Taem Yu Kasem Wan Sik

Mabel i wan woman we i strong mo i naf gud blong mekem wok. Hem i laef long Ajentina, mo i wok olsem wan dokta. Long yia 2007, hem i stat blong harem ol bodi blong hem oli taed, mo klosap evri dei hed blong hem i stap soa. Hem i talem se: “Mi go luk sam dokta, mo mi tekem sam defren kaen meresin, be ol meresin ya oli no givhan long mi nating.” Biaen Mabel i yusum wan spesel masin (MIR scan) blong lukluk insaed long bodi blong hem. Ale hem i faenemaot se hem i gat sik long bren. Hem i talem se: “!Mi mi sek! Mi no bilif se enemi ya i stap insaed long bodi blong mi.”

“Mi no save se sik ya bambae i olsem wanem, go kasem taem we oli katem mi. Taem mi wekap, mi harem se sik ya i strong, mo mi no save muv nating. Evri dei mi lukluk wanples nomo. Fastaem, mi fri blong mekem eni samting, be naoia mi no moa save mekem wan samting. Taem mi harem noes blong ol masin long hospital, ol bel blong hospital we oli ring blong soemaot trabol, noes blong ol narafala sikman, samting ya i mekem tingting blong mi i fasfas. Mo mi harem olsem se ol ples raonabaot long mi, oli fulap gud long ol man we oli safa.”

“Tede, mi kam gud lelebet, mi save wokbaot we mi no nidim narafala blong i holem han blong mi. Be ae blong mi i blaen, mekem se mi mas putum glas, mo i gat sam string long bodi blong mi we oli no wok gud.”

SAMTING WE YU SAVE MEKEM BLONG GIVHAN LONG YU

Yu mas gat stret tingting oltaem. Long Ol Proveb 17:22, Baebol i talem se: “Sipos yu yu stap glad oltaem, sik i no save spolem yu. Be sipos tingting blong yu i stap kam nogud oltaem, bambae yu stap long rod blong ded nomo.” Mabel i talem se: “Taem mi stap traehad blong winim sik ya, mi fesem sem samting olsem ol sikman we mi bin lukaot long olgeta. Evri dei mi mas mekem sam eksasaes, we i mekem bodi blong mi i soa. Samtaem mi harem olsem se mi no naf blong mekem ol eksasaes ya. Be mi traehad blong sakemaot nogud tingting ya, blong mekem se mi save harem gud bakegen.”

Yu tingbaot se i no longtaem bambae ol trabol olsem oli finis. Mabel i talem se: “Baebol i givhan long mi blong kasem save from wanem i gat trabol.” Mo tu hem i gohed se: “Mi kasem save se taem ol dei oli pas, yumi stap go klosap moa long taem ya we ol trabol bambae oli finis blong olwe.”a

Yu mas gat stret tingting se God i stap tingbaot yu. (1 Pita 5:7) Mabel i tokbaot olsem wanem samting ya i givhan long hem, hem i se: “Taem oli pusum mi i go long rum blong oli katem mi, mi luksave trutok we i stap long Aesea 41:10 we i talem se: ‘Yufala i no fraet, mi mi stap wetem yufala.’ Long taem ya tingting blong mi i kwaet, mo mi gat pis, from we mi save se Jehova God i stap lukaotgud long mi.”

?Yu yu save? Baebol i tijim se i gat wan taem we ol man bambae oli no moa harem nogud from ol sik.—Aesea 33:24; 35:5, 6.