan samting olsem se i gat bodi no fasin blong man.” Ol tok olsemia oli soemaot se ol lanwis blong ol man i no naf blong eksplenem fulwan trufala God, Jeova. Fasin ya blong toktok i wan rod blong givhan long yumi ol man blong kasem save long ol impoten save long saed blong God mo ol fasin blong hem. From samting ya, yumi no mas ting se ol tok ya i min se prapa bodi blong God i olsem bodi blong man, nogat. Be hem i wan pijatok nomo, i sem mak taem Baebol i tokbaot God olsem “Bigfala Ston,” “San” mo “wan sil.”—Dutronome 32:4, NW; Ol Sam 84:11, NW.

Long sem fasin, blong eksplenem tingting ya se man i olsem God, Baebol i talem se God i wokem man blong i tekem fasin blong hem, be bambae ol fasin blong man i no save kasem mak blong ol fasin blong God from we oli stret gud olgeta. I klia se hemia i no min se ol man oli spirit man no se God i gat bodi olsem man, nogat.

?God i Man No Woman?

Fasin ya blong yusum ol haf blong bodi blong man olsem wan pija blong halpem yumi blong kasem save long God, i sem mak long fasin blong Baebol blong yusum ol tok, we maet i givim tingting se God i wan man, i no wan woman. Long wol ya nomo i gat ol laef samting we oli man no woman. Taswe Baebol i yusum wan fasin blong toktok blong givhan long yumi ol man blong kasem wan klia save long saed blong God ya we i gat olgeta Paoa, Jeova.

Baebol i yusum tok ya “Papa.” Hemia i halpem yumi blong kasem save se Man ya we i Wokem yumi i olsem wan papa we i gat lav, i lukaotgud mo i kea long famle blong hem. (Matiu 6:9) Hemia i no minim se bambae yumi tingbaot God mo ol narafala spirit man long heven olsem se oli man no woman. Oli no gat ol haf blong bodi we i mekem se oli man no woman. I gud blong makem se Baebol i soemaot se olgeta we oli joen wetem Kraes long Kingdom blong hem long heven, oli no gat tingting ya se bambae oli stap olsem man no woman taem oli kam ol spirit pikinini blong God. Aposol Pol i pulum olgeta blong tingbaot bakegen se taem oli kam spirit pikinini blong God long heven, bambae ‘i no moa gat we sam long olgeta oli man, sam oli woman.’ Baebol i tokbaot olgeta tu olsem ‘woman’ blong smol sipsip ya Jisas Kraes. Olgeta samting ya oli soemaot olsem wanem Baebol i yusum pijatok nomo taem hem i yusum ol haf blong bodi blong man blong tokbaot God, Pikinini blong Hem Jisas mo ol narafala spirit man.—Galesia 3:26, 28; Revelesen 21:9; 1 Jon 3:1, 2.

Ol man blong raetem Baebol oli save gud wok blong ol man taswe taem oli tokbaot God, oli yusum ol tok we i blong tokbaot Hem olsem wan man, i no wan woman. Oli luksave se man we i mekem gud wok blong hem olsem wan papa, hem i wan gudfala pija blong Jeova we i gat lav mo we i intres long ol pikinini blong hem long wol ya.—Malakae 3:17; Matiu 5:45; Luk 11:11-13.

Stamba Fasin Blong Jeova

Nating se God ya we i Haefala Rula blong heven mo wol i wan spirit man, be hem i neva ting se hem i hae tumas blong i fren wetem ol man mo blong olgeta oli save hem. Nating se hem i wan spirit man be hemia i no blokem ol man we oli gat gud hat blong oli lanem mo haremgud long lav, paoa, waes mo stret fasin blong hem. Ol fasin ya blong hem oli soemaot se hem i wanem kaen God mo yumi luksave klia ol fasin ya long ol samting we Hem i wokem raonabaot long yumi.—Rom 1:20, 21.

Stamba fasin we i givhan long yumi blong kasem save se God i olsem wanem hemia lav. God i gat bigfala lav taswe hem i tokbaot hem wan olsem se hem i lav. (1 Jon 4:8, NW) Lav ya i stamba blong ol narafala fasin blong hem olsem, sore, fasin fogif mo longfala tingting. (Eksodas 34:6; Ol Sam 103:8-14; Aesea 55:7; Rom 5:8) Yes, Jeova i wan God blong lav mo hem i singaot ol man blong oli kam klosap long hem.—Jon 4:23.

[Futnot]

?YU YU BIN TINGBAOT?

◼ ?Wanem nem blong God?—Ol Sam 83:18, NW.

◼ ?Weples yumi save faenem ol fasin blong God?—Rom 1:20, 21.

◼ ?Wanem stamba fasin blong God?—1 Jon 4:8, NW.