Yu Protektem Yu

PLANTE olfala taon bifo oli gat ol bigbigfala wol we i protektem olgeta. Sipos ol enemi oli brekem wan smol haf blong bigfala wol ya, naoia ful taon ya i stap long denja. Bodi blong yumi i olsem wan bigfala wol we i protektem wan taon. Sipos yu lukaot gud long wol ya, hemia bambae i givhan bigwan long helt blong yu. Bambae yumi tokbaot faef samting we i save givim sik long yumi, mo olsem wanem yumi save blokem olgeta.

1 WOTA

DENJA: Ol bebet we oli smol we oli smol, mo oli stap long wota, oli save go stret insaed long bodi blong yumi.

BLOKEM: Beswan rod blong mekem, hemia blong protektem wota blong i no kam doti. Sipos yumi save se wota saplae blong yumi i doti, o yumi ting se i doti, yumi save mekem sam samting long haos, blong mekem wota blong yumi i sef.a Yumi putum wota long wan kontena we i gat lid, mo sipos yumi wantem dring, yumi kasem long wan longfala spun we i klin, o yumi kasem long wan tap. Yumi neva mas pusum han blong yumi long wota we i klin. Sipos i gat rod, yumi mas stap long wan komuniti we ol man oli gat ol gudfala toelet, blong mekem se wota i stap klin oltaem.

2 KAKAE

DENJA: Ol rabis bebet we oli smol we oli smol, oli save stap long kakae blong yumi.

BLOKEM: Ol smosmol bebet ya oli save stap long ol kakae we maet yumi luk se oli fres mo oli gud. Taswe i gud we oltaem yumi wasem gud ol frut mo ol ligim. Mo i gud we oltaem yumi meksua se kijin mo ol samting we yumi yusum long kijin, oli klin, mo yumi mas wasem gud han blong yumi taem yumi stap rerem o yumi kasem kakae. Sam kakae, yumi mas kukum long sam spesel tempraja, blong kilim ol bebet. Yumi mas lukaot gud long ol kakae we kala blong olgeta i jenis, mo ol kakae we smel mo tes blong olgeta i nogud, hemia sam saen we i soemaot se i gat fulap smosmol bebet insaed long olgeta. Ol kakae we yumi no yusum, i gud yumi putum kwiktaem long aesbokis. Mo taem yumi sik, i nogud yumi rerem kakae blong ol narafala.b

3 OL SMOSMOL LAEF SAMTING

DENJA: I gat sam smosmol bebet insaed long sam smosmol laef samting olsem moskito, we oli save givim sik long man.

BLOKEM: Ol smosmol laef samting ya oli gat taem blong olgeta blong oli kam. Long taem olsem, yumi mas stap insaed long haos, o maet yumi werem longfala traoses mo sot we han blong hem i longfala, blong blokem olgeta. Yumi mas slip aninit long moskito net, mo yumi rabem sam krim long yumi blong kilim olgeta. Yumi sakemaot wota long ol kontena we moskito i save putum eg insaed long olgeta.c

4 OL ANAMOL

DENJA: Ol smosmol bebet we oli laef insaed long ol anamol, oli save spolem helt blong yumi. Sipos ol anamol ya oli kakae yumi, o oli skrasem yumi, o yumi tajem sitsit blong olgeta, yumi save sik from.

BLOKEM: Sam man oli jusum blong putum anamol blong olgeta afsaed, blong i no stap klosap long olgeta. Sipos yumi tajem wan anamol, yumi mas wasem han blong yumi, mo yumi mas stap longwe long ol wael anamol. Sipos wan anamol i kakae yumi o i skrasem yumi, yumi mas wasem gud soa ya, mo yumi mas go luk dokta kwiktaem.d

5 OL MAN

DENJA: Taem man i kof o i snis, ol smosmol drop i kamaot long maot blong hem, mo sam jem we oli stap long ol drop ya oli save kam long bodi blong yumi. Oli save pas tu long skin, taem yumi sekhan o tajem narafala. Ol bebet oli save stap long ol handel blong doa, ol rel, ol telefon, ol kontrola, ol skrin blong kompiuta, mo long ol kibod.

BLOKEM: Ol samting olsem resa, tutbras, mo tawel, yumi no mas serem wetem ol narafala man. Yumi no mas tajem eni wota mo blad we i kamaot long ol anamol mo man, mo eni samting we i kamaot long blad. Mo yumi no mas lego fasin ya blong wasem gud han oltaem. Maet hemia i beswan rod blong blokem sik, blong i no kasem narafala man.

Sipos yu sik, i gud yu stap long haos. Ples ya U.S. Centers for Disease Control and Prevention, i talem se yu mas blokem maot blong yu long wan kaliko o sot blong yu taem yu kof o yu snis, be yu no mas yusum han blong yu blong blokem maot blong yu.

Wan olfala waestok i talem se: “Man we i gat gudfala tingting i save luksave we trabol i stap kam, nao i save ronwe long hem.” (Ol Proveb 22:3) !Tede wol i fulap wetem ol rabis sik, taswe tok ya i tru tumas! I gud yu go long wan klinik klosap long yu blong kasem moa save, mo yu mekem sam samting blong yu stap klin oltaem. !Yu mas mekem bodi blong yu i strong blong blokem sik!