LESEN 27
?Olsem Wanem Ded Blong Jisas i Sevem Yumi?
Yumi stap sin, safa mo ded from we faswan kapol ya Adam mo Iv oli no obei long God.a Be yumi stil gat hop. Jehova i yusum Pikinini blong hem Jisas, blong tekemaot yumi long sin mo ded. Baebol i tijim se ded blong Jisas i olsem wan ransom. Ransom hem i praes we man i pem blong mekem narafala i fri. Mo laef blong Jisas we i stret gud olgeta, hem i praes ya. (Ridim Matiu 20:28.) Jisas i stret gud olgeta mo hem i save laef olwe long wol ya, be hem i no mekem olsem. Hem i rere nomo blong ded blong yumi save kasembak laef ya we Adam mo Iv i lusum. Mo Jisas i soemaot tu se hem mo Jehova i lavem yumi tumas. Lesen ya bambae i halpem yumi blong tinghae moa long ded blong Jisas.
1. ?Olsem wanem ded blong Jisas i halpem yumi tede?
Yumi sinman, taswe yumi stap mekem plante samting we i mekem se Jehova i no glad. Be sipos yumi rili sori, yumi askem Jehova blong i fogivim yumi, mo yumi traehad blong no mekem sin ya bakegen, Jehova bambae i fogivim yumi. Yes, tru long Jisas yumi save kam fren blong God. (1 Jon 2:1) Baebol i talem se: “Kraes i ded blong karemaot sin, hem i ded wan taem nomo mo blong olwe. Stret man ya i ded from ol man we oli no stret, blong hem i save lidim yufala i go long God.”—1 Pita 3:18.
2. ?Olsem wanem ded blong Jisas i save halpem yumi long fiuja?
Jehova i sanem Jisas blong i givim laef blong hem we i stret gud olgeta “blong olgeta man we oli soemaot se oli bilif long [Jisas], oli no ded be oli kasem laef we i no save finis.” (Jon 3:16) Yumi glad se tru long samting we Jisas i mekem, Jehova bambae i finisim ol trabol we oli kamaot from we Adam i no obei. Hemia i min se, sipos yumi bilif long sakrefaes blong Jisas, bambae yumi gat janis blong enjoem laef olwe long wan paradaes long wol.—Aesea 65:21-23.
DIGIM MOA
Kasem save moa from wanem Jisas i givim laef blong hem, mo olsem wanem samting ya i halpem yumi.
3. Ded blong Jisas i mekem yumi fri long sin mo ded
Plei VIDEO, mo tokbaot kwestin ya.
Adam i stret gud olgeta be i no obei long God mo i lidim ol man oli go long rod blong sin mo ded
Jisas i stret gud olgeta mo i obei long God nao i lidim ol man i go long rod blong kam stret gud olgeta mo kasem laef olwe
4. Ded blong Jisas i save halpem olgeta man
Plei VIDEO, mo tokbaot kwestin ya.
?Olsem wanem ded blong wan man nomo i save halpem olgeta man?
Ridim 1 Timoti 2:5, 6, mo tokbaot kwestin ya:
Adam mo Jisas tufala i stret gud olgeta, be Adam i lidim ol man oli go long rod blong sin mo ded. ?Be Jisas i mekem wanem?
5. Jehova i givim presen ya ransom long yu
Ol fren blong Jehova oli luk ransom olsem presen blong olgeta. Eksampol, ridim Galesia 2:20, mo tokbaot kwestin ya:
?Wanem i soem se Pol i tingbaot ransom olsem wan presen we i kam stret long hem?
Taem Adam i sin, hem wetem olgeta we oli kamaot biaen long hem oli blong ded nomo. Be Jehova i sanem Pikinini blong hem blong i ded, nao yu save enjoem laef olwe.
Taem yu ridim ol vas we oli stap, tingbaot filing we Jehova i gat taem hem i luk Pikinini blong hem i safa. Ridim Jon 19:1-7, 16-18, mo tokbaot kwestin ya:
?Wanem tingting blong yu long ol samting we Jehova mo Jisas i mekem blong yu?
MAET MAN I ASKEM SE: “?Olsem wanem ded blong wan man nomo i save sevem plante man?”
?Bambae yu ansa olsem wanem?
SAMARI
Ded blong Jisas i mekem se Jehova i save fogivim ol sin blong yumi mo i givim janis long yumi blong enjoem laef olwe.
Tingtingbak
?From wanem Jisas i ded?
?Olsem wanem Jisas i givim wan ransom we i stret gud?
?Ded blong Jisas i halpem yu olsem wanem?
FAENEMAOT
Lanem from wanem oli se laef blong Jisas we i stret gud olgeta i wan ransom.
“?Sakrefaes Blong Jisas i ‘Wan Ransom Blong Pembak Plante Man’?” (Web atikol)
Faenemaot samting we yumi mas mekem blong yumi stap sef.
“Jisas i Sevem Ol Man—?Hem i Mekem Olsem Wanem?” (Web atikol)
?Jehova i save fogivim ol bigfala sin tu?
Makem olsem wanem sakrefaes blong Kraes i halpem wan man blong jenisim ol nogud fasin blong hem.
a Sin i minim ol nogud samting we yumi mekem, mo tu yumi bon wetem sin.