?Ol Jos Oli Save Putum Pis Samtaem?

“YUMI mas mekem se wol i kam moa gud. I gud yumi aotem ol jos.” Hemia nao toktok blong wan man Netalan, we nem blong hem Floris van den Berg. Hem i wan man blong hae save, mo ol tok ya blong hem oli kamaot long wan smol pepa we nem blong hem “?Bambae Yumi Aotem Ol Jos Olsem Wanem, Mo From Wanem?” Long olgeta ples blong wol, ol man we oli gat hae save, olgeta tu oli mekem plante toktok se yumi mas aotem ol jos.

Man ya, Steven Weinberg, we i kasem Nobel Praes from ol stadi blong hem long saed blong paoa blong ol samting we i stap raonabaot long yumi, i talem se: “Longtaem finis i kam, ol jos oli mekem ol man oli harem nogud tumas. Yumi evriwan long wol i mas wekap mo jenisim samting ya.” Long ol yia we oli jes pas, ol man oli talemaot klia tingting ya se sipos ol jos oli finis, bambae ol trabol long wol oli finis tu. Ol man oli raetem plante moa buk we oli agensem ol jos, mo plante man oli laekem blong ridim ol buk ya.

Ol saentis we oli gat hae posisen, oli kam wanples blong tokbaot rod blong finisim ol jos, oli ting se hemia wan samting we oli mas mekem kwiktaem. Ol man we oli no bilif long God, oli stap kam plante moa. Ol man ya oli yusum radio, niuspepa mo televisin, blong tok nogud long saed blong ol jos. Plante man oli respektem ol man ya. ?Be olsem wanem? ?Olgeta ya we oli agensem ol jos, oli stap mekem samting we i stret?

?I Gat Wan Jos We i Tru?

Sipos olgeta jos evriwan oli giaman, mo sipos i no gat God, ale maet i stret blong aotem ol jos. Be sipos i gat wan God, ?olsem wanem nao? Mo tu, sipos i gat wan jos we i tru, mo ol man blong hem oli stap wok long nem blong God ya, ?olsem wanem nao?

Taem ol man oli stadi mo oli lukluk gud long wok blong ol jos long ol yia we oli pas, oli makem wan jos we fasin blong hem blong wosip, i defren olgeta long ol narafala jos. Smol man nomo tede oli folem fasin ya blong wosip. Jos ya, Jisas Kraes wetem ol aposol blong hem oli stanemap. Be ol jos we oli talem se oli Kristin, oli no folem fasin ya blong wosip. Mo long plante handred yia we oli pas, ol jos ya oli mekem samting we i no laenap nating wetem fasin ya blong wosip.

?Wanem samting i mekem se ol jos we oli talem se oli Kristin, oli defren long jos ya we i tru, we Jisas i stanemap? I gat plante samting we i mekem se oli no sem mak. I gud yumi tokbaot wan long ol samting ya.

‘Oli No Blong Wol Ya’

Ol Kristin bifo oli no joen long ol pati blong politik. Hemia from we Jisas tu i no joen long politik. Baebol i talem se, tu taem Jisas i gat janis blong kam wan lida blong politik, be hem i no wantem nating. (Matiu 4:8-10; Jon 6:15) Jisas i tok strong tu long ol disaepol blong hem, from we oli wantem faet blong blokem ol man we oli kam blong holemtaet hem.—Matiu 26:51, 52; Luk 22:49-51; Jon 18:10, 11.

Taem man Rom we i hedgavman blong Judia, i askem sam kwestin long Jisas blong faenemaot sipos i tru we hem i wantem kam king, Jisas i stretem tingting blong hedgavman ya, i se: “Kingdom bilong mi i no wan kingdom bilong wol ia. Sipos kingdom bilong mi i wan kingdom bilong wol ia, bambae ol man bilong mi oli mas faitem ol soldia ia, bilong blokem olgeta oli no putum mi long han bilong ol hae man bilong man Isrel. Be kingdom bilong mi i no stanap long fasin ia.” (Jon 18:36, Gud Nyus Bilong Jisas Krais) I klia se Jisas i no joen long ol ami mo ol politik pati long taem blong hem.

