?Yu Mas Mekem Wanem Blong Soemaot Se Yu Stap Long Saed Blong Jehova?

Yu mas mekem desisen blong stap long saed blong God. 1 Pita 5:6-9

Yu mas sakemaot ol kastom we oli agensem samting we Baebol i talem. Yu no mas fraet blong mekem samting ya.

Yu no mas joen long ol politik blong ol kantri, olgeta ya oli no sapotem Jehova mo Kingdom blong hem.

Yu mas jus blong lesin long God. Matiu 7:24, 25

I gud yu joen wetem ol Witnes blong Jehova. Bambae olgeta oli givhan long yu blong kam klosap long God.

Yu mas gohed blong lanem moa long saed blong God, mo yu mas traehad blong obei long ol loa long hem.

Taem bilif blong yu i strong, yu mas givim laef blong yu i go long Jehova mo yu mas tekem baptaes.—Matiu 28:19.

Yu mas lesin long God. I gud yu ridim Baebol, mo yu askem long ol Witnes blong Jehova blong oli givhan long yu blong kasem save long Baebol. Biaen, yu mas mekem samting we yu lanem i wok long laef blong yu. Sipos yu mekem olsem, bambae yu laef olwe.—Ol Sam 37:29.