Baebol i Ansa

?God i save fogivim ol sin blong yumi?

Baebol i talem se yumi evriwan i sinman. Yumi stap mekem sin from we faswan man ya Adam i pasem sin long yumi. From samting ya, samtaem yumi mekem wan samting we i nogud, nao biaen yumi harem nogud from. Nating se i olsem, pikinini blong God, Jisas Kraes i pemaot yumi long sin, taem hem i ded from yumi. Sakrefaes blong Jisas i mekem se God i save fogivim yumi. Hemia i wan presen we God i givim.—Ridim Rom 3:23, 24.

Sam man we oli mekem ol bigfala sin oli stap tingting se, ?God i save fogivim olgeta no nogat? Yumi glad tumas blong save samting we Baebol i talem, i se: “Blad blong Jisas Pikinini blong God, bambae i stap wasemaot olgeta sin blong yumi, i stap mekem yumi klin.” (1 Jon 1:7) Sipos stret tingting i pusum yumi blong yumi tanem tingting blong yumi, Jehova bambae i glad blong fogivim yumi, nating se sin we yumi mekem i nogud we i nogud.—Ridim Aesea 1:18.

?Yumi mas mekem wanem blong God i fogivim yumi?

Sipos yumi wantem se Jehova God i fogivim yumi, yumi mas save gud hem. Hemia i min se yumi mas kasem save gud ol fasin blong hem, ol advaes blong hem, mo ol samting we hem i wantem. (Jon 17:3) Jehova i glad nomo blong fogivim olgeta we oli tanem tingting blong olgeta from ol sin blong olgeta, mo oli traehad blong jenisim fasin blong olgeta.—Ridim Ol Wok 3:19.

I no had tumas blong mekem God i glad long yumi. Jehova i savegud ol slak fasin blong yumi. Hem i gat sore mo hem i kaen. Taem yu save se Jehova i kaen long yumi mo i lavem yumi, ating yu wantem tumas blong lanem moa ol fasin blong hem, mo yu wantem mekem ol fasin we hem i glad long hem.—Ridim Ol Sam 103:13, 14.