Ol disaepol blong Jisas oli folem fasin blong hem. Grup blong ol man blong stadi we yumi tokbaot olgeta finis, oli lukluk gud long wok we jos i mekem long saed blong ol faet. Grup ya i eksplenem se: “Ol Kristin blong bifo oli no agri long faet. . . . Bighaf blong ol Kristin oli no wantem kam soldia mo joen long faet.” Ol tijing blong Jisas mo ol aposol, oli makem strong se yumi mas lavem ol man raonabaot long yumi, wetem olgeta ya tu we oli strenja mo olgeta we oli blong defren laen mo kantri. (Ol Wok 10:34, 35; Jemes 3:17) Yes, jos ya i givhan bigwan blong putum pis.

I gat sam samting we oli mekem se sloslo, wosip blong Kristin jos i no moa klin. Ol samting ya, hemia save blong man, kastom blong olgeta, mo fasin ya we man i leftemap kantri blong hem. Stadi we yumi tokbaot finis, we ol man oli mekem long saed blong ol jos mo ol faet, i talem se: “[Hedgavman blong Rom we nem blong hem] Constantine, i joen long Kristin skul, ale hem i pulum ol Kristin blong oli kam ol soldia mo oli joen long faet. Oli no moa letem tijing blong Kraes we i stanap long fasin sore, i lidim olgeta, be oli folem tingting blong hedgavman ya we i wantem gat haenem long politik mo i wantem winim plante moa kantri. Ol Kristin ya, wetem Hedgavman tu, oli traem faenem eskius we i givim raet long olgeta blong mekem faet.” Long taem ya nao, giaman Kristin skul i stat.

Wan Grup We i “Defren” Long Ol Narafala

?Olsem wanem? ?Kristin skul ya we Jisas i stanemap, i lus blong olwe? Nogat. I gat wan grup tede we yumi mas tingting gud long hem. Ol Witnes blong Jehova oli no olsem ol narafala jos, from we oli folem fasin blong wosip blong ol Kristin bifo. Oli no joen nating wetem ol jos ya we oli giaman se oli Kristin. Wan buk (The Encyclopedia of Religion) i tokbaot ol Witnes ya se oli “defren,” from we “oli no letem ol kastom blong man, no ol narafala samting, i spolem bilif blong olgeta, be oli yusum Baebol nomo blong lidim olgeta.”

Olsem ol Kristin bifo, ol Witnes blong Jehova oli no joen long ol rao blong politik. Nasnal Skul blong Saens long Yukren, i wokem wan pepa we i tokbaot se ol Witnes blong Jehova oli wok had blong joen gud, nating se oli kamaot long “ol defren kala, kantri, jos, posisen, mo sam oli gat mane, sam oli no gat.” Pepa ya i eksplenem se ol Witnes blong Jehova oli no joen long “ol grup we oli agensem gavman,” mo oli “ol man we oli folem loa blong kantri we oli stap long hem.”

Wan tija long Polan we nem blong hem, Wojciech Modzelewski, i stap tij long Yunivesiti blong Warsaw. Tija ya i raetem long wan buk (Pacifism and Vicinity) se: “Ol Witnes blong Jehova i grup ya we i bigwan moa long ol narafala grup long wol tede, we oli no joen long ol faet.” From we ol Witnes blong Jehova oli folem gud fasin blong wosip blong ol Kristin bifo, yumi save talem se oli putum bakegen long wol, fasin ya blong wosip we Jisas mo ol aposol blong hem oli stanemap. Hemia nao Kristin skul we i givhan blong mekem se pis i stap.—Lukluk bokis long nekis pej.

Wan Nambawan Fiuja

I tru se, ol man we oli wantem mekem wosip long fasin we i tru, wetem sam lida blong jos tu, oli harem nogud taem oli luk we jos blong olgeta i gat tu fes. Plante man long ol jos, oli wantem tumas se pis mo fasin joen gud i stap long wol, ale oli mekem plante wok blong samting ya i kamtru. Yumi mas luksave bigfala wok ya we oli mekem.

Be ol man oli no naf blong stretem olgeta trabol long wol ya, nomata se oli gat gudfala tingting. Profet Jeremaea bifo i raetem se: ‘I no gat man i save wanem samting bambae i kamtru long laef blong hem, mo i no gat man i save kam bos long laef blong hem.’—Jeremaea 10:23.

