?Wanem Samting We Yu Save Long Saed Blong Ol Witnes Blong Jeova?

“Mi mi ridim plante samting long saed blong ol Witnes blong Jeova long Intenet. Mi harem plante stori blong rod we ol man oli talem long saed blong olgeta. Mo mi harem plante man oli tok agensem olgeta. From samting ya, mi gat nogud tingting long saed blong ol Witnes blong Jeova.” Hemia ol tok we wan woman long Denmak i raetem. Hem i stap mekem trening blong raetem ol stori long niuspepa.

BIAEN, woman ya i askem sam kwestin long wan famle we oli Witnes blong Jeova. ?Wanem frut i kamaot from? Hem i raetem se: “!Taem mi go insaed long haos blong olgeta, tingting blong mi i jenis wantaem nomo! Maet ol man oli no save gud ol Witnes, no maet yumi evriwan yumi hareap tumas blong jajem olgeta. Mi save se mi mi mekem olsem. Mo mi luk se tingting blong mi i rong olgeta.”—Cecilie Feyling, we i wok blong niuspepa ya Jydske Vestkysten.

Wan man blong givim advaes long wan bigfala stoa blong Yurop, i talem se hem i luk we ol Witnes blong Jeova oli wok gud mo oli no giaman mo stil. Taswe hem i traem faenem ol Witnes blong oli wok long stoa ya.

Bigfala samting we i mekem se ol man oli save ol Witnes blong Jeova, hemia wok we oli mekem blong prij long ol man. Ol Witnes oli luk se sam man, oli no wantem storian long saed blong Baebol, be sam narafala man, oli glad blong storian. Long klosap evri kantri long wol i gat ol man we oli stadi Baebol wetem ol Witnes. Yes bitim seven milian man evriwan oli stadi Baebol wetem olgeta. Mo biaen sam long olgeta ya we oli stadi, oli tijim Baebol long ol narafala man. Long Yunaeted Stet, wan Kaonsel blong ol Jos i mekem wan stadi long ol jos long kantri blong olgeta, mo stadi ya i soemaot se i gat 25 bigfala jos. Long 25 jos ya, i gat 4 jos nomo we oli stap kam bigwan moa. Wan long ol fofala jos ya hemia ol Witnes blong Jeova.

?From wanem plante milian man oli stadi Baebol wetem ol Witnes? ?Olsem wanem ol Witnes oli mekem stadi wetem ol man? ?Ol man we oli stadi long Baebol oli mas kam Witnes tu? Maet yu no wantem kam wan Witnes blong Jeova, be nating, i stret nomo we yu kasem ol ansa we oli tru, long saed blong olgeta. From samting ya, i nogud yu lesin long ol tok blong ol man we oli no laekem ol Witnes, mo long ol stori blong rod. Be i gud yu lukaot ol save we i tru long saed blong olgeta. Long Ol Proveb 14:15, Baebol i talem se: “Man we i no gat hed, hem i save bilif long evri samting, be man we i gat hed, hem i stap lukluk gud long rod we bambae i folem.”

Mifala i hop se Wekap! ya i givhan long yu blong save trutok long saed blong ol Witnes blong Jeova mo blong kasem save moa long olgeta. From we yu stap ridim magasin ya, yu soemaot se yu yu wantem save long saed blong olgeta, mo yu no jajem man hareap tumas. Taswe, i gud yu mekem samting ya: Taem yu stap ridim ol fofala haf we oli kam biaen, plis yu jekem ol vas long Baebol blong yu.a I waes blong mekem olsem, mo olsem Baebol i talem, hemia fasin blong ‘ol man we oli gat tingting we i moa gud.’—Ol Wok 17:11, NW.

[Futnot]