2 Ol Samting Raonabaot, Mo Ol Fren

• Yu gat strong tingting blong kakae ol gudfala kakae nomo, be i gat wan aeskrim i stap we i spolem gud tingting blong yu.

• Yu mekem desisen blong stop smok, be ol fren blong yu we oli save, oli kam givim sigaret long yu bakegen.

• !Yu plan blong go eksasaes tede, be sus blong yu i stap samples, mo yu harem se i had wok blong go lukaotem!

?Wanem problem we yu yu luk long ol stori ya? Ol stori ya oli soemaot se ol samting raonabaot long yumi mo ol man we yumi spenem taem wetem olgeta, oli save givhan long yumi, no oli save spolem yumi.

Baebol i givhan long yumi blong yumi lukluk i go fored. Sipos yumi mekem olsem, yumi save blokem ol samting we oli save spolem ol samting we yumi wantem kasem. Nao i no gat samting i save blokem yumi blong yumi kasem mak blong yumi. (2 Timoti 2:22) Blong talem long sot tok nomo, i waes blong tingbaot ol samting we oli stap raonabaot long yumi mo ol fren.

SAMTING WE YU SAVE MEKEM

• Yu mas mekem i had moa long ol nogud samting. Eksampol. Sipos yu wantem stop blong kakae ol nogud kakae, i gud yu no pem ol kakae ya. Olsem nao sipos yu wantem ol kakae olgeta, be bambae i had blong yu faenem.

• Yu mas mekem i isi moa long ol gudfala samting. Eksampol. Sipos yu plan blong eksasaes long moning, i gud we long naet yu putumrere ol klos blong eksasaes long saed blong bed. Olsem nao, bambae i moa isi blong yu folem plan blong yu.

• Yu jusum gud ol fren blong yu. Yumi ol man, yumi save kopi fasin blong ol man we yumi joen wetem olgeta. (1 Korin 15:33) Taswe, yu no mas joen tumas wetem ol man we oli stap mekem ol samting we yu wantem stopem, be yu mas joen wetem olgeta we oli save givhan long yu blong mekem ol samting we oli gud.