Nating se i olsem, i gat taem i stap kam we laef bambae i nambawan. Tok blong God i tijim se wan dei, ol man we oli stap long wol ya bambae oli stap long pis. Ol man ya bambae oli kam olsem wan famle nomo. Olgeta man blong ol defdefren kala bambae oli joen gud. Ol man bambae oli joen gud olsem we oli blong wan kantri nomo, bambae i no moa gat ol man we oli no laekem nating laen blong narafala man, mo i no moa gat ol defdefren bilif blong ol jos. Samting we bambae i mekem se ol man oli joen gud, hemia tru wosip blong Jehova God.

Baebol i talem tu se ol jos we oli no ona long God, bambae oli lus. Jisas i talem se: “Sipos ol man blong wan jif oli seraot, nao haf i agens long narafala haf, ol wok blong jif ya i mas foldaon. Mo i no gat wan vilej no wan haos we ol man blong hem oli seraot, haf i agens long narafala haf, we bambae hem i save stap gud.” (Matiu 12:25) God bambae i mekem sua se long stret taem blong hem, ol tok ya oli kamtru long olgeta giaman skul.

Plante yia bifo, Baebol i talem se God bambae i ‘jajem ol trabol blong ol naranarafala kantri, mo bambae hem i stretem ol rao blong ol man blong plante ples.’ Profet tok ya i talem tu se ol man bambae oli “hamarem ol naef blong faet blong olgeta, gogo oli kam aean blong digim graon. Mo ol spia blong olgeta, bambae oli wokem olgeta oli kam huknaef blong katem gru blong ol grep blong olgeta. Nao olbaot long wol, ol man bambae oli no moa save girap blong go kilim ol narafala man, neva bambae oli save mekemrere bakegen blong go mekem faet.” (Aesea 2:4) Profet tok ya i stap kamtru tede. Jos ya we i tru, we ol Witnes blong Jehova oli stap folem, i stat finis blong pulum ol man blong oli gat pis.

[Tok blong makem poen long pej 8]

Ol Witnes blong Jehova oli joen gud from we oli lavlavem olgeta

[Bokis blong makem poen long pej 9]

?Wanem i Mekem Se Ol Witnes Blong Jehova Oli Defren Long Ol Narafala Jos?

Plante man oli sapraes taem oli lanem we ol Witnes blong Jehova oli defren long ol narafala jos we oli talem se oli folem Kraes. Hemia sam samting we i mekem se ol Witnes blong Jehova oli no sem mak long ol narafala jos:

PLAN WE OLI FOLEM

● Oli no gat ol pasta mo pris.

● Ol elda blong olgeta, olgeta we oli tijim ol narafala, mo ol misinari blong olgeta, oli no kasem pei from wok we oli mekem.

● Oli no givim taet mo oli no sakem kleksin long haos wosip blong olgeta, we oli kolem Haos Kingdom.

● Evri wok blong olgeta oli stanap long presen mane nomo. Mo i no gat man i save hu olgeta we oli givim presen mane, mo hamas mane oli givim.

● Olgeta oli no joen long politik.

● Oli tijim ol man blong oli laef long pis, mo oli no joen long ol faet.

● Nomata se oli stap long olgeta ples long wol, be bilif blong olgeta i mekem se oli joen gud. Mo bilif ya blong olgeta i stanap long Baebol.

● Olgeta evriwan oli joen wanples blong mekem wosip. Oli no seraot from haenem, laen, kala blong skin, mo from we oli rij no pua.

● Oli no joen long ol narafala jos, nomata sipos jos ya i Katolik, Otodoks, mo Protestan.

OL TIJING

● Oli bilif se i gat wan God nomo we i tru, we nem blong hem Jehova.

● Oli no bilif se Jisas Kraes hem i God ya we i gat olgeta paoa, mo oli no bilif long tijing blong Triniti.

● Oli folem ol tijing blong Jisas mo oli ona long hem from we hem i Pikinini blong God.

● Oli no wosipim kros, mo oli no yusum ol aedol long wosip blong olgeta.

● Oli no bilif se i gat wan helfaea we ol rabis man oli go long hem afta we oli ded.

● Oli bilif se God bambae i blesem ol man we oli obei long hem, taem bambae oli laef blong olwe long paradaes long wol.

Ol Witnes blong Jehova oli bilif se oli stap folem fasin blong wosip blong ol tru Kristin bifo, we Jisas mo ol aposol blong hem oli folem.

[Tok blong pija long pej 8]

Wan man Sebia, wan man Bosnia, mo wan man Kroasia