Lesen 12

?Wanem i Hapen Taem Yumi Ded?

Ded hem i narakaen olgeta long laef. Ded hem i olsem taem we man i stap long wan dip slip. (Jon 11:11-14) Ol dedman oli no save harem samting, oli no save lukluk, toktok, no tingbaot eni samting. (Prija 9:5, 10) Ol giaman skul oli tijim se ol dedman oli go long wan ples blong ol spirit man, blong stap wetem ol olfala blong olgeta we oli ded finis. Baebol i no tijim samting ya.

Olgeta we oli ded finis oli no save halpem yumi, mo oli no save mekem trabol long yumi. Plante man oli folem sam spesel kastom mo oli mekem sam sakrefaes we oli ting se bambae i mekem ol dedman oli glad. Hemia i no wan samting we God i glad long hem from we ol fasin ya oli stanap long ol giaman tok blong Setan. Mo tu, ol fasin ya oli no save mekem ol dedman oli harem gud, from we oli no moa laef samples. Yumi no mas fraet long ol dedman mo yumi no mas wosipim olgeta. Yumi mas wosipim God nomo.—Matiu 4:10.

Ol dedman bambae oli laef bakegen. Bambae Jeova i mekem ol dedman oli laef bakegen long wan paradaes long wol. Taem ya i stap yet long fiuja. (Jon 5:28, 29; Ol Wok 24:15) God i save mekem ol dedman oli girap long laef bakegen, olsem we yu yu save wekemap wan man we i stap slip.—Mak 5:22, 23, 41, 42.

Tingting ya se yumi no save ded, hem i wan giaman tok we Devel Setan i stamba blong hem. Setan mo ol devel oli mekem ol man oli ting se spirit blong ol dedman i laef yet mo i save mekem man i sik mo i kasem trabol. Setan i giaman long ol man, samtaem hem i yusum ol drim mo ol vison blong mekem olsem. Jeova i agensem olgeta we oli traem toktok wetem ol dedman.—Dutronome 18:10-12.