?From Wanem Kruked Fasin i Gohed Yet?
“Sam man oli gat paoa, mo ol narafala man oli stap aninit long olgeta, oli stap harem nogud.”—PRIJA 8:9.
VAS ya i soemaot klia histri blong rul blong man. Rul blong man i mekem ol narafala oli kasem trabol mo oli safa. Long ol yia we oli pas, ol man we oli gat gudfala tingting oli traehad blong mekem se i gat stret fasin. Be oli no naf blong mekem from we i gat tumas man we oli griri mo oli gat kruked fasin. ?From wanem i olsem? ?From wanem kruked fasin i stap gohed yet? Hemia from tri samting we i save pulum ol man blong mekem samting we i no stret.
1. Sin.
Baebol i talem klia se yumi evriwan i “stap aninit long paoa blong sin.” (Rom 3:9) Sin i olsem wan strong sik we yumi bon wetem mo we dokta i no save winim. Hem “i stap oltaem long tingting blong yumi.” Blong plante taosen yia, sin i “holem” no i rul long ol man olsem wan king. Hem i olsem wan ‘loa’ we i stap wok long laef blong yumi. Sin i lidim plante man blong oli mekem samting we olgeta nomo oli wantem. Mo sin i lidim olgeta blong oli kasem plante samting, no blong oli bos long ol narafala.—Rom 5:21; 7:17, 20, 23, 25.
2. Wol we yumi laef long hem.
Long wol ya, ol man oli griri mo oli tingbaot olgeta nomo. Ale, sam man oli harem se i had blong oli stap defren long ol narafala. Nao, olgeta tu oli wantem tumas blong gat paoa antap long narafala. Oli wantem mane tumas mo oli wantem gat plante samting, i bitim wanem we oli nidim. Be sore tumas, oli mas mekem kruked fasin blong oli kasem ol samting ya. Bitim we oli blokem ol kaen tingting olsem we i save pulum olgeta blong mekem nogud fasin, oli girap, oli ‘folem fasin blong bighaf blong ol man we oli mekem samting we i no stret.’—Eksodas 23:2.
3. Setan.
Setan i wan rabis enjel we i “stap giaman long olgeta man long wol, i lidim olgeta oli go krangke.” (Revelesen 12:9) Hem i glad tumas taem i giaman long ol man, nao oli folem tingting blong hem. Maet hem i luk se wan man i wantem mane tumas no i wantem plante samting. Ale, Setan i trikim man ya gogo i pulum hem blong mekem kruked fasin blong i kasem ol samting ya.
?Olsem wanem? ?Yumi olsem pikinini nomo long han blong Setan? ?Taem hem i talem wan samting, yumi obei nomo long hem? Long haf we i kam biaen, bambae yumi lanem from wanem yumi no olsem.