?I Gat Rod Blong Mekem i Stret Long Medel Blong Ol Man We Oli Gat Kruked Fasin?

“Mifala i wantem tumas we oltaem mifala i stap mekem i stret nomo.”—HIBRUS 13:18.

NOMATA se sin, wol we yumi laef long hem, mo Setan, oli pulum yumi blong mekem samting we i no stret, be yumi save blokem olgeta. ?Yumi mekem samting ya olsem wanem? Hemia taem yumi kam klosap long God mo yumi folem ol rul long Baebol. Bambae yumi tokbaot tu long ol rul ya.

RUL BLONG BAEBOL: “Yufala i no mas letem fasin blong yufala i kam olsem fasin blong ol man long wol.”—Rom 12:2.

Tru stori: Guilherme i wan gudfala bisnesman long Brasil. Hem i luksave se i no isi blong mekem i stret oltaem. Hem i talem se: “I isi nomo blong wan bisnesman i giaman no i stil taem hem i mekem bisnes. Maet from hem i mas traehad blong kasem mane we kampani i plan blong kasem, no maet i gat plante bisnes we i sem mak long bisnes blong hem, ale hem i mas traem winim ol narafala bisnesman. Plante man oli luk fasin ya we man i givim mane no i kasem mane long rod we i no stret, olsem se i wan gudfala fasin nomo. Bambae i had blong man i mekem i stret, taem hem i statem wan niufala bisnes we i mas winim mane.”

Long saed blong Guilherme, hem i strong blong no mekem kruked fasin. Hem i talem se: “Nomata wanem samting, be man i save mekem i stret taem hem i mekem bisnes. Yu mas strong blong holem ol gudfala fasin. Baebol i givhan long mi blong luk se taem mi mekem i stret, samting ya i mekem i gud long mi. Wan man we i mekem samting we i stret, tingting blong hem i klia, i kwaet, mo hem i respektem hem wan. Fasin blong hem i save pulum ol narafala tu blong oli mekem sem mak.”

RUL BLONG BAEBOL: “Ol man ya we oli wantem kam rijman, be oltaem, ol samting blong traem yumi oli stap mekem olgeta oli foldaon. Ol samting we oli wantem, we i krangke, mo we i stap spolem olgeta, i olsem trap blong kasem olgeta. Nao fasin ya blong wantem evri samting, hem i save mekem olgeta oli foldaon we laef blong olgeta i kam nogud olgeta. Fasin blong laekem mane tumas, hem i stamba blong olgeta fasin nogud.”—1 Timoti 6:9, 10.

Tru stori: André i bos blong wan kampani blong sekiuriti. Wan long ol kastoma blong hem hemia wan bigfala klab blong futbol. Wan dei, afta long wan bigfala maj blong futbol, André i go givim bil blong ol wok we hem i mekem, long ofis blong klab ya. Ofis we i lukaot long ol kaon blong klab i bisi tumas blong kaontem ol mane we oli winim long taem blong maj. Ale, from we i let finis, bos blong klab ya i hareap blong pem ol man we oli mekem sam wok long taem blong maj, mo hem i pem André tu.

André i talem se: “Taem mi stap gobak long haos, mi luk se mane we bos ya i givim, i moa long mane we hem i mas pem. Mi save se bambae hem i no save se hem i givim moa mane long hu. !Be mi save tu se sipos oli faenemaot se mane blong olgeta i sot, bambae bos ya i mas pembak mane ya wetem prapa mane blong hem! Ale mi gobak. Mi traehad gogo mi pastru long ol hip man we oli stap, mi go long ofis mo mi givimbak mane ya. Bos blong klab ya i sapraes tumas. I nogat wan man we i mekem olsem long hem samtaem.”

André i gohed i talem se: “Fasin blong mi i mekem se man ya i respektem mi. Sam yia i pas nao, be mi nomo mi stap gohed yet blong mekem wok blong klab ya, ol narafala oli finis. Mi glad tumas se taem mi folem ol rul blong Baebol long saed blong gudfala fasin, mi gat gudnem long fored blong ol narafala.”

I gud tumas blong save se taem God i givhan long yumi, yumi naf blong blokem ol samting we oli pulum yumi blong mekem i no stret. Be traehad blong man nomo i no naf blong finisim fulwan kruked fasin, from we man i no gat paoa blong mekem olsem. ?Olsem wanem? ?Hemia i min se kruked fasin bambae i neva finis samtaem? Las haf bambae i tokbaot ansa we Baebol i givim long kwestin ya.